1. Ligongo cici ŵandu ŵane ngakusanonyela kulijiganya?

MASIKU agano, ŵandu ŵajinji akusasosekwa kukamula masengo mwakulimbicila mnope kuti apate mbiya syakulikamucisya paumi wawo. Abale ŵetu ŵajinji akusakamula masengo kwa maawala gejinji kuti apate yakusosecela ya paumi ya maŵasa gawo. Ŵane ŵajinji akusamalila maawala gejinji ali mkwawula kumasengo soni kaneko kuwujilaga msimangwawo. Ŵajinji akusalikamucisya acimsyene mwakukamula masengo gakupweteka mnope. Palikumala lisiku, abale ni alongo ŵakusakamula masengo mwakulimbicilaŵa akusaŵaga ali apesile mnope. Ligongo lyakuti ŵanduŵa akusawujaga kumasengo ali apesile mnope, yikusatendekasya kuti alepeleje kulijiganya.

2. Ana ni ndaŵi japi jakusalijiganya?

² Nambope, yisyesyene yakwe yili yakuti tukusosekwa nditu kupata ndaŵi jakulijiganya Maloŵe ga Mlungu nambosoni mabuku getu ga Ciklistu. Kutenda yeleyi kuli kwakusosekwa mnope naga tukusaka kuŵa paunasi wambone ni Yehofa soni kuti tutame ni umi mpaka kalakala. (1 Tim. 4:15) Ŵandu ŵane akusanonyela kwimuka kundaŵindaŵipe ni kulijiganyaga kusa kuli jii. Pandaŵiji nganisyo syawo sikusaŵaga sili sitamilicice panyuma pakupumula cilo. Ŵane akusapata ndaŵi jamnono pakuyiwona kuti pangali yakwasokonasya, nikuti palikumalaga lisiku akusaŵa kuti alijiganyisye Maloŵe ga Mlungu soni kugaganicisya mwakusokoka.

3-4. Ana kucenga kwapi kwakutendekwe pa mabuku gatukusaŵalangaga, soni ligongo cici?

³ Mwangakayicila, mpaka akamulane ni nganisyo syakuti kupata ndaŵi jakulijiganya kuli kwakusosekwa. Nambo ana tukusosekwa kulijiganyaga yindu yapi? Komboleka mpaka aganisyeje kuti, ‘Yakusosekwa kuŵalanga yipali yejinji, mwamti ngusalepela kuŵalanga yosope yene.’ Ŵane akusakombola kuŵalanga soni kulolela yindu yele yalikopwesye likuga, nambope yeleyi yikusaŵaga yakusawusyasoni kwa abale ni alongo ŵane. Likuga Lyakulongolela likumanyilila yeleyi. Pa ligongo lyeleli, Likuga Lyakulongolela lyaganisisye yakunandiya ciŵalanjilo ca yindu yine yatukusapocelega mpela mabuku gakupulinta soni gatukusaŵalangaga kupitila pa webusayiti jetu.

⁴ Mwacisyasyo, apano Likuga lyalesile kuwandisya buku jakuti Buku Lapachaka la Mboni za  Yehova, ligongo lyakuti yakutendekwa yakulimbikasya yejinji sambano yikusasimanikwa pa webusayiti jetu ja jw.org^® nambosoni pa mapologalamu ga pa JW Broadcasting^®, gagakusakopoka mwesi uliwose. Apano sambano Sanja ja Mlonda jagaŵila nambosoni magasini ja Ajimuce!, akusajiwandisya katatupe pacaka. Kucengaku nganikuŵa kwakuti kutukamucisyeje kupata ndaŵi jakutendela yindu yayili yangakamulana ni kulambila Yehofa. Cakulinga ca kucengaku cili cakuti tupateje ndaŵi jakwanila jakutendela “yayili yambone mnope.” (Afil. 1:10) Kwende tukambilane mwampaka asagulile yindu yakusosekwa mnope soni yampaka atende kuti apinduleje mwakwanila ni lijiganyo lya Baibulo lyapajika.

5-6. Ana ni yindu yapi yatukusosekwa kulijiganya mwakusamala mnope?

