1-2. (a) Ana Yehofa aŵele mkuŵecetana camtuli ni ŵandu? (b) Ana citukambilane cici munganiji?

YEHOFA akusanonyela kuŵecetana ni m’weji. Mu ndaŵi jakala jwalakwe jwakamulicisyaga masengo ŵakulocesya, malayika soni Mwanace jwakwe Yesu Klistu, kusala nganisyo syakwe. (Amo. 3:7; Aga. 3:19; Ciw. 1:1) Masiku agano, jwalakwe akusaŵecetana ni m’weji kupitila m’Maloŵe gakwe, Baibulo. Jwalakwe ŵatupele Baibulo ni cakulinga cakuti tulijiganyeje kaganisye kakwe soni kuti tupikanicisyeje matala gakwe.

² Pandaŵi jiŵaliji Yesu pacilambo capasi, Yehofa jwaŵecetaga kutyocela kwinani pa maulendo gakwana gatatu. Kwende tukambilane yaŵaŵecete Yehofayi. Kaneko citulole yampaka tulijiganye pa yaŵaŵeceteyi soni mwampaka tupindulile.

3. Patukuŵalanga lilemba lya Maliko 1:9-11, ana Yehofa ŵaŵecete cici Yesu pajwabatiswaga soni maloŵega gasimicisyaga yindu yakusosekwa mnope yapi?

³ Pa Maliko 1:9-11 ŵalembile yaŵaŵecete Yehofa kutyocela kwinani paulendo wandanda. (Aŵalanje.) Jwalakwe jwaŵecete kuti, “M’mweji mli mwanangu jwa pa mtima. Ngusasengwa namwe mnope.” Yesu yamkwayiye mnope pajwapikene Atati ŵakwe ali mkuŵeceta kuti akusamnonyela soni akusamkulupilila mnope. Maloŵe ga Yehofaga gasimicisyaga yindu yitatu yakusosekwa mnope yakwamba Yesu. Cindu candanda, Yesu ali Mwanace jwakwe. Caŵili, Yehofa akusamnonyela Mwanace jwakwe. Soni catatu, Yehofa akusasangalala ni Mwanace jwakwe. Sambano kwende tukambilane mbali sitatusi jimojimo.

4. Pajwabatiswaga Yesu, ana jwaŵele camtuli Mwanace jwa Mlungu m’litala lyasambano?

⁴ “M’mweji mli Mwanangu.” Ni maloŵega, Yehofa jwalosisye kuti akusamnonyela Mwanace jwakwe, Yesu, soni kuti jwajinjile mu mkamulano wasambano ni Jwalakwe. Pandaŵi jiŵaliji Yesu  kwinani, jwaliji kala mwanace jwa Mlungu. Nambo pandaŵi jiŵabatiswaga, jwalakwe jwasagulidwe ni msimu weswela. Pandaŵiji, Mlungu jwalosisye kuti Yesu mpela mwanace jwa Mlungu sambano jwakwete cembeceyo cakuti caciwujila kwinani kuti cakaŵe Mwenye jwamsagulidwe jwa Mlungu soni Jwamkulungwa jwa Ŵambopesi. (Luk. 1:31-33; Aheb. 1:8, 9; 2:17) M’yoyo, Yesu pajwabatiswaga, Atati ŵakwe ŵakwete magongo gakupikanika gakuŵecetela kuti, “M’mweji mli Mwanangu.”—Luk. 3:22.

