CAKA cipiteci, acalume ŵajinji aŵicidwe kuŵa acakulungwa ŵa mumpingo soni ŵakutumicila ŵakamucisya m’likuga lya Mboni sya Yehofa. Naga wawojo ali jumo mwa abaleŵa, ngatukukayicila kuti akusangalala ni undumetume wawo wasambanowu.

Nambope, mwine mpaka akole woga. Yeleyitu yili yakupikanika. Jason, jwali jwamkulungwa jwa mumpingo jwacinyamata, jwasasile kuti, “Paŵagambile kumbika paukumu, nalipikene kuti nganimba ngombwele.” Nombe najo Mose ni Yelemiya paŵapocele undumetume wasambano ŵalipikanagasoni kuti nganaŵa akombwele. (Eks. 4:10; Yer. 1:6) Naga wawojosoni akulipikana m’yoyo, ana mpaka amalane nayo camtuli yeleyi ni kwendelecelagape ni undumetume wawo? Cisyasyo ca Timoteyo mpaka cakamucisye.—Mase. 16:1-3.

Komboleka kuti Timoteyo jwakwete yaka ciŵandika 20 kapena kupunda panandi pandaŵi jele Paulo ŵamsalilaga kuti atande kwenda najo. Pandanda, komboleka kuti Timoteyo jwalikayicilaga soni kola woga ni undumetume wasambanowu ligongo lyakuti jwaliji jwacinyamata. (1 Tim. 4:11, 12; 2 Tim. 1:1, 2, 7) Nambo pali papitile yaka yejinji, Paulo ŵawusalile mpingo wa ku Filipi kuti, “Kupitila mwa Ambuje Yesu ngwembeceya kumtumisya Timoteyo kwa jemanja pacangakaŵapa . . . Pakuŵa nganingolasoni jwine jwakwete mtima wambone mpela jwalakwe.”—Afi. 2:19, 20.

Ana cici cacamkamucisye Timoteyo kuti aŵe jwamkulungwa jwa mumpingo jwambone m’yiyi? Kwende tulole yindu yakwana 6 yele acalume ŵa maukumu akusosekwa kujigalila kwa jwalakwe.

1. Jwasamalaga mnope ya ŵandu. Paulo ŵasalile Aklistu ŵa ku Filipi kuti, ‘[Timoteyo] ni jwampaka asamale mnope ya jemanja.’ (Afi. 2:20) Yeleyitu yili yisyene. Timoteyo jwasakaga kuti ŵanduwo aŵe paunasi wambone ni Yehofa, soni jwaliji jwakusacilila kwakamucisya.

Pakumsyasya Timoteyo, aŵambaleje kuŵa mpela jwakwendesya basi jwakusasaka kwika pa malo gakwelela basi pandaŵi jakwe nambo jwangalimbana mnope ni yakwajigala ŵandu. William, jwaŵele ali pa ukumu kwa yaka yakupunda 20, akusiŵasalila abale ŵaŵicidwe kwene pa ukumu kuti, “Mwanonyeleje mnope abale. Lomlecesyeje mnope pa yindu yakusosecela jemanjajo kupunda kulondesya yindu yakwamba mpingo.”

2. Jwagawonaga masengo gakulalicila kuŵa gakusosekwa mnope. Pakulekanganya cisyasyo ca Timoteyo ni ca ŵane, Paulo jwatite, “Ŵane wosope akwamba kusosa yakulinonyelesya acimsyene, ngaŵa ya Klistu Yesu.” (Afi. 2:21) Paulo jwalembile cikalataci ali ku Loma. Abale ŵa ku Loma ŵakosyaga mnope ya masengo gawo gakucilu. Jemanjaji nganalipelekaga pa masengo ga Ucimwene. Nambo Timoteyo nganatendaga yeleyi. Pawupatikene upile wakuti akalalicile ngani syambone, nganisyo syakwe syaŵaga mpela sya Yesaya, juŵaŵecete kuti, “Une apano! Andumisye une!”—Yes. 6:8.

Ana mpaka atende wuli kuti masengo gawo ni yindu yausimu yiŵeje pa malo gakwe? Candanda, amanyilileje yayili yakusosekwa mnope. Paulo jwasasile kuti, ‘Asimicisyeje yindu yakusosekwa mnope.’ (Afi. 1:10) Yindu yakwaya Yehofa yiŵeje pandanda paumi wawo. Caŵili, anandiyeje yindu yampaka yajonanjile ndaŵi ni macili. Paulo  jwamlimbikasisye Timoteyo kuti, “M’yitile yakumbila ya unyamata, nambo mkuye cilungamo, cikulupi, cinonyelo, ni mtendele.”—2 Tim. 2:22.

