1-2. (a) Ana kumkululuchila mundu jwine mpaka kuŵe kwakusawusya mnope pandaŵi japi? (b) Ana Mlongo Denise jwalosisye chamti uli kukululuka?

 ANA wawojo yikusiyasawusya kwakululuchila ŵane? Kusala yisyene, ŵajinji yikusatusawusya kuti tumkululuchile mundu jwatuleŵele, mnopemnope naga mundujo aŵechete kapena kutenda yindu yakutupweteka mnope. Nambope, pana yindu yine yampaka tutende kuti tuleche kutumbila ni kwakululuchila ŵane. Mwachisyasyo, aganichisye yayamtendechele Mlongo Denise, a juŵalosisye ndamo jakululuka. M’chaka cha 2017, jwalakwe yimpepe ni ŵandu ŵamliŵasa mwakwe ŵapite kukulola malo ku Likulu Lyetu lya Pachilambo Chosope lya Mboni sya Yehofa. Paŵawujilaga kumangwawo, jwamlume jwine jwalepele kwendesya chenene galimoto jakwe mwamti ŵagundile galimoto ja liŵasali. Mwamti Mlongo Denise jwakomweche pangosijo. Jwalakwe ali ajimwiche jwayiweni kuti ŵanache ŵakwe awulele mnope soni ŵamkwakwe lina lyawo Brian, ŵaliji ali awile. Pakukumbuchila yayatendekweyi jwalakwe jwaŵechete kuti, “Yayatendekweyi yambweteche mnope soni yalagasyaga nganisyo.” Kaneko jwayikopochele kuti dalayifala jula nganawulala pangosijo, mwamti jwapopesile kwa Yehofa kuti akole mtendele wa mumtima.

² Mundu juŵagundile jula ŵamtaŵile soni jwajembecheyaga kumjimba magambo gakuwulaga. Soni yaliji yakuti naga chakasimanikwe kuti ali jwakulemwa nikuti jwasosekwaga kukamula ukayidi. Nambo mundu jwine juŵakamulaga masengo kukoti jwamsalile Mlongo Denise kuti umboni wachakapeleche chiwukakamuchisye kuti dalayifalajo akataŵidwe kapena iyayi. Mlongo Denise jwasasile kuti: “Nalipikene mpela kuti mundu jwine angowele liŵanga lyangu nikutagapo njete jejinji. Yaliji myoyo ligongo lyakuti yangumbwisye yindu yakusakala mnope yayandendechele paumi wangu.” Pali papitile mawiki gamnono, Mlongo Denise jwapite kukoti kuti akapelechele umboni wakuti jwamlumejo ni juŵawulesye ŵandu ŵa m’liŵasa mwakwe soni kwawulaga ŵamkwakwe. Ana jwalakwe ali ayiche ku kotiko jwaŵechete yamti uli? Jwalakwe jwam’ŵendile jwakuwelusya  magambo kuti amtendele chanasa mundujo. b Mwamti ali amalisisye kuŵecheta, jwakuwelusya magambojo jwalisile mnope. Jwalakwe jwasasile kuti: “Mbele ndili mkukamula masengo gelega kwa yaka 25, nambo nganinayiwoneje yayitendekweyi. Nganimbikanejepo mundu jwakudandawula ali mkuŵenda kuti namtendele chanasa mundu juŵamleŵele. Nganimbikanejeposoni maloŵe gachinonyelo mpela gelega soni gakululuchila.”

 3. Ana chichi chachamtendekasisye Mlongo Denise kuti akululuche?

³ Ana chichi chachamkamuchisye Mlongo Denise kuti akululuche? Jwalakwe jwaganichisyaga mnope yakusatenda Yehofa pakululuka. (Mik. 7:18) Myoyo naga tukusayamichila yakusatenda Yehofa pakutukululuchila yichiŵasoni yangasawusya kuti twakululuchileje ŵane.

 4. Ana Yehofa akusasaka kuti tutendeje chichi? (Aefeso 4:32)

⁴ Yehofa akusasaka kuti twakululuchileje ŵane mpela mwakusatendela jwalakwe pakutukululuchila. (Aŵalanje Aefeso 4:32.) Myoyo, jwalakwe akusajembecheya kuti twakululuchileje ŵandu ŵatuleŵele. (Sal. 86:5; Luk. 17:4) Mungani ajino, chitukambilane yindu yitatu yampaka yitukamuchisye kuti twakululuchileje ŵane ni mtima wosope.

