Baba ni mama ŵalipelekaga mnope ku dini ja Chikatolika. Nambo paŵalijiganyisye m’Baibulo kuti lina lya Mlungu lili Yehofa, wosopeŵa ŵaŵele ŵa Mboni sya Yehofa ŵakulipeleka mnope. Baba ŵalesile kusepa yiwanichisyo ya Yesu. Mmalomwakwe, ŵakamulichisye masengo matabwa gagaliji pasi pa nyumba jetu pakulinganya Nyumba ja Uchimwene jandanda ku San Juan del Monte kakaliji kadela kane ka mbali ja msinda wa Manila. Msindawu waliji likulu lya chilambo cha Philippines. Babaŵa ŵakombwele kutenda yeleyi ligongo lyakuti ŵaliji kalipentala.

Napagwile mu 1952, kaneko achinangolo ŵangu ŵatandite kunjiganya Baibulo pampepe ni achakuluŵangu mcheche soni mwanja chemwali ŵatatu. Uneji ni junaliji jwamnandi mnope pa wosopeŵa. Panakusile, baba ŵasalile kuti mbalanjeje Baibulo chaputala chimpepe palisiku. Konjechesya pelepa ŵanjiganyagasoni mabuku gejinji gakulondesya Baibulo. Ndaŵi sine, achinangolo ŵangu ŵaŵilangaga ŵakulolela madela soni ŵakwimila nyambi kuti agone ku nyumba jetu. Mwamti abaleŵa ŵatulimbikasyaga mnope pa liŵasa lyetu. Yindu yaŵatusalilaga jemanjaji yatukamuchisye wosope mwiŵasa mwetu kuti tunonyeleje mnope kumtumichila Yehofa.

Achinangolo ŵangu ŵangamuchisye kuti ngole chikulupi chakulimba. Mama ali ajasiche, baba ni une twatandite upayiniya mu 1971. Nambo kaneko mu 1973 ndili ngwete yaka 20 babaŵa ŵajasichesoni. Kuwa kwa achinangolo ŵangu wosope kwandendekasisye kusoŵa chitela chakamula soni natendaga lipowo mnope. Nambo chembecheyo chachikusasimanikwa m’Baibulo changamuchisye kuŵa ‘jwakulimbangana soni jwangakayichila’ yayangamuchisye kuŵa paunasi wambone ni Yehofa. (Aheb. 6:19) Pali pagambile kupita kandaŵi kamnono chiwile baba, naŵele mpayiniya jwapadela. Mwamti ŵandumisye ku kachilumba ka Coron kakaliji mu upande wa Palawan.

Panakopochelaga ku chilumba cha Coron naliji ndili ngwete yaka 21. Ligongo lyakuti nakulile ku tawuni, nasimonjile mnope kuyiwona kuti kumaloko nyumba syejinji syaliji syangali magesi ni mesi. Konjechesya pelepa, ŵandu ŵamnonope ni ŵaŵakwete njinga sya moto soni galimoto. Atamose kuti kumaloku kwapali  abale ŵakuŵalanjika, nambo nganingola mpayiniya jwakuti njendeje najo, mwamti ndaŵi sine nalalichilaga jika. Mwesi wandanda, nasoŵile mnope ŵandu ŵa mwiŵasa mwangu soni achimjangu. Chilo natamaga pasa ni kulolaga ndondwa kwinani kwineku ndili mkulila. Mwamti nagambaga kuyiwona mpela ngambe kuleka utumiki kuti mbujileje kunyumba.

