1-2. Ana umi wa ŵandu waliji wakulandana chamti uli ni wa mnyamata jwatumkolasile mu ndime jandanda?

 AGAMBE ganichisya kuti mnyamata jwine jukulile mu liŵasa lyakusichila mnope. Nambo lisiku line achinangolo ŵakwe akutenda ngosi ni kuwa. Yeleyi yikumkwaya mnope jwalakwe. Nambope panasoni chindu chine chachikumkwaya mnope. Jwalakwe akuyikopochela kuti achinangolo ŵakweŵa ŵakwete ngongole jekulungwa mnope. Kaneko mmalo mwakuti mnyamataju ajigale chipanje chalesile achinangolo ŵakweŵa, jwalakwe akusosekwa kuwusya ngongole jekulungwa mnopejo. Mwamti ŵangongolewo akumkwenya mnope kuti ŵawuchisye mbiya syawo mwachitema. Nambotu ngongoleji jili jekulungwa mnope mwamti mnyamataju nganaŵa akombwele kujiwusya jika.

² Yakulandanayi ni yayatutendechelesoni m’weji. Achinangolo ŵetu ŵandanda, Adamu ni Hawa, ŵaliji ŵamlama soni ŵatamaga mu paladaiso jwakusalala mnope. (Gen. 1:27; 2:​7-9) Jemanjaji ŵakwete upile ŵakutama ni umi wakusangalala mpaka kalakala. Nambo kaneko yindu yachenjile. Jemanjaji ŵajasile upile wakutama mu paladaiso mpaka kalakala. Ana jemanjaji ŵalechele chichi ŵanache ŵawo? Baibulo jikusatusalila kuti, “Mpela mwele ulemwa wajinjile m’chilambo kupitila mwa mundu jumo [Adamu] soni chiwa chayiche kupitila mu ulemwawo, myoyo chiwa chawandile kwa ŵandu wosope ligongo wosope ŵaliji ŵakulemwa.” (Alo. 5:12) Myoyo, chindu chaŵatulechele Adamu chili ulemwa wawukusatutendekasya kuti tuweje. Ulemwa watwajigalilewu uli mpela ngongole jekulungwa mnope, jele pangali jwalijose jwa m’weji jwakakombwele kujiwusya.—Sal. 49:8.

 3. Ligongo chichi yakulemwa yetu yikusalandana ni “ngongole”?

³ Yesu jwalandenye ulemwa ni “ngongole.” (Mat. 6:12; Luk. 11:​4, maloŵe gamwiŵanda.) Patulemwisye tukusaŵa mpela kuti tukwete ngongole kwa Yehofa. Mwamti tukusasosekwa kuwusya ngongole ja ulemwaji. Yikaŵe kuti Yehofa nganalinganya yakutukululuchila, nikuti  tukalipilaga ngongole ja ulemwaji patuwile.—Alo. 6:​7, 23.

 4. (a) Yikaŵe kuti pangali chikamuchisyo chilichose, ana ŵandu wosope ŵakulemwa chikatendechele chichi? (Salimo 49:7-9) (b) Ana m’Baibulo maloŵe gakuti “ ulemwa” gakusagopolela chichi? (Alole libokosi lyakuti “Ulemwa.”)

⁴ Ana yikakomboleche kuyipatasoni yindu yosope yaŵajasile Adamu ni Hawa? Kusala yisyene mwajika jetu ngamkaniyikomboleka. (Aŵalanje Salimo 49:​7-9.) Yikaŵe kuti pangali chikamuchisyo chilichose ngamkanitukola chembecheyo chakwimuka ku chiwa. Mwamti tukagambaga kuwa mpela yinyama ngakola chembecheyo chilichose.—Jwak. 3:19; 2 Pet. 2:12.

 5. Ana Atati ŵetu ŵachinonyelo atukamuchisye chamti uli kuwusya ngongole jetu ja ulemwa? (Alole chiwulili cha pachikuto.)

