1, 2. (a) Ana cinonyelo cikusakamulana catuli ni cikulupi? (b) Ana citutagulilane yiwusyo yapi?

TUKUSAMNONYELA Yehofa ‘ligongo jwalakwe ni juŵatandite kutunonyela.’ (1 Yoh. 4:19) Mpela mbali jimo jakulosya cinonyelo cakwe, Yehofa akusiŵajaliwa ŵakutumicila ŵakwe ŵakulupicika. Cinonyelo cetu kwa Mlungu pacikukula, cikulupi cetu ni pacikusalimba mnope. Ngatukusagamba kulupilila kuti jwalakwe apali, nambo tukusakulupililasoni kuti ngasalepela kwapa mbote ŵakutumicila ŵakwe ŵakusiŵanonyela.—Aŵalanje Ahebeli 11:6.

² Yakusatenda Yehofa pakupeleka mbote, yikusalosya kuti jwalakwejo ali ŵani soni akusatenda cici. Cikulupi cetu cikusalimba naga tukusimicisya mnope kuti jwalakwe cacipeleka mbote nditu kwa ŵandu ŵakusamsosa jwalakwe ligongo, ‘Cikulupi cili cembeceyo cisyesyene ca yindu yatukwembeceya.’ (Ahe. 11:1) Cikulupi cikusapwatikapo kwembeceya mwangakayicila kuti Mlungu cacajaliwa ŵandu ŵakwe. Ana kola cembeceyo cakuti tucipocela mbote kukusatukamucisya catuli? Ana Yehofa apelece catuli mbote kwa ŵakutumicila ŵakwe ŵakala soni ŵa masiku agano? Kwende tutagulilane.

3. Ana pa Malaki 3:10 pana cilanga catuli?

³ Yehofa msyene ni juŵasasile kuti cacipeleka mbote kwa ŵakutumicila ŵakwe ŵakulupicika. M’yoyo, jwalakwe akusatusalila yampaka tutende kuti citupocele mbotejo. Tukusaŵalanga kuti, “‘Yehofa jwa makuga ŵasasile kuti, ‘Alinje conde, . . . kuti alole naga nganawugulila matanga ga kwinani ni kwakusulila majali gati mpaka kusoŵa pakugapocelela.’” (Mal. 3:10) Tukusalosya kuyamicila mnope yatulagucisye patukupikanila kuŵilanga kwa Yehofa kwakuti tumlinje.

4. Ligongo cici mpaka tukulupilile maloŵe ga Yesu ga pa Matayo 6:33?

⁴ Yesu ŵasimicisye ŵakulijiganya ŵakwe kuti naga akuŵika Ucimwene wa Mlungu pamalo gandanda, Mlungu cacakamucisya. (Aŵalanje Matayo 6:33.) Yesu ŵaŵecete yeleyi, ligongo ŵamanyililaga kuti yalagucisye Mlungu ndaŵi syosope yikusatendekwa. (Yes. 55:11) M’wejisoni mpaka tusimicisye kuti naga tukumkulupilila Yehofa ni mtima wetu wosope, jwalakwe ngasalepela kwanilisya yaŵalagucisye. Jwalakwe ŵaŵecete kuti, ‘Une ngasinamleka kapena kumjasa kose.’ (Ahe. 13:5) Yaŵalagucisye Mlunguyi yikutukamucisya kulupilila maloŵe ga Yesu gakusala ya kusosasosa candanda Ucimwene ni cilungamo ca Mlungu.

5. Ligongo cici yaŵajanjile Yesu kwa Petulo yili yakulimbikasya cikulupi cetu?

⁵ Ndaŵi jine ndumetume Petulo ŵam’wusisye Yesu kuti, “Uwe twalesile yosope ni kwakuya ŵalakwe, ana sambano tucipata cici?” (Mat. 19:27) M’malo mwakumjamuka Petulo ligongo lya ciwusyo caŵawusisye, Yesu ŵasalile ŵakumkuya ŵakwe kuti cacipocela mbote ligongo lya kulipeleka kwawo. Ŵandumetume ŵakulupicika soni ŵane cacilamulila ni jwalakwe kwinani. Nambo Yesu ŵasasile kuti atamose apano mpaka tupocele mbote,  jwalakwe ŵaŵecete kuti, ‘Jwalijose jwalesile mangwakwe, acalongo acimjakwe, kapena babagwe, kapena mamagwe, kapena ŵanace ŵakwe, kapena migunda ligongo lya une, jwalakwejo tacikola yosopeyo yejinji kupunda yiŵalesile kala yila, kaneko tacipocela umi wangamala.’ (Mat. 19:29) Ŵakumkuya ŵakwe wosope mpaka apate majali gambone mnope kupunda yindu yaŵalesile. Jemanjaji akusapata acibaba, acimama, acayimwene, mwanja cemwali soni ŵanace ŵali ŵakupunda cilicose caŵalesile ligongo lya Ucimwene?

6. Ana yaŵatesile Yehofa pakutulagucisya kuti cacitupa mbote yikusatukamucisya catuli?

⁶ Ligongo lyakuti Yehofa ŵatulagucisye kuti cacitupa mbote, yikusatukamucisya kuti tuŵeje ŵakupilila patukusimana ni yakulingwa. Konjecesya pa majali gausimu gatukusangalala nago apanopano, tukwembeceyasoni mwalung’wanu kuti citupocele majali gane gamajinji msogolo muno. (1 Tim. 4:8) Yisyene, naga tukuŵa ŵakusimicisya kuti Yehofa ‘akusiŵapa mbote ŵandu ŵakusamsosa jwalakwejo,’ yicitukamucisya kuti tuŵepe ŵakulimba m’cikulupi.—Ahe. 11:6.

