1-2. Ligongo cici Yesu jwalasile nganisyo mnope?

PA LISIKU lyakumalisya lya umi wakwe, Yesu jwalasile mnope. Jwalakwe jwaliji ali asigele panandi kuti alagasidwe soni kuwulajidwa ni ŵandu ŵakusakala. Nambo Yesu nganagambaga kudandawula ligongo lyakuti jwaliji ali asigele panandi kuwulajidwa. M’malo mwakwe, jwalakwe jwanonyelaga mnope Atatigwe soni jwaliji jwakusacilila kwalumba. Yesu jwamanyililaga kuti naga akupitilisya kuŵa jwakulupicika pandaŵi jakusawusya jaŵasigele panandi kusimana najo, nikuti akalitendekasisye lina lya Yehofa kucimbicika. Yesu jwanonyelaga ŵandu, soni jwamanyililaga kuti cembeceyo ca ŵandu cakutama ni umi wangamala cadalilaga naga jwalakwe akupitilisya kuŵa jwakulupicika mpaka pandaŵi ja ciwa cakwe.

² Atamose kuti Yesu jwalagaga mnope ni nganisyo, nambope jwakwete mtendele wa mumtima. Jwalakwe jwasalile ŵandumetume ŵakwe kuti, “Mtendele ni ngumlecela jemanja, mtendele wakwe wa une namsyene ni ungwapa.” (Yoh. 14:27) Yesu jwakwete “mtendele wa Mlungu,” soni jwaliji jwakuwusimana mtima, yayikusayika ligongo lyakuŵa paunasi ni Yehofa. Mtendelewu wamkamucisye Yesu kuti akadandawulaga.—Afil. 4:6, 7.

3. Ana citukambilane cici mungani ajino?

³ Pangali jwalijose jwampaka asimane ni yakusawusya yakulandana ni yaŵasimene nayo Yesu. Nambope, wosope ŵakusamkuya Yesu casimaneje ni yakulingwa. (Mat. 16:24, 25; Yoh. 15:20) Mpela muyaŵelele ni Yesu, ndaŵi sine citusimaneje ni yakusawusya. Ana mpaka tutende cici kuti tukalagaga nganisyo soni kuti tukole mtendele wa mumtima? Kwende tukambilane yindu yitatu yaŵatesile Yesu pa undumetume wakwe wa pacilambo capasi soni citulole yampaka tutende pakumsyasya jwalakwe patukusimana ni yakulingwa.

4. Mwakamulana ni lilemba lya 1 Atesalonika 5:17, asale yisyasyo yakulosya kuti Yesu jwapopelaga kaŵilikaŵili kumbesi kwa umi wakwe.

⁴ Aŵalanje 1 Atesalonika 5:17. Cilo cakumalisya ca umi wakwe wa pacilambo capasi, Yesu jwapopesile mwakuwilisyawilisya. Pajwajiganyisye ŵakulijiganya ŵakwe mwampaka atendele mwambo wakumbucila ciwa cakwe, jwalakwe jwapelece lipopelo lya mkate ni finyo. (1 Akoli. 11:23-25) Mkanatyoce pamalo paŵatendelaga pasaka, Yesu jwapopelele ŵakulijiganya ŵakwe. (Yoh. 17:1-26) Jwalakwe ni ŵakulijiganya ŵakwe paŵaliji pa litumbi lya Getisemane cilo, jwapopesilesoni mwakuwilisyawilisya. (Mat. 26:36-39, 42, 44) Nambosoni maloŵe gaŵaŵecete kumbesi kwa umi wakwe galiji mu lipopelo. (Luk. 23:46) Yesu jwamsalile Yehofa yindu yosope yayatendekwaga palisiku lyakumalisya lya umi wakwe wa pacilambo capasi.

5. Ligongo cici cikulupi ca ŵakulijiganya ŵa Yesu canandipe?

⁵ Ligongo limo lyalyamtendekasyaga Yesu kupilila yakulingwa yakwe lyaliji lyakuti jwalakwe jwadalilaga Atatigwe kupitila m’lipopelo. Ŵandumetume ŵakwe ndaŵi jine ŵalepele kuŵa mesope. Yakuyicisya yakwe yaliji yakuti cikulupi cawo catandite kunandipa pandaŵi jaŵasimene ni yakulingwa. (Mat. 26:40, 41, 43, 45, 56) Patusimene ni yakulingwa, mpaka tupitilisye kuŵa ŵakulupicika naga tukusakuya cisyasyo ca Yesu soni “kupopela.” Ana mpaka tupopeleleje cici?