Pandaŵi jakusawusyaji napopelaga kwa Yehofa kumŵenda kuti angamuchisye. Naganichisyaga maloŵe gakulimbikasya ganaŵalasile m’Baibulo soni m’mabuku getu. Naganichisyagasoni mnope lilemba lya Salimo 19:14. Mwamti panganichisye ya lilembali nayiwonaga kuti Yehofa chaŵe “Lwala lwangu ni mkulupusyo jwangu” naga nguganichisya mnope yakumsangalasya jwalakwejo mpela yakusatendaga soni ndamo syakwete. Ngani jine ja mu Sanja ja Mlonda ja Chisungu jajakwete mtwe wakuti “Nganimŵa Jika” a jangamuchisye mnope. Mwamti najiŵalangaga mwakuwilisyawilisya. Yisyesyene yakwe pandaŵi jakusawusyaji nganimba jika, ligongo Yehofa jwaliji ni une. Mwamti pandili jika yambaga upile wakupopela, kulijiganya soni kuganichisya yanalijiganyisyeyo.

Mkanipapite ndaŵi jelewu chikopochele ku Coron, ŵambisile kuŵa jwamkulungwa jwa mumpingo. Ligongo lyakuti napali jwamkulungwa jwa mumpingo jikape, wiki jilijose natendesyaga Sukulu ja Undumetume wa Mlungu, msongano wakosechela utumiki, Lijiganyo lya Buku lya Mpingo, nambosoni Sanja ja Mlonda. Konjechesya pelepa, naŵechetagasoni ngani sya wosope wiki jilijose. Yindu yeleyi yandendekasyaga kuti ngatendaga lipowo.

Nasangalalaga mnope ni utumiki wanatendaga ku Coron. Mwamti apano ŵandu ŵane ŵanajiganyaga Baibulo ŵabatisidwe. Nambo papali yakusawusya yine yanasimanaga nayo. Ndaŵi sine, nasosekwaga kwenda chiŵandika lisiku lyamtundu kuti ngayiche kudela janasosekwaga kulalichila. Mwamti pane nganimanyililaga kwachingagone pachingayichepo. Gawo ja mpingo wetu jakwetesoni tuyilumba twine twamwanamwana. Mwamti ndaŵi syejinji nakwelaga maboti ga yinjeni ni kupitaga panyasa pali pana mbungo jamachili. Pandaŵiji nganimanyililaga kung’ambila. Atamose kuti papali yakusawusya yosopeyi, Yehofa jwangamuchisyaga soni kunjenjela. Pali papitile ndaŵi, namanyilile kuti Yehofa jwakundile kuti simane ni yakusawusyayi, kuti ngosechele kutenda utumiki wine wakusawusya mnope.

Mu 1978, ŵandumisye kuti ngatumichileje m’chilambo cha Papua New Guinea chachili kumpoto kwa Australia. Delaji jili jamatumbi. Nasimonjile mnope panamanyilile kuti ŵandu chiŵandika 3 miliyoni ŵakusatamaga m’chilambochi akusaŵecheta yiŵecheto yakupunda 800. Nambo ŵandu ŵajinji akusaŵecheta chiŵecheto cha Melanesian Pidgin chelesoni akusagamba kuchisala kuti Tok Pisin.

Ndili ngopochele kwene ku delaji, ŵambisile mumpingo wa Chisungu wawaliji mu msinda wekulungwa wa Port Moresby. Nambo kaneko natandite kusongana mumpingo wa chiŵecheto cha Tok Pisin, mwamti najinjile kalasi ja kulijiganya chiŵechetochi. Pangulalichila, nakamulichisyaga masengo maloŵe galigose ganalijiganyisye. Yeleyi yakamuchisye kuti nalijiganye chiŵechetochi mwakwanguya. Mkanipapite ndaŵi jelewu, nakombolaga kuŵecheta ngani ja wosope m’chiŵechetochi. Yasimonjesye mnope kuti mkanichimale chaka chiyichile ku delaji, ŵambisile kuŵa jwakulolela dela. Mwamti nalolelaga mipingo jajaŵechetaga chiŵechetochi jajaliji mmaupande gejinji m’chilambocho.

