Ngani Jakulijiganya 14
Ana Tukukwanilisya Undumetume Wetu?
‘Mkamule masengo gakulalicila ngani syambone, ni mkamule masengo genu gosope mpela jwakutumicila jwa Mlungu.’—2 TIM. 4:5.
NYIMBO 57 Tulalicileje Ŵandu ŵa Mitundu Josope
YACITULIJIGANYE *
Ali ajimwice kuŵawe, Yesu akuwonecela kwa ŵakulijiganya ŵakwe ni akwasalila kuti ‘ajawule akajiganye ŵandu ŵangosyo syosope.’ (Alole ndime 1)
1. Ana ŵandumetume wosope ŵa Mlungu akusasaka kutenda cici, soni ligongo cici? (Alole ciwulili papeji jandanda.)
YESU KLISTU ŵalamwile ŵakumkuya ŵakwe kuti ‘ajawule, akajiganye ŵandu ŵangosyo syosope.’ (Mat. 28:19) Ŵandumetume ŵakulupicika wosope ŵa Mlungu akusasaka kumanyilila yampaka atende kuti akwanilisye undumetume waŵapocele. (2 Tim. 4:5) Masengoga gali gakusosekwa mnope kupunda masengo galigose paumi wetu soni tukusosekwa kugakamula mwacitema. Nambope, mpaka yiŵe yakusawusya kuti tumalileje ndaŵi jejinji tuli mu undumetume.
2. Ana patukulingalinga kukwanilisya undumetume wetu tukusasimana ni yakusawusya yamtuli?
2 Panasoni masengo gane gakusosekwa mnope gagakusasaka ndaŵi jetu soni macili getu. Mwine tukusakamula masengo gakucilu kwa maawala gejinji kuti tupate yakusosecela ya paumi wetu soni liŵasa lyetu. Mwine tukusalaga kuti tusamalile maukumu ga mwiŵasa, tukusalwala, tukusalaga nganisyo kapena tukusalaga ligongo lya ucekulu. Ana mpaka tukombole camtuli kukwanilisya undumetume wetu kwineku tuli mkupilila yakusawusyayi?
3. Ana maloŵe ga Yesu ga pa Mateyu 13:23 gakusagopolela cici?
3 Naga tukusalepela kutenda yejinji mu undumetume wa Yehofa ligongo lya yakusawusya ya paumi wetu, ngatukusosekwa kutenguka. Yesu jwamanyililaga kuti ngaŵa jwalijose jwetuwe cacisogola yisogosi ya Ucimwene yakulandana ni ŵane. (Aŵalanje Mateyu 13:23.) Yehofa akusayamicila yiliyose yatukusatenda pakumtumicila, mnopemnope naga tukutenda yosope yampaka tukombole. (Aheb. 6:10-12) Ndaŵi sine, mwakamulana ni mwayiŵelele yindu paumi wetu mpaka tulipikaneje kuti mpaka tukombole kutenda yindu yejinji. Mungani ajino, citulole yampaka tutende kuti undumetume wetu uŵeje pamalo gandanda paumi wetu, soni kuti pakapagwaga yindu yakusokonasya undumetume wetu. Citulolesoni yampaka tutende kuti tulalicileje soni kwiganya mwakamula mtima. Nambo candanda, ana kukwanilisya undumetume wetu kukusagopolela cici?
4. Ana kukwanilisya undumetume wetu kukusagopolela cici?
4 Mwakata mpaka tujile kuti kukwanilisya undumetume wetu kukugopolela kuti tukusosekwa kukamula masengo gakulalicila, soni kwiganya mwakamulana ni mwampaka tukombolele. Kukwanilisya undumetume wetu ngakukusagamba kudalila pandaŵi jatukusamalila pa kulalicila. Nambo cacili cakusosekwa kwa Yehofa cili cakulinga catukusalalicilila. Ligongo lyakuti tukusamnonyela Yehofa soni acimjetu, tukusakamula undumetume wetu ni mtima wosope. * (Mak. 12:30, 31; Akolo. 3:23) Kutumicila Mlungu ni mtima wetu wosope kukusagopolela kulipeleka jika, pakamulicisya masengo macili getu mwakamulana ni mwampaka tukombolele pakumtumicila jwalakwe. Patumanyilile kuti uli upile kukamula masengo gakulalicila, tukusalingalinga kulalicila ngani syambone kwa ŵandu ŵajinji mwakamulana ni mwampaka tukombolele.
