NGANI JAKULIJIGANYA 40
‘Kwalongolela Ŵandu Ŵajinji mu Litala lya Chilungamo’
“Ŵele ŵiŵalongolele ŵandu ŵajinji mu litala lya chilungamo tachilanguka mpela ndondwa mpaka kalakala.”—DAN. 12:3.
NYIMBO NA. 151 Jwalakwe Chachaŵilanga
YACHITULIJIGANYE *
1. Ana tukwembecheya yindu yakusangalasya yapi mu Ulamusi wa Yaka 1,000 wa Klistu?
KUSALA yisyene, yichiŵa yakusangalasya mnope pajichiyika ndaŵi jele ŵandu ŵawe chachijimuka mu Ulamusi wa Yaka 1,000 wa Klistu. Ŵandu wosope ŵele ŵakunonyelwa ŵawo ŵajasiche akwembecheya kwawonasoni jemanjajo. Mwelemutu ni mwakusapikanilasoni Yehofa. (Yob. 14:15) Agambe ganichisya mwatuchisangalalila kwawona ŵawe ali mkwimuka. Mpela mwatwalijiganyichisye mungani jipite jila, “ŵakulungama” ŵele mena gawo galembedwe m’buku ja umi chachijimuka kuti ‘apochele umi.’ (Mase. 24:15; Yoh. 5:29) Komboleka kuti ŵajinji mwa ŵakunonyelwa ŵetu chachiŵa mu gulu ja ŵandu ŵandanda kwimuka panyuma pa Alamagedo. * Nambosoni, ŵandu “ŵangalungama” ŵele nganakola upile wakwanila wakummanyilila kapena kumtumichila Yehofa pandaŵi jiŵaliji umi, chachijimuka kuti ‘awelusidwe.’
2-3. (a) Mwakamulana ni Yesaya 11:9, 10, ana ni masengo gekulungwa gapi gakwiganya gagachitendekwa? (b) Ana chitukambilane chichi munganiji?
2 Ŵandu wosope ŵachachijimuka ku ŵawe chachisosekwa kwajiganya. (Yes. 26:9; 61:11) Yeleyi yichitendekasya kuti chigapagwe majiganyo gekulungwa ganganigatendekweje mu mbili josope ja ŵandu. (Aŵalanje Yesaya 11:9, 10.) Ligongo chichi tukuŵecheta yeleyi? Ligongo limo lili lyakuti, ŵandu ŵangalungama ŵachachijimuka ku ŵawe, chachisosekwa kulijiganya yakwamba Yesu Klistu, Uchimwene wa Mlungu, soni mbopesi jakutuwombola. Chachisosekwasoni kumanyilila kusosekwa kwa lina lya Yehofa soni ligongo lyakwe jwalakwe ali jwakuŵajilwa kulamula. Atamose ŵandu ŵakulungama chachisosekwa kulijiganya yaŵele Yehofa ali mkwajiganya ŵandu ŵakwe pakwamba ya chakulinga chakwe pachilambo chapasi pano. Ŵane mwa ŵandu ŵakulungamaŵa ŵawile Baibulo mkanijimale kulembedwa. Yeleyi yikulosya kuti ŵandu ŵakulungama soni ŵangalungama chachikola yejinji yakuti alijiganye.
3 Munganiji, chitukambilane yiwusyo yakuyichisyayi. Ana masengo gekulungwa gakwiganya gachitendekwa chamtuli? Ana masengoga gachilosya chamtuli naga mundu akusosekwa kulembedwa lina lyakwe m’buku ja umi mpaka kalakala kapena iyayi? Kwanga kwa yiwusyoyi kuli kwakusosekwa mnope kwa m’weji masiku agano. Mpela mwachituyiwonele munganiji, yakulochesya yine yakusangalasya ya m’buku ja Daniele soni ja Chiwunukuko chiyitukamuchisye kupikanichisyasoni chenene yayichitendekwa pachachijimuka ŵandu ku ŵawe. Nambo chandanda, kwende tulole kaje yakulochesya yakusangalasya yayikusasimanikwa pa Daniele 12:1, 2.
“ŴAŴAGONILE MWITAKA CHACHIJIMUKA”
4-5. Ana pa Daniele 12:1 pakusasala yamtuli yakwamba masiku gambesi?