6. Ana cikulupi mpaka citukamucisye camtuli kola mtendele wa mumtima?

⁶ Mpaka tupopeleje kwa Yehofa kuti “atujonjecesye cikulupi” (Luk. 17:5, NW; Yoh. 14:1) Tukusasosekwa cikulupici ligongo lyakuti Satana akumlinga jwakumkuya jwa Yesu jwalijose. (Luk. 22:31) Ana cikulupi mpaka citukamucisye camtuli kupitilisya kola mtendele  wa mumtima, atamose kuti tukusasimana ni yakulingwa ndaŵi ni katema? Patutesile yiliyose yampaka tukombole kuti tumalane ni yakusawusya, cikulupici mpaka citukamucisye kuleka kudandawula ligongo tukusamanyilila kuti Yehofa cacilinganya yindu pandaŵi jwakwe. Ligongo lyakuti tukusakulupilila kuti jwalakwe mpaka atende yindu cenene kupunda mutukatendele m’weji, tukusakola mtendele wa mumtima.—1 Pet. 5:6, 7.

7. Ana tukulijiganya cici kutyocela pa yaŵaŵecete Robert?

⁷ Lipopelo mpaka litukamucisye kola mtendele wa mumtima mwangasamala kandu ni yakulingwa yatukusasimana nayo. Kwende tuganicisye cisyasyo ca jwamkulungwa jwa mumpingo jwine lina lyakwe Robert, apano akwete yaka ciŵandika 80. Jwalakwe jwasasile kuti, “Maloŵe gagali pa Afilipi 4:6, 7 gangamucisye kumalana ni yakusawusya yangu. Nalagaga ligongo nganingola mbiya. Nambosoni kwakandaŵi, nalesile kutumicila mpela jwamkulungwa jwa mumpingo.” Ana ni cici cacamkamucisye Robert kupitilisya kola mtendele wa mumtima? Jwalakwe jwasasile kuti, “Pandandite kulaga nganisyo napopelaga. Ngasingulupilila kuti pandaŵi janapopelaga ni janakolaga mtendele wa mumtima.”

8. Mwakamulana ni lilemba lya Yohane 8:29, ana ligongo line lyapi lyalyamtendekasisye Yesu kola mtendele wa mumtima?

⁸ Aŵalanje Yohane 8:29. Atamose kuti Yesu jwalagasidwe, jwalakwe jwakwete mtendele wa mumtima ligongo lyakuti jwamanyililaga kuti jwasangalasya Atatigwe. Jwapitilisyesoni kuŵa jwakupikanila, pandaŵi jele yaliji yakusawusya kwa jwalakwe kutenda yeleyi. Jwalakwe jwanonyelaga mnope Atatigwe, soni cindu cakusosekwa mnope paumi wakwe caliji kumtumicila  Yehofa. Mkanayice pacilambo capasi jwalakwe jwaliji “m’misili” jwa Mlungu. (Mis. 8:30) Nambosoni ali ayice pacilambo capasi, jwalakwe jwajiganyaga ŵandu ŵane mwakulimbicila yakwamba Atatigwe. (Mat. 6:9; Yoh. 5:17) Masengoga gamtendekasisye Yesu kuŵa jwakusangalala mnope.—Yoh. 4:34-36.

9. Ligongo cici tukusakola mtendele wa mumtima patukutenda yejinji pa masengo gakulalicila?

⁹ Mpaka tumsyasye Yesu mwakumpikanila Yehofa soni kukamula “masengo ga Ambuje mwacitema masiku gosope.” (1 Akoli. 15:58) Patukupeleka “ndaŵi jetu josope” pa masengo gakulalicila, tukusakolaga nganisyo syakuŵajilwa pakwamba yakusawusya yetu. (Mase. 18:5) Mwacisyasyo, patuli mu undumetume tukusasimana ni ŵandu ŵakusasimana ni yakusawusya yekulungwa kulekangana ni m’weji. Nambo patandite kulijiganya ya cinonyelo ca Yehofa soni kamulicisyaga masengo yalijiganyisyeyo, akusaŵaga ŵakusangalala mnope. Ndaŵi syosope patukulola yeleyi yili mkutendekwa, tukusaŵaga ŵakusimicisya kuti Yehofa cacitusamalila. Kusimicisya kweleku kucitukamucisya kuti tupitilisye kola mtendele wa mumtima. Mlongo jwine jwaŵele ali mkulagasika nganisyo kwandaŵi jelewu soni jwaŵele mkulipikana kuti jwangali mate, akusagawona maloŵega kuŵa gasyesyene. Jwalakwe jwasasile kuti, “Pangukola yakutenda yejinji mu undumetume ngusalipikana kuŵa jwakusangalala mnope. Nguganisya kuti pandili mu undumetume wa mumgunda ngusalipikana kuŵa jwakuŵandikana mnope ni Yehofa.”