5-6. Ana mundu jwangakutenda yejinji mu undumetume mpaka awuŵice camtuli undumetume pamalo gandanda? Apelece cisyasyo.
5 Agambe ganicisya ya mnyamata jwakusangalala ligongo lyakwimba gitala. Jwalakwe akusanonyela kwimba nyimbo pandaŵi jilijose japatile lipesa. Kaneko, jwalakwe akupata masengo gakuti akajimbeje gitala pamalo gane kumbesi kwa yijuma. Nambope jwalakwe ngakupata mbiya syakwanila syakulikamucisya paumi wakwe. Kaneko jwalakwe akupata kaganyu kakuti akamuleje kutyocela Lyakulemba mpaka Lyamsano, nambo ka mbiya syamnono. Nambo atamose kuti akukamula kaganyuka, mtima wakwe uli pa kwimba nyimbo basi. M’yoyo, jwalakwe akulingalinga kusya lunda lwakwe lwakwimba kuti caŵe jwakwimba jwakutamilicika. Atamose yili m’yoyo, jwalakwe akusasangalala papatile kandaŵi kalikose kakuti akajimbe nyimbo.
6 Mwakulandana ni yeleyi, mwine yikusaŵaga yakusawusya kuti tumalileje ndaŵi jejinji mu undumetume, atamose kuti tukusasakaga kuti tumalileje ndaŵi jejinji paundumetume wetu. Tukusalingalinga kongolela lunda lwetu lwakwiganya kuti twayiceje pamtima ŵandu ni ngani syambone. Ligongo lyakuti akwete yakutenda yejinji ya paumi, mwine mpaka asacilileje kumanyilila yampaka atende kuti masengo gakulalicila gaŵeje pamalo gandanda paumi wawo.
YAMPAKA ATENDE KUTI UNDUMETUME UŴEJE PAMALO GANDANDA PAUMI WAWO
7-8. Ana mpaka tumsyasye camtuli Yesu pangani ja undumetume?
7 Yesu jwapelece cisyasyo cambone pangani ja undumetume. Cindu cakusosekwa mnope paumi wakwe caliji kuŵeceta yakwamba Ucimwene wa Mlungu. (Yoh. 4:34, 35) Jwalakwe jwajendaga lutando lwelewu kuti akalalicile ŵandu ŵajinji. Jwalakwe jwasosagasosaga mipata kuti aŵecetane ni ŵandu kulikose kapena m’majumba gawo. Undumetume ni wawaliji cindu candanda paumi wa Yesu.
8 Mpaka tusyasye cisyasyo ca Klistu mwakusosasosa mipata jakuŵecetana ni ŵandu pakwamba ya ngani syambone ndaŵi jilijose soni kulikose. Tuli ŵakusacilila kutenda yiliyose yampaka tukombole kuti tujigale nawo mbali pa masengo gakulalicila. (Mak. 6:31-34; 1 Pet. 2:21) Abale ni alongo ŵane akutumicila mpela apayiniya ŵapajika, ŵakutamilicika soni ŵane ŵakamucisya. Ŵane alijiganyisye ciŵeceto cine kapena kusamila kumkuli wawukusosecela ŵakulalicila ŵajinji. Nambope, masengoga gakukamulidwa mnope ni abale ni alongo ŵele ngakutenda yejinji mu undumetume, nambo akusatenda yiliyose yampaka akombole. Mulimose mwampaka yiŵele, Yehofa jwangatuŵenda kuti tutende yindu yanganituŵa tukombwele kutenda. Jwalakwe akusasaka kuti tusangalaleje patukumtumicila, patukulalicila “utenga waucimbicimbi wakutyocela kwa Mlungu jwakusangalala.”—1 Tim. 1:11; Det. 30:11, NW.
9. (a) Ana Paulo jwaŵisile camtuli masengo gakulalicila pamalo gandanda, atamose kuti jwakamulagasoni masengo gakucilu? (b) Ana lilemba lya Masengo 28:16, 30, 31 likusalosya camtuli muŵawuwonelaga Paulo undumetume wakwe?