⁵ Ana cindu capi catukusosekwa kuŵika pamalo gandanda? Tukusosekwa kupataga ndaŵi jakulijiganya Maloŵe ga Mlungu lisiku lililyose. Ndime sya Kuŵalanga kwa Baibulo kwa wiki jilijose ku misongano ja mpingo, ŵasinandiye ni cakulinga cakuti tupateje ndaŵi jejinji jakuganicisya mwakusokoka yatuŵalasile soni kuwungunya mwakwanila. Cakulinga cetu cikaŵaga cakuti tugambe kumalisya ndime syasiŵicidwe wiki jelejo, nambo tukundeje kuti utenga wa m’Baibulo utuyiceje pamtima soni kututendekasya kuŵa paunasi wambone mnope ni Yehofa.—Sal. 19:14.

⁶ Ana cindu cine catukusosekwa kulijiganya mwakusamala mnope cili cici? Yili yisyene kuti tukusasaka kukosecela Sanja ja Mlonda jakulijiganya soni Lijiganyo lya Baibulo lya Mpingo nambosoni kukosecela misongano ja mkati mwa wiki. Tukusosekwa tuŵalanjejesoni Sanja ja Mlonda jilijose soni magasini ga Ajimuce!

7. Ana tukusosekwa kudandawula naga ngatukukwanisya kuŵalanga yindu yosope yayikusasimanikwa pa webusayiti jetu soni pa JW Broadcasting?

⁷ Mwine mpaka aganisyeje kuti, ‘Yili yisyene, nambo yinduyi yikuwoneka kuti yitupile mnope, nambi wuli pakwamba ya ngani sine soni mafidiyo gagakusaŵicidwa pa webusayiti jetu ja jw.org ni yindu yine yayikusawonecelaga pa JW Broadcasting?’ Kwende tuwanicisye m’yi: Tujile kuti wawojo apite ku lesitilanti, ni msyene lesitilantijo akuŵika yakulya yakunong’a yakulekanganalekangana patebulo. Mwaciwonecele, wawojo nganaŵa alile cilicose cacili patebulopo. Mmalo mwakwe mpaka agambe kulya yakulya yakuyisaka peyo. Mwakulandana ni yeleyi, naga nganaŵa akombwele kuŵalanga yindu yosope yayikusimanikwa pa webusayiti jetu, akasadandawula mnope. Aŵalanjeje soni kulolela yindu mwampaka akombolele. Sambano kwende tulole ngopolelo ja kulijiganya soni yampaka tutende kuti kulijiganya kwetu kuŵeje kwakamucisya.

8. Ana yindu yapi yampaka tutende patukukosecela Sanja ja Mlonda, soni ana kutenda yeleyi mpaka kutukamucisye camtuli?

⁸ Patukulijiganya, nganisyo syetu sikusaŵaga pa yindu yatukuŵalangayo ni cakulinga cakuti tulijiganye cindu cine cakwe cakusosekwa mnope. Kulijiganya nganikuŵa kwamba kuŵalanga mwacitema soni kata msela pamalo papali kwanga kwa yiwusyo. Mwacisyasyo, pakukosecela Lijiganyo lya Sanja ja Mlonda, candanda akusosekwa kuŵalanga palembile kuti yacitulijiganye ca kundanda kwa nganijo. Kaneko, aŵalanje soni kuganicisya mtwe wa ngani, nambosoni tumitwe twamwanamwana soni yiwusyo yakuwilisya. Kaneko aŵalanje ngani josopejo nambo mwakusamala mnope. Akusosekwa kuwupikanicisya msela wawukusaŵaga ndaŵi syejinji kundanda kwa ndime. Mselawu ucakamucisya kumanyilila yajikulondesya ndimejo. Pakuŵalanga nganijo, alinje kulola yajikuti ndime jilijose pakulondesya yejinji yakwamba kamtwe kamwana nambosoni yajikuti pakukamulana ni ciwundo cekulungwa ca ngani josope. Alembeje maloŵe galigose soni yindu yine yanganayimanyililaga mkanaŵe kulijiganya soni yakusaka kuti awungunye.