10. Ana tukulijiganya cici kutyocela pa yaŵasasile Brenda?

¹⁰ Aganicisyesoni ya cisyasyo ca mlongo jwine lina lyakwe Brenda. Jwalakwe soni mwanace jwakwe jwamkongwe akusalwala ulwele wekulungwa. Ligongo lya ulwelewu, Brenda akusalepela kwenda mwamti akusasosekwa kwendela pa njinga ja ŵandu ŵalemale. Ndaŵi sine jwalakwe akusalalicila mlango ni mlango, nambope ndaŵi syejinji akusalalicila pakamulicisya masengo yikalata. Jwalakwe jwasasile kuti, “Najiticisye kuti ulwelewu ngaŵa mkupola mu ndaŵi jetu jino. M’yoyo, ngusalipeleka mnope pa masengo gakulalicila. Kusala yisyene, pangulalicila jwangaganicisyasoni yakusawusya yangu. M’malo mwakwe, ngusanganicisyaga yakwakamucisya ŵandu ŵane ŵangusasimana nawo mu undumetume. Pangulalicila ngusaganicisyaga mnope ya cembeceyo cangu ca msogolo.”

11-13. (a) Ana ŵandumetume soni ŵandu ŵane ŵalosisye camtuli kuti ŵaliji acimjakwe ŵasyesyene ŵa Yesu? (b) Ana acimjakwe ŵa Yesu ŵamtendekasisye camtuli jwalakwe kuŵa jwakusangalala?

¹¹ Pandaŵi josope jaŵalalicilaga Yesu, ŵandumetume ŵakwe ŵakulupicika ŵaliji acimjakwe ŵasyesyene. Jemanjaji ŵaliji acimjakwe ŵasyesyene ŵakusiŵakolanga m’Baibulo kuti, “Pana mjakwe jwine jwakusakunyambatila kupunda mlongo mjako.” (Mis. 18:24) Yesu jwawonaga acimjakwe ŵeleŵa kuŵa ŵakusosekwa mnope. Pandaŵi ja undumetume wakwe pangali acalongo acimjakwe ŵakucilu ŵaŵakulupilile mwa jwalakwe. (Yoh. 7:3-5) Pandaŵi jine, ŵacibale ŵakwe ŵayikene pakuganisya kuti jwalakwe atesile masoka. (Mak. 3:21) Mwakulekangana ni yeleyi, Yesu jwasalile ŵandumetume ŵakwe ŵakulupicika palisiku lya kumalisya lya umi wakwe kuti, “Jemanja ni ŵimtemi ni une mu yisawusyo yangu yosope.”—Luk. 22:28.

¹² Ndaŵi syejinji ŵandumetume ŵakwe ŵamkuŵasyaga Yesu. Nambo jwalakwe nganagambaga kulolecesya yakulemwecekayo, m’malo mwakwe jwawonaga kuti akwete cikulupi. (Mat. 26:40; Mak. 10:13, 14; Yoh. 6:66-69) Cilo cakumalisya ali ni ŵandumetume ŵakwe, Yesu jwasalile acalume ŵakulupicikaŵa kuti, “Ngumkolanga kuti acimjangu ligongo nimsalile yosope yimbikene kutyocela kwa Atati ŵangu.” (Yoh. 15:15) Ngatukukayicila kuti acimjakweŵa ŵamlimbikasisye mnope jwalakwe. Jemanjaji ŵamkamucisye Yesu kusangalala mnope  ni undumetume wakwe waŵawutesile jwalakwe.—Luk. 10:17, 21.

¹³ Konjecesya pa ŵandumetumeŵa, Yesu jwakwetesoni acimjakwe ŵane acalume soni acakongwe ŵaŵamkamucisyaga jwalakwe pa masengo gakulalicila m’matala gane. Ŵane ŵamŵilanjilaga Yesu kunyumba syawo kuti akalye yakulya yalumo. (Luk. 10:38-42; Yoh. 12:1, 2) Ŵanesoni ŵajendaga ni Yesu mwamti ŵagaŵanaga najo yindu yaŵakwete. (Luk. 8:3) Yesu jwakwete acimjakwe ŵambone ligongo lyakuti jwalakwe jwaliji mundu jwambone kwa acimjakwewo. Jwalakwe jwatendelaga yindu yambone acimjakwewo, nambo nganajembeceyaga kuti jemanjajo camtendeleje yindu yakuti nganaŵa ayikombwele. Yesu jwaliji jwamlama nambope jwalakwe jwayamicilaga mnope cikamucisyo caŵapocelaga kutyocela kwa acimjakwe ŵangali umlamawo. Mpaka tuŵesoni ŵakusimicisya kuti jemanjaji ŵamkamucisye Yesu kukola mtendele wa mumtima.

14-15. Ana mpaka tutende wuli kuti tukole acimjetu ŵambone soni ana jemanjaji mpaka atukamucisye camtuli?

