1-2. Ligongo chichi ŵakutumichila ŵa Mlungu ali ŵakusangalala? (Yakobo 1:​22-25)

 YEHOFA soni Mwanache jwakwe akusasaka kuti tusangalaleje. Juŵalembile Salimo 119:2 jwaŵechete kuti, “Ŵana upile ŵele ŵakugasunga Malamusi ga AMBUJE. Ŵele ŵakumsosa AMBUJE ni mtima wawo wosope.” Nombenajo Yesu jwasasile kuti, “Ŵakwete upile ali ŵandu ŵele akusagapikanila maloŵe ga Mlungu ni kugasungaga!”—Luk. 11:28.

² Ŵakutumichila ŵa Yehofawe tuli ŵandu ŵakusangalala. Ligongo chichi yili myoyo? Pana magongo gejinji. Nambo ligongo limo lili lyakuti tukusaŵalanga Maloŵe ga Mlungu mwakutamilichika soni tukusalingalinga kuti tukamulichisyeje masengo yatulijiganyisyeyo.—Aŵalanje Yakobo 1:​22-25.

3. Ana kukamulichisya masengo yindu yatuŵalasile m’Maloŵe ga Mlungu kukusatukamuchisya chamti uli?

³ Yindu yikusatujendela chenene ‘patukutenda yagakusaŵecheta maloŵe’ ga Mlungu. Tukusamanyilila kuti kutenda yeleyi kuli kwakusosekwa mnope ligongo tukusaŵa kuti tukumsangalasya Yehofa soni yikusatutendekasya kuŵa ŵakusangalala. (Jwak. 12:13) Patukamulichisya masengo yatukusalijiganya m’Maloŵe ga Mlungu, yikusatukamuchisya kuti tuŵe ŵakamulana ni ŵandu ŵa mwiŵasa mwetu soni Aklistu achimjetu. Ngatukukayichila kuti mwelemu ni mwayiŵelele ni wawojo. Konjechesya pelepa tukusaŵambala yakusawusya yejinji yakusasimana nayo ŵandu ŵele ngakusakuya malamusi ga Yehofa. Kusala yisyene, tukusakamulana ni yaŵaŵechete Mwenye Daudi. Ali asasile ya malamusi soni majiganyo ga Yehofa, Daudi jwamalisisye nyimbo jakwe mwakusala kuti, ‘Pangugasunga ngusapochela mbote jajikulungwa.’—Sal. 19:​7-11.

4. Ligongo chichi yikusaŵa yakusawusya kukamulichisya masengo yatulijiganyisye m’Maloŵe ga Mlungu?

⁴ Kusala yisyene, ndaŵi sine yikusaŵa yakusawusya kukamulichisya masengo yatukusalijiganya m’Maloŵe ga Mlungu. Yili myoyo, ligongo  lyakuti tukusatanganidwaga mnope lisiku lililyose. Nambope tukusasosekwa kuti tupateje ndaŵi jakuŵalanga soni kulijiganya Baibulo kuti tumanyilileje yakusasaka Yehofa. Myoyo, kwende tulole yindu yine yampaka yitukamuchisye kuti tuŵalanjeje Baibulo mwakutamilichika. Chitulolesoni yindu yampaka yitukamuchisye kuti tukomboleje kuganichisya yindu yatuŵalasile. Kaneko chitulole yindu yampaka tutende kuti tukomboleje kukamulichisya masengo paumi wetu yindu yatulijiganyisye.

ALIŴICHILEJE NDAŴI JAKUTI AŴALANJEJE MALOŴE GA MLUNGU

5. Ana ni yakutendekwa yapi yayikusatumalilaga ndaŵi jetu jejinji?

⁵ Ŵakutumichila ŵa Yehofawe tukusakola yakutenda yejinji. Tukusamalila ndaŵi jejinji tuli mkutenda yindu yakusosekwa mnope. Mwachisyasyo, ŵajinji mwa m’weji tukusakamula masengo kuti tukomboleje kulisamalila soni kwasamalila ŵamwiŵasa mwetu. (1 Tim. 5:8) Aklistu ŵajinji akusiŵasamalila ŵachibale ŵawo ŵakulwala kapena ŵali ŵakalambale. Wosopewe tukusasosekwa ndaŵi jakwanila kuti tukomboleje kuchisamalila chenene chilu chetu. Konjechesya pelepa, tukusakolasoni yakutenda yine mumpingo. Chindu chakusosekwa mnope chatukusasosekwa kutenda chili kukamula nawo masengo gakulalichila mwakulipeleka mnope. Pakuŵapo tukusakola yakutenda yejinji, ana mpaka tutende uli kuti tupateje ndaŵi jakuŵalanga Baibulo mwakutamilichika, kuganichisya yatuŵalasileyo soni kuyikamulichisya masengo paumi wetu?