⁵ Kwende tuganichisyesoni ya mnyamata jwatumkolasile kundanda jula. Ana jukapikene uli mumtima yikaŵe kuti mundu jwine jwamsichile alipeleche kuti chamkamuchisye kuwusya ngongolejo? Ngatukukayichila kuti mnyamataju jukayamichile mnope ligongo lyakumkamuchisyaku. Mwakulandana ni yeleyi, Atati ŵetu ŵachinonyelo Yehofa, atupele mtuka wawukusalipila ngongole ja ulemwa watwajigalile kwa Adamu. Pakulondesya yeleyi, Yesu jwatite, “Mlungu ŵachinonyele mnope chilambo chapasi mwamti ŵapeleche Mwanache jwakwe jumopejo, ni chakulinga chakuti jwalijose jwakumkulupilila jwalakwe akajonanjidwa nambo akole umi wangamala.” (Yoh. 3:16) Kupwatika pelepa, mtukawu utendekasisyesoni kuti yiŵeje yakomboleka kuŵa pawunasi wambone ni Yehofa.

 6. Ana chitukambilane maloŵe gapi ga m’Baibulo, soni ligongo chichi?

⁶ Ana mpaka tupindule chamti uli ni mtuka wekulungwa mnope wakululuchidwa ulemwa, kapena kuti “ngongole,” jatwakweteji? Kwanga kwa chiwusyochi kukusasimanikwa m’maloŵe gaŵakamulichisye masengo m’Baibulo. Maloŵe gakwe gali mpela gakuti kwajilanya ŵandu ni Mlungu, kusimasya ulemwa, kuŵa paunasi ni Mlungu, mbopesi jakutuwombola, mtengo wakuwombola umi soni kutuwona kuŵa ŵakulungama. Munganiji chitukambilane ngopolelo ja maloŵega. Patukuganichisya mnope maloŵega, chiyitukamuchisye kuti tumyamichileje mnope Yehofa ligongo lyakutukululuchila.

KUTUJILANYA NI MLUNGU

 7. (a) Ana Adamu ni Hawa ŵajasilesoni chindu chine chapi? (b) Ligongo lyakuti tuli ŵanache ŵa Adamu ni Hawa, ana twasosechelaga chichi? (Aloma 5:10, 11)

⁷ Adamu ni Hawa ŵajasile upile wakutama ni umi mpaka kalakala. Kupwatika pelepa, jemanjaji ŵajonasilesoni unasi wawo ni Yehofa. Adamu ni Hawa mkanalemwe ŵaliji mbali ja liŵasa lya Mlungu. (Luk. 3:38) Nambo ligongo lyakuti nganampikanila Yehofa, jemanjaji nganaŵasoni mu liŵasa lyakweli. Yeleyi yatendekwe jemanjaji mkanatande kola ŵanache. (Gen. 3:​23, 24; 4:1) Myoyo,  ligongo lyakuti tuli ŵanache ŵa Adamu, twasosekwaga kuti tuŵesoni paunasi ni Yehofa. (Aŵalanje Aloma 5:​10, 11.) Kasale kane mpaka tujile kuti twasosekwaga kutujilanya ni jwalakwe. Mwakamulana ni buku jine, maloŵe ga Chigiliki gaŵagakamulichisye masengo pakusala ya “kuŵasoni paunasi,” mpaka gagopolele “kuŵa paujakwe ni mdani.” Chakusangalasya chili chakuti Yehofa ni juŵatendekasisye kuti yeleyi yikomboleche. Ana jwatesile chamti uli yeleyi?

KUSIMASYA ULEMWA

 8. Ana maloŵe gakuyichisyaga gakusagopolela chichi? (a) kusimasya ulemwa. (b) kuŵasoni paunasi.

⁸ Yehofa jwalinganyisye dongosolo jakusimasya ulemwa pakusaka kwakamuchisya ŵandu kuti aŵesoni paunasi ŵambone ni jwalakwe. Yehofa jwalinganyisye litala lyakamuchisya kuti awusye chindu chaŵajasile Adamu mwakupeleka chindu chine chakulandana ndendende ni mtengo wa chindu chachajasichecho. Pakusala ya ngopolelo ja liloŵe lyakuti “kusimasya ulemwa,” Malemba ga Chigiliki gakusakamulichisyasoni masengo liloŵe lyakuti kuŵasoni paunasi. (Alo. 3:25) Maloŵega gakusasala ya dongosolo jaŵalinganyisye Yehofa pakusaka kumkamuchisya mundu kuti aŵesoni pamtendele ni jwalakwe.