¹⁴ Acimjetu ŵambone mpaka atukamucisye kuŵa ŵakulupicika kwa Yehofa. Kuti tukole acimjetu ŵambone tukusosekwa kuŵa ŵandu ŵambone. (Mat. 7:12) Mwacisyasyo, Baibulo jikusatulimbikasya kuti tukamulicisyeje masengo ndaŵi soni macili getu pakwakamucisya ŵandu ŵane, mnopemnope “ŵakulaga.” (Aef. 4:28) Ana mpaka tuganicisye ya mundu jwine mu mpingo mwetu jwampaka tumkamucisye? Ana mpaka tukamsumile yindu mundu jwakulepela kutyoka pa nyumba jakwe ligongo lya ukalamba kapena ligongo lya kulwala? Ana mpaka tulikamucisye liŵasa lyakulaga? Naga tukumanyilila kakamulicisye masengo ka webusayiti ja jw.org^® soni pologalamu ja JW Library^® ana mpaka twakamucisyesoni ŵandu ŵane mumpingo mwetu mwampaka akamulicisye masengo mbali syelesi? Patukwakamucisyasoni  ŵandu ŵane, tukusaŵaga ŵakusangalala mnope.—Mase. 20:35.

¹⁵ Acimjetu mpaka atukamucisye pandaŵi jatusimene ni yakulingwa soni kuti tupitilisye kola mtendele wa mumtima. Mpela muyaŵelele ni Elihu juŵampikanilaga Yobu ali mkusala yakusawusya yakwe, acimjetusoni mpaka atupikanileje mwakulitimalika patukwasalila yakusawusya yetu. (Yob. 32:4) Nambo tukajembeceyaga kuti acimjetu catusalileje yakutenda, m’malo mwakwe mpaka tuŵe ŵalunda naga tukupikanila cikamucisyo cawo cakutyocela m’Baibulo. (Mis. 15:22) Mwenye Daudi jwapocelaga cikamucisyo kutyocela kwa acimjakwe. M’wejisoni mwakulinandiya tukusosekwa kupocela cikamucisyo kutyocela kwa acimjetu. (2 Sam. 17:27-29) Kusala yisyene, acimjetuŵa ali mbaso jakutyocela kwa Yehofa.—Yak. 1:17.

16. Mwakamulana ni lilemba lya Afilipi 4:6, 7, ana ni litala lyapi lyampaka tupatile mtendele wa mumtima? Alondesye.

¹⁶ Aŵalanje Afilipi 4:6, 7, NW. Ligongo cici Yehofa akusatusalila kuti mpaka atupe mtendele wa mumtima wakusapeleka kupitila “mwa Klistu Yesu”? Mpaka tukole mtendele wa mumtima, naga tukukulupilila soni kumanyilila udindo wakwete Yesu pa cakulinga ca Yehofa. Mwacisyasyo, kupitila mu mbopesi ja ciwombolo ca Yesu, yakulemwa yetu yosope yikusakululucidwa. (1 Yoh. 2:12) Yeleyi yili yakutondoya kwabasi. Yesu mpela Mwenye jwa Ucimwene wa Mlungu, cacilinganya yindu yosope yajonasile Satana pampepe ni cilambo cakweci. (Yes. 65:17; 1 Yoh. 3:8; Ciw. 21:3, 4) Yeleyi yikusatupa cembeceyo cakusangalasya mnope. Atamose kuti Yesu atupele undumetume ŵakusawusya mnope, nambope jwalakwe ali ni m’weji, catukamucisyeje mpaka kumbesi kwandaŵi ajino. (Mat. 28:19, 20) Yeleyi yili yakulimbikasya. M’yoyo, citondoyo, cembeceyo soni kulimbikasya yili yindu yampaka yitukamucisye kola mtendele usyesyene wa mumtima.

17. (a) Ana Mklistu mpaka akole mtendele wa mumtima camtuli? (b) Mwakamulana ni cilanga cacili pa lilemba lya Yohane 16:33, ana tucikombola kutenda cici?

¹⁷ Ana mpaka tutende wuli kuti tukole mtendele wa mumtima patusimene ni yakulingwa? Mpaka tutende yeleyi pakujigalila yindu yaŵatesile Yesu. Cindu candanda, tukusosekwa kupitilisya kupopela kwa Yehofa mwangasamala kandu ni yindu yayikututendecela. Cindu caŵili, tumpikanileje Yehofa soni tukamuleje masengo gakulalicila mwakulimbicila, atamose yili yakusawusya kutenda yeleyi. Cindu catatu, tupateje acimjetu ŵambone ŵampaka atukamucisyeje patusimene ni yakulingwa. M’yoyo mtendele wa Mlungu mpaka wucenjele mtima wetu. Mpela muyaŵelele ni Yesu, tucikombola kumalana ni yakulingwa yiliyose.—Aŵalanje Yohane 16:33.