1. Mpela mwalikuŵecetela lilemba lya Aefeso 6:10-13, ana ni litala lyekulungwa lyapi lyalosisye Yehofa kuti akusasamala ya m’weji? Alondesye.

LIMO mwa matala gekulungwa galosisye Yehofa kuti akusatuganicisya mpela ŵakutumicila ŵakwe, lili kutukamucisya kuŵambala adani ŵetu. Mdani jwamkulungwa mnope ali Satana ni yiŵanda yakwe. Yehofa akusatukalamusya pakwamba ya adaniŵa soni akusatusalila yampaka tutende kuti twaŵambaleje. (Aŵalanje Aefeso 6:10-13.) Patukupocela cikamucisyo kutyocela kwa Yehofa soni kumdalila jwalakwe ni mtima wetu wosope mpaka tupunde patukulimbana ni Satana. M’yoyo, mpaka tukole cikulupi mpela ciŵakwete ndumetume Paulo. Jwalakwe jwalembile kuti, “Naga Mlungu ali kumbali jetu, ana ŵani mpaka asisyane ni uwe?”—Alo. 8:31.

2. Ana mungani ajino citukambilane cici?

² Mpela aklistu ŵasyesyene, ngatukusosekwa kuganicisyaga mnope ya Satana ni yiŵanda yakwe. Tukusosekwa kuganicisyaga mnope yatukusalijiganya yakwamba Yehofa soni kumtumicila jwalakwe. (Sal. 25:5) Nambope, tukusosekwa kumanyilila yindu yakusatenda Satana. Ligongo cici? Ligongo lyakuti mpaka tuŵambale yitega yakwe. (2 Akoli. 2:11) Mungani ajino, citukambilane litala lyekulungwa mnope lyatesile Satana ni yiŵanda yakwe pakusaka kwasokonasya ŵandu. Nambosoni citukambilane mwampaka tuŵambalile misimu jakusakala.

3-4. (a) Ana kutenda yamisimu kukusagopolela cici? (b) Ana ngani jakulupilila misimu jiwandile camtuli?

³ Litala lyekulungwa mnope lyakusakamulicisya masengo Satana ni yiŵanda yakwe pakusaka kwasokonasya ŵandu lili kutenda yamisimu. Ŵandu ŵakusatenda yamisimu akusaŵeceta kuti  akusamanyilila yindu yele ŵandu nganaŵa ayimanyilile kapenasoni mpaka alicenjele. Mwacisyasyo, ŵandu ŵane akusaŵeceta kuti akusamanyilila yaciyitendekwe kusogolo. Akusatenda yeleyi pakamulicisya masengo cisango kapena kukulupilila ndondwa. Ŵandu ŵane mpaka atendeje yindu mpela kuti akusaŵecetana ni ŵandu ŵawe. Soni ŵandu ŵane akusatendaga yindu ya usaŵi, masenga kapenasoni kumloga mundu jwine. *

⁴ Ŵandu ŵajinji akusakulupilila kuti misimu jikwete macili. Mwakamulana ni kuwungunya kwakwatendekwe m’yilambo yakwana 18 ku Latin America soni ku Caribbean, ŵapatile kuti mwa ŵandu ŵatatu mundu jumo akusakulupilila ya masenga, usaŵi kapena akusakulupilila kuti yili yakomboleka kuŵecetana ni misimu. Kuwungunyaku kwatendekwesoni m’yilambo yakwana 18 ya mu Africa. Ŵapatile kuti mundu jumo mwa ŵandu ŵaŵili akusakulupilila ya usaŵi. Cinga tukusatama kwapi, tukusasosekwa tuŵambaleje kutenda yamisimu. Satana akusaka kwasokonasya “ŵandu ŵapacilambo cosope capasi.”—Ciw. 12:9.

5. Ana Yehofa akusapikana wuli mumtima pakwamba ya kutenda yamisimu?

⁵ Yehofa ali “Ambuje ŵakulupicika.” (Sal. 31:5) Ana jwalakwe akusapikana wuli mumtima pakwamba kutenda yamisimu? Jwalakwe akusaŵengana nayo. Yehofa jwasalile Aisalaeli kuti, ‘Pakaja kusimanikwa mundu pasikati penu, jwakupeleka mwanace jwakwe pa moto mpela mbopesi. Pakaja kusimanikwa mundu kulondola cisango, kapena jwakusagamila masoka, kapena jwakutenda ya usaŵi, kapena jwakamulicisya masengo yilisi. Pakaja kusimanikwa mundu jwakuwusya lunda kwa misimu ja ŵandu ŵawe. Ambuje Mlungu jwenu akusaŵengana nawo ŵandu ŵakutenda yakusakala yamtundu welewo.’ (Det. 18:10-12) Aklistu nganaŵa pasi pa cilamusi ciŵapelece Yehofa kwa Aisalaeli. Nambope, tukusamanyilila kuti nganisyo syakwe pakwamba mwakusayiwonela yamisimu nganisicenga.—Mala. 3:6.

