ŴACINYAMATA ŵajinji pa nyambi pakusaka kumbilanga akusati “Atati,” “Baba” kapena kuti “Mjomba.” Soni pakusambilangaga m’yiyi, yikusasangalasya ligongo lyakuti ngwete yaka 89. Maloŵe gelega ngusagawona mpela cinonyelo soni majali gakutyocela kwa Yehofa pa undumetume wandaŵi syosope wambele ndili mkutenda kwa yaka 72. Pangulola yasimene nayo munyumamu pakumtumicila Mlungu, ngusinasimicisya anyamataŵa kutyocela pasi pa mtima kuti, ‘Cimcipocela mbote naga mkuŵa ŵakulimba mtima.’—2 Mbi. 15:7.

Acinangolo ŵangu ŵasamile ku Ukraine kwawula ku Canada. Ŵajile kutama m’tawuni ja Rossburn mu upande wa Manitoba. Twapali ŵanace ŵacalume 8 soni ŵacikongwe 8. Une naliji jwa nambala 14. Baba ŵajinonyelaga Baibulo kwabasi, mwamti Lyamlungu kundaŵi kulikose ŵatuŵalanjilaga Baibulo. Nambo ŵayiwonaga kuti acimlongola ŵa dini ŵaliji ŵangali lung’wanu ni ŵandu ŵa mu dini jawo nambo pa mbiya basi, mwamti babaŵa ŵaliwusyaga kuti, “Ana Yesu pajwalalicilaga soni kwiganya jwapocelaga mbiya?”

Acakuluŵangu mcece soni acalumbuŵangu mcece ŵalijiganyisye usyesyene. Cemwali ŵangu lina lyawo, Rose ŵatendaga upayiniya mpaka pandaŵi jiŵawile. Cemwaliŵa mkanawe, ŵamlimbikasyaga jwalijose kuti apikanileje Maloŵe ga Mlungu. Ŵatiga, “Ngusaka cituwonegane m’cilambo casambano.” Acimwene ŵangu ŵakulungwa, lina lyawo Ted, mkanawumanyilile usyesyene ŵalalicilaga cijiganyo ca moto wa helo. Lyamlungu lililyose kundaŵi, ŵalalicilaga pa wayilesi. Mwakuwilisyawilisya ŵagombelecesyaga ŵakupikanila kuti ŵandu ŵakulemwa Mlungu cakajoce kwangamala ku moto wa helo. Kaneko ali alijiganyisye usyesyene, ŵatandite kumtumicila Yehofa mwakulupicika soni mwamtawu.

Lisiku line mu June 1944, panayice ku nyumba kutyocela ku sukulu, nakasimene kabuku ka mtwe wakuti The Coming World Regeneration * kali pa tebulo. Natandite kuŵalanga peji jandanda, jaŵili, kaneko nagambaga kuŵalanga. Ndili malisisye kuŵalanga kabuku kosope nganisyo syangu syawugwice, mwamti natandite kusaka kumtumicila Yehofa mpela muŵatendele Yesu.

Ana kabukuka kasimanikwe uli pa tebulo petupa? Acimwene ŵangu, lina lyawo Steve, ŵasasile kuti  kwayice acalume ŵaŵili ŵaŵasumisyaga mabuku ni tumabuku. Acimweneŵa ŵatite, “Sumile kabukuka ligongo lyakuti kacipileje.” Acalumeŵa ŵayicesoni Lyamlungu. Ŵatusalile kuti ŵaliji Ŵamboni sya Yehofa soni ŵajangaga yiwusyo yaŵawusyaga ŵandu pakamulicisya masengo Baibulo. Twayamicile mnope ligongo lyakuti acinangolo ŵetu ŵatusalilaga kuti tucimbicisyeje Maloŵe ga Mlungu. Acalumeŵa ŵatusalilesoni kuti Ŵamboni sya Yehofa pacangakaŵapa cakole msongano ku Winnipeg mu msinda waŵatamaga cemwali ŵangu lina lyawo Elsie. Mwamti nayiweni kuti ngatende nawo msonganowo.