6. Ana mpaka tutende uli kuti tulolechesyeje kuti tukusaŵalanga Baibulo? (Alolesoni chiwulili.)

⁶ Kuŵalanga Baibulo chili chimo mwa yindu yakusosekwa mnope kwa m’weji Aklistu. Myoyo, tulolechesyeje kuti tukusapata ndaŵi jakujiŵalanga. (Afil. 1:10) Pakwamba ya mundu jwakusangalala, Baibulo jikusati, “Akusimana lukondwa pakugapikanila Malamusi ga AMBUJE, ni akugaganichisya malamusigo musi ni chilo.” (Sal. 1:​1, 2) Yeleyi yikugopolela kuti tuliŵichileje ndaŵi jakuti tuŵalanjeje Baibulo. Ana ndaŵi jambone kuŵalanga Baibulo jili japi? Jwalijose mpaka asagule ndaŵi jakulekangana ni mjakwe. Nambo chakusosekwa mnope chili chakuti asaguleje ndaŵi jampaka aŵalanjeje Baibulo mwakutamilichika. M’bale jwine lina lyakwe Victor jwasasile  kuti, “Ngusanonyela kuŵalanga Baibulo kundaŵi. Atamose kuti jwanganonyela kulaŵila kwimuka, nambope ngusayiwona kuti ndaŵi jeleji jili jambone mnope ligongo yikusaŵa kuti pangali yakusokonasya yejinji. Pandaŵi jeleji yikusaŵa kuti nganguganisya yejinji, mwamti yikusaŵa yangasawusya kuganichisya mnope yanguŵalangayo.” Ana ndaŵi jeleji ni jajilisoni jambone kwa wawojo? Aliwusye kuti, ‘Ana ndaŵi jambone kwa uneji kuŵalanga Baibulo jili japi?’

AGANICHISYEJE YAKUŴALANGAYO

7-8. Ana chichi champaka chitukamuchisye kuti tupinduleje patukuŵalanga Baibulo? Alondesye.

⁷ Ndaŵi sine mpaka tukomboleje kuŵalanga yindu yejinji nambo ni kulepela kuyiganichisya. Ana pakwete paŵalasile yindu yineyakwe nambo mkanipapite ndaŵi jelewu nikusimanikwa kuti ayiliŵalile? Jwalijose pakwete payimtendechele yeleyi. Yili yakutesya chanasasoni kuti yeleyi mpaka yitutendechele patukuŵalanga Baibulo. Komboleka kuti ŵaliŵichile chakulinga chakuti aŵalanjeje machaputala gakuŵalanjika lisiku lililyose. Tukwayamichila mnope ligongo lyakola chakulinga chelechi. Nambope akusosekwa kuliŵichila yakulinga soni kutenda yampaka akombole kuti ayikwanilisye. (1 Akoli. 9:26) Akumbuchileje kuti kuŵalanga Baibulo kugambile kuŵa pakutandila pambone. Nambo kuti yakusaŵalanga m’Maloŵe ga Mlungu yakamuchisyeje akusasosekwa kutenda yejinji.

⁸ Kwende tuganichisye ayi. Wula jili jakusosekwa mnope ku yakumela. Nambo naga jikugwa jejinji kwandaŵi jamnono, mpaka yitendekasye kuti mesi gakajinjila pasi pa litaka. Payitendekwe yeleyi, nikuti wula jejinjijo nganijikamuchisya kuti yakumela yikule chenene. Nambo kuti yakumela yikule chenene yikusasosekwa kuti wula jiyicheje mwapanandipanandi nichakulinga chakuti mesi gajinjileje pasi. Mwakulandana ni yeleyi, tukusasosekwa kuŵalanga Baibulo mwapanandipanandi. Kutenda yeleyi mpaka kutukamuchisye kuti tukomboleje kuyiganichisya, kuyikumbuchila soni kuyikamulichisya masengo paumi wetu yatuŵalasileyo.—Yak. 1:24.