6. (a) Ana Satana akusiŵalimbikasya camtuli ŵandu kuti atendeje yamisimu pakusaka kwawulasya? (b) Mwakamulana ni lilemba lya Jwakulalicila 9:5, ana yisyesyene yakwe ni yapi yakwamba ŵandu ŵawe?

⁶ Yehofa akusatukalamusya kuti tuŵambaleje kutenda yamisimu, ligongo lyakuti jwalakwe akusamanyilila kuti Satana akusakamulicisya masengo yeleyi pakusaka kwawulasya ŵandu. Satana akusiŵalimbikasya ŵandu kuti atendeje yamisimu pakusaka kulimbikasya mabosa gakuti ŵandu ŵawe akusapitilisyape kuŵa ni umi kumalo kwine kwakwe. (Aŵalanje Jwakulalicila 9:5.) Satana akusiŵalimbikasyasoni ŵandu kuti atendeje yamisimu pakusaka kuti atendeje woga soni kuti akaŵa paunasi ni Yehofa. Cakulinga ca Satana cili cakuti ŵandu ŵakusatenda yindu yamisimu akulupilileje misimu jakusakala m’malo mwakumkulupilila Yehofa.

7. Ana Yehofa akusatusalila cici?

⁷ Mpela mwatuŵecetele kundanda kula, Yehofa akusatusalila yampaka tutende kuti Satana ni yiŵanda yakwe yikatusokonasya. Kwende tukambilane yindu yampaka tutende kuti tulimbane ni Satana ni yiŵanda yakwe.

8. (a) Ana ni litala lyekulungwa lyapi lyampaka tukanile misimu jakusakala? (b) Ana lilemba lya Salimo 146:4, likusasisya camtuli mabosa ga Satana gakwayana ni ciwa?

⁸ Tuŵalanjeje soni ganicisya mwakusokoka Maloŵe ga Mlungu. Lyeleli lili litala lyekulungwa mnope lyampaka tuŵambalile mabosa  gajikusalimbikasya misimu jakusakala. Maloŵe ga Mlungu gali mpela upanga wakutema gampaka tukatile mabosa gakusalimbikasya Satana. (Aef. 6:17) Mwacisyasyo, Maloŵe ga Mlungu gakusakana mabosa gakuti mundu jwam’we mpaka aŵecetane ni mundu jwali cijumi. (Aŵalanje Salimo 146:4.) Maloŵe ga Mlungu gakusatukumbusyasoni kuti Yehofa jikape ni jwali jwakudalilicika soni ni jwampaka amanyilile yakusogolo. (Yes. 45:21; 46:10) Naga tukuŵalanga ni kuganicisyaga mwakusokoka Maloŵe ga Mlungu tuciŵa ŵakoseka kukana mabosa gele misimu jakusakala jikusasaka kuti tukulupilileje.

9. Ana ni yakutendekwa yapi yayili yakamulana ni kutenda yamisimu yatukusosekwa kuyiŵambala?

⁹ Tukaneje yiliyose yakamulana ni kutenda yamisimu. Mpela Aklistu ŵasyesyene ngatukusosekwa kutenda yindu yiliyose yakwayana ni yamisimu. Mwacisyasyo, ngatukusosekwa kuja kuŵecetana ni ŵandu ŵakusaŵecetana ni misimu kapena kulinga kuŵecetana ni mundu jwam’we m’litala lililyose. Mpela mwatwalijiganyicisye mungani jipite jila, tukusaŵambala misyungu ja malilo jajigonile pa cikulupi cakuti mundu jwam’we akusaŵaga ali cijumi kumalo kwine kwakwe. Soni ngatukusakamulicisyaga masengo ndondwa kapena ŵandu ŵayisango kuti atusalile yindu yakusogolo. (Yes. 8:19) Tukumanyilila kuti yakutendekwa yosopeyi yili yakogoya mnope soni kutenda yeleyi mpaka kututendekasye kuti tutande kuŵecetana ni Satana ni yiŵanda yakwe.

10-11. (a) Ana ŵandu ŵane ŵa m’yaka 100 yandanda ŵatesile cici ali alijiganyisye usyesyene? (b) Mwakamulana ni lilemba lya 1 Akolinto 10:21, ana mpaka tusyasye camtuli cisyasyo ca Aklistu ŵandanda, soni ligongo cici?

