MPAYINIYA jwine jwamkongwe jwa yaka 27, lina lyakwe Sylviana jwatite, “Panapikene ya acimjangu ŵaŵatumicilaga ku malo kwakusosecela ŵakulalicila ŵajinji, nasakaga nombene ndili njawile nawo.” Jwalakwe jwasasilesoni kuti, “Nambo nayiwonaga kuti nganimba ngombwele.”

Ana wawojo akwetesoni nganisyo mpela sya Sylviana? Ana wawojosoni aŵele ali mkuganicisya yakwawula kumkuli wawukusosecela ŵakulalicila ya Ucimwene ŵajinji, nambo akuyiwona kuti nganaŵa akombwele? Naga yili m’yoyo, akatenguka. Ni cikamucisyo ca Yehofa, abale ni alongo ŵajinji akombwele kulimbana ni yakusawusya yakwalepelekasya kutenda yejinji mu undumetume. Kuti tupikanicisye cenene mwakusatendela Yehofa pakwakamucisya ŵandu ŵalipelece, kwende tulole yayikutendekwa m’cilambo ca Madagascar cacilisoni cilumba camcece pa yilumba yekulungwa mnope pacilambo capasi.

M’yaka 10 yipiteyi, ŵakulalicila ŵamtawu soni apayiniya ŵakupunda 70 ŵakutyocela ku yilambo 11 * ŵayice kukutumicila m’cilamboci, cacili ku Africa. Ŵandu ŵajinji m’cilamboci akusajicimbicisya Baibulo. Nambosoni, ŵakulalicila ŵajinji ŵa m’cilamboci aŵele ŵakusacilila kwawula m’mikuli jine pacilumbaci kukulalicila utenga wa Ucimwene. Kwende tulole yakwamba ŵane mwa jemanjaji.

Louis ni ŵamkwakwe Perrine ŵa yaka ya m’ma 30, ŵatyosile ku France kwawula ku Madagascar. Mkanasame, kwa yaka yejinji ŵaŵele ali mkuganicisya yakwawula kukulalicila m’cilambo cine, nambo Perrine nganasakaga kusamako. Jwalakwe jwatite, “Natendaga woga kwawula ku malo kwangakumanyilila. Nganisakaga kutalikangana ni acalongo acimjangu. Nganisakagasoni kusama, kuleka yakutenda yetu ya lisiku lililyose, kuleka malo ganagasyoŵelele nambosoni kusamila ku mpingo wine. Yeleyi ni yayaliji yakusawusya yangu yekulungwa.” Nambo mu 2012, Perrine jwalimbile mtima mwamti jwalakwe pampepe ni ŵamkwakwe ŵasamile. Ana jemanjaji ŵapikene wuli paŵasagwile m’yiyi? Louis jwatite, “Panguganicisya yamunyuma, nguyiwona kuti Yehofa ŵangamucisye kuti cikulupi cangu ciŵe cakulimba.” Jwasasilesoni kuti, “Agambe ganicisya, pa Cikumbucilo candanda kutenda nawo ku Madagascar, ŵakulijiganya Baibulo ŵetu ŵakwana 10 ŵayice.”

 Ana cici cacalimbikasisye kuti akaleka undumetume ni kuwujila kumangwawo paŵasimene ni yakusawusya? Jemanjaji ŵamŵendaga Yehofa kuti ŵapeje macili gakwakamucisya kupilila. (Afi. 4:13) Louis jwatite, “Twayiweni kuti Yehofa ŵatujangaga mapopelo getu soni kutupa ‘mtendele wa Mlungu.’ Twaganicisyaga mnope ya cisangalalo catwapataga mu undumetume wetu. Nambosoni, acimjetu ŵakumusi ŵatutumicisyaga mameseji soni yikalata yakutulimbikasya.”—Afi. 4:6, 7; 2 Akoli. 4:7.

Yehofa ŵamjaliwe Louis ni Perrine ligongo lya kupilila kwawo. Louis jwatite, “Mu October 2014, twawujile ku France kukutenda nawo Sukulu Jakwiganya Baibulo ja Maŵasa ga Ciklistu. * Kwinjila nawo mu sukuluji galiji majali gangaliŵalicika gakutyocela kwa Yehofa.” Paŵamalisisye majiganyoga, ŵatumisyesoni ku Madagascar.

