LIGONGO lyakuti kusakala kukwendelecela kutupa ‘m’masiku gambesiga,’ ŵandu ŵa Yehofa akusosekwa kuŵa ŵakulitimalika kupundana ni kalakose. (2 Tim. 3:1-5) Tukutama m’cilambo cele ŵandu ŵakwe ali ŵakulinonyela, ŵangakamulana ni acimjawo, soni ŵangaligosa. Wosope ŵakusalosya ndamo syelesi akusaŵa ŵangalitimalika. M’yoyo Mklistu jwalijose akusosekwa kuliwusya kuti, ‘Ana ngusalosya ndamo jangalitimalika mpela ŵandu ŵa m’cilamboci? Ana kuŵa jwakulitimalika kukusagopolela cici? Ana mpaka ndende cici kuti kulitimalika kuŵe mbali ja umundu wangu?’

Ana maloŵe gakuti “kulitimalika” gakusagopolela cici mwakamulana ni mwagakamulicisye masengo m’Baibulo? Gakusagopolela yejinji ngaŵa kwamba kumasyape yakusawusya. Mundu jwakulitimalika akusapilila ni cakulinga. Jwalakwe akusayiwona yindu mwakuŵajilwa soni akusiŵaganicisya ŵane atamose kuti ŵanewo atesile yindu yakwakuŵasya. Pa ligongo lyeleli, mundu jwakulitimalika jwangakunda kutenda yindu yampaka yisokonasye mkamulano pati jwine Amlemwecesye kapena kumŵecetela maloŵe gacipongwe. M’yoyo, ngatukusasimonga Baibulo pajikusala kuti “kulitimalika” kukusayika ligongo lya cinonyelo. * (1 Akoli. 13:4) Maloŵe ga Mlungu gakusasalasoni kuti “kulitimalika” jili jimo mwa “ndamo syawukusakoposya msimu weswela.” (Aga. 5:22, 23) Ana tukusosekwa kutenda cici kuti tukole ndamo jeleji?

Kuti tukole ndamo jeleji, tukusosekwa kumŵenda Yehofa kuti atupe msimu wakwe weswela, wakusawupeleka kwa jwalijose jwakusamkulupilila jwalakwe. (Luk. 11:13) Atamose kuti msimu wa Mlungu ukwete macili, tukusosekwa kutenda mbali jetu soni kutendaga yindu mwakamulana ni mapopelo getu. (Sal. 86:10, 11) Yeleyi yikugopolela kuti tukusosekwa kutenda yiliyose yampaka tukombole kuti tuŵe ŵakulitimalika. Tucitenda yeleyi ni cakulinga cakuti ndamoji jitamilicice mumtima mwetu. Nambope ndaŵi sine mpaka tulepele kulosya ndamoji. Ana cici campaka citukamucisye?

Tukusosekwa kulijiganya soni kukuya cisyasyo ca Yesu ni cakulinga cakuti tukole ndamo ja kulitimalika. Ndumetume Paulo mwakusalilidwa jwalembile yakwamba “umundu wasambano” wawukusapwatikapo ndamo ja “kulitimalika.” Kaneko jwatulimbikasisye kuti ‘akunde kuti mtendele wa Klistu walongoleleje m’mitima mwawo.’ (Akolo. 3:10, 12, 15) Mpaka tukunde mtendele welewu “kulamulila” m’mitima jetu mwakusyasya cikulupi cakwete Yesu cakuti Mlungu cacilinganya yindu pandaŵi jakwe. Naga tukukuya cikulupi cakweci, ngasitutenguka soni tuciŵa ŵakulitimalika, mwangasamala kandu ni yampaka yitutendecele.—Yoh. 14:27; 16:33.

Wosopewe tukusasacilila cilambo casambano cili ciyice pacangakaŵapa. M’yoyo, tukusosekwa  kulijiganya kuŵa ŵakulitimalika mpela mwakusatendelaga Yehofa ni m’weji. Baibulo jikusatusimicisya kuti, “Yehofa ngakucelewa kwanilisya cilanga cakwe, mpela mwakusayiwonela ŵandu kuti akucelewa, nambo akulitimalika ni m’weji, pakuŵa ngakusaka kuti jwalijose cajonasice nambo akusaka kuti ŵandu wosope apitikuce mtima.” (2 Pet. 3:9) Patukuganicisya yatesile Yehofa pakulitimalika ni m’weji, ana ngayikututendekasya kuŵa ŵakulitimalika patuli ni ŵane? (Alo. 2:4) Ana ni yindu yapi yayikusatutendekasya kuŵa ŵakulitimalika?