9. Ana tukusosekwa kutenda chichi naga tukusaŵalanga Baibulo mwakuwutuka?

⁹ Ana akusaŵalanga Baibulo mwakuwutuka? Naga yili myoyo, ana mpaka atende uli? Aŵalanjeje mwapanandipanandi. Yeleyi yichakamuchisya mnope kuti akomboleje kuganichisya mnope yakuŵalangayo,  soni kutenda yeleyi kuli kwangasawusya. Mpaka atende chenene konjechesya ndaŵi jakusalijiganya Baibulo nichakulinga chakuti aganichisyeje mnope yakuŵalangayo. Kapena mpaka asagule kuŵalanga ndime syamnono kuti ndaŵi jinejo ajikamulichisye masengo pakuganichisya yaŵalasileyo. M’bale Victor jwatumkolasile kundanda jula jwasasile kuti, “Panguŵalanga Baibulo, ndaŵi sine ngusagamba kuŵalanga chaputala chimo. Pakuŵapo ngusaŵalanga Baibulo kundaŵi, yikusaŵa yangasawusya kuti nayiganichisye lisiku lyosope yambalasileyo.” Chinga akusakamulichisya masengo litala lyapi pakuŵalanga, nambo chakusosekwa mnope chili chakuti aŵalanjeje mwapanandipanandi kuti akomboleje kuyiganichisya yaŵalasileyo.—Sal. 119:97; alole libokosi lyakuti “ Yiwusyo Yakusosekwa Kuyiganichisya.”

10. Alondesye yampaka atende kuti akamulichisyeje masengo yalijiganyisye. (1 Atesalonika 5:​17, 18)

¹⁰ Ndaŵi jilijose jakuŵalanga Baibulo aganichisyeje yampaka atende kuti akamulichisye masengo yakuŵalangayo. Paŵalasile ndime sya mnono, aliwusyeje kuti, ‘Ana yambalasileyi mpaka nayikamulichisye masengo chamti uli apano kapena msogolo?’ Tuwanichisye kuti palisikulyo akuŵalanga lilemba lya 1 Atesalonika 5:​17, 18. (Aŵalanje.) Panyuma pakuŵalanga ndime siŵilisi, akusosekwa kuliwusya kuti. ‘Ana ngusapopela kalingwa soni kwandaŵi jelewu uli?’ Kaneko akusosekwa kuganichisya yindu yakusayiyamichila wawojo. Mwine mpaka apate yindu yitatu yambone yakusaka kumyamichila Yehofa. Atamose ali aganichisye kwandaŵi jamnono yindu yaŵalasile m’Baibulo, mpaka yakamuchisye kuti ayipikanichisye yaŵalasileyo soni kuyikamulichisya masengo. Naga akukuya litala lyeleli pakuŵalanga Babulo yichakamuchisya mnope. Mwamti mkupita kwandaŵi chachiŵa jwakutumichila jwa Yehofa jwambone mnope. Sambano ana mpaka atende chichi naga ayikopochele kuti pana yindu yejinji yakusosekwa kuchenga paumi wawo?

ALIŴICHILEJE YAKULINGA YAMPAKA AYIKWANILISYE

11. Ligongo chichi ndaŵi sine mpaka atenguche? Asale chisyasyo.

¹¹ Ndaŵi sine mpaka atenguche naga paŵalasileje Baibulo ayikopochele kuti pana yindu yejinji yakusosekwa kuchenga. Aganichisye ayi. Komboleka kuti paŵalasileje Baibulo lelo alijiganyisye kuti akusosekwa ŵachimbichisyeje ŵandu wosope. (Yak. 2:​1-8) Kaneko ayikopochele kuti akusosekwa kuchenga mwakusatendela yindu ni ŵandu ŵane. Pelepo nikuti yili chenene. Kaneko lisiku lyakuyichisya akuŵalanga ngani jajikulosya kusosekwa kwakusamala ni yindu yatukusaŵecheta. (Yak. 3:​1-12) Mwamti ayikopochele kuti ndaŵi sine yakuŵecheta yawo ngayikusaŵa yambone. Mwamti akuliŵichila chakulinga chakuti aŵecheteje yambone soni yakwalimbikasya ŵane. Kaneko palisiku lyatatu akulijiganya kuti akusosekwa kuŵambala kukamulana ni chilambo. (Yak. 4:​4-12) Myoyo, ayiweni kuti akusosekwa asaguleje  chenene yakusangalasya. Palisiku lyakuyichisya, mpaka atande kuyiwona kuti nganaŵa akombwele kuchenga ligongo lyakuti pana yindu yejinji yakusosekwa kongolela.

12. Ligongo chichi ngakusosekwa kutenguka naga paŵalasileje Baibulo ayikopochele kuti pana yindu yejinji yakusosekwa kuchenga? (Alolesoni maloŵe gamwiŵanda.)

¹² Akatengukaga naga ayikopochele kuti pana yindu yejinji yakusosekwa kuchenga. Welewo mpaka uŵe umboni wakulosya kuti ali ŵakulinandiya. Mundu jwakulinandiya, akusaŵalanga Malemba nichakulinga chakuti alole yindu yakusosekwa kuchenga paumi wakwe. a Tukumbuchileje kuti ‘kuwala umundu wasambano’ nganijiŵa ngani ja lisiku limpepe. (Akolo. 3:10) Sambano, ana mpaka atende chichi kuti apitilisye kukamulichisya masengo yaŵalasile m’Maloŵe ga Mlungu?