9. (a) Ligongo cici tukusosekwa kutenda lung’wanu ni Malemba pandaŵi jatukulijiganya Sanja ja Mlonda, soni ana mpaka tutende camtuli yeleyi? (b) Mwakamulana ni lilemba lya Yoswa 1:8, ana tukusosekwa kutenda cici kupwatika pakuŵalanga Malemba?

 ⁹ Patukusatenda Lijiganyo lya Sanja ja Mlonda pa misongano jetu ja mpingo, yikusatukamucisya kuti tujipikanicisyeje Baibulo. M’yoyo, tutendeje lung’wanu ni Malemba, mnopemnope gacigakaŵalanjidwe pandaŵi ja lijiganyoli ku mpingo. Akusosekwa kutenda lung’wanu mnope ni yagakuti pakukamulana maloŵe gagali mu lilemba ni songa jekulungwa jajikusimanikwa mu ndime mwamuli lilembalyo. Konjecesya pelepa, apateje ndaŵi jakuganicisya mwakusokoka Malemba gaŵalasile, soni aloleje mwampaka agakamulicisye masengo paumi wawo.—Aŵalanje Yoswa 1:8.

10. Mwakamulana ni lilemba lya Ahebeli 5:14, ligongo cici acinangolo akusosekwa kupata ndaŵi jakutenda Kulambila kwa Peŵasa pakwajiganya ŵanace ŵawo yampaka atende pakulijiganya nambosoni kuwungunya yindu yine?

¹⁰ Yili yakupikanika kuti acinangolo akusasaka kuti Kulambila kwa Peŵasa kwakusatenda wiki jilijose, ŵanace ŵawo akuwoneje kuŵa kwakusangalasya. Nambope, atamose kuti acinangolo akusosekwa kulinganya yakuti akambilane pakulambila kwa peŵasa, jemanjaji ngakusosekwa kulinganya yindu yapajika yakusangalasya mnope wiki jilijose. Atamose kuti Kulambila kwa Peŵasa mpaka kuŵe kupata ndaŵi jakulolela pologalamu ja JW Broadcasting kapena ndaŵi sine kukamula masengo gane gakwe mpela, kulinganya mucawonecelaga combo ca Nowa, nambope, cakusosekwa mnope cili kwajiganya ŵanace ŵawo. Ŵanaceŵa akusosekwa kulijiganya yampaka atende pakukosecela misongano ja mpingo. Mwacisyasyo, akusosekwa kosecela yampaka atende pakuwungunya ngani jine jakwe jiŵawusisye acimjawo kusukulu. (Aŵalanje Ahebeli 5:14.) Jemanjaji naga akupata ndaŵi jakulijiganya ngani jine jakwe ja m’Baibulo, yiciŵa yangasawusya kupikanicisya ngani sya pamisongano ja mpingo, pamisongano jamwanamwana soni jaupande jele mwine nganaŵa alosisye mafidiyo. Acinangolo ni ŵakusosekwa kusagula ulewu wa ndaŵi jakulijiganya ni ŵanace ŵawo mwakamulana ni mwaŵelele ŵanacewo.

11. Ligongo cici yili yakusosekwa kugajiganya majiganyo getu ga Baibulo yampaka gatende pakulijiganya mwakusokoka pajika?

¹¹ Ŵakulijiganya Baibulo ŵetu akusasosekwasoni kwajiganya yampaka atende pakulijiganya. Naga ali ŵacasambano, tukusaŵa ŵakusangalala patukwawona jemanjaji ali mkukata misela papali kwanga pandaŵi jakukosecela lijiganyo lya Baibulo kapena misongano ja mpingo. Nambo tukusosekwa kugajiganya majiganyo ga Baibulo getu yampaka gatende pakuwungunya ngani jine jakwe soni yampaka gatende pakulijiganya mwakusokoka pajika. Yeleyi yicakamucisya pasimene ni yakusawusya, mwamti m’malo mwakuti ŵawusye ŵane mumpingo yakusosekwa  kutenda, cacimanyilila acimsyene yampaka atende mwakuwungunya m’mabuku getu.

