Apikane mwajikusajanjila Baibulo yiwusyo yeleyi.

Lilemba lya Masengo 24:15 likusatusalila kuti kuchiŵa “kwimuka kwa ŵandu ŵakulungama soni ŵangalungama.” Ŵandu ŵakulungama ŵakwasala pelepa ali ŵandu ŵaŵampikanilaga Mlungu pandaŵi jiŵaliji ni umi. Sonitu jemanjaji mena gawo galembedwe m’buku ja umi. (Mala. 3:16) Nambo ŵandu ŵangalungama ŵakwasala pelepa akupwatikapo ŵandu ŵele pandaŵi jiŵaliji umi, nganakola upile wakulijiganya yakwamba Yehofa. Myoyo mena gawo nganigalembedwa m’buku ja umi.

Pa lilemba lya Yohane 5:28, 29 pakusasalasoni ya magulu gaŵili ga ŵandu ŵakwasala pa Masengo 24:15. Yesu jwasasile kuti ŵandu “ŵaŵatendaga yindu yambone” chachijimuka kuti ‘apochele umi’ nambo “ŵaŵatendaga yindu yakusakala chachawelusya.” Ŵandu ŵakulungamaŵa ŵatendaga yindu yambone pandaŵi jiŵaliji ni umi. Jemanjaji chachijimuka kuti apochele umi ligongo mena gawo gali chiŵelape m’buku ja umi. Nambo ŵandu ŵangalungama ŵaŵatendaga yakusakala pandaŵi jiŵaliji umi chachijimuka kuti awelusidwe. Mena ga jemanjaji nganigaŵe kulembedwa m’buku ja umi soni mundaŵi jakuwelusyaji chachisosekwa kwalolela kwa kandaŵi kuti alosye naga achenjile ndamo syawo syakusakala. Pandaŵi jakuŵelusyaji, jemanjaji chachikola upile wakulijiganya yakwamba Yehofa. Nambosoni chachikola upile wakulembedwa mena gawo m’buku ja umi.

Lilemba lya Chiwunukuko 20:12, 13 likusasala kuti ŵandu wosope ŵachachijimuka ku ŵawe chachisosekwa kupikanila yindu ‘yayalembedwe m’mipukutu’ yayichiŵa malamusi gasambano gachachitupa Mlungu m’chilambo chasambano. Yehofa chachajonanga ŵandu ŵachachikana kupikanila malamusi gelega.—Yes. 65:20.

Yakulochesya ya pa Daniele 12:2, NWT, yasasile kuti ŵane mwa ŵandu ŵaŵawile chachijimuka kuti apochele “umi wangamala soni ŵane chachijimuka kuti apochele chilango mwamti ngasasimanikwa mpaka kalakala.” Lilembali likusala ya kwimuka kwakumalisya kwakupochela “umi wangamala” kapena kuŵelusidwa kwakuti “ngasasimanikwa mpaka kalakala.” Myoyo pambesi pa yaka 1,000 ŵandu ŵane chachipochela umi wangamala nambo ŵane chachijonanjidwa mwamti ngasasimanikwasoni mpaka kalakala.—Chiw. 20:15; 21:3, 4.

Kuti tupikanichisye yeleyi, kwende tuwanichisye yakutendekwa ya magulu gaŵili gagachijimuka ku ŵawega ni ŵandu ŵakusaka kuja kutama m’chilambo chine. Ŵandu ŵakulungama ali mpela ŵandu ŵapochele chikalata chakwakunda kukamulaga masengo m’chilambocho kwandaŵi jelewu soni mwagopoka. Nambo ŵandu ŵangalungama ali mpela ŵandu ŵapochele chikalata chakwakunda kutama m’chilambomo kwakandaŵi soni mpela achalendo. Myoyo ŵanduŵa mpaka asosekwe kupikanila malamusi ga m’chilambocho kuti ŵakunde kutama mpaka kalakala. Mwakulandana ni yeleyi, ŵandu ŵangalungama ŵachachijimuka ku ŵawe chachisosekwa kupikanila malamusi ga Yehofa kuti aŵe ŵakulungama ni chakulinga chakuti chapitilisye kutama mu paladaiso. Nambosoni mwangasamala kandu ya chikalata chapochele mundu chakumkunda kutama m’chilambo chine, ŵane mpaka akundidwe kupitilisya kutama m’chilambomo nambo ŵane mpaka ŵatopole. Yeleyi mpaka yitendekwe pakujigalila yakutenda mundujo m’chilambomo. Mwakulandana ni yeleyi ŵandu ŵachachijimuka ku ŵawe chachawelusya kakumalisya pakujigalila yachachitendaga jemanjajo m’chilambo chasambano.

Ngaŵa kuti Yehofa ali Mlungu jwachanasape, nambo alisoni Mlungu jwa chilungamo. (Det. 32:4; Sal. 33:5) Jwalakwe chachilosya chinonyelo chakwe mwakwajimusya ŵakulungama soni ŵangalungama. Nambo jwalakwe chachisaka kuti jemanjaji apitilisye kupikanila malamusi gakwe pangani ja chambone soni chakusakala. Ŵandu ŵachachipitilisya kumnonyela jwalakwe soni ndamo syakwe syakulungama ni ŵachachakunda kupitilisya kutama m’chilambo chasambano.