1. Ligongo chichi yikusaŵa yakusawusya kumanyilila yakugopolela mundu pasasile kuti jwakululuchile?

 “BASI NAMKULULUCHILE.” Kusala yisyene tukusasangalala mnope patupikene maloŵe gelega kutyochela kwa mundu jwatumleŵele. Nambo ana maloŵe gakuti “Namkululuchile” gakusagopolela chichi kusyesyene? Komboleka mundu juŵamleŵelejo mpaka aŵechete maloŵega pakusaka kulosya kuti unasi wawo ni jwalakwejo ukupitilila. Kapena mpaka aŵechete maloŵega pakusaka kulosya kuti ngakusakasoni kuŵechetana ya nganijo, nambo yili mkuti unasi wawo ni jwalakwejo usokonechele. Kusala yisyene, ŵandu pakuŵecheta kuti namkululuchile mpaka yigopolele yejinji.

 2. Ana Baibulo jikusalondesya chamti uli kululuchila kwa Yehofa? (Alolesoni maloŵe gamwiŵanda.)

² Yakusatenda Yehofa pakutukululuchila ŵandu ŵangali umlamawe yikusalekangana mnope ni yatukusati m’weji pakwakululuchila achimjetu. Mwamti pangali mundu jwampaka akombole kumkululuchila mjakwe mpela mwakusatendela Yehofa. Pakwamba ya Yehofa, jwa masalimo jwasasile kuti, “Nambo ŵalakwe akusakululuchila [yisyesyene, NWT] ni ligongo lyakwe tukusitwachimbichisyaga.” a (Sal. 130:4) Kusala yisyene, Yehofa pamkululuchile mundu yikusaŵa kuti ‘amkululuchile yisyesyene.’ Jwalakwe ni jwakusatulosya m’weji chisyasyo chambone cha kwakululuchila ŵane. Mwamti m’Malemba gane ga Chihebeli, ŵakulemba Baibulo ŵakamulichisye masengo maloŵe gapajika pakulondesya yakusati Yehofa pakululuchila.

 3. Ana kululuchila kwa Yehofa kukusalekangana chamti uli ni kululuchila kwa m’weji? (Yesaya 55:​6, 7)

³ Yehofa pamkululuchile mundu, yikusaŵa kuti atyosisye ulemwa wosope wa mundujo. Mwamti mundujo akusakola upile wakuŵasoni  paunasi wambone ni jwalakwe. Nambo chindu chakusangalasya mnope chili chakuti Yehofa akusamkululuchila mundu mwakuwilisyawilisya.—Aŵalanje Yesaya 55:​6, 7.

 4. Ana Yehofa atesile yamti uli pakusaka kutukamuchisya kupikanichisya ngopolelo ja kululuchila kusyesyene?

⁴ Naga kululuchila kwa Yehofa kukusalekangana ni kwa ŵandu, ana ŵandu ŵangali umlamawe mpaka tutende uli kuti tupikanichisye ngopolelo jakwe? Yehofa jwakamulichisye masengo maloŵe gakuwanichisya gakupikanika chenene pakusaka kutukamuchisya kupikanichisya ngopolelo ja kululuchila kwakwe. Mwamti munganiji chitukambilane gane mwa maloŵega. Maloŵega chigatukamuchisye kulola yakusatenda Yehofa pakutyosya ulemwa, ndaŵi jijojo ni kumkamuchisyasoni mundujo kuŵa najo paunasi wambone. Kukambilana maloŵega chikutukamuchisye kuti twayamichileje mnope Atati ŵetu ŵakusakombola kululuchila mmatala gejinji.