5. Ana mpaka tusyasye camtuli cisyasyo ca Yehofa pangani jwakwalosya cinonyelo soni kwalimbikasya ŵane?

⁵ “M’mweji mli . . . jwa pa mtima.” Cisyasyo ca Yehofa cakulosya cinonyelo soni kusasangalala cikusatukamucisya kumanyilila kuti tukwete ukumu wakwalimbikasya ŵane. (Yoh. 5:20) Mundu jwine patulosisye cinonyelo soni kutuyamicila ligongo lya yindu yatukusitumtendela, tukusaŵa ŵakulimba. Mwakulandana ni yeleyi, abale ni alongo mumpingo soni ŵamwiŵasa mwetu akusasaka kuti twalosyeje cinonyelo soni kwalimbikasya. Patukwayamicila ŵane, tukusaŵa tuli mkulimbisya cikulupi cawo soni kwakamucisya kuti ajendelecele kumtumicila Yehofa mwakulupicika. Acinangolo ni ŵakusosekwa mnope kwalimbikasyaga ŵanace ŵawo. Naga acinangolo akwayamicila ŵanace ŵawo kutyocela pasi pamtima soni kwalosya cinonyelo, ŵanaceŵa caciŵa ŵakulimba mnope.

6. Ana ligongo cici mpaka tukole cikulupi pa Yesu Klistu?

⁶ “Ngusasengwa namwe mnope.” Maloŵega gakusalosya kuti Yehofa jwakwete cikulupi cakuti Yesu catende lisosa lyakwe mwakulupicika. Ligongo lyakuti Yehofa jwakwete cikulupi pa Mwanace jwakwe, m’wejisoni mpaka tukulupilile kuti Yesu cacikwanilisya yilanga yosope yaŵasasile Yehofa. (2 Akoli. 1:20) Patukuganicisya cisyasyo ca Yesu, tukusaŵa ŵakusacilila kulijiganya kutyocela kwa jwalakwe soni kukuya sajo syakwe. Naga Yehofa jwakwete cikulupi pa Yesu, nikutisoni, Yehofajo akwete  cikulupi cakuti mpela likuga, ŵakutumicila ŵakwe cacijendelecela kulijiganya kutyocela kwa Mwanagwe.—1 Pet. 2:21.

7. Mwakamulana ni lilemba lya Mateyu 17:1-5, ana ni paulendo wapi wajwaŵecete Yehofa kutyocela kwinani, soni jwaŵecete cici?

⁷ Aŵalanje Mateyu 17:1-5. Ndaŵi jaŵili jiŵaŵecete Yehofa kutyocela kwinani jaliji ndaŵi jele “uwonece wa Yesu wasindile.” Yesu jwam’ŵilasile Petulo, Yakobo soni Yohane kuti alongane ni jwalakwe ku litumbi lyelewu. Paŵaliji kwitumbiku, jemanjaji ŵagaweni meso mkulola gakusimonjesya mnope. Ngope ja Yesu jaŵasile mnope soni yakuwala yakwe yanyesimilaga mnope. Kaneko pawonece yiwulili yiŵili, cimo caliji ca Mose cine ca Eliya, ni ŵatandite kuŵecetana ni Yesu pakwamba ya ciwa soni yakwimuka kwakwe. Ŵandumetume ŵatatu ŵala “ŵaliji mkugwesela.” Nambo palwamasile lugono mmeso, jemanjaji ŵagaweni meso mkulola gakusimonjesyaga. (Luk. 9:29-32) Kaneko, liwunde lyakuŵala lyawunicile jemanjaji ni ŵapikene maloŵe ga Mlungu kutyocela mwiwundemo. Mpela muŵatendele paŵabatiswaga Yesu, apasoni Yehofa jwalosisye kuti akusasangalala ni Mwanagwe soni akusamnonyela. Jwalakwe jwatite, “Aju ni mwanangu jungusinamnonyela, nipo ngusasangalala najo mnope.” Nambo pandaŵi aji Yehofa jwajonjecesye kusala kuti, “Mumpikanileje.”