Ligongo lyakuti mipingo jatalikangene mnope, nasosekwaga kulinganya misongano ja dela jejinji. Yeleyi  yandendekasyaga kuti njendeje mnope. Pandanda, natendaga mnope lipowo ligongo lya yindu yachilendo, chiŵecheto chachilendo, soni ndamo jachilendo. Ligongo lyakuti kudelaji kwapali matumbi gejinji soni yikwesya, kajende kaŵaga kakusawusya. Myoyo, kuti ngomboleje kwendela mipingoji nasosekwaga kwenda pa ndege wiki jilijose. Mwamti ndaŵi sine jwakwela naŵaga jika mu kandege kamwana kemalemale. Kwela ndegeku kwandesyaga woga mpela mwayaŵelaga panakwelaga maboti gala.

Ligongo lyakuti kudelaji mafoni galiji gakusoŵa, nalumbikanaga ni mipingo kupitila mu yikalata. Mwamti ndaŵi syejinji nakopochelaga pampingopo chikalata changu mkanichiŵe kopochela. Ndaŵi jilijose patusimene ni abale ni alongo, ŵambochelaga ni magasa gaŵili, mwamti yaŵatendagayo yandendekasyaga kuyiwona kuti natesile chenene kusagula kuti namtumichileje Yehofa. Mwamti nam’weni Yehofa ali mkungamuchisya mu yindu yejinji, soni unasi wangu ni jwalakwe walimbile mnope.

Ndili ngopochele pa chilumba cha Bougainville, nasimene ni liŵasa line lyalyasechelelaga. Kaneko ŵambusisye kuti, “Ana akutukumbuchila?” Nakumbuchile kuti nalilalichile liŵasali pandaŵi jine ndili ngopochele kwene ku Port Moresby. Natandite kwajiganya Baibulo mkanimbe kumsalila m’bale jwakudelako kuti jwajiganyeje. Apano, liŵasali lyabatisidwe. Welewutu uli umo mwa upile wanapatile mu yaka yitatu yanatumichile ku Papua New Guinea.

Mkanimbe kutyoka ku Coron mu 1978, namanyigene ni mlongo jwine jwakusalala soni jwakulipeleka pakumtumichila Yehofa lina lyakwe Adel. Mlongoju jwatendaga upayiniya wakutamilichika kwineku ali mkulela ŵanache ŵakwe ŵaŵili mena gawo Samuel soni Shirley. Konjechesya pelepa, mlongoju jwasamalilagasoni mamagwe ŵaŵaliji ŵachikulile. Mu Meyi 1981, nawujile ku Philippines kuti ngamlombe mlongoju. Tuli tugambile kulombana, wosope twatendaga upayiniya wakutamilichika, kwineku tuli mkulisamalila liŵasa lyetu.

Atamose kuti nakwete udindo wakulisamalila liŵasa, mu 1983 ŵambisilesoni kuŵa mpayiniya jwapadela. Ŵandumisye kuti ngatumichileje ku chilumba cha Linapacan chachaliji mu upande wa Palawan. Twasamile kudelaji liŵasa lyetu lyosope, mwamti pandaŵijo kwaliji kuli kwangali jwa Mboni sya Yehofa jwalijose. Mama ŵawo ŵamkwangu ŵajasiche pali papitile chaka. Nambope, kulipeleka mnope pamasengo gakulalichila kwatukamuchisye kuti tukalagasikaga mnope nganisyo ligongo lya chiwachi. Twatandisye majiganyo ga Baibulo gejinji ku Linapacan gagajawulaga pasogolo. Mwamti twasosekwaga mwachitema Nyumba ja Uchimwene jamwana. Myoyo, twagambile kutaŵa jika. Pali pamasile yaka yitatu chiyichile kudelaji, twasangalele mnope kwawona ŵandu 110 ali asimanikwe pa Chikumbuchilo. Mwamti ŵajinji mwa jemanjaji ŵabatisidwe m’weji tuli tutyosile.