Yakutendekwa ya lisiku lililyose mpaka yilinje kulitimalika kwetu. Mwambone, naga akuyiwona kuti akwete cindu cakusosekwa mnope cakusaka kuŵeceta, akusosekwa kulitimalika ni cakulinga cakuti akakuŵasya ŵandu ŵane. (Yak. 1:19) Mpaka asosekwesoni kulosya ndamo ja kulitimalika pakukunguluka ni ŵakulupilila acimjawo ŵele ndamo syawo mpaka syakuŵasye wawojo. Mmalo mwakutenda yindu mwangalitimalika, mpaka yiŵe cenene kumbucila mwakusatendela Yehofa soni Yesu pa yakulepela yetu. Jemanjaji ŵangayikosya yakulepela yetu yamwanamwana. Mmalo mwakwe, akusalola ndamo syetu syambone soni mwakulitimalika akusalolecesya mwatukutendela yindu ni kutujongolela.—1 Tim. 1:16; 1 Pet. 3:12.

Cindu cine campaka cilinje kulitimalika kwetu cili cakuti naga mundu jwine akutusalila kuti tutesile cindu cakulemwa. Mwine cindu candanda catukusatenda cili kulicenjela. Nambope, Maloŵe ga Mlungu gakusasala yakulekangana ni yeleyi. Gakusati, “Mundu jwakulitimalika ali jwambone kupunda mundu jwakulikwesya. Mkajanguyaga kutumbila, pakuŵa ŵandu ŵakuloŵela ni ŵakusatumbila mwacitema.” (Jwak. 7:8, 9) Atamose kuti yakusalayo yili yaunami, tukusosekwa kuŵa ŵakulitimalika soni tukusosekwa ganicisya mwakusamala mkanitujanje. Yeleyi ni yaŵatesile Yesu pandaŵi jele ŵandu ŵane ŵasalaga yaunami pakwamba ya jwalakwe.—Mat. 11:19.

Mnopemnope acinangolo akusosekwa kuŵa ŵakulitimalika pandaŵi jakwakamucisya ŵanace ŵawo kongolela ndamo syawo soni kuŵambala kumbila yakusakala. Kwende tulole cisyasyo ca Mattias, jwakutumicila pa nyambi ja ku Scandinavia. Pajwaliji jwacinyamata, acimjakwe ŵa kusukulu ŵamsekaga ligongo lya yindu yajwakulupililaga. Pandanda, acinangolo ŵakwe nganamanyililaga yeleyi. Nambo kaneko jemanjaji ŵayiweni kuti jwalakwe atandite kayicila usyesyene. Baba ŵawo Mattias, lina lyawo Gillis, ŵatite, “Pandaŵiji pasosekwaga kulitimalika.” Mattias ŵawusyaga kuti, “Ana Mlungu ali ŵani?” Nambi wuli naga Baibulo nganijiŵa Maloŵe ga Mlungu? “Ana tukumanyilila camtuli kuti Mlungu ni jwakusasaka kuti tutendeje yeleyi?” Jwalakwe jwawusyagasoni babagwe kuti, “Ligongo cici mpaka anjamuce naga ngangutenda yindu yakusakulupililaga wawojo?”

Gillis ŵatite, “Ndaŵi sine yiwusyo yaŵawusyaga mwanace jwetu yalosyaga kuti atumbile, ngaŵaga ni une kapena mamagwe, nambo jwawuwonaga usyesyene kuti ukutendekasya umi wakwe kuŵa wakusawusya.” Ana Gillis ŵatesile wuli kuti amkamucisye mwanaceju? Gillis jwatite, “Une ni mwanangu twatamaga pasi ni kukambilanaga mwamti ndaŵi sine kukambilanaku kwajigalaga ndaŵi jelewu.” Ndaŵi syejinji nampikanilaga mwalung’wanu soni nam’wusyaga kuti manyilile cenene mwajwapikanilaga  mumtima. Ndaŵi sine namsalilaga yindu yakuti akayiganicisye kwa lisiku limo kapena kupunda mkanitusimanesoni kuti tukambilane. Ndaŵi sinesoni, nasosekwaga ndaŵi kuti ngajiganicisye ngani jasasile mwanangu jila. Kupitila mkukambilanaku, Mattias jwatandite kupikanicisya ngopolelo ja ciwombolo, soni yakuti Yehofa akusatunonyela nambosoni akwete ufulu wakutulamulila. Yajigele ndaŵi, soni ndaŵi syejinji yaliji yakusawusya, nambo mwapanandipanandi jwatandite kumnonyela Yehofa. Une ni ŵamkwangu tuli ŵakusangalala mnope ligongo lyakulingalinga kuŵa ŵakulitimalika pakumkamucisya mwanace jwetu kutandila ali jwacinyamata.”