YEHOFA AKUSATOSYA ULEMWA

 5. Ana chikusatendekwa chichi Yehofa patukululuchile yakulemwa yetu?

⁵ M’Baibulo, ulemwa akusawulandanya ni katundu jwakusitopa mnope. Pakulondesya ya ulemwa wakwe, Mwenye Daudi jwatite, “Ulemwa wangu undiŵisye msingu wangu, ukusitopa mpela msigo wakupunda machili gangu.” (Sal. 38:4) Nambotu Yehofa akusakululuka yakulemwa ya mundu jwagalawiche mtima. (Sal. 25:18; 32:5) Liloŵe lya Chihebeli lyaŵaligopolele kuti “kululuchila” likusagopolela “kunyakula” kapena kuti “kujigala.” Myoyo, Yehofa patukululuchile yikusaŵa mpela kuti atyosisye chindu chakusitopa chatwanyakwile pekoyo petu.

 6. Ana Yehofa akusayiponya chamti uli yakulemwa yetu kutali?

⁶ Maloŵe gane gakuwanichisya gakusalosya kuti Yehofa akusaŵika yakulemwa yetu kutali mnope. Lilemba lya Salimo 103:12 likusatusalila kuti, “Mpela kungopokolyuŵa kukutalikangana ni kungapilolyuŵa, myoyo akusatyosya yakulemwa yetu kuti yiŵe kwakutalikangana ni uwe.” Kusala yisyene, kungopokolyuŵa kuli kwakutalikangana mnope ni kundiŵililolyuŵa, mwamti malo gaŵiliga nganigaŵa gasimene. Kasale kane mpaka tujile kuti, Yehofa patukululuchile yikusaŵa kuti yakulemwa yetuyo ayiŵisile kutali mnope ni m’weji. Yeleyitu yikutusimichisya kuti Yehofa akusatukululuchila ni mtima wosope.

 7. Ana Baibulo jikusasala kuti Yehofa akusatenda nayo chichi yakulemwa yetu? (Mika 7:​18, 19)

⁷ Pakuŵa tuyiweni kuti mwakuwanichisya Yehofa akusayiŵika yakulemwa yetu kutali ni m’weji, ana yeleyi yikugopolela kuti jwalakwejo akusayisunga yakulemwayo? Iyayi. Pakwamba ya Yehofa, Mwenye Hesekiya jwasasile kuti, “Aponyisye kunyuma kwawo yakulemwa yangu yosope.” (Yes. 38:9, 17, NWT.) Maloŵe gakuwanichisyaga gakulosya kuti Yehofa akusajigala yakulemwa ya mundu jwagalawiche mtima ni kuyiponya kutali kwangawonekasoni. Kasale kane mpaka tujile kuti, “Atendekasisye [yakulemwa yangu] mpela kuti nganiyitendekwa.” Baibulo jalondesisyesoni mfundo jeleji m’maloŵe gane gakuwanichisya gagakusasimanikwa pa Mika 7:18, 19. (Aŵalanje.) Palilembali, pakusasala mpela kuti Yehofa akuponya ulemwa wetu wosope pasi pa nyasa. Mundaŵi jakala, yaliji yangakomboleka kuti mundu achipate chindu chachigwilile pasi pa nyasa.

 8. Ana pakwika apano tulijiganyisye yamti uli?

⁸ Kupitila m’maloŵe gakuwanichisyaga, tulijiganyisye kuti Yehofa patukululuchile akusatyosya yakulemwa yetu yosope. Mwamti ngatukusasosekwasoni kulijimbaga magambo ligongo lya yakulemwa yeleyo. Yeleyitu yikukamulana ni yaŵasasile Daudi jwaŵatite, “Ŵana upile ŵandu ŵakululuchidwe yitendo yawo yakusakala soni yakulemwa yawo. Jwana upile mundu jwele yakulemwa yakwe Yehofa ngasayikumbuchila.” (Alo. 4:​6-8) Kusala yisyene, kwelekutu kuli kululuchila kusyesyene.