Liŵasa lya Didier ni Nadine lyasamile ku France ni kwawula ku Madagascar m’caka ca 2010. Pandaŵiji ŵaliji ni yaka ya m’ma 50. Didier jwatite, “Tuli tulombene kwene twatendaga upayiniya, nambo patwakwete ŵanace nganitujendelecelasoni kutenda upayiniya. Ŵanaceŵa ali akusile twaganicisye yakuja kutumicila m’cilambo cine.” Nadine jwatite, “Nganisyo syakuti tulekangane ni ŵanace syandendekasyaga kayicila yakuja kutumicila kwine. Nambo cakusangalasya ni cakuti ŵanacewo ŵatusalile kuti, ‘Naga akusaka kuja kutumicila kumkuli wakusosecela ŵakulalicila ŵajinji, tuciŵa ŵakusangalala.’ Maloŵega gatulimbikasisye kusama. Atamose kuti tukutama kwakutalikangana ni ŵanaceŵa, nambope tukusaŵaga ŵakusangalala ligongo tukusaŵecetana nawo kaŵilikaŵili.”

Yaliji yakusawusya kwa Didier ni Nadine kuti alijiganye ciŵeceto ca Cimalagase. Nadine jwaŵecete kuti, “Nganituŵa mpela ŵanace ŵakusalijiganya ciŵeceto mwangasawusya.” Nambi ŵakombwele cinawuli? Candanda, ŵatandite kusongana mumpingo wa Cifalansa. Kaneko, ali ayiweni kuti mpaka akombole kulijiganya ciŵeceto ca Cimalagase, ŵasamile mumpingo wa ciŵecetoci. Nadine jwatite, “Ŵandu ŵatwasimanaga nawo pakulalicila ŵanonyelaga kulijiganya Baibulo, mwamti ŵatuyamicilaga ligongo lyakwajendela. Pandanda pene nganingulupililaga kuti yeleyi mpaka yitendekwe. Ngusanonyela mnope kutenda upayiniya mumkuli welewu. Panjimwice lisiku lililyose, ngusaŵeceta jika kuti, ‘Eya, njawule kukulalicila sano!’”

Didier jwamwemwetelaga ali agambile kumbucila mwayaŵelaga pandanda pene paŵalijiganyaga Cimalagase. Jwalakwe ŵatite, “Natendesyaga misongano jampingo nambo nganimbikanicisyaga ndemanga sya abale ni alongo. Kwa une nagambaga kuyamicila kuti, ‘Sikomo kwejinji.’ Ndili nam’yamicile mlongo jwine juŵapelece ndemanga, ŵandu ŵaŵatemi munyuma mwakwe ŵatandite kupukunya mitwe kulosya kuti ŵajanjile yangaŵa. Kaneko mwacitema namlanjile m’bale jwine jwele ngukulupilila kuti ŵapelece ndemanga jakulondola.”

Pa msongano waupande wa mu 2005, Thierry ni ŵamkwakwe lina lyakwe Nadia, ŵalolelele seŵelo ja mtwe wakuti “Mkwanilisye Yakulinga Yakumcimbicisya  Yehofa.” Seŵelo ja m’Baibulo jakusala ya Timoteyoji jayice pamtima, mwamti jakamucisye kuti aŵe ŵakusacilila kwawula kukutumicila ku malo kwakusosecela ŵakulalicila ya Ucimwene ŵajinji. Thierry jwatite, “Pambesi pa seŵeloji, tuli mkukwatila m’miyala, nalolegene ni ŵamkwangu ni kwawusya kuti, ‘Sano m’weji ni citujawule kwapi?’ Ŵamkwanguwo ŵasasile kuti nombe nawo ŵaganicisyagasoni kwampaka tujawule.” Ali atyosile pa msonganowu, ŵatandite kutendapo kandu kuti akwanilisye yakulinga yawo. Nadia jwatite, “Mwapanandipanandi, twatandite kunandiya katundu jwetu mpaka twasigele ni katundu jwakwanila m’yikwama mcece.”