Gillis ni ŵamkwakwe ŵajegamilaga cikamucisyo ca Yehofa paŵamkamucisyaga mwanace jwawo mwakulitimalika. Pakukumbucila yamunyuma, Gillis jwatite, “Namsalilaga Mattias kuti twamnonyelaga mnope, yayatutendekasyaga kuti tumpopeleleje mnope ni cakulinga cakuti Yehofa amkamucisye jwalakwe kupikanicisya usyesyene.” Acinangoloŵa ali ŵakusangalala yisyesyene ligongo lyakuti ŵatesile yindu mwakulitimalika soni nganawujila munyuma paŵamkamucisyaga mwanace jwawo.

Tukusosekwasoni kuŵa ŵakulitimalika patukumsamalila jwamwiŵasa mwetu kapena mjetu jwakulwala ulwele wekulungwa. Kwende tulole cisyasyo ca Ellen, * jwakusatama ku Scandinavia.

Kwa yaka 8 yipiteyo, ŵamkwakwe Ellen ŵasimene ni ulwele wakuwulaga yiŵalo wawajonasile ututu. Ligongo lya ulwelewu jwalakwe jwangatenda canasa soni jwangasangalala. Yeleyi yili yakusawusasya mnope kwa Ellen. Ellen jwasasile kuti, “Akusasosekwa kuŵa jwakulitimalika nambosoni kupopela mnope.” Jwajonjecesyesoni kuti, “Lilemba lyangusalinonyela nambosoni lyalikusandamika mtima pasi lili lya Afilipi 4:13 lyalikusati, ‘Mu yindu yosope, ngusapataga macili kutyocela kwa jwele jwakusamba macili.’” Ni macili ga Yehofa soni cikamucisyo cakwe Ellen akusakombola kupilila yakusawusyayi.—Sal. 62:5, 6.

Nambope, pakwamba ya kulitimalika Yehofa ali cisyasyo cambone mnope catukusosekwa kucikuya. (2 Pet. 3:15) Pana ngani syejinji syasikusasimanikwa m’Maloŵe ga Mlungu syasikulosya kuti Yehofa ali jwakulitimalika mnope. (Neh. 9:30; Yes. 30:18) Mwambone, ana Yehofa jwalosisye camtuli kulitimalika pandaŵi jaŵawusyaga yiwusyo Abulahamu pakwamba yakonanga msinda wa Sodomu? Tukusaŵalanga kuti Yehofa nganamkata pakamwa Abulahamu. M’malo mwakwe, Yehofa jwapikanilaga mwakulitimalika pa ciwusyo cilicose caŵawusyaga Abulahamu. Kaneko Yehofa jwalosisye kuti ŵampikanilaga Abulahamu pajwasalaga yakusawusya yakwe nambosoni jwasimicisye kuti jwalakwe ngaŵa mkonanga msinda wa Sodomu atamose muli musimanikwe acalume ŵakulupicika 10. (Gen. 18:22-33) Yeleyi yikulosya kuti Yehofa akusatupikanila mwakulitimalika soni jwangatenda yindu mwakupundaganya.

Kulitimalika jili mbali ja umundu wasambano jakusosekwa mnope kwa Mklistu jwalijose. Naga tukulimbicila kukusya ndamoji soni kuŵa ŵakupilila, tucacimbicisya Atati ŵetu ŵakwinani ŵali ŵakulitimalika soni ŵakusatusamalila. Soni tuciŵa m’likuga lya ŵandu ‘ŵele mwacikulupi soni mwakulitimalika akupocela yindu yaŵasalile Mlungu.’—Aheb. 6:10-12.