4 Aŵalanje Daniele 12:1. Buku ja Daniele jikusasala yindu yakusangalasya yayichitendekwa m’masiku gambesi. Mwachisyasyo, pa Daniele 12:1 akusasala ya Mikaele jwali Yesu Klistu ali ‘mkwalondela ŵandu ŵa Mlungu.’ Yakulochesyayi yatandite kukwanilichikwa mu 1914 pandaŵi jele Yesu ŵamsagwile kuŵa Mwenye jwa Uchimwene wa Mlungu kwinani.
5 Nambope, Daniele jwasalilidwesoni kuti Yesu ‘chachalondela ŵandu pandaŵi ja yisawusyo yakogoya yanganiyiwonecheje kala kosope.’ Ndaŵi ja “yisawusyo yakogoya” jeleji jili ndaŵi ja “yakusawusya yekulungwa” yakusayisala pa Mateyu 24:21. Myoyo Yesu akwalondela kapena kuti kwachenjela ŵandu ŵa Mlungu kumbesi kwa yisawusyo yakogoya yeleyi jajichiŵa ndaŵi ja Alamagedo. Nombe buku ja Chiwunukuko jikusijakolanga jemanjaji kuti ali “gulu jekulungwa ja ŵandu ŵakopweche mu yakusawusya yekulungwa.”—Chiw. 7:9, 14.
6. Ana gulu jekulungwa ja ŵandu ŵachachikulupuka pa yakusawusya yekulungwa chichatendechela chichi? Alondesye. (Alolesoni ngani jajili m’magasiniji jakuti “Yiwusyo Yakutyochela kwa Ŵakuŵalanga” pakwamba ya ŵandu ŵachachijimuka ku ŵawe.)
6 Aŵalanje Daniele 12:2. Ana gulu jekulungwa ja ŵandu ŵachachikulupuka pa yisawusyo yakogoya chichatendechela chichi? Yakulochesya yeleyi ngayikusala yakwimuka kwakuwanichisya. Munyumamu twakulupililaga kuti lilemba lya Daniele 12:2 lyasalaga ya kwimuka kwa ŵandu ŵachachijawula kwinani kapena kwawula pasogolo kwa masengo gakulalichila gagasigele panandi kumala mu 1918 ligongo lya ŵandu ŵakusisya. * Mmalomwakwe pelepa akwamba ya ŵandu ŵachachijimuka m’chilambo chasambano. Ligongo chichi tukuŵecheta yeleyi? Maloŵe gakuti “mwitaka” gaŵagakamulichisyesoni masengo pa Yobu 17:16 gakusagopolelasoni kuti “m’malembe.” Yeleyi yikugopolela kuti maloŵe ga pa Daniele 12:2 gakwamba yakwimuka ku ŵawe kusyesyene kwakuchitendekwa panyuma pa masiku gambesi kapena kuti panyuma pa Alamagedo.
7. (a) Ana ŵandu chachijimuka ku ŵawe chachisosekwa kutenda yamtuli kuti apochele “umi wangamala”? (b) Ligongo chichi kwimuka kweleku kuchiŵa “kwambone mnope”?
7 Sano ana maloŵe gagakusasimanikwa pa Daniele 12:2 gakuti tachijimuka kuti apochele “umi wangamala” gakugopolela chichi? Maloŵega gakugopolela kuti mkati mwa yaka 1,000, ŵandu ŵatachijimuka ku ŵawe chachisosekwa kulijiganya, kupitilisya kulijiganyako ni kumpikanila Yehofa ni Yesu kuti chapochele umi wangamala. (Yoh. 17:3) Kweleku kuchiŵa “kwimuka kwambone mnope” kupunda kwimuka kukwatendekwe munyumamu. (Aheb. 11:35) Tukuŵecheta yeleyi ligongo lyakuti ŵandu ŵaŵajimwiche ku ŵawe munyumamu ŵawilesoni.
8. Ligongo chichi ŵandu ŵane chachijimuka kuti ‘chapochele chilango’ mwamti ngasasimanikwasoni mpaka kalakala?
8 Nambo ngaŵa kuti ŵandu wosope ŵachachijimuka ku ŵawe chachikunda kwiganyidwa ni Yehofa. Yakulochesya ya Daniele yasasile kuti ŵandu ŵane chachijimuka kuti ‘chapochele chilango’ kapena kuti chachijonanjidwa mwamti ngasasimanikwasoni mpaka kalakala. Ligongo lyakuti jemanjajo chachilosya mtima wakwimuchila, mena gawo ngasigalembedwa m’buku ja umi soni ngasapochela umi wangamala. Myoyo, pa Daniele 12:2 pakusasala ya yindu yayichatendechela ŵandu ŵachachijimuka ku ŵawe pakujigalila yindu yachachitenda panyuma pakwimukaku. * (Chiw. 20:12) Mwamti ŵane chachipochela umi wangamala pele ŵane ngasapochela.