Mu 1986, ŵandumisye ku chilumba cha Culion kukwaliji ŵandu ŵakulwala matana. Kaneko nombe ŵamkwangu ŵaŵele mpayiniya jwapadela. Pandanda, twajogopaga kwalalichila ŵandu ŵaŵakwete ulwelewu. Nambo abale ni alongo ŵa ku delaji ŵatusimichisye kuti ŵandu ŵaŵakwete ulwelewu ŵapochele mtela mwamti nganaŵa ŵapelele ŵane. Ŵane mwa ŵandu ŵakulwalaŵa ŵatendaga misongano ja mpingo m’nyumba ja mlongo jwine. Kaneko twatandite kusyoŵelela kwalalichila ŵanduŵa. Mwamti waliji upile wekulungwa kwasalila chembecheyo cha m’Baibulo ŵandu mpela  ŵeleŵa ŵaŵaliwonaga kuŵa ŵangasosekwa. Yalijisoni yakusangalasya kwawona ŵandu ŵaŵakwete ulweleŵa ali mkusangalala ligongo lyakola chembecheyo chakuti lisiku line chachikola yilu yambone.—Luk. 5:​12, 13.

Pakusaka kwakamuchisya ŵanache ŵetu kuti asyoŵelele umi wa ku Culion, twalinganyisye yakwaŵilanga alongo ŵaŵili ŵachisikana kutyochela ku Coron kuti akungulucheje nawo. Mwamti alongo ŵaŵiliŵa pampepe ni ŵanache ŵetu ŵasangalalaga mnope paŵalalichilaga pajika jawo. Jemanjaji paŵalalichilaga soni kwajiganya ŵanache ŵajinji, une ni ŵamkwangu twaŵaga tuli mkwajiganya achinangolo ŵawo. Pandaŵi jine, twalijiganyaga Baibulo ni maŵasa 11. Mkanipapite ndaŵi, twakwete majiganyo gejinji gakwawula pasogolo, mwamti twatamilikasisye mpingo wasambano.

Pandanda, napali jikape jwamkulungwa jwa mumpingo mu delaji. Myoyo, ofesi ja nyambi jasalile kuti ndendesyeje misongano ja mpingo wiki jilijose kwa ŵakulalichila 8 ŵa ku Culion. Kaneko ni kuja kutendesyasoni misongano mmusi wa Marily kukwapali ŵakulalichila 9. Musi welewu waliji palutando lwakwenda ma awala gatatu pa liboti. Panyuma pa misongano ja mpingo, une ni liŵasa lyangu twasosekwaga kwenda kwa ma awala gejinji kupita mu dela ja matumbi kuti tukatendesye majiganyo ga Baibulo mmusi wine wakolanjidwa Halsey.

Kaneko, ŵandu ŵajinji ŵa ku Marily soni ku Halsey ŵatandite kumtumichila Yehofa mwamti twataŵile Nyumba ja Uchimwene mmalo gosopega. Nambo abale ni alongo ŵa ku Linapacan soni ŵandu ŵane ŵa chidwi ŵapeleche yindu yejinji yakamulichisya masengo nambosoni ŵakamulaga nawo masengo gakutaŵago. Nyumba ja Uchimwene ja ku Marily jaliji jakomboleka kusonganamo ŵandu 200 soni jaliji jakomboleka kujikusya. Myoyo, twatendelagamo misongano ja dela.

Ŵanache ŵetu paŵakusile, une ni ŵamkwangu twatandite utumiki wakulolela dela ku Philippines mu 1993. Kaneko, mu 2000 najinjile Sukulu Jakwiganya Undumetume, kuti akanjiganye kuŵa jwakwiganya jwa sukuluji. Nayiwonaga kuti nganguŵajilwa utumiki welewu. Nambo ŵamkwangu ŵalimbikasyaga ndaŵi syosope. Ŵangumbwisye kuti Yehofa ni jwampaka ambe machili kuti ngombole kutenda utumikiwu. (Afil. 4:13) Ŵamkwanguŵa ŵakwete umboni wa yeleyi ligongo  ŵakombolaga kutenda utumiki wawo atamose kuti ŵalwalaga.