8. Ana meso mkulola ga Yesu gamkwayiye camtuli jwalakwe soni ŵakulijiganya ŵakwe?

⁸ Meso mkulolaga gapelece ciwulili ca ucimbicimbi wa Yesu wa msogolo soni macili gakwe mpela Mwenye jwa Ucimwene wa Mlungu. Mwangakayicila, meso mkulolaga gamlimbikasisye Yesu, kuti ajendelecele kupilila yipwetesi soni ciwa cakwe cakupweteka mnope. Galimbikasisyesoni cikulupi ca ŵandumetume. Yakamucisye jemanjaji kukosecela yakulingwa yakasimene nayo kusogolo soni masengo gakusawusya gaŵasosekwaga kukamula. Pali pamasile yaka 30, ndumetume Petulo jwasasilesoni ya meso mkulola gala, kulosya kuti jwalakwe jwagakumbucilagape.—2 Pet. 1:16-18.

9. Ana Yesu jwasalile cici ŵakulijiganya ŵakwe?

⁹ “Mumpikanileje.” Maloŵega galosisye kuti Yehofa akusasaka kuti tupikanileje maloŵe ga Mwanace jwakwe. Ana Yesu jwaŵecete cici ali pacilambo capasi? Jwalakwe jwaŵecete yindu yejinji yakusosekwa kuyipikanila. Mwacisyasyo, mwacinonyelo jwalakwe jwajiganyisye ŵakulijiganya ŵakwe mwampaka alalicile ngani syambone soni mwakuwilisyawilisya jwakumbusyaga kuti aŵeje mesope. (Mat. 24:42; 28:19, 20) Jwalakwe jwalimbikasyagasoni kuti akusosekwa kutenda yindu mwakulimbangana kuti akawujila munyuma. (Luk. 13:24) Jwalimbikasisyesoni ŵakulijiganya ŵakwe kuti anonyelaneje jwine ni mjakwe, ajendelecele kuŵa ŵakamulana soni asunjeje malamusi gakwe. (Yoh. 15:10, 12, 13) Yindu yaŵasasile Yesu kwa ŵakulijiganya ŵakweyi yaliji yakusosekwa mnope. Masiku aganosoni yaŵasasileyi yili yakusosekwa mnope.

10-11. Ana mpaka tulosye camtuli kuti tukusampikanila Yesu?

¹⁰ Yesu jwasasile kuti, “Jwalijose jwali mbali ja yakuwona akusambikanila.” (Yoh. 18:37) Tukusalosya kuti tukusapikanila maloŵe gakwe gakuti “mtendeleneje canasa, nipo mkululucilaneje jwine ni mjakwe naga jwine amlemwecesye mjakwe.” (Akolo. 3:13; Luk. 17:3, 4) Tukusalosyasoni kuti tukusapikanila maloŵe gakwega patukulipeleka mnope pamasengo gakulalicila ngani syambone “pa ndaŵi jakugasaka ŵandu atamose pangakugasaka.”—2 Tim. 4:2.

¹¹ Yesu jwasasilesoni kuti, “Ngondolo syangu sikusapikana maloŵe gangu.” (Yoh. 10:27) Ŵakumkuya ŵa Klistu akusalosya kuti akusapikanila Yesu ngaŵape pa maloŵe gakwe nambo mwakukamulicisya masengo maloŵego. Jemanjaji  ŵangagamba kusokonecela nganisyo ligongo lya “yakusawusya ya umi.” (Luk. 21:34) M’malo mwakwe, jemanjaji akusapikanila malamusi ga Yesu atamose kuti akusasimana ni yindu yakusawusya mnope. Abale ŵajinji akupilila yakulingwa yakulekanganalekangana, kupwatikapo kwasisya, usawuci nambosoni ngosi sya m’cipago. Mwangasamala kandu kuti akusimana ni yindu yeleyi, jemanjaji akwendelecelape kuŵa ŵakulupicika kwa Yehofa. Jemanjaji Yesu akwasimicisya kuti, “Ŵele ŵakupikanila ni kutenda yinalamwile kuti ayitende jemanjajo ni ŵakunonyela une. M’yoyo Atati tacanonyela ŵele ŵakunonyela unejowo.”—Yoh. 14:21.