Najesile wapanjinga pa lutando lwa makilomita 320 kwawula ku Winnipeg, nambo najimi m’tawuni ja Kelwood kuŵatamaga Ŵamboni sya Yehofa ŵaŵili ŵala. Ndili kweleko, natesile nawo misongano ja mpingo, mwamti nalijiganyisye mwakusatendela yindu Ŵamboni sya Yehofa. Nambosoni nalijiganyisye kuti mundu jwalijose, cinga jwamlume, jwamkongwe, kapena jwacinyamata akusosekwa kulalicila mpela muŵatendelaga Yesu.

Ndili njice ku Winnipeg, pamsongano waupande nacingangene ni acimwene ŵangu lina lyawo Jack ŵaŵatamaga mu upande wa ku Ontario. Lisiku lyandanda pamsonganowu, m’bale jwine jwapelece cimanyisyo cakuti cipaŵe ubatiso. Acimwene ni une twasagwile kuti tubatiswe pamsonganowu. Panyuma pa kubatiswa, wosope twasimicisye yakutanda undumetume wa upayiniya. Tuli tuwusile kumsongano, Jack ŵatandite upayiniya wakutamilicika. Pandaŵiji, une nakwete yaka 16, m’yoyo nasosekwaga kuwujila kusukulu. Nambo caka cakuyicisya natandite upayiniya wakutamilicika.

Une ni Stan Nicolson, twatandite upayiniya ku Souris m’tawuni ja Manitoba. Patwatendaga upayiniyawu ndaŵi syejinji yindu yatusawusyaga. Mbiya sitwakwete syatandite kumala panandipanandi, nambo nganituleka kulalicila. Lisiku line patwatyocelaga kukulalicila jatukwete sala, nambo nganitukola mbiya syakusumila yakulya. Twasimonjile mnope kuwusimana msaku wa yakulya wuli pamlango petu. Nganitummanyilila mundu juŵayice nayo yakulyayi. Palisikuli, twalile cenene. Jelejitu jaliji mbote ligongo lyangakunda kutulusya makono getu. Kusala yisyene, pawamalaga mwesiwu, twasangalele mnope kupundana ni kala kose.

Jili jimasile miyesi jamnono, ŵatutumisye m’tawuni ja Gilbert Plains jajili palutando lwa makilomita 240 mu msinda wa Souris. M’masiku gelego, mpingo uliwose wakolaga ndandanda jaŵajiŵikaga ku pulatifomu jajalosyaga masengo gakulalicila ga mwesi uliwose. Mwesi winewakwe masengo gakulalicila nganigajenda cenene, mwamti naŵecete ngani jakwagombelecesya abale ni alongo kusosekwa kwakulalicila. Panyuma pamisonganoji, mlongo jwacikulile jwine jwalisoni mpayiniya, jwele ŵamkwakwe nganaŵa mu usyesyene, jwasalile ali mkulila kuti, “Ngusalingalinga nambo ngangusakombola kutenda yejinji mpela munatendelaga pandanda.” Yajwaŵecete mlongoyi yangwayiye mnope mwamti natandite kulila kaneko nampepesye.

Mpela munatendele une, abale ŵacinyamata mpaka alemwesye m’kaŵecete soni mpaka atenguce nayo. Nambo nalijiganyisye kuti m’malo mwakutenguka, kuli kwambone kulijiganya kutyocela pa yindu yaulemwisyeyo. Ligongo lyakwendelecela kuŵa jwakulupicika napocelesoni undumetume wine.