Jemanjaji ŵapite ku Madagascar mu 2006 soni akusangalala ni undumetume wawo. Nadia jwatite, “Tukusasangalala mnope ligongo ŵandu ŵatukusalalicila utenga wa Mlungu akusawupikanila.”

Pali pamasile yaka 6, liŵasali lyasimene ni cakusawusya. Mamagwe Nadia, lina lyawo a Marie-Madeleine, ŵaŵatamaga ku France, ŵagwile ni kuposokoka mkono soni kuwulala mumtwe. Pambesi pakuŵecetana ni adokotala ŵa Marie-Madeleine, Thierry ni Nadia ŵaŵendile mama ŵawo kuti ayice ku Madagascar kuti atameje nawo. Atamose kuti pandaŵiji mamaŵa ŵakwete yaka 80, nambope ŵakundile kusama. Ana akusapikana wuli pakutama m’cilambo cine? Mamawo ŵatite, “Ndaŵi sine yikusaŵa yakusawusya kusyoŵelela. Atamose kuti ngangutenda yejinji nambope ngusalipikana kuti ndili jwakusosekwa mumpingo. Nambosoni ngusangalala mnope ligongo lyakuti ŵanace ŵanguŵa akwendelecela kutenda undumetume.”

Riana ali m’bale jwa yaka 22. Jwalakwe ŵakulile ku Alaotra Mangoro, upande wa cajila mnope wawuli kungopoko lyuŵa kwa cilambo ca Madagascar. Jwalakwe jwakombolaga cenene ku sukulu mwamti jwakwete yakulinga yakutenda majiganyo gapenani. Nambo paŵalijiganyisye Baibulo, jwacenjile nganisyo syakwe. Jwalakwe jwatite, “Panalembile mayeso gakumalisya ga kusekondale namlagwisye Yehofa kuti, ‘Naga ngukombola mayeso gangu gakumalisya, cindande upayiniya.’” Pagakopwece mayeso, Riana ŵakumbucile yaŵamlagwisye Yehofa. Jwalakwe pampepe ni m’bale jwine juŵaliji mpayiniya ŵajile kutama pampepe. Jemanjaji ŵatandite tumaganyu kwineku ni kutendaga upayiniya. Riana jwatite, “Nguyiwona kuti nasagwile cenene.”

Nambope, ŵacibale ŵa Riana nganapikanicisyaga ligongo lyakwe jwalakwe nganatenda majiganyo gapenani. Jwalakwe jwatite, “Baba ŵangu, baba ŵanandi, soni anganga ŵalimbikasyaga kuti ndende majiganyo gapenani. Nambo nganingunda kuti cilicose cindepelekasye kutenda upayiniya.” Mkanipapite ndaŵi, Riana jwasakaga kwawula kukutumicila ku malo kwakusosecela ŵakulalicila ŵajinji. Ana cici cacamkamucisye kukwanilisya cakulinga cakweci? Jwalakwe jwatite, “Ŵawiyi ŵajinjile m’nyumba mwetu ni kujigala yindu yangu yejinji. Yeleyi yandendekasisye kumbucila maloŵe ga Yesu gakuti tusunjeje ‘cipanje kwinani.’ M’yoyo, natandite kutenda mtawu kuti mbate cipanje causimu.” (Mat. 6:19, 20) Jwalakwe jwasamile ni kwawula mumkuli wine kummwela kusyesyene kwa cilambo ca Madagascar kwele wula jikusasoŵa mnope. Kuja kwika kumkuliwu luli lutando lwa makilomita 1,300. Mumkuliwu mwatamaga ŵandu ŵa mtundu wa Antandroy. Ligongo cici Riana ŵasagwile kwawula kweleku?

Mkanayice ŵawiyi ŵala, Riana ŵatendaga lijiganyo lya Baibulo ni acalume ŵaŵili ŵa mtundu wa Antandroy. Jwalakwe jwalijiganyisye panandi ciŵeceto ca ŵanduŵa mwamti kaneko jwatandite kuganisya ya ŵandu ŵanesoni ŵa mtunduwu ŵanganapikaneje ya Ucimwene. Jwalakwe jwatite, “Namŵendile Yehofa kuti angamucisye kwawula kumkuli wa ŵandu ŵakuŵeceta Citandaloyi.”