12. Ana ni litala line lyapi lyampaka tulosye kuti tukusampikanila Yesu?

¹² Litala line lyampaka tulosye kuti tukusampikanila Yesu, lili kukamulana ni ŵandu ŵasagulidwe kuti atulongoleleje. (Aheb. 13:7, 17) Yaka yapangakaŵapa likuga lya Mlungu licenjile yindu yejinji. Yeleyi yikupwatikapo kakamulicisye masengo ka yida soni matala gasambano mu undumetume, katende ka misongano ja mkati mwacijuma, soni kataŵe ni kalinganye ka Nyumba sya Ucimwene. Tukusayamicila mnope ligongo lya cikamucisyo cakwe cacinonyelo. Tuli ŵakusimicisya kuti Yehofa tacitupa majali naga tukukuya malamusi ga m’likuga lyakwe.

13. Ana ni majali gapi gatukusapata ligongo lyakupikanila Yesu?

¹³ Tukusapata majali naga tukusapikanila yindu yosope yaŵajiganyisye Yesu. Jwalakwe jwasimicisye ŵakulijiganya ŵakwe kuti yakusajiganya jwalakwejo yicakamucisya. Yesu jwasalile ŵakulijiganyaŵa kuti, “Timcisimana cipumulisi ca umi wenu. Pakuti likongwa lingusakoleka une lili lyangasawusya, nipo msigo wungumtwika uli wangasitopa.” (Mat. 11:28-30) Maloŵe ga Mlungu gagakupwatikapo mabuku mcece gosope ga Ngani syambone, gagakusasala ya umi wa Yesu soni undumetume wakwe, gakusatulimbikasya mwausimu soni kutupa lunda. (Sal. 19:7; 23:3) Yesu jwatite, “Ŵana upile usyesyene ali ŵandu ŵakugapikana maloŵe ga Mlungu ni kugakamulicisya masengo.”—Luk. 11:28.

14-15. (a) Mwakamulana ni lilemba lya Yohane 12:27, 28, ana ni pa cakutendekwa catatu capi, paŵaŵecete Yehofa kutyocela kwinani? (b) Ligongo cici maloŵe gaŵaŵecete Yehofa gamlimbikasisye Yesu?

¹⁴ Aŵalanje Yohane 12:27, 28, NW. Mu utenga wambone wa Yohane ŵalembile cakutendekwa catatu pele Yehofa jwaŵecete kutyocela kwinani. Pali pagambile kusigala masiku gakuŵalanjika kuti Yesu awe, jwalakwe jwapite ku Yelusalemu kukutenda Pasaka jwakwe jwakumalisya.  Jwalakwe jwasasile kuti, “Umi wangu ukulaga mnope.” Kaneko jwapopesile kuti, “Atati, acimbicisye lina lyawo.” Atatigwewo pakwanga kutyocela kwinani ŵatite, “Nalicimbicisye, soni tinjilicimbicisyasoni.”

¹⁵ Yesu jwalasile ligongo lya ukumu wajwakwete wakwendelecela kuŵa jwakulupicika kwa Yehofa. Jwalakwe jwamanyililaga kuti casimane ni yindu yakusawusya soni ciwa cakutesya canasa. (Mat. 26:38) Nambo cindu cakusosekwa mnope kwa Yesu caliji cakuti acimbicisye lina lya Atati ŵakwe. Jwalakwe ŵamjimbile magambo gakunyosya Mlungu, mwamti jwadandawulaga kuti ciwa cakwe cicitendekasye kuti Mlungu akapocela ucimbicimbi. Kusala yisyene, maloŵe gaŵaŵecete Yehofa gamlimbikasisye Yesu kola cikulupi cakulimba mnope. Jwalakwe jwasimicisye kuti Yehofa catendekasye lina lyakwe kucimbicikwa. Maloŵe ga Atatigwega gamlimbikasisye mnope Yesu kuti apilile yakusawusya yayaliji kusogolo kwakwe. Atamose kuti pandaŵijo, Yesupe ni juŵapikanicisye yiŵaŵecete Atatigweyi, Yehofa jwalolecesye kuti maloŵe gakwe galembedwe kuti wosope tugamanyilile.—Yoh. 12:29, 30.

