1-3. (a) Ana Aklistu alosisye catuli kuti ali ŵakusacilila kusimanikwa pamisongano? (Alole ciwulili cacili penanici.) (b) Ana mu ngani ajino citutagulilane cici?

PANDAŴI jele mlongo jwine lina lyakwe Corinna ŵaliji ni yaka 17, mamagwe ŵataŵigwe. Kaneko, Corinna ŵamjigele ni kwawula najo ku cilambo ca Siberia, kukwaliji kwakutalikangana mnope ni kumangwakwe. Kweleko, ŵamtendelaga yindu mpela kapolo. Ndaŵi sine, jwalakwe ŵamkanganicisyaga kamula masengo kumigunda kuli mkusisima mnope, soni nganakola yakuwala yakuliteteya ku mbepo. Atamose kuti ŵasimanaga ni yakusawusyayo, Corinna ni mlongo jwine ŵasimicisye mtima kuti akasimanikwe pamsongano wampingo.

² Corinna ŵatite, “Twatyosile ligulo kumalo kwatwakamulilaga masengo ni twajesile lutando lwa makilomita gakwana 25 kuti tukayice kwakwelela sitima. Sitimajo janyakwice 2 koloko jacilo, soni twajesile kwa maawala 6 ni kutuluka. Kaneko twajesile wapasi lutando lwa makilomita 10 kuti tukayice kumisonganoko.” Corinna ŵaliji jwakusangalala mnope kuti ŵajesile wele ulendowo. Jwalakwe ŵatite, “Kumisonganoko, twalijiganyisye Sanja ja Mlonda soni kwimba nyimbo sya Ucimwene. Yeleyi yalimbikasisye  cikulupi cetu.” Atamose kuti jamanjaji nganajawula kumasengoko kwa masiku gatatu, nambo jwakulolela masengo nganamanyilila yakuti Corinna ni mjakwe ŵatyosile.

³ Ndaŵi syosope, ŵandu ŵa Mlungu akusasangalala kusongana pampepe. Mwambone, Aklistu ŵandanda ŵasangalalagasoni kusongana pampepe ni kumlambilaga Yehofa soni kulijiganya ya jwalakwe. (Mase. 2:42) Mwangakayicila, wawojosoni akusasacilila kwawula kumisongano mwakutamilicika. Nambo ndaŵi sine mpaka yasawusyeje kusimanikwa pamisongano mwakutamilicika mpela mwayikusaŵela ni abale ni alongo ŵane. Komboleka kuti, akusosekwa kamula masengo kwa maawala gejinji kapena akwete yindu yejinji yakuti atende kapenasoni ndaŵi syejinji akusalipikana kuŵa ŵakupela. Ana cici campaka cakamucisye kumalana ni yakusawusyayi, ni kwendelecela kusimanikwa pamisongano? ^[1] Ana mpaka twakamucisye catuli ŵatukusajiganya Baibulo soni ŵandu ŵane kukuwona kusosekwa kwakusimanikwa pamisongano? Mu ngani ajino, citutagulilane magongo gakwana 8 gakututendekasya kusimanikwa pa misongano. Magongoga mpaka tugaŵice m’yiwusyo yitatu ayi: Ana misongano jikusatukamucisya catuli? Ana kusimanikwa kwetu pamisongano kukusakamucisya catuli ŵandu ŵane? Ana Yehofa akusapikana wuli mumtima patukusimanikwa pamisongano? ^[2]

4. Ana kusimanikwa pamisongano kukusatukamucisya catuli kulijiganya ya Yehofa?

⁴ Misongano jikusatujinganya. Misongano jikusatukamucisya kulijiganya ya Mlungu jwetu, Yehofa. Mwambone, yaka yiŵili yapacangakaŵapa, mipingo jejinji jalijiganyaga buku jakuti, Yandikirani kwa Yehova pa Lijiganyo lya Baibulo lya Mpingo. Ana kulijiganya ndamo sya Yehofa soni kupikana ndemanga syakutyocela pasi pa mtima siŵapelekaga abale ni alongo ŵawo nganikwalimbikasya kwanonyela mnope Atati ŵawo ŵakwinani? Tukusapikanicisyasoni Maloŵe ga Mlungu mwakupikanila mwakusamala ngani, yilosyo, soni kuŵalanga kwa Baibulo. (Neh. 8:8) Mwambone, agambe ganisya yindu yejinji yatukusalijiganya cijuma cilicose patukosecela kuŵalanga kwa Baibulo soni kwapikana ŵane ali mkusala songa syalijiganyisye kutyocela m’Baibulomo.

