ANA pakwete paŵasoŵile mundu jwakwakamuchisya paŵasimene ni yakusawusya yineyakwe? Masiku agano tukutama mu “ndaŵi jakusawusya soni jakogoya,” yayikusatutendekasya kuti tukasangalalaga soni kusoŵa ŵandu ŵakwasalila yayikutulagasya nganisyo. (2 Tim. 3:1) Atamose yili myoyo, ngatukusasosekwa kulimbanaga ni yakusawusya yetu jikape. Mwamti Baibulo jikusasala kuti achimjetu ŵambone mpaka atukamuchisye “pandaŵi ja yisawusyo.”—Mis. 17:17.

Achimjakwe ŵa ndumetume Paulo ŵaŵajendaga nawo pa utumiki wakwe ŵamkamuchisyaga mnope. (Akolo. 4:​7-11) Paulo pajwaliji mundende ku Loma, achimjakweŵa ŵamkamuchisyaga masengo gele jwalakwejo ngamkanakombola kugatenda pajika jakwe. Mwachisyasyo, Epafulodito ŵampaga Paulo yindu yakusosekwa yaŵatumisyaga abale ni alongo ŵa ku Filipi. (Afil. 4:18) Tukiko jwatumisyaga yikalata ya Paulo ku mipingo jakulekanganalekangana. (Akolo. 4:7) Ligongo lyakuti achimjakweŵa ŵamkamuchisyaga, Paulo jwakombwele kutenda chenene utumiki wakwe atamose kuti jwaliji kwajika mundende. Ana wawojo mpaka atende wuli kuti ŵakamuchisyeje achimjawo?

Yisyasyo ya masiku agano yikusalosya umbone wakwakamuchisya achimjetu. Chimo mwa yisyasyo yeleyi, ali mlongo jwine jwakusatenda upayiniya wakutamilichika ku Spain lina lyakwe Elisabet. Mamagwe mlongoju paŵasimene ni ulwele wa kansa, mlongo jwine ŵamtumichisyaga jwalakweju mautenga gejinji gakumlimbikasya gakola ndime sya m’Baibulo. Elisabet jwatite, “Mautenga gelega gambaga machili lisiku lililyose kuti ngatendaga lipowo.”—Mis. 18:24.

Mpaka tukamulaneje mnope ni Aklistu achimjetu patukwakamuchisya kwawula kukulalichila soni ku misongano ja mpingo. Mwachisyasyo, mwine mpaka alinganye yakuja kukumjigala m’bale kapena mlongo jwachikulile pakwawula ku misongano kapena kukulalichila. Naga akutenda yeleyi, nikuti mpaka akole upile wakulimbikasyana ni jemanjajo. (Alo. 1:12) Nambope, panasoni Aklistu ŵane ŵangakusakombola kutyoka pamlango pawo. Ana mpaka twakamuchisye chamti uli jemanjaji?

Abale ni alongo ŵane akwete ulwele soni yakusawusya yine yayikusiyalepelekasya kusimanikwa pa misongano ja mpingo pameso ni pameso. Aganichisye yayamtendechele M’bale David jwaŵasimanikwe ni ulwele wa kansa. Kwa miyesi jakupunda 6, m’baleju jwapochelaga mtela wa ulwele wakwewu. Nambo chakusangalasya chaliji chakuti, kwandaŵi josopeji m’baleju pampepe ni ŵamkwakwe lina lyawo Lidia, ŵatendaga nawo misongano ja mpingo kupitila pa intaneti.

 Ana abale ni alongo ŵa mumpingo mwawo ŵakamuchisye chamti uli jemanjaji? Panyuma pa msongano uliwose, abale ni alongo ŵasimanikwe ku Nyumba ja Uchimwene ŵaŵechetanaga ni liŵasali kupitila pa fidiyokofelesi. Konjechesya pelepa, naga m’baleju ni ŵamkwakwe ajanjile pa misonganopo, abale ni alongo ŵatumichisyaga mautenga gakwayamichila. Ana yakuyichisya yakwe yaliji yamti uli? Yakamuchisye kuti M’bale David ni ŵamkwakwe akatendaga mnope lipowo.