 9. Ana Yehofa ŵalinganyisye dongosolo jamti uli pakusaka kuti ŵakululuchileje Ayisalayeli yakulemwa yawo?

⁹ Pakusaka kuti Ayisalayeli aŵesoni paunasi wambone ni Yehofa, jwalakwe jwalinganyisye kuti paŵe dongosolo jachatendeje ni chakulinga chakuti ŵakululuchileje yakulemwa yawo. Mwamti Ayisalayeli ŵakolaga Lisiku lya Mwambo Wakusimasya Ulemwa, wawatendekwaga kampepe pachaka. Palisikuli, jwamkulungwa jwa ŵakutaga mbopesi jwapelechelaga ŵandu mbopesi sya nyama. Nambope, nyamasyo nganisityosyaga ulemwa wosope wa Ayisalayeli ligongo syaliji syakutuluka pakulandanya ni ŵandu. Nambope naga Ayisalayeli agalawiche mtima soni akupeleka mbopesi kwa Yehofa, jwalakwe jwaŵaga jwakoseka kwakululuchila yakulemwa yawo. (Aheb. 10:​1-4) Konjechesya pelepa, dongosolo jeleji soni mbopesi syaŵapelekaga Ayisalayeli, syakamuchisyaga kukumbuchila kuti ali ŵakulemwa. Nambosoni syakamuchisyaga kumanyilila kuti ŵasosekwaga chindu chine chakupunda pelepa champaka chisimasye yakulemwa yawo.

10. Ana Yehofa jwalinganyisye dongosolo jambone mnope japi pakusaka kwakululuchila ŵandu yakulemwa yawo?

¹⁰ Ana Yehofa watesile yamti uli pakusaka kuti yiŵe yakomboleka kwakululuchila ŵandu yakulemwa yawo? Jwalakwe jwalinganyisye yakuti Mwanache jwakwe ‘alipeleche kampepe basi kuti anyakule ulemwa wa ŵandu ŵajinji.’ (Aheb. 9:28) Myoyo, Yesu jwapeleche “umi wakwe kuti awombole ŵandu ŵajinji.” (Mat. 20:28) Ana mbopesi jakutuwombola jili chichi?

MBOPESI JAKUTUWOMBOLA

11. (a) Mwakamulana ni yajikusasala Baibulo, ana mbopesi jakutuwombola jikusagopolela chichi? (b) Ana ni mundu jwapi jwaŵaliji jwakuŵajilwa kupeleka mbopesi jakutuwombolaji?

¹¹ Mwakamulana ni yajikusasala Baibulo, mbopesi jakutuwombola jili mtengo wawapelechedwe kuti yiŵe yakomboleka kusimasya ulemwa soni kwilana ni Mlungu. a Yehofa jwayiweni kuti mbopesi jeleji jichitendekasya kuti yindu yayajonasiche yiwujile. Ana yeleyi yikakomboleche chamti uli? Akumbuchileje kuti Adamu ni Hawa ŵajasile umi wawo wamlama nambosoni upile wakutama ni umi mpaka kalakala. Myoyo, mbopesi jakutuwombola jasosekwaga kuŵa mtengo wa chindu wakulandana ndendende ni mtengo wa chindu chachajonasiche. (1 Tim. 2:6) Mbopesi jeleji jasosekwaga kupelechedwa ni mundu jwele (1) jwaliji jwamlama, (2) jwaŵakwete upile wakutama ni umi wangamala pachilambo chapasi, soni (3) juŵaliji jwakusachilila kupeleka umi wakwe pakusaka kutuwombola. Umi wa mundu jwelejo ni wawukawombwele umi wawajonasiche.