5. Ana misongano jetu jaciklistu jakamucisye catuli kamulicisya masengo yakusalijiganya m’Baibulo soni kongolela undumetume wawo?

⁵ Misongano jikusatujiganya kamulicisya masengo songa sya m’Baibulo mu mbali syosope sya umi wetu. (1 Ates. 4:9, 10) Mwambone, Sanja ja Mlonda Jakulijiganya jikusalimbikasya ŵandu ŵa Mlungu kuti atendeje yakusasaka Mlungujo. Ana pakwete palijiganyisye Sanja ja Mlonda jajalimbikasisye kutenda yejinji pakumtumicila Mlungu, kongolela mapopelo gawo, kapena kwakululucila abale ni alongo? Msongano wa Undumetume ni Umi Waciklistu ukusatujiganya mwampaka tulalicilileje ngani syambone soni kwakamucisya ŵane kupikanicisya usyesyene wa m’Baibulo.—Mat. 28:19, 20.

6. Ana misongano jikusatulimbikasya catuli?

⁶ Misongano jikusatulimbikasya. Yakutendekwa m’cilamboci, mpaka yitutendekasye kulepela ganisya cenene, kulagasika nganisyo, soni kutusokonasya mwausimu. Mwakulekangana ni yeleyi, misongano jampingo jikusatulimbikasya kwendelecela kumtumicila Yehofa. (Aŵalanje Masengo 15:30-32.) Ndaŵi syejinji, pamisongano tukusalijiganya yakwayana ni kwanilicikwa kwa yakulocesya ya m’Baibulo. Yeleyi yikusatutendekasya kuŵa ŵakusimicisya kuti yaŵalocesye Yehofa pakwamba ya msogolo yicikwanilicikwa yisyene. Abale ni alongo pakuŵeceta ngani pa pulatifomu akusatulimbikasya. Aklistu acimjetu pakupeleka ndemanga pamisongano soni kwimba nyimbo mwakutyocela pasi pamtima akusatulimbikasyasoni. (1 Akoli. 14:26) Nambosoni patukunguluka ni abale soni alongo ŵetu misongano mkanijitande soni jili jimasile tukusalipikana kuŵa ŵakusangalala mnope ligongo lyakuti tukwete acimjetu ŵajinji ŵakusatunonyela yisyene.—1 Akoli. 16:17, 18.

7. Ligongo cici kusimanikwa pamisongano kuli kwakusosekwa mnope?

 ⁷ Msimu weswela wa Mlungu ukusatukamucisya patuli pamisongano. Yesu Klistu ali apite kwinani ŵatite, “Jwakwete liwiwi apikane yawukusala msimu ku mipingo.” (Ciu. 2:7) Yesu akulongolela mpingo waciklistu pakamulicisya masengo msimu weswela. Tukusosekwa msimu weswelawo kuti utukamucisyeje kumalana ni yakulingwa, kulalicila mwakulimba mtima, soni kusagula yindu mwalunda. Pa ligongo lyeleli, tukusosekwa kutenda yiliyose yakomboleka kuti tusimanikweje pamisongano kuti tupoceleje cikamucisyo ca msimu weswela wa Mlungu.

8. Ana kusimanikwa kwetu pamisongano ja mpingo, ndemanga syetu, soni kwimba nyimbo yikusakamucisya catuli ŵakulambila acimjetu? (Alole libokosi lyakuti, “Akusapikana Cenene M’cilu Panyuma pa Misongano.”)

⁸ Misongano jikusatupa lipesa lyakulosya kuti tukusanonyela abale ni alongo ŵetu. Akusosekwa ganicisyaga mwakusokoka yakusawusya yakusimana nayo abale ni alongo mumpingo mwawo. Ni ligongo lyakwe ndumetume Paulo ŵalembile kuti, “Kwende tuganicisyaneje jwine ni mjakwe.” Kaneko jwalakwe ŵajendelecele kuŵeceta kuti mpaka tulosye kwaganicisya ŵane ‘mwangaleka kusimanikwa pamisongano jetu.’ (Ahe. 10:24, 25) Kusimanikwa kwawo pamisongano kukusalosya kuti akusiŵawona ŵakulambila acimjawo kuŵa ŵakusosekwa. Nambosoni, ndemanga syawo syakutyocela pasi pamtima soni kwimba nyimbo yikusiyalimbikasya Aklistu acimjawo.—Akolo. 3:16.