 YEHOFA AKUSAFUFUTA YAKULEMWA YETU

 9. Ana Yehofa jwakamulichisye masengo maloŵe gapi gakuwanichisya pakulondesya kululuchila kwakwe?

⁹ Yehofa akusakamulichisyasoni masengo maloŵe gane gakuwanichisya pakutukamuchisya kumanyilila kuti kupitila mu mbopesi jakutuwombola jwalakwe akusafufuta yakulemwa yosope ya mundu jwagalawiche mtima. Mwakuwanichisya Yehofa akusaŵa mpela kuti akuchapa soni kuyigulula yakulemwayi. Yeleyi yikusatendekasya kuti jwakulemwajo aŵe jwamswela. (Sal. 51:7; Yes. 4:4; Yel. 33:8) Pakusala yakuyichisya ya yeleyi, Yehofa jwatite, “Mŵele ŵachejewu ligongo lya ulemwa wenu, nambo une tinjimchapa, nipo timchiŵa ŵaswela kuti mbee. Mgambile kuti psyu mpela miasi, timchiŵa ŵaswela mpela litonji.” (Yes. 1:18) Yindu yechejewu payigwilile pa nguwo jeswela yikusasawusya kuti yityoche. Nambotu, kupitila mu maloŵe gakuwanichisyaga, Yehofa akutusimichisya kuti yakulemwa yetu mpaka yityoche ni ngawonekasoni.

10. Ana Yehofa akusakamulichisya masengo maloŵe gane gapi pakulondesya yakusati pakutukululuchila?

¹⁰ Mpela mwajaŵechetele ngani jandanda jila, ulemwa akusawulandanya ni “ngongole.” (Mat. 6:12; Luk. 11:​4, maloŵe gamwiŵanda.) Myoyo, ndaŵi jilijose patumlemwechesye Yehofa, yikusaŵa mpela kuti tukonjechesya ngongole jatukwete kala. Mwamti ngongole jakwe jikusaŵa jekulungwa mnope. Nambo Yehofa patukululuchile, yikusaŵa mpela kuti amasisye ngongole jatwasosekwaga kuwusya. Jwalakwe jwangatukwenyagasoni pa yakulemwa yajwatukululuchile. Mpela mwayikusaŵela kuti mundu akusasangalala mnope pakululuchidwe ngongole, m’wejisoni tukusasangalala mnope Yehofa patukuluchile ulemwa wetu.

11. Ana Baibulo jikusagopolela chichi pajikusala kuti Yehofa ‘atukululuchile’ yakulemwa yetu? (Masengo 3:19)

¹¹ Yehofa jwangagamba kutukululuchila ngongole jatwakwete kapena kuti yakulemwa yetu. Nambo jwalakwe akusayitendekasya yakulemwayo kuti yikawonechelasoni. (Aŵalanje Masengo 3:19.) Kuti tupikanichisye yeleyi aganichisye ayi: Tuwanichisye kuti mundu jwine akukwacha ngongole ja mbiya jaŵajigele wawojo. Atamose ali akwachile mbiyajo, manambala gakwe mpaka gawonechelejepe. Nambotu kumkululuchila mundu kuli kwakulekangana ni yeleyi. Kuti tupikanichisye chenene yeleyi, tukusosekwa kumbuchila kuti inki jaŵakamulichisyaga masengo kala, jaŵaga jangasawusya kufufutika ni mesi. Mwamti yakombolekaga kujigala litonje lyenyoŵe ni kufufutila maloŵe gelembedwe. Myoyo, naga mundu “amkululuchile” ngongole, yaŵaga kuti ajimasisye kapena kuti ajifufwite. Mwamti meso ga mundu ngamkanigakombolasoni kulola papalembedwe ngongolejo. Yeleyi yamtendekasyaga mundujo kuwoneka mpela kuti nganakola ngongole jilijose. Kusala yisyene, yili yakulimbikasya kumanyilila kuti Yehofa jwangagamba kumasya yakulemwa yetu nambo kuti akusayifufuta kuti yikawonechelasoni.—Sal. 51:9.