Kaneko mu 2006 ndili mkwiganya kalasi jine, ŵamkwangu ŵasimanikwe ni ulwele winewakwe. Nganitujembecheyaga yeleyi. Panasalile ŵamkwangu kuti tukusosekwa kuleka utumiki kuti nasamalileje chenene, ŵanjanjile kuti, “Agambe kupata dokotala jwampaka angamuchisye, mwamti ngumanyilila kuti Yehofa chatukamuchisye kuti tupitilisye kumtumichila.” Kwa yaka 6 yakuyichisya, ŵamkwangu ŵapitilisye kumtumichila Yehofa mwangadandawula chilichose. Paŵalepelaga kwenda, ŵalalichilaga ali atemi pa njinga ja ŵandu ŵalemale. Paŵalajililaga kuŵecheta, ŵagambaga kwanga pa misongano ja mpingo mwakusala maloŵe gamo kapena gaŵili basi. Ŵamkwanguŵa ŵapitilisye kupochela mautenga gakwayamichila ligongo lya chisyasyo chawo chambone chakupilila mpaka paŵajasiche mu 2013. Natumichile yimpepe ni ŵamkwangu ŵakulupichikaŵa kwa yaka yakupunda 30. Ŵamkwanguŵa paŵajasiche, nadandawile mnope soni natesile lipowo.

Ŵamkwangu ŵasakaga kuti mbitilisye kumtumichila Yehofa, mwamti ni yandesile. Kola yakutenda yejinji, kungamuchisye kuti ngomboleje kulimbana ni lipowo. Kutandila mu 2014 mpaka mu 2017, naŵele ndili mkujijendela mipingo jajikusaŵecheta Chittagalog m’yilambo yele masengo getu ŵagalekasisye. Kaneko nakwete upile wakujijendela mipingo ja chiŵechetochi ku Taiwan, ku United States, soni ku Canada. Mu 2019, najiganyisye kalasi ja Chisungu ja Sukulu ja Ŵakulalichila ya Uchimwene ku India soni ku Thailand. Kutenda mautumiki gelega kungamuchisye kuŵa jwakusangalala mnope. Mwamti ngusasangalala mnope pangulipeleka pakumtumichila Yehofa.

Pambochele utumiki uliwose wasambano, ngusatanda kwanonyela mnope abale ni alongo ŵasimene nawo. Mwamti kulekangana ni jemanjaji kukusaŵa kwakupweteka mnope. Payitendekwe yeleyi, ngusasosekwa kwamba kumdalila mnope Yehofa. Ndaŵi syosope, jwalakwe aŵele ali mkungamuchisya. Mwamti yeleyi yiŵele yili mkungamuchisya kuti ngomboleje kulimbana ni yakusawusya yiliyose yampaka simane nayo. Apano ngutenda upayiniya wapadela ku Philippines. Mwamti syoŵelele mumpingo wangu wasambano, mwelesoni mwana abale ni alongo ŵakusangamuchisya soni kusamalila mnope. Ngusayamichila mnope pangumwona Samuel ni Shirley ali mkusyasya chikulupi chaŵakwete mayi ŵawo.—3 Yoh. 4.

Kusala yisyene, mbele ndili mkusimana ni yakusawusya yejinji paumi wangu. Yine mwa yakusawusyayi yaliji kwawona ŵamkwangu ali mkulaga ni ulwele soni kuwa. Konjechesya pelepa, nasosekwagasoni kusyoŵelela kutama malo ga chilendo. Nambope, nayiweni kuti Yehofa “nganaŵa kwakutalikangana ni jwalijose jwa m’weji.” (Mase. 17:27) Mkono wa Yehofa “nganiwuŵa wejipi” kuti mpaka ulepele kwakamuchisya soni kwalimbikasya ŵakutumichila ŵakwe. (Yes. 59:​1, NWT.) Yehofa jwali Lwala lwangu, aŵele ali mkungamuchisya kwa umi wangu wosope, mwamti ngusinamyamichila mnope. Kusala yisyene, Yehofa nganandeka jika.