9, 10. (a) Ana maloŵe ga Yesu ga pa Yohane 10:16 gakutukamucisya catuli kupikanicisya kusosekwa kwakusimanikwa pamisongano? (b) Ana kusimanikwa kwetu pamisongano mwakutamilicika kukusakamucisya catuli Aklistu ŵaŵatopolegwe ni ŵacinasi ŵawo?

⁹ Misongano jikusatukamulanya ni ŵakulupilila acimjetu. (Aŵalanje Yohane 10:16.) Yesu ŵaliwanicisye ni jwakucinga, soni ŵakumkuya ŵakwe ni likuga lya ngondolo. Tuwanicisye kuti ngondolo siŵili sili petumbi, soni sine siŵili sili m’ciŵata, nambosoni ngondolo jine jikulya panepakwe. Ana pelepa mpaka tujile kuti ngondolo 5 syelesyo sili likuga limo? Iyayi. Likuga lya ngondolo likusaŵaga yimpepe ni kumkuyaga mkucinga. Mwakulandana ni yeleyi, m’wejisoni nganituŵa tumkuyisye Mkucinga jwetu naga tukusalilekanganya ni acimjetu. Tukusosekwa kusimanikwaga pamisongano jaciklistu kuti tuŵe mbali ja “likuga limo lya ngondolo” lyalikulongolelegwa ni “mkucinga jumo.”

¹⁰ Patukusimanikwa pamisongano, tukusaŵaga tuli mkulimbisya mkamulano wetu waciklistu. (Sal. 133:1) Ŵane mwa ŵakulambila acimjetu ŵatopolegwe pamlango ni acinangolo, soni ŵacinasi ŵawo. Nambo, Yesu ŵasasile kuti cacapa jemanjajo liŵasa lyausimu lyalicanonyelaga soni kwasamalila. (Maliko 10:29, 30) Pakusimanikwa pamisongano mwakutamilicika, mpaka alosye kuti ali atati, mama, mcimwene, soni mcemwali  kwa jemanjajo. Ana yeleyi ngayikutulimbikasya kutenda yakomboleka kuti tusimanikweje pamisongano josope?

11. Ana kusimanikwa kwetu pamisongano kukusatukamucisya catuli kumpa Yehofa yindu yatukuŵajilwa kumpa?

¹¹ Patukusimanikwa pamisongano tukusampaga Yehofa yindu yatukuŵajilwa kumpa. Mpela Mkupanganya jwetu, tukusosekwa kum’yamicilaga, kumcimbicisya, soni kumlumbaga. (Aŵalanje Ciunukuko 7:12.) Patukupopela, kwimba nyimbo, soni kuŵeceta ya Yehofa pamisongano, tukusampaga jwalakwe cindu cakusosekwa mnope cacili kumlambila. Uli upile wekulungwa mnope kumlambila Yehofa cijuma cilicose.

12. Ana Yehofa akusapikana wuli mu mtima patukupikanila lilamusi lyakuti tusimanikweje pamisongano?

¹² Yehofa akusasakasoni kuti tumpikanileje. Jwalakwe ŵatulamwile kuti tukaleka kusimanikwa pamisongano, mnopemnope ndaŵi ja mbesi jino. Yehofa akusasangalala mnope patukupikanila mwakusacilila lilamusili. (1 Yoh. 3:22) Jwalakwe akusayamicila patukulingalinga kusimanikwa pamisongano.—Ahe. 6:10.

13, 14. Ana tukusam’ŵandicila catuli Yehofa ni Yesu patukusimanikwa pamisongano?

¹³ Kusimanikwa kwetu pamisongano kukusalosya kuti tukusaka kum’ŵandicila Yehofa soni Mwanagwe. Pamisongano, Mkwiganya jwetu jwamkulungwa akusatujiganya Maloŵe gakwe, Baibulo. (Yes. 30:20, 21) Atamose ŵandu ŵangakulupilila ŵakusasimanikwa pamisongano jetu mpaka aŵecete kuti, “Yisyene Mlungu ali pasikati penu.” (1 Akoli. 14:23-25) Yehofa akusajijaliwa misongano ni msimu wakwe weswela soni kutujiganya ya jwalakwe. Patukwawula kumisongano tukusapikana yakutusalila Yehofa, tukusayiwona mwakusatunonyelela, soni tukusam’ŵandicila jwalakwe.

