Ana aŵalasile mwakusamala magasini ga Sanja ja Mlonda gapacangakaŵapa? Kwende tulole naga cakombole kwanga yiwusyo yakuyicisyayi:

Ana camuko caŵapelece Yesu pa Matayo 18:15-17 cikusasala ya mtundu wapi wa yakulemwa?

Yesu ŵaŵecetaga ya yakulemwa yampaka ŵandu ŵalemwesyanilewo akombolece kuyimasya acimsyene. Nambo yakulemwayo mpaka yikule mwati jwine nikutyosyedwa mumpingo naga ngatukumasya mwacitema. Mwambone yakulemwa yakwe mpaka yiŵe cinyengo kapena kusakasya mbili ja ŵane.—w16.05, peji 7.

Ana mpaka atende wuli kuti kuŵalanga Baibulo kwawo kuŵeje kwakamucisya mnope?

Mpaka atende yakuyicisyayi: Ajiwoneje ngani jilijose kuŵa jakamucisya, apateje songa syampaka asikamulicisye masengo soni aliwusyeje yiwusyo mpela yakuti, ‘Ana mpaka nakamucisye najo wuli ŵane?’ Akamulicisyeje masengo yida yayipali yakwakamucisya kuwungunya ngani jakuŵalangajo.—w16.05, mapeji 24-26.

Ana yili yakulemwecekwa kwa Mklistu kulila jwakunonyelwa jwakwe pawile atamose kuti akusakulupilila yakuti ŵawe cacijimuka?

Kola cikulupi cakuti ŵawe cacijimuka ngakukusatyosya canasa cakusakola Mklistu jwakunonyelwa jwakwe pawile. Abulahamu ŵalisile Sala ali awile. (Gen. 23:2) Pali papite kandaŵi canasa cikusanandipa.—wp16.3, peji 4.

Ana mundu jwajigele kakwama ka mlembela kakunyakulila inki soni acalume 6 ŵajigele yida yakonanjila ŵakwakolanga mu Ezekieli caputala 9 akwimila ŵani?

Jemanjaji akwimila likuga lyangondo lyakwinani lyalyajonasile msinda wa Yelusalemu soni lyalicijonanga cilambo cakusakala ca Satanaci pa Alamagedo. Mwakamulana ni kwanilicikwa kwa yakulocesyayi moŵa agano, mundu jwajigele kakwama ka mlembele kakunyakulila inki akwimila Yesu Klistu. Jwalakwe ni jucacalemba cimanyisyo ŵandu kuti cakulupuce.—w16.06, mapeji 16-17.

Ana Baibulo jakulupwice ku yakogoya yapi?

(1) Atamose kuti ŵajilembile m’mipukutu jakupanganyidwa kutyocela ku mlulu soni mapende ga yinyama, nambo nganijijonasika. (2) Jakulupwice kwa ŵandale ŵajinji yimpepe ni acimlongola ŵa dini ŵaŵakwete yakulinga yakujijonanga, soni (3) Jakulupwice kwa ŵandu ŵane ŵaŵalingaga kucenga utenga wakwe.—wp16.4, mapeji 4-7.

Ana Mklistu mpaka atende wuli kuti akole umi wangasaka yejinji?

Alembe ndandanda ja yindu yakusosecela. Akasumaga yindu yangakusosecela. Alembe mwacakamulicisyeje masengo cenene mbiya syawo. Asumisye, agaŵanye, soni ajase yindu yangakusayikamulicisya masengo. Awusye ngongole syosope syakwete. Alinganye yakuti anandiye ndaŵi jakusakamulila masengo gakulembegwa. Aganicisye yampaka atende kuti ajonjecesye yakusatenda mu undumetume.—w16.07, peji 10.

Ana cindu capi cele Baibulo jikusasala kuti cili cakusosekwa mnope kupunda golidi kapena silifa?

Lilemba lya Yobu 28:12, 15 likusasala kuti lunda luli lwambone mnope kupunda golidi kapena silifa. Pakulusosasosa, ajendelecele kuŵa ŵakulinandiya soni kuŵa ŵakulimba m’cikulupi.—w16.08, mapeji 18-19.

Ana yili yakuŵajilwa kuti m’bale alanjeje ndewu masiku agano?

Mu ndamo sine, kola ndewu syekatile cenene kuli kwakundidwa, soni nganikuŵa kwalepelekasisye ŵandu kuti apikanile utenga wetu. Nambo atamose yili m’yoyo abale ŵane akusasagula kuti akalangaga ndewu. (1 Akoli. 8:9) Mu ndamo sine ŵangalimbikasya acalume kulanga ndewu soni yikusaŵa yangaŵajilwa kwa Aklistu kuti alanjeje ndewu.—w16.09, peji 21.

Ligongo cici mpaka tukulupilile yajasasile Baibulo yakuti Daudi jwamenyene ni Goliyati?

Goliyati ŵaliji jwamlewu masentimita 15 kumpunda mundu jwakusamsala masiku agano kuti ali jwamlewu mnope. Daudi ŵaliji mundu jusyesyene mpela muŵasalile Yesu soni mwayikusasalila yakulemba yakala yakwamba nyumba ja Daudi. Yosopeyi yikulosya kuti Daudi ŵaliji mundu jusyesyene.—wp16.5, peji 13.

Ana umanyilisi, kupikanicisya yindu soni lunda yikusalekangana wuli?

Mundu jwakwete umanyilisi akusamanyilila yindu yakulekanganalekangana. Mundu jwakusapikanicisya yindu akusakombola kulola mwele cindu cine cikusakamulanilana ni cine. Nambo mundu jwakwete lunda akusakola umanyilisi soni akusapikanicisya yindu, nambosoni akusayikamulicisya masengo.—w16.10, peji 18.