12. Ana yakulinga yapi yatukusosekwa kola patukulijiganya?

¹² Naga wawojo ngakusanonyela kulijiganya, mpaka aganisyeje kuti kulijiganya kuli kwangasangalasya. Nambo yili yakomboleka kuŵa ŵakusangalala pakulijiganya. Candanda mpaka atande nikulijiganya kwa ndaŵi jamnono kaneko mkupita kwa ndaŵi mpaka ajonjecesye ndaŵi jakulijiganyila. Akoleje cakulinga pakulijiganya. Cakusosekwa mnope ciŵeje kuŵa paunasi wambone ni Yehofa. Cakulinga cine campaka tucikwanilisye mwacitema cili kwanga ciwusyo catuwusisye mundu jwine jwakwe kapena kuwungunya yakusawusya yine yakwe yatusimene nayo.

13. (a) Alondesye yampaka atende mwanace jwa sukulu pakusaka kuŵicila kunyuma yakusakulupililaga pali ku sukulu. (b) Ana mpaka akamulicisye masengo camtuli maloŵe gagakusimanikwa pa Akolose 4:6?

¹³ Ana wawojo ali mwanace jwa sukulu? Naga yili m’yoyo acimjawo ŵa m’kalasi mpaka akulupilileje cijiganyo cakuti mundu ŵatyocele ku cinyama. Mpaka asaceje kuŵicila kunyuma yajikusajiganya Baibulo, nambo wawojo mpaka alipikaneje kuti nganaŵa akombwele. Naga yili m’yoyo nikuti akusosekwa kutanda kulijiganya mwakutamilicika. Mpaka akole yakulinga yiŵili ayi pakulijiganya: (1) kulimbisya cikulupi cawo cakuti Mlungu ni juŵapanganyisye yindu yosope soni (2) kulijiganya yampaka atende pakulondesya usyesyene wakutyocela m’Maloŵe ga Mlungu. (Alo. 1:20; 1 Pet. 3:15) Candanda mpaka aliwusyeje ligongo lyakwe acimjawo ŵa m’kalasi akusakulupililaga cijiganyo cakuti mundu ŵatyocele ku cinyama. Kaneko akusosekwa kuwungunya mwakusamala ya nganijo pakamulicisya masengo mabuku getu. Kutenda yeleyi mpaka kwakamucisye kulondesya yindu yakusakulupililaga m’litala lyakuti wawojo nganajembeceyaga. Ŵandu ŵajinji ŵakusakulupilila cijiganyo cakuti mundu ŵatyocele ku cinyama, akusatendaga yeleyi ligongo lyakuti mundu jwine jwakusamcimbicisya jwasalile kuti yeleyi yili yisyesyene. Naga apatile songa jimo kapena siŵili pawungunyisyeje, nikuti mpaka amjanje mwakumyika pamtima mundu jwakusaka kulijiganya usyesyene.—Aŵalanje Akolose 4:6.

14-16. (a) Ana mpaka atende wuli kuti alijiganye yejinji pakwamba ya mabuku gakusaka kugamanyilila cenene? (b) Ana Malemba gagakamulicisye masengo mundimeji, mpaka gakamucisye camtuli kujipikanicisya buku ja Amosi? (Alole libokosi lyakuti “Twawoneje Ŵandu ŵa M’Baibulo Mpela Ali Cijumi.”)

¹⁴ Tuwanicisye kuti pamisongano ja mpingo tuciŵalanga soni kukambilana mabuku gane ga ŵakulocesya ŵaŵalembile mabuku kutandila pa Hoseya mpaka Malaki. Candanda, mpaka asosekwe kola lung’wanu lwakusaka kumanyilila yajwalembile jwakulocesyaju. Ana mpaka akombole kutenda yeleyi camtuli?