13. Ana mpaka atende chichi kuti akombole kukamulichisya masengo yindu yalijiganyisye? (Alolesoni chiwulili.)

¹³ Naga ayikopochele kuti pana yindu yejinji yakusosekwa kuchenga, mpaka atende chenene kuchengaga panandipanandi mmalo mwagamba kuchenga yindu yosopeyo pandaŵi jimo. (Mis. 11:2) Mpaka alinje kutenda ayi: Alembe ndamo syakusaka kuchenga paumi wawo. Kaneko mpaka asagule ndamo jimo kapena siŵili kuti atande kuputila ngondo, soni ndamo sine syalesilesyo mpaka alinganye yakuputila ngondo ndaŵi jine. Sambano ana mpaka atandile papi?

14. Ana mpaka atande ni yakulinga yapi?

¹⁴ Pa yakulinga yaŵaliŵichile, atandeje ni yindu yakuyiwona kuti yili yangasawusya kuyikwanilisya. Mwinesoni mpaka atande ni mbali jakujiwona kuti jili jakusosekwa kuchenga mwachitema. Pasagwile yindu yakusaka kuchengayo, awungunyeje m’mabuku getu. Mpaka atende yeleyi pakamulichisya masengo Kabuku Kakamuchisya Kuwungunya  Ngani ka Mboni sya Yehofa. Amŵendeje Yehofa kuti ŵakamuchisye kuŵa “ŵakusachilila kutenda yindu yakumsangalasya jwalakwe.” (Afil. 2:13) Kaneko akamulichisyeje masengo yalijiganyisyeyo. Pakombwele kukwanilisya chakulinga chawo chandanda, yichalimbikasya kuti akwanilisyesoni yakulinga yineyo. Naga akombole kuchenga ni kukola ndamo jinejakwe ja Chiklistu, chachiyiwona kuti yili yangasawusya kukolasoni ndamo sine.

MKUNDEJE KUTI MALOŴE GA MLUNGU “GAKAMULEJE MASENGO MWA JEMANJA”

15. Ana ŵakutumichila ŵa Yehofa akusalekangana chamti uli ni ŵandu ŵajinji ŵakusati akusaŵalanga Baibulo? (1 Atesalonika 2:13)

¹⁵ Ŵandu ŵane aŵele ali mkuŵalanga Baibulo kwandaŵi jelewu. Nambo ana jemanjaji akusayikulupilila yajikusasala Baibulo? Ana jemanjaji akusakamulichisya masengo yakusaŵalangayo soni kukunda kuti yichenje umi wawo? Chakutesya chanasa chili chakuti jemanjaji ŵangatendaga yeleyi. Yeleyitu yili yakulekangana ni yakusatenda ŵakutumichila ŵa Yehofa. Mwakulandana ni Aklistu ŵa mundaŵi ja ŵandumetume, m’wejisoni tukusajiwona Baibulo kuti jili “mpela mwagaŵelele kusyesyene kuti gali maloŵe ga Mlungu.” Nambosoni tukusalingalinga kukamulichisya masengo paumi wetu yindu yatukusalijiganya m’Baibulo.—Aŵalanje 1 Atesalonika 2:13.

16. Ana tutendeje chichi kuti tukamulichisyeje masengo yatuŵalasile m’Maloŵe ga Mlungu?

¹⁶ Kusala yisyene, ndaŵi sine mpaka tuyiwoneje kuŵa yakusawusya kuŵalanga Maloŵe ga Mlungu soni kukamulichisya masengo yatuŵalasileyo. Mpaka tulajejesoni kupata ndaŵi jakuti tuŵalanje. Kapena mpaka tuŵalanjeje mwakuwutuka mnope ni kulepelaga kuganichisya yatuŵalasileyo. Mwinesoni mpaka tutenguche patukuyiwona kuti pana yindu yejinji yatukusosekwa kuchenga. Myoyo, chinga akusimana ni yakusawusya yamti uli akaganisyaga kuti nganaŵa amalene nayo. Yehofa mpaka ŵakamuchisye kumalana ni yakusawusya yeleyo. Kwende ndaŵi syosope tumŵendeje Mlungu kuti atukamuchisyeje. Kutenda yeleyi kuchitukamuchisya kuti tukaŵa ŵandu ŵakwamba kupikana maloŵe ni kugaliŵalila, nambo ŵakutenda yagakuŵecheta Maloŵe ga Mlungu. Kusala yisyene, naga tukusaŵalanga Maloŵe ga Mlungu soni kugakamulichisya masengo paumi wetu, tuchiŵa ŵakusangalala mnope.—Yak. 1:25.