9 Ndumetume Paulo jwalosisye cisyasyo cambone mwakuwuwona undumetume kuŵa cindu cakusosekwa mnope paumi wakwe. Pandaŵi jaŵaliji ku Kolinto, paulendo wakwe waŵili wa umishonale, jwalakwe nganakola mbiya syejinji mwamti ŵasosekwaga kamula masengo gakutota matenti kuti apateje mbiya. Nambope, masengo gakutota matentiga nganagawonaga kuŵa gakusosekwa mnope. Jwalakwe jwakamulaga masengoga pakusaka kuti apateje kanekakwe kwineku ali mkulalicila ngani syambone kwa ŵandu ŵa ku Kolinto. Paulo jwatendaga yeleyi kuti ŵanduwo akamlipilaga. (2 Akoli. 11:7) Atamose kuti Paulo jwasosekwaga kukamula masengo gakucilu, jwalakwe jwapitilisye kuŵika undumetume pamalo gandanda, soni jwalalicilaga palisiku lyakupumula kapena kuti Sabata. Nambo yindu payatandite kwenda cenene paumi wakwe, Paulo jwalipelece mnope pa masengo gakulalicila. Jwalakwe “ŵapelece ndaŵi jakwe josope kulalicila maloŵe ga Mlungu, ni kwasimicisya Ayuda kuti Yesu ali Mkulupusyo [Klistu, NW].” (Mase. 18:3-5; 2 Akoli. 11:9) Kaneko, pajwaliji mu ukayidi wa panyumba ku Loma kwa yaka yiŵili, Paulo jwalalicilaga kwa ŵandu ŵaŵayikaga kukumlola soni jwalembaga yikalata. (Aŵalanje Masengo 28:16, 30, 31.) Paulo nganakunda kuti cilicose cisokonasye undumetume wakwe. Jwalakwe jwalembile kuti, “Mlungu. . . , ŵatupele masengo gelega, ni ligongo lyakwe ngatukwasa mtima.” (2 Akoli. 4:1) Mwakulandana ni Paulo, m’wejisoni atamose kuti tukusamalila ndaŵi jejinji pakamula masengo gakucilu, mpaka tuŵiceje masengo ga Ucimwene pamalo gandanda paumi wetu.
Pana matala gejinji gakutukamucisya kukwanilisya undumetume wetu (Alole ndime 10-11)
10-11. Ana mpaka tukwanilisye camtuli undumetume wetu atamose kuti tukwete yakusawusya m’cilu?
10 Naga nganituŵa tukombwele kulalicila nyumba ni nyumba ligongo lyakuti tukalambele kapena kulwalalwala, nambope, mpaka tulalicileje pakukamulicisya masengo matala gane. Aklistu ŵandanda ŵalalicilaga ŵandu kulikose kwaŵasimanaga. Jemanjaji ŵalalicilaga pandaŵi jilijose soni kulikose kwaŵasimanaga ŵandu, cinga kunyumba ni nyumba kapena pamalo gakusimanikwa ŵandu ŵajinji. (Mase. 17:17; 20:20) Naga nganituŵa tukombwele kwenda lutando lwelewu, mpaka tutame pamalo pakusapitapita ŵandu ni kulalicilaga. Kapena mpaka tulalicileje mwaupile, kulemba yikalata kapena ulaliki wa pafoni. Abale ni alongo ŵajinji ŵanganaŵa akombwele kulalicila ku nyumba ni nyumba ligongo lya yakusawusya ya mcilu, akusasangalala ni undumetume pakamulicisya masengo matalaga.
11 Mwangasamala kandu kuti nganituŵa tukombwele kutenda yejinji, nambope mpaka tukwanilisye undumetume wetu. Kwende tulolesoni cisyasyo ca ndumetume Paulo cila. Jwalakwe jwatite, “Mu yindu yosope, ngusapataga macili kutyocela kwa jwele jwakusamba macili.” (Afil. 4:13, NW) Paulo jwasosekwe macili gelega pandaŵi jaŵalwasile, paulendo wakwe wine wa umishonale. Jwalakwe jwasalile Agalatiya kuti, “Mpela mkukumbucila kuti pinatandite kumlalicila jemanja Ngani Syambone, une nalwalaga.” (Aga. 4:13) Mwakulandana ni muyaŵelele kwa Paulo, naga tukwete yakusawusya ya m’cilu, tukwete upile wakuti mpaka tulalicile ngani syambone kwa ŵane, cinga kwa madokotala kapena kwa ŵane ŵakusakamula masengo m’cipatala. Pandaŵi jele abale ni alongo akusajawulaga m’majumba mwa jemanjaji, akusaŵaga ali kumasengo.