¹⁵ Candanda, mpaka aliwusye kuti, ‘Ana ngumanyilila yamtuli yakwamba mundu juŵalembile bukuji?’ Ana jwalakwe ŵaliji ŵani, jwatamaga kwapi, soni jwakamulaga masengo gamtuli? Naga tukumanyilila yejinji yakwamba juŵalembile buku, mpaka tupikanicisye cenene ligongo lyakwe jwalakwe jwakamulicisye masengo maloŵe gane gakwe kapena ligongo lyakwe jwakamulicisye masengo yiwanicisyo. Pakuŵalanga Baibulo, aloleje maloŵe gagakusala ya umundu wa juŵalembile bukujo.

¹⁶ Kaneko, caciyiwona kuti yili yakamucisya kumanyilila ndaŵi jijalembedwe bukujo. Mpaka atende yeleyi, mwakulola palembile kuti, “Mabuku a M’Baibulo ndi Tsatanetsatane Wakwe,” kunyuma kwa Baibulo ja Ciceŵa ja Baibulo la Dziko Latsopano la Malemba Opatulika. Konjecesya pelepa, mpaka alole cati cacikusala ŵakulocesya soni ayimwene mu buku ja Kabuku Kakamucisya Pakulijiganya Maloŵe ga Mlungu. Naga buku jakulijiganyajo jikusala ya yindu yakulocesya, mpaka atende cenene kulijiganya ya muwaŵelele umi wa ŵandu pandaŵi jijalembedwaga bukujo. Ana jwakulocesyaju jwasosekwaga kwasalila ŵandu kuti acenje ndamo soni yitendo yapi yakusakala? Ana ni ŵandu ŵapi ŵaŵatemi ni umi ndaŵi jakulandana ni mkulemba buku ja m’Baibulojo? Mpaka apikanicisye cenene yindu yeleyi, mwakulola mabuku gane  ga m’Baibulo. Mwacisyasyo, kuti apikanicisye cenene yayatendekwaga mundaŵi ja Amosi, mpaka atende cenene kuŵalanga Malemba ga m’Baibulo ja Ciceŵa ja Dziko Latsopano m’buku ja 2 Ayimwene soni 2 Mbili, gagakusimanikwa mumsela wakatikati pa Amosi 1:1. Konjecesya pelepa, mpaka tulolesoni yiŵalembile Hoseya, juŵasimanikwe mundaŵi ja Amosi. Naga akulola yeleyi m’mabuku ga m’Baibulo gane, mpaka apikanicisye cenene muwaŵelele umi wa ŵandu mundaŵi ja Amosi.—2 Ayi. 14:25-28; 2 Mbi. 26:1-15; Hos. 1:1-11; Amo. 1:1.

17-18. Ana kutenda lung’wanu ni maloŵe gagakuwoneka mpela gangasosekwa, mpaka kwakamucisye camtuli kuŵa ŵakusangalala pakutenda lijiganyo lya Baibulo lyapajika? Apelece yisyasyo yayili mundimesi kapena yine.

¹⁷ Patukuŵalanga Baibulo, mpaka tutende cenene kujiŵalanga ni cakulinga cakuti tulijiganye yejinji. Mwacisyasyo, tujile kuti akuŵalanga caputala 12 m’buku ja Sekaliya cacikusala yakulocesya ya Sekaliya yakwamba ciwa ca Mesiya. (Sak. 12:10) Pakwika mundime 12, akuŵalanga palembile kuti “liŵasa lyakutyocela kwa Natani” licilila ligongo lya ciwa ca Mesiya. M’malo mwakutenda mbwaji ni maloŵe gelega, mpaka ajime kaje ni kuliwusya kuti, ‘Ana pana kamulana kwamtuli pasikati pa liŵasa lya Natani ni Mesiya?’ Ana pana litala lililyose lyakuti ajipikanicisye cenene nganiji? Kuti apikanicisye cenene yeleyi, mpaka asosekwe kuwungunya. Kuti alole malemba gagakusasimanikwa mumsela wamkatikati casimane lilemba lya 2 Samueli 5:13, 14, papakusasala yakuti Natani jwaliji jumo mwa ŵanace ŵa Mwenye Daudi. Lilemba lyakuyicisya lili lya Luka 3:23, 31, lyalikusasala kuti Yesu jwapagwile mumsela wa Natani kupitila mwa Maliya. (Alole Sanja ja Mlonda jagaŵila ja Na. 3, 2016, p. 9, pa mtwe wakuti “Ana Akumanyilila?”) Kaneko mpaka asangalale kumanyilila kuti yakulocesyayi yasalaga kuti Yesu cacipagwila mumsela wa Daudi. (Mat. 22:42) Nambo Daudi jwakwete ŵanace ŵacalume ŵakupunda 20. Pelepa nganiyiŵa yakusimonjesya kuti Sekaliya jwasasile yakuti ŵandu ŵa m’liŵasa lya Natani  cacilila ligongo lya ciwa ca Yesu.