16. Ligongo cici ndaŵi sine mpaka tudandawuleje ligongo lyakuti ŵandu ngakulicimbicisya lina lya Mlungu?

¹⁶ Mwakulandana ni Yesu, m’wejisoni mpaka tudandawuleje ligongo lyakuti ŵandu ngakulicimbicisya lina lya Yehofa. Mpela muyaŵelele ni Yesu, ŵandu mpaka atutendeleje yindu yangali cilungamo. Mwinesoni mpaka tusokonecele nganisyo ligongo lya ngani syaunami syakusawandisya ŵandu ŵakusisya syakwamba m’weji. Mpaka  tuganicisyejesoni kuti ngani syaunamisi ngasikusayikasya ucimbicimbi pa lina lya Yehofa soni pa likuga lyakwe. Patusimene ni yindu mpela yeleyi, maloŵe ga Yehofa mpaka gatulimbikasye mnope. M’yoyo, ngatukusosekwa kudandawula ŵandu pakunyosya lina lya Mlungu soni likuga lyakwe. Mpaka tuŵe ŵakusimicisya kuti “mtendele wa Mlungu, wele uli wakupunda umanyilisi wosope wa ŵandu, tiwucisunga cenene mitima [jetu] ni nganisyo [syetu] kupitila mukulumbikana [kwetu] ni Yesu Klistu.” (Afil. 4:6, 7) Yehofa cacilicimbicisya lina lyakwe. Kupitila mu Ucimwene wakwe, jwalakwe cacityosya yakusakala yiliyose yele Satana ni cilamboci ayikasisye pa ŵakutumicila ŵakulupicika ŵa Mlungu.—Sal. 94:22, 23; Yes. 65:17.

17. Mwakamulana ni lilemba lya Yesaya 30:21, ana Yehofa akusaŵecetana camtuli ni m’weji masiku agano?

¹⁷ Masiku agano, Yehofa akwendelecelape kuŵeceta ni m’weji. (Aŵalanje Yesaya 30:21.) Yili yisyene kuti ngatukusapikana maloŵe ga Mlungu kutyocela kwinani. Nambope, jwalakwe jwatupele Maloŵe gakwe, Baibulo. Jwalakwe akusatusalila malamusi gakwe kupitila mwelemu. Konjecesya pelepa, msimu wa Yehofa ukusakamucisya “kapolo jwakulupicika,” kuti ajendelecele kupeleka cakulya causimu kwa ŵakutumicila ŵakwe. (Luk. 12:42, NW) Tukwete yindu yejinji mpela mabuku, mafidiyo ni yindu yakupikanila soni yindu yine ya pa Inteneti yayikusatukamucisya kuti tujendelecele kuŵa ŵakulimba.

18. Ana maloŵe ga Yehofa gakusalimbikasya camtuli cikulupi cawo?

¹⁸ Kwende tujendelecele kumbucila maloŵe gaŵaŵecete Yehofa, pandaŵi jele Mwanace jwakwe jwaliji pacilambo capasi. Maloŵe ga Mlungu gagalembedwe m’Baibulo gakusatusimicisya kuti Yehofa cacilinganya yindu yiliyose yaŵajonasile Satana soni cilambo cakusakalaci. Mwakusacilila, kwende tupikanileje maloŵe ga Yehofa. Naga tukutenda m’yoyo, tucijendelecela kupilila yakusawusya yampaka tusimane nayo apano soni kusogolo. Baibulo jikusatukumbusya kuti, “Pakusosekwa kupimilila, kuti mtende yakusaka Mlungu, pakutenda m’yoyo timkapocele yele yiŵatite tacimpa.”—Aheb. 10:36.