12. Ligongo chichi Yesu jwaliji jwakuŵajilwa kupeleka mbopesi jakutuwombola?

 ¹² Aganichisye magongo gatatu gagatendekasisye kuti Yesu akombole kulipila mtengo wa mbopesi jakutuwombola. (1) Yesu jwaliji jwamlama soni “jwalakwe nganatenda kose yakulemwa.” (1 Pet. 2:22) (2) Ligongo lya yeleyi, jwalakwe akakombwele kutama ni umi wangamala pachilambopa. (3) Jwalakwe jwaliji jwakusachilila kuwa soni kupeleka umi wakwe ligongo lya m’weji. (Aheb. 10:​9, 10) Yesu jwaliji jwamlama mpela mwayaŵelele ni Adamu mkanaŵe kulemwa. (1 Akoli. 15:45) Myoyo, ligongo lyakuti Yesu jwatuwilile, jwakombwele kupeleka mtengo wakulandana ndendende ni yindu yaŵajasile Adamu. (Alo. 5:19) Mwamti Yesu jwaŵele “Adamu jwakumalisya.” Myoyo, nganipasosekwagasoni mundu jwine jwamlama kuti apeleche mtengo wa yindu yaŵajonasile Adamu. Yili myoyo ligongo lyakuti Yesu ŵawile “kampepe basi,” mwamti mbopesi jakwe jichakamuchisya ŵandu mpaka kalakala.—Aheb. 7:27; 10:12.

13. Ana dongosolo jakusimasya ulemwa jikusalekangana chamti uli ni mbopesi jakutuwombola?

¹³ Ana pana kulekangana kwamti uli pasikati pa dongosolo ja kusimasya ulemwa ni mbopesi jakutuwombola? Dongosolo ja kusimasya ulemwa jili yindu yajwalinganyisye Mlungu pakusaka kuti yiŵe yakomboleka kuŵasoni paunasi wambone ni ŵandu. Pele mbopesi jakutuwombola jili mtengo wawapelechedwe kuti yiŵe yakomboleka kusimasya ulemwa wa ŵandu. Mtengo welewu wajimilaga umi wa Yesu wamlama wawapelechedwe ligongo lya m’weji.—Aef. 1:7; Aheb. 9:14.

YEHOFA JWATUWOMBWELE SONI KUTUWONA KUŴA ŴAKULUNGAMA

14. Ana sambano chitukambilane chichi, soni ligongo chichi?

¹⁴ Ana dongosolo jakusimasya ulemwa jikwete yakuyichisya yamti uli? Baibulo jikusakamulichisya masengo maloŵe gejinji pakulondesya umbone wa dongosoloji. Atamose kuti ngopolelo sya gane mwa maloŵega sikusalandana, liloŵe lililyose likusasala kusosekwa kwa dongosolo jakusimasya ulemwaji yayapeleche upile wakuti Yehofa atukululuchileje. Pachitukambilaneje maloŵega, chitulolesoni yagakuti pakumkwaya jwalijose pajika.

15-16. (a) Ana liloŵe lyakuti “kuwombola umi” likusagopolela chichi m’Baibulo? (b) Ana yeleyi yikusatukwaya chamti uli?

¹⁵ M’Baibulo maloŵe gakuti kuwombola umi gakusagopolela kumgopola mundu, kapena kuti kumasya magambo gakwe, yayikusakomboleka ligongo lya mbopesi jakutuwombola. Pakulondesya yeleyi ndumetume Petulo jwatite, “Jemanja mkumanyilila kuti ŵamgopwele [Maloŵe gakwe gandanda “ŵamsumile; ŵamwombwele”] ku umi wangalondeka wamwajigalile kwa achinangolo ŵenu. Ngaŵa kuti ŵamgopwele ni yindu yampaka yijonasiche, mpelaga silifa kapena golide. Nambo ŵamgopwele ni myasi ja Klistu, jajili mpela myasi ja ngondolo jangalemala soni jangali liŵasi.”—1 Pet. 1:18, 19; maloŵe gamwiŵanda.

¹⁶ Ligongo lya mbopesi jakutuwombola, mpaka tuŵe ŵagopoka ku ulemwa soni chiwa. (Alo. 5:21) Kusala yisyene, tukusamyamichila mnope Yehofa soni Yesu ligongo lyakutuwombola ni myasi jakusosekwa mnope ja Yesu.—1 Akoli. 15:22.

17-18. (a) Ana kutuwona kuŵa ŵakulungama kukusagopolela chichi? (b) Ana yeleyi yikusatukwaya chamti uli?