¹⁴ Yesu jwali Mtwe wa mpingo ŵatite, “Kwele kwasongene ŵandu ŵaŵili kapena ŵatatu m’lina lyangu, une cinjiŵa pasikati pawo.” (Mat. 18:20) Baibulo jikusasalasoni kuti Yesu “akwenda pasikati” pa mipingo ja ŵandu ŵa Mlungu. (Ciu. 1:20–2:1) Agambe ganisya, Yehofa ni Yesu akusatulimbikasya patuli pamisongano. Ana akuganisya kuti Yehofa akusapikana wuli mumtima pakulola kusacilila kwetu kuti tum’ŵandile jwalakwe soni Mwanagwe?

15. Ana kusimanikwa kwetu pamisongano kukusamlosya catuli Mlungu kuti tukusaka kumpikanila?

¹⁵ Kusimanikwa kwetu pamisongano kukusalosya kuti tuli ku mbali ja ulamusi wa Mlungu. Atamose kuti Yehofa akusatulamula kuti tusimanikweje pamisongano, nambope, jwalakwe ŵangatukanganicisya kuya lilamusilyo. (Yes. 43:23) M’yoyo, yili ni m’weji kulosya kuti tukusamnonyela Yehofa kutyocela pasi pa mtima, soni kuti tuli ku mbali ja ulamusi wakwe. (Alo. 6:17) Mwambone, ana mpaka tutende wuli naga juŵatulembile masengo ngakutupa lipesa lyakusimanikwa kumisongano mwakutamilicika? Ŵaboma kombolekasoni kutusisya, kutuŵika mu ndende, kapena kutusalila kuti naga akutusimana pamisongano catulipisye mbiya. Kapena mpaka tulinjikweje mwakumalila ndaŵi jelewu tuli mkutenda yakusangalasya mmalo mwakusimanikwa kumisongano. Mu yakutendekwa yosopeyi, jwalijose akwete ufulu wakulisagulila kuŵa ku mbali ja Yehofa kapena iyayi. (Mase. 5:29) Naga tukusagula kuŵa kumbali ja ulamusi wa Yehofa, tucimsangalasya jwalakwe.—Miy. 27:11.

16, 17. (a) Ana tukumanyilila catuli kuti misongano jaliji jakusosekwa mnope kwa Aklistu ŵandanda? (b) Ana M’bale George Gangas ŵajiwonaga wuli misongano jaciklistu?

¹⁶ Panyuma pa Pentekosite mu 33, Aklistu ŵasimanaga mwakutamilicika ni kumlambilaga Yehofa. Jemanjajo “ŵajendelecele kupikanila yaŵajiganyaga ŵandumetumewo, soni kutendela yindu pampepe.” (Mase. 2:42) Soni jemanjajo nganaleka kusongana pamo, atamose pandaŵi  jele Aloma soni acimlongola wa Ayuda ŵatendelaga yangalwe.

¹⁷ Ŵakutumicila ŵa Yehofa ŵa moŵa agano, akusalosyasoni kuti akusayamicila mnope misongano jaciklistu. Mwambone, M’bale George Gangas, juŵatumicile mu Likuga Lyakulongolela kwa yaka yakupunda 22 ŵatite, “Kwa uneji kusongana ni abale kuli cimo mwa yindu yayikusasangalasya mnope pa umi, soni kukusalimbikasya mnope. Ngusanonyela kwika ku Nyumba ja Ucimwene mwacitema soni kutyokako mwakucelewa, naga kuli kwakomboleka. Ngusasangalala mnope panguŵecetana ni ŵandu ŵa Mlungu. Pangukunguluka ni jemanjajo ngusalipikana mpela ndili ku nyumba ni liŵasa lyangu, soni ndili mu paladaiso jwausimu.” Jwalakwe ŵajonjecesye kuti, “Mpela mwayiŵelele kuti kampasi ndaŵi syosope jikusalanjila kumpoto, unesoni nganisyo syangu syosope sikusasacilila kusimanikwa pamisongano.”

18. Ana akusajiwona wuli misongano jaciklistu, soni akusacilila kutenda cici?

¹⁸ Ana wawojo akusajiwonasoni misongano kuŵa jakusosekwa mnope? Naga yili m’yoyo, aŵeje ŵakusacilila kupilila soni kutenda yakomboleka kuti asimanikweje pamisongano mwakutamilicika. Pakutenda yeleyi cacilosya kuti akamulana ni yaŵaŵecete Mwenye Daudi kuti, “Yehofa, ngusanonyela nyumba jakusatama wawojo.”—Sal. 26:8.