12. Ana tukulijiganya chichi kutyochela pa maloŵe gakuwanichisya gakusala ya lipundugulu?

¹² Yehofa jwakamulichisyesoni masengo maloŵe gakuwanichisya mpela gelega pakulondesya yakusatenda jwalakwe pakwakululuchila ŵandu yakulemwa yawo. Jwalakwe jwasasile kuti, “Ndyosisye yakulemwa yenu mpela liwunde soni ulemwa wenu mpela lipundugulu.” (Yes. 44:22) Yehofa patukululuchile, yikusaŵa mpela kuti akamulichisye masengo lipundugulu pakusiŵa yakulemwayo kuti yikawonechelasoni.

13. Ana tukusapikana uli mumtima Yehofa patukululuchile yakulemwa yetu?

¹³ Ana yeleyi yikutujiganya chichi? Yehofa patukululuchile, ngatukusosekwa kulijimbaga mnope magambo kwa umi wetu wosope. Tukuŵecheta yeleyi ligongo lyakuti, kupitila mu myasi ja Yesu Klistu, yikusaŵa kuti ngongole jetu ja ulemwa jimasile. Mwamti kwa Yehofa yikusaŵa mpela kuti nganitutenda chakulemwa chilichose. Yeleyitu, ni yakusatenda Yehofa patukululuchile yakulemwa yetu soni patugalawiche mtima.

 YEHOFA AKUSATENDEKASYA KUTI UNASI WETU NI JWALAKWE UWUJILESONI

14. Ligongo chichi tukusosekwa kulupilila mnope yakuti Yehofa chachitukululuchila yisyesyene? (Alolesoni chiwulili.)

¹⁴ Kululuchila kwa Yehofa kukusatukamuchisya kuti tukombole kuŵanajosoni paunasi wambone. Yikusatukamuchisyasoni kuti tuŵambaleje kulijimba magambo mnope. Mwamti ngatukusasosekwa kogopaga kuti Yehofa jwatusunjile chakulukosi soni akusosasosa lipesa lyakutupela chilango. Jwalakwe nganaŵa atesile yeleyi. Yehofa pasasile kuti atukululuchile, tukusosekwa kulupilila yeleyo. Jwakulochesya Yelemiya jwakamwile maloŵe ga Yehofa pajwasasile kuti, “Tinjakululuchila ulemwa wawo, mwakuti ngisinawukumbuchilasoni.” (Yel. 31:34) Nombe ndumetume Paulo pakulondesya ya maloŵega jwatite, “ngasingumbuchila yakulemwa yawo.” (Aheb. 8:12) Nambo ana maloŵega gakusagopolela chichi?

15. Ana Yehofa pakusala kuti ngasakumbuchilasoni yakulemwa yetu yikusagopolela chichi?

¹⁵ Ngaŵa kuti ndaŵi syosope Baibulo pajikusala maloŵe gakuti ‘kumbuchila’ yikusagopolela ya mundu jwakuganichisya yindu yayatendekwe munyuma. Mmalomwakwe, maloŵega mpaka gajimilesoni ya mundu jwakutenda yineyakwe. Mwachisyasyo, jwachiswamba juŵamkomele pachitela mwakuŵandikana ni Yesu jwaŵendile kuti, “Yesu, akangumbuchile pachakajinjile mu Uchimwene wawo.” (Luk. 23:​42, 43) Pelepatu, munduju jwamŵendaga Yesu kuti chamtendele yineyakwe. Mwamti yaŵatite Yesu pakumjanga munduju, yalosisye kuti chachitendapo kandu mwakumjimusya ku chiwa. Myoyo, Yehofa pakusala kuti ngasayikumbuchilasoni yakulemwa yetu, akusagopolela kuti ngasatenda chilichose pakusaka kutupa chilango ligongo lya yakulemwa yatwatesile munyumamo yaŵatukululuchile.