Ndili ngwete yaka 21, nakwete upile wakwinjila Sukulu ja Gilead jatwawugalile mu February 1950. Ciŵandika ŵandu 25 mwa ŵandu 103 ŵatwaliji mkalasimo, ŵatumisye ku upande wakuŵeceta Cifalansa ku Quebec m’cilambo ca Canada. Kweleko acimlongola ŵa dini ŵalagasyaga ŵa Mboni sya Yehofa. Une ŵandumisye m’tawuni ja Val-d’Or m’cilambo cicici ca Canada. Lisiku line likuga lyetu lyapite kukulalicila m’musi wine ciŵandika musi wa Val-Senneville. Jwambopesi jwine jwakumaloko jwatujogoyisye kuti naga ngatukutyoka m’musimo catende ciwawa. Yaŵaŵeceteyi yatendekasiye kuti tujawule ku nganya ja magambo. Kweleku jwambopesi jula jwasimanikwe kuti ali jwakulemwa. *

Cakutendekwa celeci ni yinesoni yatendekwaga pakulimbana kuti tupate ufulu wakulambila ku Quebec. Acimlongola ŵa dini ja Cikatolika ni ŵaŵalamulilaga  upande wa ku Quebec kwa yaka yakupunda 300. Acimlongola ŵa dini soni ŵandale ŵalagasyaga ŵa Mboni sya Yehofa. Jaliji ndaŵi jakusawusya mnope soni twaliji ŵamnono, nambo nganituwujila munyuma. Nambope, papali ŵandu ŵane ŵamitima jambone ŵaŵapikanilaga usyesyene. Nakwete upile wakwajiganya Baibulo ŵandu ŵajinji ŵele panyuma pakwe ŵaŵele Ŵamboni sya Yehofa. Limo mwa majiganyo gangu lyaliji liŵasa lya ŵandu 10. Mwamti liŵasa lyosopelyo lyatandite kumtumicila Yehofa. Ligongo lya cisyasyo cambone ca liŵasali, yatendekasisye ŵandu ŵane kuleka dini ja Cikatolika. Twajendelecele kulalicila soni mwapanandipanandi twapundile kulimbana kula.

Mu 1956, ŵandumisye ku Haiti. Amishonale ŵasambano kweleko ŵalagaga kuŵeceta Cifalansa, nambope ŵandu ŵapikanilaga. M’mishonale jwine lina lyakwe Stanley Boggus, jwatite, “Twasimonjile kwawona ŵandu ali mkutenda yakomboleka kuti atukamucisye kuŵeceta cenene Cifalansa.” Pandanda, nakwete upile ligongo lyakulijiganya Cifalansa ku Quebec. Nambo kaneko twamanyilile kuti abale ŵajinji ŵakumaloko, ŵaŵecetaga ciŵeceto ca Cikiliyo. M’yoyo, twasosekwaga kulijiganya ciŵecetoci. Twalijiganyisye, soni twapatile mbote ligongo lyakulijiganyaku.

Kuti tujendelecele kwakamucisya abaleŵa, Likuga Lyakulongolela lyatukundile kuti tugopoleleje Sanja ja Mlonda soni mabuku gane m’ciŵeceto ca Cikiliyo. Ciŵalanjilo ca ŵandu ŵakusongana catupile mnope m’cilambomo. Mu 1950, ku Haiti kwapali ŵakulalicila ŵakwana 99, nambo mu 1960, ciŵalanjiloci cakwesile mnope kwikana pa ŵakulalicila ŵakupunda 800. Pandaŵiji, ŵaŵendile kuti ngatumicileje ku Beteli. Mu 1961, nasangalele ligongo lyakola upile wakutendesya Sukulu ja Undumetume wa Ucimwene. Twakombwele kwajiganya acakulungwa ŵa mumpingo ŵakwana 40 soni apayiniya ŵapajika. Mu January 1962, pamsongano waupande twalimbikasisye abale ŵakumaloko kuti ajonjecesye undumetume wawo, mwamti ŵane ŵasagulidwe kuŵa apayiniya ŵapajika. Yeleyi yaliji ya pandaŵi jakwe ligongo kulagasidwa kula kwaliji kuli kumasile.