Riana jwapite kumkuliwu, nambo mkanipapite ndaŵi jwasimene ni cakusawusya. Jwalakwe nganapataga masengo. Jwamlume jwine jwam’wusisye kuti, “Ligongo cici m’yiceje akuno? Kuti ŵandu apate masengo, akusajawula kwamkutyocela mmwejoko!” Pali pamasile yijuma yiŵili, Riana jwapite ku msongano wa upande nambo ali jwangali ata likobili lililyose. Palisiku lyakumalisya lya msonganowo, m’bale jwine ŵaŵisile kandu mu msaku wa Riana. Syaliji mbiya syakwanila kwa jwalakwe kuwujila ku Antandroy soni sine jwatandile bisinesi. Riana jwatite, “Ligasa lya Yehofa lyangamucisye pandaŵi jakwe. Yeleyi yangamucisye kwendelecelape kwakamucisya ŵandu ŵanganakola upile wakulijiganya ya Yehofa.” Pasosekwagasoni kutenda yejinji mumpingo. Riana jwasasilesoni kuti, “Naŵecetaga ngani cijuma cilicose. Yehofa ŵanjiganyaga kupitila m’likuga lyakwe.” Apano, Riana akwendelecelape kulalicila ya Ucimwene kwa ŵandu ŵa ciŵeceto ca Citandaloyi ŵele ŵakusasaka kulijiganya ya Yehofa.

Yehofa akusatusimicisya kuti “jwalijose jwakusosasosa majali pacilambo capasi, Mlungu jwausyesyene cacimjaliwa.” (Yes. 65:16) Patukulingalinga kulimbana ni yakusawusya yetu soni kutenda yejinji mu undumetume, tucipocela majali ga Yehofa. Kwende tuganicisye ya Sylviana jwatumkolasile kundanda kwa nganiji. Tukumbucile kuti jwalakwe jwayiwonaga kuti nganaŵa akombwele kuja kutumicila ku malo kwakusosecela ŵakulalicila ŵajinji. Ligongo cici jwaganisyaga m’yoyo? Jwalakwe jwatite, “Lukongolo lwangu lwa kumciji luli lwejipi kupunda lwa kumlyo. M’yoyo, ngusajenda mwakulajilila soni ngusapela mwacitema.”

Mu 2014, Sylviana pampepe ni mpayiniya jwine jwacisikana jwa mumpingo mwakwe, lina lyakwe Sylvie Ann, ŵapite kutama mu kamusi kane kakali pa lutando lwa makilomita 85 kutyocela mu tawuni jaŵatamaga. Atamose kuti Sylviana jwajendaga mwakulajilila, nambo jwakwanilisye yakulinga yakwe. Ana jwapatile majali gamtuli? Jwalakwe jwatite, “Pambesi pa caka cimo, Doratine junamjiganyaga Baibulo, jwabatiswe pa msongano wamkuli.”

Mwakamulana ni yaŵatesile Aklistu ŵaŵapite kukulalicila ku malo kwakusosecela ŵakulalicila ŵajinji, m’wejisoni naga tukulingalinga kulimbana ni yakusawusya yetu pakusaka kutenda yejinji mu undumetume, tucikuwona kwanilicikwa kwa maloŵe ga Yehofa gakuti, “Cinamlimbikasye. Yisyene cinamkamucisye.” (Yes. 41:10) Yakuyicisya yakwe, cikulupi cetu pa Yehofa ciciŵa cakulimba. Konjecesya pelepa, kulipeleka ni mtima wosope mumkuli wetu kapena kuja kutumicila ku malo kwakusosecela ŵakulalicila ŵajinji m’cilambo cine, kukusatukamucisya kosecela masengo ga Ucimwene gatukugajembeceya m’cilambo casambano. Didier, jwatumkolasile kala munganiji, jwatite, “Kutumicila ku malo kwakusosecela ŵakulalicila ŵajinji kuli kwambone, ligongo kukusatukosecelesya yatucitendaga msogolo.” M’yoyo, lili lipopelo lyetu kuti ŵanesoni ŵajinji atande kosecelaku!