¹⁰ Tukaneje yindu yiliyose yakamulana ni kutenda yamisimu. Ŵandu ŵane ŵaŵatamaga ku Efeso ŵam’yaka 100 yandanda ŵatendaga yamisimu. Paŵagambile kulijiganya usyesyene, jemanjaji ŵacenjile mnope. Maloŵe ga Mlungu gakusati, “Ŵandu ŵiŵatendaga ya matipwi, ŵajigele mabuku gawo ni ŵagaŵisile pampepe ni koca pamoto pameso pa ŵandu wosope.” (Mase. 19:19) Ŵanduŵa ŵatesile yiliyose yakomboleka kuti ajikane misimu jakusakala. Mabuku  gawo gamasengaga galiji gambiya syejinji. M’malo mwakwamba kwasa mabukugo kapena kugasumisya kwa ŵandu ŵane, ŵagajonasile. Jemanjaji ŵaganicisyaga mnope yakumsangalasya Yehofa, m’malo mwakuganicisya winji wambiya sya mabukugo.

¹¹ Ana mpaka tusyasye camtuli cisyasyo ca Aklistu ŵam’yaka 100 yandanda? Mpaka luŵe lunda kukana cindu cilicose cakamulana ni kutenda yamisimu. Yindu yakwe mpaka yiŵe mpela yilisi, yisasi kapena yindu yakusawala ŵandu kuti alicenjele ku misimu jakusakala.—Aŵalanje 1 Akolinto 10:21.

12. Ana ni yiwusyo yapi yampaka tuliwusyeje pakwamba yakusangalasya yetu?

¹² Tuwungunyeje mwakusamala yindu yakusangalasya. Tuliwusyeje kuti, ‘Ana ngusaŵalanga mabuku, magasini kapena ngani sya pa Intaneti syakwamba yamisimu? Nambi wuli pakwamba ya nyimbo syagusapikanila, mafilimu soni ma TV gangusalolela kapena mang’asi ga pa kompyuta? Ana yakusangalasya yangusayinonyela yikusapwatikapo yamisimu? Ana yakusangalasyayi akusalosyaga mundu jwali cijumi kapena jwam’we ali mkusyuka cinecakwe? Ana akusalosya ya masenga, kuloga kapena kumtembelela mundu kuŵa mpela yakusangalasya yangajogoya?’ Nambope, ngaŵa kuti yakusangalasya yosope yikusalimbikasya yamisimu. Patukuwungunya yakusangalasya yetu, tuŵeje ŵakusacilila kuŵambala cindu cilicose cakusaciŵenga Yehofa. Tukusasaka kutenda cilicose campaka tukombole kuti ‘tuŵe ni nganisyo syambone’ pameso pa Mlungu.—Mase. 24:16. *

13. Ana tukusosekwa kuŵambala kutenda cici?

¹³ Tuŵambaleje ngani syakwayana ni yiŵanda. Pambali jeleji, tukososekwa kusyasya  cisyasyo caŵapelece Yesu. (1 Pet. 2:21) Jwalakwe mkanayice pacilambo capasi jwatamaga kwinani, mwamti jwamanyililaga yindu yejinji yakwamba Satana ni yiŵanda yakwe. Nambo jwalakwe pakusaka kuŵeceta ngani nganaŵecetaga ngani syakwamba yajatesile misimu jakusakala. Yesu jwasakaga kwajiganya ŵandu yakwamba Yehofa, ngaŵaga ya Satana. Mpaka tusyasye cisyasyo ca Yesuci, mwakuŵambala kuwandisya ngani sya yiŵanda. M’malo mwakwe, tulosyeje muyakuŵeceta yetu kuti ‘mtima wetu ugumbele ni ngani jambone,’ jajili usyesyene.—Sal. 45:1.

14-15. (a) Ligongo cici ngatukusosekwa kutenda woga ni misimu jakusakala? (b) Ana ni umboni wapi wawulosisye kuti Yehofa akwateteya ŵandu ŵakwe masiku agano?

¹⁴ Tukatendaga woga ni misimu jakusakala. M’cilambo cakalaci yindu yakusakala mpaka yitutendecele. Yindu yakwe yili mpela ngosi, kulwala kapena kuwa kwene. Yindu yeleyi mpaka yitutendecele mwangajembeceya. Nambo tukaganisyaga kuti misimu jangawoneka ni jajitendekasisye yindu yeleyi. Baibulo jikusasala kuti “ndaŵi ni yakutendekwa yangayijembecela yikusayatendecela wosope.” (Jwak. 9:11, NW) Yehofa alosisye kuti akwete macili mnope kupunda yiŵanda. Mwacisyasyo, Mlungu nganamkunda Satana kuti am’wulaje Yobu. (Yob. 2:6) Mundaŵi ja Mose, Yehofa jwalosisye kuti akwete macili mnope kupunda masenga gaŵatendaga ŵa mbopesi ku Iguputo. (Eks. 8:18; 9:11) Yehofa ŵampele Yesu macili ali kwinani kupunda ga Satana ni yiŵanda yakwe, mwamti Yesujo jwaponyisye Satana ni yiŵanda yakwe pacilambo capasi. Pacangakaŵapa, Yesu tacimponya Satana ni yiŵanda yakwe mwisimbo. Pandaŵiji, jemanjaji ngasakombolasoni kwawulasya ŵandu.—Ciw. 12:9; 20:2, 3.