AGANICHISYEJE MWAKUPIKANILA MUMTIMA

 5. Mwakamulana ni Misyungu 12:​18, ana mpaka yitukwaye chamti uli mundu jwine patuleŵele?

⁵ Yindu yaŵechete mundu jwine mpaka yitupweteche mnope mumtima mnopemnope naga mundujo ali mjetu jwa pamtima kapena jwa mwiŵasa mwetu. (Sal. 55:​12-14) Mwamti ndaŵi sine mpaka tupikane kupweteka mnope mpela kuti mundu jwine atusomile. (Aŵalanje Misyungu 12:18.) Komboleka mpaka tulinjeje kuŵambala kuganichisya mwatukupikanila mumtima. Nambo kutenda yeleyi mpaka kuŵe mpela kulisoma ni chipula ni kuchileka paliŵanga pepo. Mwakulandana ni yeleyi, tukajembecheyaga kuti chitupikaneje chenene mumtima ligongo lyakuti tukuŵambala kuganichisya mwatukupikanila.

 6. Ana mpaka tutende chichi mundu jwine patuleŵele?

⁶ Mundu jwine patuleŵele, yayikusayika mwachitema munganisyo mwetu mpaka yiŵe kutumbila. Baibulo jikusatusalila kuti mpaka tutumbile. Nambope jikusatukalamusyasoni kuti ngatukusosekwa kutumbila kwandaŵi jelewu. (Sal. 4:4; Aef. 4:26) Ligongo chichi jikusasala yeleyi? Yili myoyo ligongo lyakuti ndaŵi syejinji mundu akusatenda yindu mwakamulana ni mwakupikanila mumtima. Mwamti kutumbila nganikuŵa kumlongolele mundu kutenda yambone. (Yak. 1:20) Akumbuchileje kuti kutumbila kukusatendekwa mwachipago, nambo kuti mundu atumbile kwa ndaŵi jelewu akusatenda kusagula.

 7. Ana ŵandu ŵane akusapikana chamti uli naga mundu jwine jwaleŵele?

⁷ Kusala yisyene, patutendeledwe yangali chilungamo yikusatupweteka mnope. Mwachisyasyo, Mlongo Ann jwasasile kuti: “Panaliji mwanache baba ŵangu ŵalesile mama ulombela ni kulombela jwamasengo jwetu. Yeleyi yambweteche mnope. Baba ni ŵamkwawoŵa ali akwete mwanache jwamkongwe jwine nagambaga kulipikana kuti ndili jwangali mate.” Mlongo jwine lina lyakwe Georgette jwasasile mwajwapikanilaga ŵamkwakwe paŵaŵele ŵangakulupichika. Jwalakwe jwatite, “Twakungulukaga kutandila tuli ŵanache, soni twatendelaga yimpepe upayiniya. Nambo yaŵatesile ŵamkwangu yambweteche mnope.” Nombe najo Mlongo Naomi jwatite, “Ŵamkwangu paŵasasile kuti ŵalolelaga yakuŵagula mwakusisa yambweteche mnope mumtima. Ligongo nganinganisyaga kuti mpaka atende yindu yangakulupichika.”

 8. (a) Ana ni magongo gane gapi gagakusatutendekasya kuti twakululuchileje ŵane? (b) Ana pakusaŵa yakuyichisya yamti uli naga tukwakululuchila ŵane? (Alole libokosi lyakuti “ Yampaka Atende Naga Mundu Jwine Jwaleŵele.”)

 ⁸ Kusala yisyene, nganituŵa tukombwele kwalekasya ŵandu kuŵecheta kapena kutenda yindu yampaka yitupweteche. Nambo champaka tukombole kutenda pandaŵijo chili kuwukamula mtima basi. Mwamti tukusasosekwa kwamba kwakululuchila. Tukusatenda yeleyi ligongo lyakuti tukusamnonyela Yehofa jwakusatusalila kuti twakululuchileje ŵane. Mwamti naga tukupitilisya kutumbila soni ngakululuchila ŵane tukusagamba kulipweteka jika basi. (Mis. 14:​17, 29, 30) Apikane yaŵatesile Mlongo jwine lina lyakwe Christine. Jwalakwe jwasasile kuti, “Pandumbile ligongo lya yindu yatesile mundu jwine, nganimbikanaga kunong’a kwa chakulya, nganimbataga lugono, soni nalepelaga kutenda yindu mwakuwukamula mtima. Yeleyi yandendekasyaga kuti ndepeleje kutenda chenene yindu ni ŵamkwangu soni ŵandu ŵane.”

 9. Ligongo chichi ngatukusosekwa kusunga chakulukosi?

⁹ Atamose yili mkuti mundu juŵatuleŵelejo ngakutendapo kandu kuti tutamilikasye mtendele, m’wejo mpaka tugambe kutenda mbali jetu. Ana mpaka tutende chamti uli yeleyi? Mlongo Georgette, jwatumsasile kundanda jula jwatite, “Papitile ndaŵi, nambo kaneko nalesile kwatumbilila ŵamkwangu ŵatwalekangene ulombela. Yakuyichisya yakwe nakwete mtendele wa mumtima.” Naga tukuŵambala kusunga chakulukosi, yikusakamuchisya kuti tukole chilu chambone. Nambosoni yikusatukamuchisya kuti tusangalaleje. (Mis. 11:17) Nambo ana mpaka atende uli naga akuyiwona kuti nganaŵe koseka kululuka?