¹⁷ Kutuwona kuŵa ŵakulungama kukusagopolela kuti magambo gatwakwete gamasile mwamti nganitukola magambo galigose soni tuli ŵaswela. Atamose kuti Yehofa akusatenda yeleyi, jwalakwe jwangakasa malamusi ga mfundo syakwe syakulungama. Yehofa ngakusatuwona kuŵa ŵakulungama ligongo lyakuti tuli ŵambone. Paja m’weji twajigalile ulemwa kwa achinangolo ŵetu, soni jwalakwe jwangasangalalaga ni ulemwa. Nambo Yehofa akusaŵa jwakusachilila kutukululuchila yakulemwa yetu naga tukukulupilila dongosolo jakusimasya ulemwa soni mbopesi jakutuwombola jajapelechedwe.—Alo. 3:24; Agal. 2:16.

¹⁸ Ana yeleyi yikugopolela chichi kwa m’weji?  Ŵandu ŵasagulidwe kuti akalamulileje yimpepe ni Yesu kwinani, akusiŵawona kuti ali ŵakulungama soni akusakolanjidwa kuti ŵanache ŵa Mlungu. (Tit. 3:7; 1 Yoh. 3:1) Mwamti Yehofa jwakululuchile yakulemwa yawo. Kwa jemanjaji yikusaŵa mpela kuti nganatendejepo ulemwa, yayikusiyatendekasya kuŵajilwa kuŵa mu Uchimwenewu. (Alo. 8:1, 2, 30) Nombe ŵandu ŵakwete chembecheyo chakutama ni umi pachilambopa akusiŵawona kuŵa ŵakulungama mpela achimjakwe ŵa Mlungu, soni akusiŵakululuchila yakulemwa yawo. (Yak. 2:​21-23) Ŵandu ŵali mu gulu jekulungwa ŵachachikulupuka pa Alamagedo, akwete chembecheyo chakutama pachilambopa mwamti ngasawa mpaka kalakala. (Yoh. 11:26) “Ŵandu ŵakulungama” soni “ŵangalungama” ŵagonile ku malembe chachijimuka. (Mase. 24:15; Yoh. 5:28, 29) Pambesi pakwe, ŵakutumichila wosope ŵakulupichika ŵa Yehofa pachilambopa chachikola “ufulu wakuchimbichika wa ŵanache ŵa Mlungu.” (Alo. 8:21) Kusala yisyene, tukwete upile wekulungwa ligongo lya dongosolo jakusimasya ulemwa jajikusatendekasya kuti tuŵe paunasi wambone mnope ni Atati ŵetu Yehofa.

19. Ana yindu yachenjile uli paumi wetu ligongo lya yindu yaŵatutendele Yehofa ni Yesu? (Alolesoni libokosi lyakuti “ Yagakusagopolela Maloŵega.”)

¹⁹ Yisyene kuti pandanda umi ŵetu ŵaliji mpela wa mnyamata jwatumkolasile kundanda jula, juŵagambile kusigala ni chingongole chele ngamkanakombolasoni kuchiwusya. Nambo tukusamyamichila Yehofa ligongo lyakutukamuchisya. Yindu yachenjile mnope paumi wetu ligongo lyakuti Yehofa ŵalinganyisye dongosolo jakusimasya ulemwa soni kupeleka mbopesi jakutuwombola. Kumkulupilila Yesu Klistu kukusatukamuchisya kuti tugopoledwe ku ulemwa soni chiwa. Mwamti Yehofa patukululuchile yakulemwa yetu, yikusaŵa mpela kuti nganitulemwasoni. Nambope, chindu chakusosekwa mnope chili chakuti, tuli paunasi wambone ni Atati ŵetu ŵachinonyelo Yehofa.

20. Ana mu ngani jakuyichisya tuchikambilana chichi?

²⁰ Kuganichisya yindu yaŵatutendele Yehofa soni Yesu, kukusatutendekasya kuti twayamichileje mnope jemanjaji. (2 Akoli. 5:15) Kusala yisyene, yikaŵe kuti jemanjaji nganatukamuchisya, ngamkanitukola chembecheyo chilichose. Nambo ana yakusatenda Yehofa pakutukululuchila yikusamkwaya chamti uli jwalijose jwetuwe? Tuchikambilana yeleyi mu ngani jakuyichisya.