3. Jwalimbilicilaga undumetume wapajika. Paulo ŵakumbwisye Aklistu ŵa ku Filipi kuti, “Jemanja mkumanyilila kudalilicika [kwa Timoteyo], kuti mpela mwanace ni babagwe atumicile yimpepe ni une mpela acikapolo pakuwandisya ngani syambone.” (Afi. 2:22) Timoteyo nganaŵa jwaulesi. Jwalakwe jwakamulaga masengo mwamacili pampepe ni Paulo, soni yeleyi yalimbikasisye mkamulano wawo.

Masiku agano, m’likuga lya Yehofa mwana masengo gejinji. Masengo gakwe gali gakusangalasya nambosoni mpaka gakamucisye kuŵa ŵakamulana ni Aklistu acimjawo. M’yoyo, akoleje “yakutenda yejinji ndaŵi syosope pamasengo ga Ambuje.”—1 Akoli. 15:58.

4. Jwatendaga yalijiganyisye. Paulo ŵamsalile Timoteyo kupitila m’cikalata kuti, “Mmwejo mkuyisye cenene yijiganyo yangu, umi wangu, cakulinga cangu, cikulupi cangu, cinonyelo cangu, soni kupilila kwangu.” (2 Tim. 3:10) Ligongo lyakuti Timoteyo jwatendaga yalijiganyisye, jwapocele maukumu gejinji.—1 Akoli. 4:17.

Ana akwete mjawo jwacikulile jwampaka akuyeje cisyasyo cakwe? Naga nganakola, wuli ngampata jumo? Tom, aŵele ali jwamkulungwa jwa mumpingo kwa yaka yejinji. Jwalakwe jwatite, “Panagambile kuŵicidwa kwene kuŵa jwamkulungwa jwa mumpingo, m’bale jwine jwasamalaga mnope ya une. Ndaŵi syosope namsalilaga kuti angamucisye soni nakuyaga yasalileyo. Yeleyi yambele macili.”

5. Jwajendelecele kulijiganya. Paulo jwamlimbikasisye Timoteyo kuti, “Mkole cisyoŵe cakutenda yindu yakumkamucisya kuŵape ŵakulipeleka kwa Mlungu.” (1 Tim. 4:7) Mundu jwakutenda maseŵela gakuwutuka akusakola jwakumlongolela, nambo msyenejosoni akusasosekwa kulijiganya pajika. Paulo jwamsalile Timoteyo kuti, “Mjendelecele kuŵa jwakulipeleka pakuŵalanga pameso pa ŵandu, pakulimbikasya, soni pakwiganya. . . . Mganicisye mwakusokoka yindu yeleyi. Mlipelece pa yindu yeleyi kuti ŵandu wosope alole kuti mkwawula pasogolo.”—1 Tim. 4:13-15.

Wawojosoni akusosekwa kwendelecela kusya lunda lwawo. Anonyeleje kuŵalanga mabuku getu gasambano ni kamulicisyaga masengo yaŵalasileyo. Nambosoni aŵambaleje kuŵa ŵakulidalila mnope ni ganisyaga kuti akumanyilila yejinji mwamti mpaka amalane ni yiliyose mkanawungunye mwakusamala. Pakusyasya cisyasyo ca Timoteyo, ‘asamaleje ni yakusatenda soni yakusajiganya.’—1 Tim. 4:16.

6. Jwajegamilaga msimu wa Yehofa. Pakusala ya undumetume wa Timoteyo, Paulo jwamkumbwisye kuti, “Mcisunje cenene cipanje capajika caŵampele kupitila mwa msimu weswela wawuli mwa m’weji.” (2 Tim. 1:14) Kuti awusamale cenene undumetume wakwe, Timoteyo jwasosekwaga kwegamila msimu wa Mlungu.

Donald, aŵele ali jwamkulungwa jwa mumpingo kwa yaka yejinji. Jwalakwe jwasasile kuti, “Acalume ŵa maukumu akusosekwa kuwuwona unasi wawo ni Mlungu kuŵa wakusosekwa mnope. Ŵakusatenda yeleyi ‘macili gawo gacitupa.’ Naga akusaŵenda msimu wa Mlungu ni kola cisogosi ca msimuwo, cacakamucisya abale ni alongo mumpingo.”—Sal. 84:7; 1 Pet. 4:11.

Yili yakulimbikasya mnope kwawona abale ŵa maukumu ŵasambano mpela wawojo ali mkutenda yejinji pakutumicila Yehofa. Jason, jwatumkolasile kundanda kwa ngani kula jwatite, “Kutandila pandaŵi janatandite kutumicila mpela jwamkulungwa jwa mumpingo, nalijiganyisye yejinji soni cikulupi cangu cilimbile. Apano ngusangalala ni undumetume wangu soni nguwuwona kuti uli upile wekulungwa!”

Ana wawojo cajendelecele kutenda yejinji pakutumicila Yehofa? Cakulinga cawo ciŵeje cakumsyasya Timoteyo. Kaneko wawojosoni cacakamucisya ŵandu ŵa Mlungu.