YAMPAKA ATENDE KUTI AMALANE NI KUTUMBILA

10. Ligongo chichi tukusosekwa kulipa ndaŵi kuti mtima wetu uŵe mmalo? (Alolesoni chiwulili.)

¹⁰ Ana mpaka atende uli kuti amalane ni kutumbila? Litala limo lyampaka lyakamuchisye lili kwamba kulipa ndaŵi. Paja mundu jwawulele mnope papochele chikamuchisyo chamtela pakusajigala ndaŵi kuti apole. Mwakulandana ni yeleyi, m’wejisoni tukusasosekwa ndaŵi jakwanila kuti tukombole kumkululuchila mundu juŵatuleŵele.—Jwak. 3:3; 1 Pet. 1:22.

11. Ana lipopelo mpaka lyakamuchisye chamti uli kuti ŵakululuchileje ŵane?

¹¹ Amŵendeje Yehofa kuti ŵakamuchisye kwakululuchila ŵane. c Mlongo Ann, jwatumkolasile  kundanda jula jwasasile yalyatite pakumkamuchisya lipopelo. Jwalakwe jwatite, “Namŵendaga Yehofa kuti atukuluchileje pa yindu yanganituŵecheta chenene kapena kuyitenda mu liŵasa lyetu. Mwamti kaneko nalembele chikalata baba soni mama ŵakusimanawo. Muchikalatacho nasalile jemanjajo kuti nakululuchile.” Mlongoju jwasasile kuti kutenda yeleyi jaliji ngani jakusawusya. Nambo jwatite, “Nakulupililaga kuti kusyasya ndamo jakululuchila ja Yehofa mpaka kwakamuchisye baba ni ŵamkwawowo kulijiganya yakwamba Yehofa.”

12. Ligongo chichi tukusosekwa kumdalila Yehofa mmalo mwakulidalila? (Misyungu 3:​5, 6)

¹² Kumdalila Yehofa kuli kwakusosekwa mnope. (Aŵalanje Misyungu 3:​5, 6.) Yehofa akusamanyilila yindu yayili yambone kwa m’weji. (Yes. 55:​8, 9) Mwamti jwalakwe nganaŵa atuŵendile kutenda yindu yampaka yituwulasye. Myoyo, Yehofa pakusatulimbikasya kuti twakululuchileje ŵane, tukakayichilaga kuti yichitukamuchisya jika. (Sal. 40:4; Yes. 48:​17, 18) Nambope, naga ngatukuchenga kaganisye ketu, nganituŵa tukombwele kwakululuchila ŵane. (Mis. 14:12; Yel. 17:9) Mlongo Naomi, jwatumkolasile jula, jwasasile kuti, “Pandanda nayiwonaga kuti nganimba nakululuchile ŵamkwangu ligongo lyakuti ŵalolelaga yindu yakuŵagula. Najogopaga kuti mpaka atendesoni yindu yine yampaka yimbweteche mnope, soni nayiwonaga kuti chachiliŵalila yayatite pakumbweteka yindu yaŵatesile. Nayiwonagasoni kuti Yehofa akupikanichisya mwangupikanila. Kaneko natandite kuyiwona kuti ligongo lyakuti Yehofa akupikanichisya mwangupikanila ngayikugopolela kuti jwalakwejo akukamulana nayo. Nambo jwalakwe akumanyilila mwangupikanila mumtima soni kuti mpaka pasosekwe kupita ndaŵi kuti ndeche kutumbila ni yayatendekweyo. Nambosoni namanyilile kuti jwalakwejo akusasaka kuti nakululuchileje ŵane.” d

YAMPAKA ATENDE KUTI AGANICHISYEJE YINDU YAMBONE

13. Mwakamulana ni Aloma 12:​18-21, ana tukusosekwa kutenda chichi?

¹³ Naga tumkululuchile mundu juŵatuleŵele, tukusasosekwa kutenda yindu yinesoni mmalo mwakwamba kuleka kuŵecheta yayatendekweyo. Naga juŵatuleŵelejo ali m’bale kapena mlongo, chakulinga chetu chiŵeje kutamilikasya mtendele. (Mat. 5:​23, 24) Mmalo mwakumtumbilila kapena  kumsunjila chakulukosi mundujo, tukusosekwa kumtendela chanasa soni kumkululuchila. (Aŵalanje Aloma 12:​18-21; 1 Pet. 3:9) Ana chichi champaka chitukamuchisye kuti tukombole kutenda yeleyi?