YAMPAKA ATENDE KUTI ATAMEJE NI UMI WANGASAKA YEJINJI
12. Ana kulola cindu cimo kukusagopolela cici?
12 Yesu jwatite, “Liso lili nyali ja cilu. M’yoyo, naga liso likulola cindu cimo, cilu cosope ciciŵa cakuŵala.” (Mat. 6:22) Ana pelepa Yesu jwagopolelaga cici? Jwalakwe jwagopolelaga kuti umi wetu ukusosekwa kulolaga pa cakulinga cimo. Tukakunda kuti yindu yine yitusokonasye. Yesu jwalosisye cisyasyo cambone pangani jeleji mwakuŵika umi wakwe wosope pa undumetume. Soni jwajiganyisye ŵakulijiganya ŵakwe kuti nombe nawo nganisyo syawo syosope siŵeje pakutumicila Yehofa soni pa Ucimwene wakwe. Tukusakuya cisyasyo ca Yesuci mwakuŵika umi wetu wosope pa masengo gakulalicila, ‘kutanda kusosasosa yindu yayili yakusosekwa mnope mu Ucimwene wa Mlungu.’—Mat. 6:33.
13. Ana cici campaka citukamucisye kuti tuŵiceje nganisyo syetu syosope pa undumetume wetu?
13 Kuti tulosye kuti tukuŵika nganisyo syetu syosope pa undumetume wetu, tukusosekwa kumalilaga ndaŵi jamnono pa yindu yangasosekwa mnope. Yeleyi mpaka yitukamucisye kuti tumalileje ndaŵi jejinji pakwakamucisya ŵane kuti ammanyilile soni kumnonyela Yehofa. * Mwacisyasyo, ana mpaka tunandiye ndaŵi jatukusamalila pakamula masengo gakucilu kuti tupateje ndaŵi jejinji jakwinjilila mu undumetume mkati mwa wiki? Ana mpaka tunandiye yakusangalasya yatukusatenda yayikusajigala ndaŵi jejinji?
14. Ana liŵasa line lyacenjile yindu yapi pakusaka kuti lipateje ndaŵi jakwanila jakulalicilila?
14 Yeleyi ni yajwatesile jwamkulungwa jwampingo jwine lina lyakwe Elias, ni ŵamkwakwe. Jwalakwe jwasasile kuti, “Pandaŵi jatwasakaga kutanda kutenda yejinji mu undumetume nganituŵa apayiniya, nambo papali yindu yine yatukatesile kuti tumalileje ndaŵi jejinji mu undumetume. M’yoyo, twacenjile yindu yine kuti tukomboleje kumalila ndaŵi jelewu mu undumetume. Mwacisyasyo, twanandiye yakusumasuma. Twamanyilile kuti tukusamalila ndaŵi jelewu pa yakusangalasya. M’yoyo, twacenjilesoni pelepa. Twaŵendilesoni abwana ŵetu kuti atupungule ndaŵi jakukamulila masengo kuti tupateje ndaŵi jakwanila jakulalicilila. Yakuyicisya yakwe yaliji yakuti, twakombolaga kulalicila nawo ligulo, kutendesya majiganyo ga Baibulo gejinji, soni twalalicilaga nawo mkati mwa wiki kaŵili pa mwesi. Yeleyi yaliji yakusangalasya kwabasi.
YAMPAKA ATENDE KUTI AKUSYE LUNDA LWAWO LWAKULALICILILA SONI KWIGANYA
Naga tukusakamulicisya masengo yatukusalijiganya m’misongano ja mkati mwa wiki, tucipitilisya kuŵa ŵakulalicila soni ŵakwiganya ŵambone (Alole ndime 15-16) *
15-16. Mwakamulana ni lilemba lya 1 Timoteo 4:13, 15, ana mpaka tupitilisye camtuli kukusya lunda lwetu lwakwiganya? (Alole libokosi lyakuti “Yakulinga Yampaka Yitukamucisye Kukwanilisya Undumetume Wetu.”)
15 Litala line lyakutukamucisya kukwanilisya undumetume wetu lili kukusya lunda lwetu pa masengo gakulalicila. Ŵandu ŵakusakamula masengo ganegakwe akusapocela majiganyo gakwayana ni masengogo pakusaka kuti akusye lunda lwawo pamasengogo. Yeleyisoni ni yayikusosekwa kutendekwa ni ŵakulalicila ya Ucimwene. Tukusosekwa kupitilisya kulijiganya mwampaka tukucisye lunda lwetu lwakwiganya mu undumetume wetu.—Mis. 1:5; aŵalanje 1 Timoteo 4:13, 15.