Pa January 23, 1962 msongano waupande uli umasile, m’mishonale jwine lina lyakwe Andrew D’Amico ni une ŵatukamwile ku ofesi ja nyambi. Ŵatusumwilesoni katoni ja Ajimuce! jwa January 8, 1962 (jwa Cifalansa). Ajimuce! jeleji jakamwile maloŵe ga mu  nyusipepala gagasalaga ya ndamo jajatendekwaga mu Haiti jakwayana ni yamisimu (voodoo). Ŵane nganasangalala ni maloŵega mwamti ŵaŵecetaga kuti m’weji ni ŵatwalembile nganiji ku nyambi. Pali pamasile yijuma yamnono, amishonale wosope ŵatusalile kuti tuwujile kumangwetu. * Nambo abale ŵatwajiganyisye ŵala ŵajendelecele kamula masengo mwakulimbicila. Masiku agano, ngusasangalala nawo abaleŵa ligongo lya kupilila kwawo soni mwacakulile cikulupi cawo. Sambano jemanjaji akwete Baibulo la Dziko Latsopano la Malemba Opatulika m’ciŵeceto cawo ca Cikiliyo, yindu yanganituyiganicisyaga.

Panyuma pakutumicila ku Haiti, ŵandumisye ku Central African Republic kuti ngatumicile mpela m’mishonale. Kaneko nakwete upile wakutumicila mpela jwakulolela jwakwendajenda kaneko naŵele jwakulolela nyambi.

M’masiku gelego, Nyumba sya Ucimwene syejinji pakutaŵa nganakamulicisya yindu yakudula. Nalijiganyisye kacuŵe ka masace ga balele soni kawimbe kakwe. Ŵandu ŵakupita mu msewu paŵambonaga ndili mkuwimba Nyumba ja Ucimwene ŵasimongaga kwabasi. Yalimbikasisyesoni abale kuti ajigaleje nawo mbali pakutaŵa soni kulinganya Nyumba syawo sya Ucimwene syasijonasice. Acimlongola ŵa dini ŵatusekaga ligongo macalici gawo galiji gamalata nambo Nyumba syetu sya Ucimwene syaliji syewimbe ni masace ga balele. Atamose yaliji m’yoyo, nambope twajendelecele kutaŵa Nyumba sya Ucimwene syakuwimba ni masace ga balele. Ŵandu ŵalesile kutuseka pajayice mbungo mumsinda wa Bangui. Mbungoji janyakwile misakasa josope ja malata ja macaliciga ni kuja kujiponyela mumsewu wekulungwa. Misakasa jajakulupwice jaliji ja Nyumba sya Ucimwene syetu basi. Kuti tukombole kulolela masengo gakulalicila, twataŵile ofesi ja nyambi jasambano soni nyumba ja amishonale kwa miyesi msanope basi. *

Mu 1976, masengo gakulalicila ŵagalekasisye ku Central African Republic ni kaneko ŵandumisye mu msinda wa N’Djamena ciŵandika cilambo ca Chad. Nambope cakusangalasya caliji cakuti nasimene ni mlongo jwine, lina lyakwe Happy, juŵaliji mpayiniya jwapajika jwamtawu jwakutyocela ku Cameroon. Twalombene pa 1 April, 1978. M’mwesi wuwuwu, ngondo jatandite mwamti wosope twatilile kumwela kwa cilamboci. Pajamasile ngondoji, twawujile kumwangwetu. Nambo twasimene kuti nyumba jetu jaliji likulu lya asilikali. Mabuku, dilesi ja paulombela nambosoni mituka jaŵatupele paulombela wetu, yosope ŵapyajisile. Nambo nganitutenguka. Wosope meso getu galiji pasogolo.

Yili yimasile yaka yiŵili, masengo gakulalicila ku Central African Republic gatandilesoni, mwamti twawujilesoni ni kutanda kutumicila mpela ŵakwendajenda. Twakwete nyumba jakwenda najo jakola bedi jakupinda, cigubu cekulungwa camalita 200, filiji, soni cakutelecela. Kajende kaliji kakusawusya. Paulendo wine, twajimi malo gakwana 117 ligongo lya ŵapolisi.