¹⁵ Tukwete maumboni gejinji gakuti Yehofa akwateteya ŵandu ŵakwe masiku agano. Kwende tuganicisye ayi: Tukusalalicila soni kwiganya ŵandu ŵamitundu josope pacilambo capasi. (Mat. 28:19, 20) Yeleyi yikusatendekasya kuti masengo ga Satana gawonecele peswela. Kusala yisyene, yikaŵe kuti Satana akwete macili nikuti akalekasisye masengo getu. Nambo jwalakwe nganaŵa akombwele kulekasya masengoga. M’yoyo, ngatukusosekwa kutendaga woga ni misimu jakusakala. Tukumanyilila kuti “Ambuje akusacilolela cilambo cosope, soni akusapeleka macili kwa ŵandu wosope ŵakusampikanila jwalakwe.” (2 Mbi. 16:9) Naga tuli ŵakulupicika kwa Yehofa, yiŵanda nganiŵa yikombwele kutuwulasya.

16-17. Asale cisyasyo cakulosya kulimba mtima kuŵalosisye mlongo jwine mwampaka tujikanile misimu jakusakala?

¹⁶ Tukusasosekwa kuŵa ŵakulimba mtima kuti tujikane misimu jakusakala, mnopemnope naga acimjetu ŵapamtima kapena ŵacibale ŵetu akutusisya. Nambo Yehofa akusiŵapa majali ŵandu ŵakusalosya kulimba mtima. Kwende tulole cisyasyo ca mlongo jwine, lina lyakwe Erica jwakusatama ku Ghana. Erica jwakwete yaka 21 pajwatandaga kulijiganya Baibulo. Ligongo lyakuti babagwe ŵaliji ŵambopesi ŵaŵatendaga yamasenga, Erica jwasosekwaga kutenda nawo msyungu wakwayana ni kutenda yamisimu, wawapwatikagapo kulya nyama jakupelecedwa ku mbopesi ja milungu ja babagwe. Erica pajwakanile kutenda nawo msyunguwo, ŵacibale ŵakwe ŵaganisyaga kuti jwalakwe cajitumbilikasye milungu jawo. Ŵacibaleŵa ŵakulupililaga kuti milunguji mpaka jape cilango cakulaga nganisyo soni yilwele.

¹⁷ Ŵacibale ŵa Erica ŵamkanganikaga kuti atende nawo msyunguwu, nambo jwalakwe jwakanile. Yeleyi yatendekasisye kuti atyoce pa nyumbapo. Liŵasa line lya Mboni sya Yehofa lyamjigele jwalakwe kuti atameje najo. Yehofa ŵamjaliwe Erica mwakumpa abale ni alongo ŵaŵaliji mpela acalongo acimjakwe. (Mak. 10:29, 30) Atamose kuti ŵacibale ŵakwe ŵamkanile nambosoni kumjonanjila yindu yakwe, Erica jwaŵelepe jwakulupicika kwa Yehofa, mwamti jwabatiswe. Apano Erica akutenda upayiniya wakutamilicika. Jwalakwe nganatendaga woga ni yiŵanda. Pakwamba ya ŵacibale ŵakwe ŵala Erica jwasasile kuti, “Napopelaga lisiku lililyose kuti ŵacibale ŵangu cam’manyilile Yehofa soni cakole ufulu watukusapata ligongo lyakumtumicila Mlungu jwacinonyelo.”

18. Ana ni majali gapi gatukusapocela naga tukumkulupilila Yehofa?

¹⁸ Ngaŵa kuti wosopewe cikulupi cetu mpaka cilinjidwe m’litala mpela lyeleli. Nambope, wosopewe tukusosekwa tujiŵambaleje misimu jakusakala soni tumkulupilileje Yehofa. Naga tukutenda yeleyi, tucipocela majali gejinji, soni tuciŵambala mabosa ga Satana kutusokonasya. Nambosoni ngasitutenda woga ni yiŵanda kuti mpaka yitulekasye kumtumicila Yehofa. Kupunda yosopeyi tuciŵa paunasi wakulimba ni Yehofa. Ndumetume Yakobo jwalembile kuti, “Mlipelece kwa Mlungu. Mumkaneje Satana nipo tacimtila. Mwaŵandicile Mlungu, nipo Ŵalakwe tacimŵandicila jemanja.”—Yak. 4:7, 8.