¹⁸ Kwende tulole cisyasyo cine. Mu caputala candanda m’buku ja Luka, tukusaŵalanga kuti lilayika Gabuliyeli lyayice kwa Maliya ni kumsalila ngani jakwamba mwanace jucapagwe. Lilayikali lyatite, “Jwalakwejo taciŵa jwamkulungwa ni tacikolanjidwa kuti Mwanace jwa Mlungu jwakwinani mnope. Ambuje Mlungu tacimtenda jwalakwejo kuŵa mwenye mpela muŵaŵelele nangolo jwakwe Daudi nipo taciŵa mwenye jwa Aisalaeli mpaka kalakala.” (Luk. 1:32, 33) Komboleka kuti mpaka tusaceje kuŵika nganisyo syetu pa mbali jandanda mu utenga wa Gabuliyeli, mnopemnope, yakuti Yesu cacikolanjidwa kuti, “Mwanace jwa Mlungu jwakwinani mnope.” Nambo Gabuliyeli jwalocesyesoni kuti Yesu “taciŵa mwenye.” M’yoyo, mwine mpaka tusimonjeje yagagopolelaga maloŵe gaŵaŵecete Gabuliyeli kwa Maliya. Ana Maliya jwaganisyaga kuti Gabuliyeli jwasalaga yakuti Yesu cajinjile m’malo mwa Mwenye Helodi kapena cajinjile m’malo mwa ŵakulamulila ŵane ŵa ku Isalaeli? Naga Maliya jwaganisyaga yakuti Yesu caŵe mwenye, nikuti Maliyajo akaliji nangolo jwa mwenye, soni liŵasali likatamaga m’nyumba ja mwenye. Nambo Baibulo jangasala yakuti Maliya jwasasile cilicose ca yeleyi kwa Gabuliyeli, soni pangali patukusaŵalanga kuti Maliya jwasakaga kupata malo mu Ucimwene, mpela muŵatendele ŵakulijiganya ŵaŵili ŵa Yesu. (Mat. 20:20-23) Yeleyi yikututendekasya kuŵa ŵakusimicisya kuti Maliya jwaliji jwamkongwe jwakulinandiya mnope.

19-20. Mwakamulana ni Yakobo 1:22-25; 4:8, ana cakulinga cetu ciŵeje camtuli patukulijiganya?

¹⁹ Tukumbucileje kuti cakulinga cetu cekulungwa catukusalijiganyicisya Maloŵe ga Mlungu soni mabuku getu ga Ciklistu cili kusaka kuŵa paunasi ni Yehofa. Tukusasakasoni kumanyilila cenene kuti tuli mundu jwamtuli soni yatukusosekwa kucenga ni cakulinga cakuti tumsangalasye Mlungu. (Aŵalanje Yakobo 1:22-25; 4:8.) Ndaŵi jilijose jatukutanda kulijiganya, tukusosekwa kumŵenda Yehofa kuti atupe msimu wakwe weswela. Tumŵendeje jwalakwe kuti atukamucisyeje kuti tupindule mwakwanila patukulijiganya soni kulola cenene yatukusosekwa kucenga.

²⁰ Kwende wosope tuŵeje mpela jwakutumicila jwa Mlungu jwakulupicika juŵamsasile jwamasalimo kuti, “Akusimana lukondwa kapena kuti cisangalalo pakugapikanila Malamusi ga Ambuje, ni akuganicisya malamusigo musi ni cilo. . . Jwelejo akusapunda mu yosope yakutenda.”—Sal. 1:2, 3.