Maloŵe ga Cihebeli pa lilembali mpaka gajimile ya ŵandu ŵacilendo ŵakusakala kapena ya ŵandu ŵa Mlungu. Atamose yili m’yoyo, kwende tulole magongo gampaka gatukamucisye kumanyilila yisyesyene yakwe:

1. Tukusosekwa kulolasoni lilemba lya Salimo 144:12-15. Ndime 12 jatandite ni maloŵe gakuti “kaneko.” Yeleyi yikulosya kuti yindu yambone yayikukolanjidwa mu ndime 12 mpaka 14 yikwawula kwa ŵakulungama, ŵakuŵenda kuti ŵakulupusye kwa ŵandu ŵakusakala ŵakukolanjidwa pa Salimo 144:11. Ndime 15 jikwiticisyasoni yeleyi, ligongo jikukolanga kaŵili maloŵe gakuti “ŵakusangalala,” pakwambaga ya ŵandu ŵawowopewo, “ŵele Mlungu jwawo ali Yehofa!”

2. Kusala kuti Salimo 144:12-15 jikwamba ya ŵandu ŵa Mlungu yili yakamulana ni ngani sine sya m’Baibulo syakulondesya yakuti Mlungu cacapa majali ŵandu ŵakulupicika. Daudi ni juŵalembile Salimo 144. Salimoji jikulosya cenenepe cikulupi caŵakwete Daudi, kuti Mlungu pacaciwukulupusya mtundu wa Ayisalayeli kwa acimmagongo ŵakwe, caciwukamucisya kuŵa wakusangalala soni yindu yiciwujendelaga cenene. (Lev. 26:9, 10; Deut. 7:13; Sal. 128:1-6) Mwambone, lilemba lya Deuteronomo 28:4 likusati, “Yehofa cacajaliwa ŵanace ŵenu, cacijaliwa yagowola yenu soni ŵanace ŵa yilango yenu, ŵanace ŵa ng’ombe ni ŵa ngondolo.” Lilembali lyakwanilicikwe mu ulamusi wa Solomoni, mwanace jwa Daudi. Pandaŵijo, Ayisalayeli ŵaliji pamtendele wejinji soni yindu yajendelaga cenene. Yili yakusangalasyasoni kumanyilila kuti yayatendekwaga mu ulamusi wa Solomoni, yatendelaga ciwulili yindu yambone ya mu ulamusi wa Mesiya.—1 Maf. 4:20, 21; Sal. 72:1-20.

3. Mwakamulana ni yatutagulileneyi, Salimo 144 jikulosya cenene yindu yambone yakwembeceya ŵakutumicila ŵa Yehofa. Yindu yakwe mpela konanjidwa kwa ŵandu ŵakusakala kaneko ŵandu ŵakulungama ni kutamaga mwamtendele mpaka kalakala.—Sal. 37:10, 11.