Mlongo Mary soni ŵamkwakwe lina lyawo John, a akusatama m’chilambo chele kukusayika ŵandu ŵajinji ŵakusaka masengo ŵakutyochela ku Philippines. Pandaŵi ja mlili wa COVID-19, mlongoju jwakombwele kutandisya majiganyo ga Baibulo ni ŵandu ŵakusatama m’chilambo chakwecho soni ŵandu ŵa m’yilambo yine. Ana jwakombwele chamti uli kutenda yeleyi?

Mlongoju jwakombwele kutenda yeleyi ligongo lyakuti jwawusyaga ŵakulijiganya Baibulo ŵakwe chiwusyo chakuti, “Ana akummanyilila mundu jwalijose jwampaka asache kulijiganya Baibulo?” Ŵanduwo pajanjile kuti elo, jwasalilaga kuti ŵamanyikasye kwa jwalakwe. Kuwusya chiwusyo changasawusyachi kukusatendekasya kuti paŵe yakuyichisya yambone. Yikusaŵa myoyo, ligongo lyakuti ŵandu ŵakusasangalala papikene Maloŵe ga Mlungu, akusasakasoni kwamanyisya achimjawo soni ŵachinasi ŵawo. Ana kuwusya chiwusyo chelechi kwakwete yakuyichisya yamti uli?

Jwamkongwe jwine juŵalijiganyaga Baibulo ni Mlongo Mary lina lyakwe Jasmin, jwamsalile mlongoju ya achimjakwe mcheche ŵaŵatandite kulijiganya Baibulo. Jumo mwa ŵanduŵa jwaliji Kristine. Jwalakweju jwasangalalaga pakulijiganya, mwamti jwamŵendile kuti alijiganyeje kaŵili pa wiki. Mlongo Mary pajwamwusisye jwamkongweju naga akwamanyilila ŵane ŵampaka asache kulijiganya Baibulo, jwamkongwejo jwasasile kuti, “Elo apali, mwamti chinasalile.” Pali pagambile kumala ma wiki gakuŵalanjika, jwamkongwe jula jwamanyikasisye achimjakwe mcheche ŵaŵasakaga kulijiganya Baibulo. Kaneko, jwamkongweju jwamanyikasisyesoni achimjakwe ŵane kwa Mlongo Mary ŵelesoni ŵamanyikasyaga achimjawo.

Kristine jwasakaga kuti nombe ŵandu ŵa mwiŵasa mwakwe ku Philippines alijiganyeje Baibulo. Myoyo, jwamsalile mwanache jwakwe jwamkongwe lina lyakwe Andrea. Pandanda, mwanache jwakwejo jwaganisyaga kuti ‘Dini ja ŵa Mboni sya Yehofa jili jachilendo, ŵandu ŵakwe ŵangamkulupililaga Yesu, soni akusagamba kamulichisya masengo, Malangano Gakala.’ Nambo ali agambile kulijiganya kampepe, jwachenjile kaganisye kakwe. Mwamti pandaŵi jakulijiganya jwayikanaga pakuŵecheta kuti, “Naga Baibulo jikusala myoyo, nikuti yili yisyene.”

Pali papitile ndaŵi, Andrea jwamanyikasisye achimjakwe ŵaŵili kwa Mlongo Mary soni mjakwe jwakumasengo ŵaŵatandite kulijiganya Baibulo. Konjechesya pelepa, Mlongo Mary nganamanyililaga kuti babagwe ŵakongwe ŵa Andrea lina lyawo Angela ŵaŵalijisoni ŵangalola ŵapikanilaga nawo lijiganyolyo. Kaneko lisiku line, babagwe ŵakongwewo ŵamsalile kuti ŵamanyikasye kwa Mlongo Mary kuti nombenawo alijiganyeje pajika. Angela ŵasangalalaga mnope ni yindu yajwalijiganyaga. Mwamti pawamalaga mwesi jwakombwele kwinjisya ndime syejinji sya m’Baibulo, soni jwasakaga kuti alijiganyeje Baibulo kacheche wiki jilijose. Jwalakwe jwatandite kutenda  nawo misongano ja mpingo kupitila pa fidiyokofelesi. Mwamti Andrea ni juŵamkamuchisyaga Angela kuti akomboleje kutenda misonganoji.

Mlongo Mary pajwamanyilile kuti Joshua ŵaŵaliji ŵamkwakwe ŵa Kristine akusatenda chidwi pakulijiganya ni ŵamkwakwe, Mlongo Mary jwamwusisye naga mpaka asache kulijiganya nawo. Nambo Joshua jwajanjile kuti, “Chingambeje kupikanila nawo, nambo akambusya chiwusyo chilichose, naga akumbusya chingambe kutyokapo.” Nambo mkati mwa maminisi 5 ali mkulijiganya, jwalakwejo jwawusisye yiwusyo yejinji kupunda yajwawusisye ŵamkwakwe ŵala. Mwamti jwasakaga kuti apitilisye kulijiganyako.

Chiwusyo changasawusya chajwawusisye Mlongo Mary chatendekasisye kuti akole majiganyo gejinji. Mwamti jwayikene pakwaŵenda abale ni alongo ŵane kuti amkamuchisyeje kutendesya majiganyogo. Majiganyo gosope gajwatandisye Mlongo Mary gakwanile 28, soni ŵandu ŵakwe ŵaliji ŵakutyochela m’yilambo mcheche.

Jasmin juŵaliji jwandanda kulijiganya ni Mlongo Mary jwabatisidwe mu Epulo 2021. Pele Kristine jwabatisidwe mu Meyi 2022, mwamti jwawujile ku Philippines kuti akatameje ni liŵasa lyakwe. Nombenawo wakulijiganya Baibulo ŵane ŵaŵili ŵele Kristine ŵamanyikasisye kwa Mlongo Mary ŵabatisidwe. Angela jwabatisidwe pali pagambile kumala myesi jakuŵalanjika, mwamti apano ali mpayiniya jwakutamilichika. Joshua ŵamkwakwe Kristine, soni mwanache jwawo jwamkongwe lina lyakwe Andrea pampepe ni majiganyo gane gala akwawula pasogolo.

Mu yaka 100 yandanda, ngani syambone syawandaga mwachitema pasikati pa ŵandu ŵa m’liŵasa limpepe soni pasikati pa ŵandu ŵaŵakunguluchilaga yimpepe. (Yoh. 1:​41, 42a; Mase. 10:​24, 27, 48; 16:​25-33) Mpaka atende chenene kumwusya jwakulijiganya Baibulo jwawo chiwusyo chakuti, “Ana akummanyilila mundu jwalijose jwampaka asache kulijiganya Baibulo?” Komboleka panyuma pakuwusya chiwusyochi nombesoni mpaka ŵapate ŵandu ŵajinji ŵampaka asache kulijiganya Baibulo.