‘KWALONGOLELA ŴANDU ŴAJINJI MU LITALA LYA CHILUNGAMO’
9-10. Ana chindu chine chapi chachichitendekwa panyuma pa yakusawusya yekulungwa? Ana ŵani ‘ŵatachilanguka mbee mpela kwinani’?
9 Aŵalanje Daniele 12:3. Ana chindu chine chapi chachichitendekwa panyuma pa “yisawusyo yakogoya”? Konjechesya pa yakusala pa Daniele 12:2, ndime 3 jikusasalasoni yindu yine yayichitendekwa panyuma pa yakusawusya yekulungwa.
10 Ana ŵani ‘ŵatachilanguka mbee mpela kwinani’? Maloŵe ga Yesu gagakusimanikwa pa Mateyu 13:43 gakusatukamuchisya kupata kwanga kwakwe. Pakusati, “Pandaŵi jelejo ŵakulungama chachiŵala mnope mpela lyuŵa mu Uchimwene wa Atati ŵawo.” Pelepa Yesu jwasalaga ya “ŵanache ŵa Uchimwene” ŵali Aklistu ŵasagulwe ŵachakalamulile yimpepe ni jwalakwe mu Uchimwene kwinani. (Mat. 13:38) Myoyo nikuti maloŵe ga pa Daniele 12:3 gakwamba ya ŵasagulwe soni ya masengo gachachikamula jemanjaji mkati mwa Ulamusi wa Yaka 1,000.
Ŵa 144,000 chachikamula masengo yalumo ni Yesu Klistu pakulongolela masengo gakwiganya gagachitendekwa mkati mwa yaka 1,000 (Alole ndime 11)
11-12. Ana ŵa 144,000 chachikamula masengo gapi mkati mwa yaka 1,000?
11 Ana ŵasagulwe chachalongolela ‘chamtuli ŵandu ŵajinji mu litala lya chilungamo’? ŵasagulwe chachitenda yindu mwakamulana mnope ni Yesu Klistu pakulongolela masengo gakwiganya gagachitendekwa pachilambo chapasi mkati mwa yaka 1,000. Ngaŵa kuti ŵa 144,000 chachigambaga kulamulila mpela mamwenye basi, nambo chachiŵasoni ŵambopesi. (Chiw. 1:6; 5:10; 20:6) Myoyo jemanjaji chachikamuchisya nawo pamasengo ‘gakujiposya mitundu ja ŵandu.’ Mwamti mwapanandipanandi chachakamuchisya ŵandu kuti aŵesoni ŵamlama. (Chiw. 22:1, 2; Esek. 47:12) Kusala yisyene ŵasagulwe chachisangalala mnope.
12 Ana ŵani ŵali m’gulu ja “ŵandu ŵajinji” ŵachachilongoleledwaga mu litala lya chilungamo? Jemanjaji ali ŵandu ŵachachijimuka ku ŵawe soni ŵachachikulupuka pa Alamagedo yalumo ni ŵanache ŵele mwine chachipagwaga m’chilambo chasambano. Panyuma pa yaka 1,000, ŵandu wosope pachilambo chapasi chachiŵa ŵamlama. Sano ana mena ga jemanjaji gachilembedwa pandaŵi japi ni chakulembela cha inki ngaŵaga ni pemsulo?
KULINJIDWA KAKUMALISYA
13-14. Ana ŵandu wosope ŵamlama ŵachachiŵa pachilambopa chachisosekwa kutenda chichi mkanaŵe kupochela umi wangamala?
13 Tukusosekwa kumbuchila kuti kuŵa jwamlama kwangagopolelaga kuti basi mundujo awupatile umi wangamala. Aganichisye ya Adamu ni Hawa. Jemanjaji ŵaliji ŵamlama, nambope ŵasosekwaga kumpikanila Yehofa mkanaŵe kupedwa umi wangamala. Nambo chakutesya chanasa, jemanjaji ŵalepele kumpikanila Mlungu.—Alo. 5:12.