16. Ana Baibulo jikusalondesya chamti uli ufulu wawukusapagwa Yehofa patukululuchile?

¹⁶ Baibulo jikusakamulichisyasoni masengo maloŵe gane gakuwanichisya pakusaka kutukamuchisya kupikanichisya ufulu watukusakola Yehofa patukululuchile. Ligongo lyakuti tuli ŵangali umlama, tukusaŵa mpela “achikapolo  ŵa ulemwa.” Nambo Yehofa patukululuchile, tukusaŵa mpela kuti ‘tugopweche ku ukapolo wa ulemwa.’ (Alo. 6:​17, 18; Chiw. 1:5) Kusala yisyene, patumanyilile kuti Yehofa atukululuchile mpaka tusangalale mpela kapolo jwagopoledwe mu ukayidi.

17. Ana yikusakomboleka chamti uli kuti kululuchila kumkamuchisye mundu kulama? (Yesaya 53:5)

¹⁷ Aŵalanje Yesaya 53:5. Maloŵe gakumalisya gakuwanichisya gatukusaka tukambilane gakusatulandanya m’weji ni ŵandu ŵakwete ulwele wakogoya mnope. Mwamti Yehofa akusatukamuchisya kuti tulame ku ulwelewu kupitila mu mbopesi jakutuwombola jaŵapeleche jwalakwe. (1 Pet. 2:24) Mbopesi jakutuwombolaji jikusatendekasya kuti yiŵe yakomboleka kuŵasoni paunasi wambone ni Yehofa, wawukusajonasika patutesile ulemwa. Mundu jwalamile ku ulwele wekulungwa akusasangalala mnope. Myoyo, m’wejisoni tukusasangalala mnope Yehofa patukululuchile soni kutujitichisya nikuŵanajosoni paunasi wambone.

ANA YEHOFA PATUKULULUCHILE YIKUSAKWAYA CHAMTI ULI UMI WETU?

18. Ana tulijiganyisye yamti uli kutyochela pa maloŵe gakuwanichisya gakulondesya ya kululuchila kwa Yehofa? (Alolesoni libokosi lyakuti “Ana Yehofa Akusatukululuchila Chamti Uli?”

¹⁸ Ana tulijiganyisye yamti uli patukambileneje maloŵe gakuwanichisya gagakusasimanikwa m’Baibulo gakulondesya yakusati Yehofa pakutukululuchila? Jwalakwe patukululuchile jwangayikumbuchilasoni yakulemwa yetuyo. Yeleyi yikusatukamuchisya kuti tuŵesoni paunasi wambone ni Atati ŵetu ŵakwinani. Nambosoni yikusatukumbusya kuti kululuchila kwa Yehofa uli mtuka. Yehofa akusatupa mtuka welewu ligongo lya chinonyelo soni umbone mtima wakwe wekulungwa wakusiŵalosya ŵandu ŵakulemwa ŵele nganaŵajilwaga mtuka welewu.—Alo. 3:24.

19. (a) Ligongo chichi tukusasosekwa kusangalala? (Aloma 4:8) (b) Ana tuchikambilana chichi mu ngani jakuyichisya?

¹⁹ Aŵalanje Aloma 4:8. Kusala yisyene, wosopewe tuli ŵakusangalala mnope kumanyilila kuti Yehofa ‘akusatukululuchila’ yisyesyene. (Sal. 130:4) Nambope, kuti Yehofa atukululuchile tukusasosekwa kutenda chindu chine chakusosekwa mnope. Yesu jwasasile kuti, “Naga ngamkwakululuchila ŵandu yakulemwa yawo, Atati ŵenu ngasamkululuchilasoni yakulemwa yenu.” (Mat. 6:​14, 15) Yeleyitu yikulosya kuti tukusasosekwa kumsyasya Yehofa mwakwakululuchila ŵane. Nambo ana mpaka tutende chamti uli yeleyi? Ngani jakuyichisya jichitukamuchisya kumanyilila mwampaka tutendele yeleyi.