Ana mpaka tukombole kulalichila yimpepe ni abale ni alongo ŵangakusakombola kutyoka pamlango? Mpaka tulosye kuti nganitwaliŵalila jemanjaji patulinganyisye yakulalichila nawo yimpepe. (Mis. 3:27) Myoyo, mpaka tutende chenene kupataga ndaŵi jakulalichila nawo mwakulemba yikalata kapena kupitila pa foni. Ŵandu ŵangakusakombola kutyoka pamlango mpaka atende nawo msongano wakosechela utumiki kupitila pa fidiyokofelesi. Mwamti M’bale David ni ŵamkwakwe ŵayamichile dongosolo jeleji. M’bale David jwatite, “Kuŵa yimpepe ni kagulu ketu ka utumiki pa msongano wakata soni lipopelo yatupaga machili.” Nambosoni naga mpaka yikomboleche, mpaka alinganye yakumjigalila jwakulijiganya Baibulo jwawo ku nyumba ja Mklistu jwangakusakombola kutyoka pamlango kuti akatendeleje kweleko lijiganyo lya Baibulolyo.

Patukutenda yindu yimpepe ni Aklistu achimjetu ŵangakusakombola kutyoka pamlango, soni kulola ndamo syawo syambone tukusatanda kamulana mnope ni jemanjaji. Mwachisyasyo, pakulalichila yimpepe ni jemanjaji, nikulola yakuti pakakamulichisye masengo Maloŵe ga Mlungu kuti amyiche pamtima mundu jwakumlalichila, chachitanda kwachimbichisya mnope. Mwamti pakwakamuchisya Aklistu achimjawo pa yindu yausimu, yichakamuchisya kola achimjawo ŵajinji.—2 Akoli. 6:13.

Paulo yamlimbikasyaga mnope kuŵa yimpepe ni Tito juŵaliji mjakwe. (2 Akoli. 7:​5-7) Ngani ja Pauloji jikutukamuchisya kumanyilila kuti mpaka twalimbikasye ŵandu ŵakusimana ni yakusawusya ngaŵaga pakwamba kwatendela chanasape, nambo mwakuŵa nawo yimpepe soni mwakutenda yampaka tukombole pakwakamuchisya.—1 Yoh. 3:18.

Abale ni alongo ŵetu ŵa ku Russia ali chisyasyo chambone pangani jakamusyangana. Aganichisye yayamtendechele M’bale Sergey ni ŵamkwakwe lina lyawo Tatyana. Panyuma pakuti ŵapolisi awungunyisye m’nyumba jawo, ŵajigele jemanjaji kuti akawusye yiwusyo. Mlongo Tatyana ni juŵaliji jwandanda kumleka kuti awujile kunyumba. M’bale Sergey jwatite, “Ŵamkwangu paŵagambile kopochela kunyumba, mlongo jwine jwakulimba mtima jwayiche kukwalola ŵamkwanguŵa. Mwamti achimjetu ŵane ŵajinji ŵayichesoni kukutukamuchisya kulinganya yindu m’nyumba jetu panyuma pa kuwungunya kula.”

M’baleju jwasasilesoni kuti, “Ngusanonyela mnope lilemba lya Misyungu 17:​17, lyalikusati, ‘[Mjetu jusyesyene] akusakunonyela ndaŵi ni ndaŵi, soni mlongo mjakwe ŵapagwile kuti atukamuchisye pandaŵi ja yisawusyo.’ Maloŵega gangamuchisye mnope pandaŵi jatwalagasidwagaji ligongo nasosechelaga mnope chikamuchisyo cha achimjangu. Mwamti Yehofa jwambele achimjangu ŵangali woga ŵaŵangamuchisye mnope.” a

Masiku agano patukusimana mnope ni yakusawusya, ni patukusosechela mnope achimjetu ŵampaka atukamuchisye. Mwamti tuchisosekwasoni mnope achimjetuŵa pandaŵi ja yakusawusya yekulungwa. Myoyo, apano ni patukusosekwa kutenda yampaka tukombole kuti tukole achimjetu ŵambone.—1 Pet. 4:​7, 8.