14 Ana kumbesi kwa yaka 1,000 yindu yichiŵa uli kwa ŵandu ŵachachitamaga pachilambo chapasichi? Ŵandu wosope chachiŵa ali ŵamlama. Ana ŵandu wosope ŵamlamawo chachikamuchisya ulamusi wa Yehofa mpaka kalakala? Kapena ŵane mwa jemanjajo chachitenda yindu mpela Adamu ni Hawa ŵaŵaŵele ŵangakulupichika atamose kuti ŵaliji ŵamlama? Tukusosekwa kupata kwanga kwa chiwusyo chelechi, nambo ana mpaka tukupate chamtuli kwanga kwakwe?
15-16. (a) Ana ŵandu wosope chachipedwa chakachi upile wakulosya kulupichika kwawo kwa Yehofa? (b) Ana pachiŵa yakuyichisya yamtuli pa kulinjidwa kwakumalisya kweleko?
15 Satana chachimwugalila mundende kwa yaka 1,000. Pandaŵijo, jwalakwe ngasakombolasoni kumsokonasya mundu jwalijose. Nambope, chakumbesi kwa yaka 1,000, Satana chachigopoledwa kundendeko. Pandaŵi jelejo jwalakwe chachilinga kwasokonasya ŵandu ŵamlama. Pandaŵi jakulinjidwaku, ŵandu wosope ŵamlama pachilambopa chachikola upile wakulosya naga akusalichimbichisya lina lya Mlungu soni kamuchisya ulamusi wakwe. (Chiw. 20:7-10) Yindu yachachitenda mundu jwalijose pandaŵi jakulinjidwaji, yichilosya naga lina lyakwe lichisosekwa kulembedwa m’buku ja umi mpaka kalakala.
16 Baibulo jikusatusalila kuti ŵandu ŵane chachiŵa ŵangakulupichika mpela Adamu ni Hawa, mwamti chachikana ulamusi wa Yehofa. Ana jemanjajo chichatendechela chichi? Pa Chiwunukuko 20:15 pakusatusalila kuti, “Jwalijose jwele lina lyakwe nganilisimanikwa mu buku ja umi ŵamponyisye m’nyasa jakolela moto.” Basitu, ŵandu wosope ŵachachimjimuchila Mlungu chachijonanjidwa mwamti ngasasimanikwasoni mpaka kalakala. Nambo ŵandu ŵajinji ŵamlama chachipunda pa kulinjidwa kwakumalisya. Mwamti mena ga jemanjaji gachilembedwa m’buku ja umi soni ngasigafufutidwa mpaka kalakala.
YAYICHITENDEKWA MU “NDAŴI JAKUMALISYA”
17. Ana Daniele jwasalilidwe kuti mundaŵi jetu jino muchitendekwa chichi? (Daniele 12:4, 8-10)
17 Kusala yisyene, yili yakusangalasya mnope kuganichisya yindu yeleyi yayichitendekwa kusogoloku. Nambope, Daniele jwasalilidwesoni ni lilayika yindu yine yakusosekwa mnope yakwamba ndaŵi jetu jino, jajili “ndaŵi jakumalisya.” (Aŵalanje Daniele 12:4, 8-10; 2 Tim. 3:1-5) Lilayikalyo lyamsalile Daniele kuti, “Umanyilisi tiwuchikulilakulila.” Yeleyi, yagopolelaga kuti ŵakutumichila ŵa Mlungu chachipikanichisya chenene yakulochesya ya m’buku ja Daniele. Lilayika lila lyasasilesoni kuti mundaŵi jetu jino, ŵandu ‘ŵakusakala tachipitilisya kutenda yakusakala. Pangali atamose jumo mwa jemanjajo jutachiyipikanichisya yeleyi.’
18. Ana pachangakaŵapa ŵandu ŵakusakala chichatendechela chichi?
18 Masiku agano, yikusawoneka mpela kuti ŵandu ŵakusakala ngakupochela chilango payindu yakusatendaga. (Mala. 3:14, 15) Nambo pachangakaŵapa, Yesu chachawelusya ŵandu ŵali mpela mbusi ni kwalekanganya ni ŵandu ŵali mpela ngondolo. (Mat. 25:31-33) Ŵandu ŵakusakalaŵa ngasakulupuka pandaŵi ja yakusawusya yekulungwa, soni ngasajimuka kuti atame m’chilambo chasambano. Mena gawo ngasigasimanikwa mu “buku jachikumbukumbu” jakusajikolanga pa Malaki 3:16.