14. Ana tukusosekwa kulingalinga kutenda chichi soni ligongo chichi?

¹⁴ Tumwoneje mundu juŵatuleŵelejo mpela mwakusamwonela Yehofa. Jwalakwe akusasagula kulola yindu yambone mwa ŵandu. (2 Mbi. 16:9; Sal. 130:3) Patusagwile kuti tuganichisyeje yakulepela ya ŵane, munganisyo mwetu mukusagamba kwika yakulepelape basi. Nambo patusagwile kuti tuganichisyeje yambone yakusatenda ŵane, munganisyo mwetu mukasajendagasoni yambone peyo. Mwamti patukulola yambone mwa ŵane, yikusaŵa yangasawusya kuti twakululuchile. Mwachisyasyo, M’bale Jarrod jwasasile kuti, “Yikusaŵaga yangasawusya kuti namkululuchile m’bale jwandeŵele panguganichisya yindu yambone yakusatendaga mmalo mwakuganichisya yakulepela yakwe.”

15. Ligongo chichi mpaka yiŵe yakamuchisya kumsalila mundu juŵatuleŵele kuti tumkululuchile?

¹⁵ Chindu chine chakusosekwa mnope chatukusasosekwa kuchiganichisya chili kumsalila mundu  jwatuleŵelejo kuti tumkululuchile. Ligongo chichi tukuŵecheta yeleyi? Alole yindu yajwaŵechete Mlongo Naomi jwatumkolasile kundanda jula. Jwalakwe jwatite, “Ŵamkwangu ŵambusisye kuti, ‘Ana mungululuchile?’ Panasakaga kuŵecheta maloŵe gakuti, ‘Namkululuchile, nalepele kuŵecheta maloŵega. Pelepa namanyilile kuti nganinakululuchila kutyochela pasi pamtima. Mwamti pandaŵi jine nasalile kuti ‘Nakululuchile.’ Panagambile kuŵecheta maloŵega ŵamkwangu ŵagwisisye misosi, mwamti nasimonjile mnope ni yayatite pakwakwaya mumtima. Kutandila pandaŵiji natanditesoni kwadalila mnope, mwamti apano tukusakamulana mnope.”

16. Ana alijiganyisye chichi pangani jakululuchila?

¹⁶ Yehofa akusasaka kuti twakululuchileje ŵane. (Akolo. 3:13) Atamose yili myoyo, ndaŵi sine mpaka yitusawusyeje kuti twakululuchile ŵane. Nambo mpaka tukombole kutenda yeleyi naga ngatukuŵambala kuganichisya mwatukupikanila mumtima, kaneko ni kulingalinga kumalana ni kutumbilako. Patutesile yeleyi, mpaka tutande kuganichisya yindu yambone.—Alole libokosi lyakuti “ Yindu Yitatu Yampaka Atende Kuti Ŵakululuchileje Ŵane.”

AGANICHISYEJE MNOPE YINDU YAMPAKA APATE LIGONGO LYAKULULUKA

17. Ana kululuka mpaka kutukamuchisye chamti uli?

¹⁷ Tukwete magongo gejinji gakututendekasya kwakululuchila ŵane. Aganichisye magongo gakuyichisyaga. Ligongo lyandanda, patukwakululuchila ŵane yikusaŵa kuti tukumsyasya soni kumchimbichisya Yehofa ŵali Atati ŵetu ŵachanasa. (Luk. 6:36) Ligongo lyaŵili, patukwakululuchila ŵane tukusalosya kuyamichila yakusatenda Yehofa pakutukululuchila m’weji. (Mat. 6:12) Soni ligongo lyatatu lili lyakuti, patukwakululuchila ŵane tukusakola yilu yambone soni kuŵa ŵakamulana ni achimjetu.

18-19. Ana kwakululuchila ŵane mpaka kukole yakuyichisya yamti uli?

¹⁸ Patukwakululuchila ŵane mpaka tupate yindu yambone yanganitujembecheyaga. Mwachisyasyo, apikane yindu yambone yayamtendechele Mlongo Denise, jwatumkolasile kundanda jula. Atamose kuti mlongoju nganamanyililaga yakuti mundu juŵagundile jula jwalinganyisye yakuliwulaga panyuma pa magambo gakwe, yaŵatesile mlongoju pakumkululuchila yakamuchisye mundujo kuti atande kulijiganya Baibulo ni ŵa Mboni sya Yehofa.

¹⁹ Ndaŵi sine, mpaka tuyiwoneje kuŵa yakusawusya mnope kwakululuchila ŵane. Nambope mpaka tupate upile ligongo lyakutenda yeleyi. (Mat. 5:7) Myoyo, kwende wosopewe tutendeje yampaka tukombole pakumsyasya Yehofa mwakwakululuchila ŵane.