16 Nambo, ana mpaka tupitilisye camtuli kukusya umanyilisi wetu mu undumetume? Mwakutenda lung’wanu ni yatukusalijiganya cijuma cilicose Pamsongano wa Undumetume ni Umi Waciklistu. Msonganowu ukusatukamucisya kuti tukusye lunda lwetu lwakwiganya mu undumetume. Mwacisyasyo, pandaŵi jele ceyamani akumkamucisya jwakulijiganya, mpaka tulijiganye yindu yine yampaka yitukamucisye kongolela undumetume wetu. Yatulijiganyisyeyo mpaka tuyikamulicisye masengo pandaŵi jine patukukambilana ni mundu ya ngani syambone. Mpaka tumŵende jwakulolela kakuga ketu ka undumetume wa mumgunda kuti atukamucisye, kapena kwenda najo mu undumetume. Mpaka tujendesoni ni jwakulalicila jwine jwasyoŵelele undumetume, kapena mpayiniya soni jwakulolela mkuli. Patumanyilile kakamulicisye masengo ga cida cilicose cacili mu Yida Yakamulicisya Masengo Pakwiganya, tucisangalala ni undumetume wetu.
17. Ana tucipata cici patukwanilisya undumetume wetu?
17 Tukwete upile wekulungwa mnope ligongo lyakuti Yehofa atukundile kuti tuŵe “ŵamasengo acimjakwe ŵa Mlungu.” (1 Akoli. 3:9, NW) Patukulingalinga “kusagula ayo yayili yambone mnope” soni kuŵika nganisyo syetu syosope pa undumetume wetu, ‘tucitumicila Ambuje mwakusangalala.’ (Afil. 1:10; Sal. 100:2) Mpela jumo mwa ŵakutumicila ŵa Mlungu, mpaka tuŵe ŵakusimicisya kuti jwalakwe cacitupa macili kuti tukwanilisye undumetume wetu, atamose tusimane ni yakusawusya yamtuli. (2 Akoli. 4:1, 7; 6:4) Cinga yakutendekwa ya paumi wetu yikusatukunda kutenda yamnono kapena yejinji pamasengo gakulalicila, nambope komboleka “kusengwa kapena kuti kusangalala ligongo lya masengo” getugo naga tukulipeleka ni mtima wetu wosope mu undumetume wetu. (Aga. 6:4) Patukukwanilisya undumetume wetu, tukusalosya kuti tukusamnonyela Yehofa soni acimjetu. Baibulo jikusasala kuti, “Naga mkutenda yeleyi, timcilikulupusya mwasyene, nambo soni ŵandu ŵakusagapikanila maloŵe genu.”—1 Tim. 4:16.
NYIMBO 58 Tuwungunyeje Acimjetu Ŵamtendele
^ ndime 5 Yesu ŵatulamwile kuti tulalicileje ngani syambone syakwamba ya Ucimwene soni kuti tupanganye ŵakulijiganya. Mungani ajino, citulole yampaka tutende kuti tukwanilisye undumetume wetu, atamose kuti tukusasimana ni yakusawusya paumi wetu. Citulijiganyesoni mwampaka tuŵele ŵakulalicila ŵambone soni yampaka tutende kuti tusangalaleje patukulalicila.
^ ndime 4 NGOPOLELO JA MALOŴEGA: Undumetume wetu ukusapwatikapo kulalicila soni kwiganya, kutaŵa soni kulinganya Nyumba sya ucimwene, malo gakutendela misongano, Beteli, nambosoni maofesi gagopolela mabuku. Ukusapwatikaposoni kukamucisya pamasengo gakwakamucisya ŵandu ŵajatendecele ngosi.—2 Akoli. 5:18, 19; 8:4.
^ ndime 13 Alole matala 7 gagakusimanikwa mu libokosi lya mtwe wakuti “Yampaka Atende Kuti Akole Umi Wangasaka Yejinji,” kutyocela mu Sanja ja Mlonda ja July 2016, p. 10.
^ ndime 62 KULONDESYA YIWULILI: Mlongo akutenda cisyasyo ca ulendo wakuwilisya pandaŵi ja misongano ja mkati mwa wiki. Kaneko, pandaŵi jele ceyamani akumkamucisya, jwalakwe akulemba yiwundo yakamucisya mkabuku ka Kajiganye. Kaneko, kumbesi kwa cijuma, jwalakwe akukamulicisya masengo yalijiganyisyeyo mu undumetume.