19. Ana apano tukusosekwa kutenda chichi? Ligongo chichi tukusosekwa kutenda yeleyi? (Malaki 3:16-18)
19 Ajino jili ndaŵi jakuti tulosye kuti nganituŵa kumbali ja ŵandu ŵakusakala. (Aŵalanje Malaki 3:16-18.) Yehofa akwasonganganya ŵandu ŵakusiŵawona kuti ali ‘ŵakweŵakwepe’ kapena kuti ŵandu ŵali ŵakusosekwa mnope kwa jwalakwejo. Ngatukukayichila kuti m’wejisoni tukusasaka kuŵa mu gulu jeleji.
Kusala yisyene, yichiŵa yakusangalasya kumwona Daniele, ŵakunonyelwa ŵetu, soni ŵandu ŵane ŵajinji ali ‘ajimwiche’ kuti apochele mbote jawo m’chilambo chasambano (Alole ndime 20)
20. Ana Yehofa ŵamsalile chichi Daniele? Ligongo chichi wawojo akwembecheya mwachidwi kukwanilichikwa kwa yaŵasasile Yehofayi?
20 Kusala yisyene tukutama mundaŵi jakusangalasya mnope. Nambosoni yindu yakusangalasya mnope yisigele panandi kutendekwa. Myoyo pachangakaŵapa tuchawona ŵandu wosope ŵakusakala ali mkwajonanga. Panyuma pa yeleyi, tuchiyiwona yaŵasasile Yehofa kwa Daniele yili mkukwanilichikwa. Jwalakwe jwatite, “pambesi timchijimuka ku ŵawe kuti timpochele mbote jenu.” (Dan. 12:13) Ana akwembecheya mwachidwi lisiku ‘lyachachijimuka’ Daniele soni ŵakunonyelwa ŵawo? Naga yili myoyo, akusosekwa kutenda yakomboleka kuti apano aŵe mundu jwakulupichika. Yeleyi yichakamuchisya kuti lina lyawo liŵepe m’buku ja umi ja Yehofa.
NYIMBO NA. 80 “Apasye Soni Alole, Yehofa Ali Jwambone”
^ Nganiji jikusala kuchenga kwakupali pa kapikane ketu pa maloŵe gakwamba majiganyo gekulungwa gakusagalondesya pa Daniele 12:2, 3. Chitulole ndaŵi jayichitendekwa yeleyi soni ŵandu ŵachachikamula nawo masengoga. Chitulolesoni yagachitenda majiganyogo pakwakamuchisya ŵandu kosechela chenene kulinjidwa kwakumalisya kwakuchitendekwa kumbesi kwa Yaka 1,000 ya Ulamusi wa Klistu.
^ Komboleka kuti kwimuka ku ŵawe kuchitanda ni ŵandu ŵakulupichika ŵaŵawile m’masiku gambesi. Kaneko ŵane wosope chachijimukaga pakujigalila m’bado uliwose. Naga yichiŵa myoyo, nikuti m’bado uliwose uchikola upile wakwapochela ŵandu ŵakwamanyilila chenene ŵachachijimuka ku ŵawe. Mulimose mwayichiŵela, nambo Malemba gakusasala kuti ŵandu ŵakusajimuka kuti akatameje kwinani, jwalijose akusajimuka “pandaŵi jakwe.” Mwakulandana ni yeleyi, nombe ŵandu ŵachachijimuka kuti atameje pachilambopa komboleka kuti chachajimusyaga mwadongosolo.—1 Akoli. 14:33; 15:23.
^ Yeleyi yikuchenga kapikane ketu ka maloŵe gagakusimanikwa m’buku ja Chichewa jakuti Samalani Ulosi wa Danieli! mtwe 17, soni mu Sanja ja Mlonda ja Chichewa ja Julayi 1, 1987, pp. 21-25.
^ Mwakulekangana ni yeleyi, maloŵe gakuti “ŵakulungama” soni “ŵangalungama” gagakusasimanikwa pa Masengo 24:15 soni maloŵe gakuti “ŵaŵatendaga yindu yambone” nambosoni gakuti “ŵaŵatendaga yindu yakusakala” gagakusasimanikwa pa Yohane 5:29 gakusasalaga ya yindu yaŵatendaga ŵanduwo mkanaŵe kuwa.