Ndaŵi syejinji twalagaga ligongo lya citukuta. Pamisongano, ndaŵi sine yaŵaga yakusawusya kupata mesi gakwanila kutendela ubatiso. M’yoyo, abale ŵasosile cisima m’lusulo lwejumilile kaneko ŵatekaga mesigo ni cigubu ni kuja kutagaga mu cidilamu, mwakutendela ubatiso waŵawutendelaga m’cidilamu.

Mu 1980, ŵatusamicisye ku Nigeria. Kweleko, kwa yaka yiŵili ni hafu, twakamucisye kosecela masengo gakutaŵa nyambi jasambano. Abale ŵasumile majumba gaŵili gakusunjila katundu gaŵasakaga kugagumula kuti ataŵepo nyambi. Lisiku line kundaŵi, nakwesile penani pa nyumbaji kuti ngakamucisye masengo gagumula. Ndaŵi ja musi, natandite kutuluka. Nambo masengo gagumulaga gasokonasisye yindu. Naliŵete pambali ni nagwilile pasi. Nawonekaga kuti mbulele mnope, nambo panyuma pakumulika adokotala, ŵasalile ŵamkwangu kuti, “Mkadandawula. Jigambile katika mitasi soni caŵe cenene.”

 Mu 1986, twasamile m’cilambo ca Côte d’Ivoire. Kweleko twatumicilaga mpela ŵakwendajenda. Undumetumewu watuyikasisye ciŵandika ku Burkina Faso. Nambo nganingasisyaga kuti lisiku line ku Burkina kuciŵa kumangwetu.

Mu 1956, natyosile ku Canada, nambo mu 2003, panyuma pa yaka 47 nawujile ku Beteli ja ku Canada. Pandaŵiji naliji ni ŵamkwangu, Happy. Pa yipepala yetu twaliji ŵa ku Canada, nambo mumtima twalipikanaga kuti tuli ŵa ku Africa.

Kaneko mu 2007, ndili ngwete yaka 79, twawujilesoni ku Africa. Ŵatutumisye ku Burkina Faso, kweleko natumicilaga mu Komiti Jacilambo. Kaneko ofesi ja nyambi ja ku Burkina Faso, ŵajicenjile ni kuŵa Ofesi Jakugopolela Mabuku Jakutali jajaliji pasi pa nyambi ja Benin. Mu August 2013, ŵatutumisye ku Beteli ja Benin jeleji.

Atamose kuti ngusalepela kutenda yindu yine, nambope ngusanonyela kulalicila. Yaka yitatu yipiteyo, ni cikamucisyo ca acakulungwa ŵa mumpingo soni ca ŵamkwangu, nasangalele mnope kwawona ŵakulijiganya Baibulo ŵangu ŵaŵili, Gédéon soni Frégis, ali mkubatiswa. Apano jemanjaji akumtumicila Yehofa mwamtawu.

Apano, une ni ŵamkwangu tuli ku nyambi ja ku South Africa. Akunokuno liŵasa lya Beteli likutupa cikamucisyo catukusosecela. South Africa cili cilambo ca nambala 7 mu Africa mwambele ndili mkutumicila. Kaneko mu October 2017, twapocele majali gapajika. Twakwete upile wa kuja kutenda nawo mwambo wakupeleka likulu lya Mboni sya Yehofa ku Warwick, New York. Waliji mwambo wangaliŵalicika.

Buku Lapachaka la Mboni za Yehova la 1994 pa peji 255, jatite, “Wosope ŵaŵele mkupilila pakamula masengo gakulalicila kwa yaka yejinji, tukwalimbikasya kuti, ‘Mŵe ŵakulimba mtima soni mkasimtulusya makono genu, ligongo cimcipata majali ligongo lya masengo genu.’—2 Mbi. 15:7.” Une ni ŵamkwangu tuli ŵakusimicisya kukuya maloŵe gelega soni kwalimbikasya ŵane kuti atende m’yoyo.