7. Ana cembeceyo cetu cikusaŵa mpela nangula m’litala lyapi?

⁷ Pa Kulalicila kwa Petumbi, Yesu ŵasasile kuti, ‘Asangalale mnope ligongo mbote jawo jili jekulungwa kwinani, pakuŵa mwelemu ni muŵatendelesoni pakwalagasya ŵakulocesya ŵaŵapali jemanja mkanimpagwe.’ (Mat. 5:12) Konjecesya pa ŵandu ŵacacipocela mbote kwinani, panasoni ŵane ŵacacipocela mbote jakutama ni umi wangamala pacilambo capasi. Lyeleli lilisoni ligongo lyakupikanika lyakuŵela ‘ŵakusangalala.’ (Sal. 37:11; Luk. 18:30) Nambope, wosopewe cinga tukwembeceya kwawula kwinani kapena kutama pacilambo capasi, cembeceyo cetu mpaka ciŵe ‘nangula jwa umi wetu soni cili cisyesyene ni cakulimba.’ (Ahe. 6:17-20) Mpela mwele nangula akusakamucisya kuti liboti likajigalika ni cimbungo, nombenaco cembeceyo cetu cakuti tucipocela mbote mpaka citukamucisye kuti tuŵe ŵakutamilicika soni mpaka citulimbisye kuti tupilile yakusawusya yampaka tusimaneje nayo.

8. Ana cembeceyo cetu mpaka cinandiye catuli kulagasika nganisyo?

⁸ Cembeceyo cetu cakutyocela m’Baibulo, cikwete macili gakutukamucisya kunandiya kulagasika nganisyo. Yaŵalagucisye Mlungu yili mpela mawuta gausimu gampaka gatukamucisye kutamika pasi mtima wetu wakulagasika. Yili yakutondoya mnope kwa m’weji kumanyilila kuti Yehofa cacitukamucisya patukumtulila yakusawusya yetu. (Sal. 55:22) Mpaka tukole cikulupi cakuti Mlungu mpaka ‘akombole kutenda yindu yekulungwa mnope kupunda yosope yampaka tuŵende kapena kuganicisya.’ (Aef. 3:20) Yehofa cacitukamucisya ngaŵape yindu yekulungwa nambo ‘yekulungwa mnope.’

9. Ana tukusimicisya catuli kuti Yehofa cacitupa majali?

⁹ Kuti citupocele mbote, tukusosekwa kumkulupilila mnope Yehofa soni kupikanila yakusasaka jwalakwe kuti tutendeje. Mose ŵawusalile mtundu wa Ayisalayeli kuti, ‘Yehofa cacimjaliwa jemanja nditu m’cilambo cele Yehofa Mlungu jwenu ampele kuti mtamemo, naga mkupikanila maloŵe ga Yehofa Mlungu jwenu soni kusunga cenene malamusi gosope gangumpa lelojino. Pakuŵa Yehofa Mlungu jwenu cacimpa majali mpela muŵalagucisye kwa jemanja.’ (Deut. 15:4-6) Ana akwete cikulupi cakuti Yehofa cacapa majali naga akwendelecela kumtumicila mwakulupicika? Kusala yisyene, akwete magongo gambone gakumkulupilila.

10, 11. Ana Yosefe ŵapocele mbote jatuli ligongo lyakuŵa jwakulupicika kwa Mlungu ?

¹⁰ Baibulo jalembedwe kuti jitukamucisyeje. Jikwete yisyasyo yejinji yakulosya kuti Yehofa ŵapelece mbote kwa ŵakutumicila ŵakwe ŵakulupicika. (Alo. 15:4) Cisyasyo cakumanyika cenene cili ca Yosefe. Acakulugwe ŵamsumisye jwalakwe kuti aŵe kapolo. Panyuma pakwe ŵamkwawo abwana ŵakwe ŵamlambucisye kuti asacileje kwakamulila. Yeleyi yatendekasisye kuti am’ŵice  mu ukayidi. Ana yeleyi yamlekangenye ni Mlungu? Iyayi! Baibulo jikusasala kuti, ‘Yehofa ŵajendelecele kuŵa ni Yosefe soni kulosya kulupicika kwa jwalakwe . . . Yehofa ŵaliji ni Yosefe soni ŵajaliwaga yiliyose yaŵatendaga.’ (Gen. 39:21-23) Mundaŵi josope jaŵasimanaga ni yakusawusya, Yosefe ŵajembeceyaga Mlungu mwakuwusimana mtima.

¹¹ Pali papite yaka, Falao ŵamkopwesye Yosefe mu ukayidi ni kum’ŵika kuŵa jwakulamulila jwaŵili mu Iguputo. (Gen. 41:1, 37-43) Yosefe ni ŵamkwakwe ŵakwete ŵanace ŵaŵili. ‘Yosefe ŵampele mwanace jwandanda lina lyakuti Manase, pakuŵa jwalakwe jwaŵecete kuti, “Mlungu atendekasisye kuti ndiŵalile yakusawusya yangu soni wosope ŵa m’nyumba ja baba ŵangu.” Mwanace jwakwe jwaŵili ŵampele lina lyakuti Efulaimu, pakuŵa jwalakwe ŵaŵecete kuti, “Mlungu ambele ŵanace m’cilambo ca yakusawusya yangu.”’ (Gen. 41:51, 52) Ligongo lyakuti Yosefe ŵajendelecele kuŵa jwakulupicika kwa Mlungu, jwalakwe ŵapocele majali gagatendekasisye kuti akulupusye umi wa Ayisalayeli soni wa ŵandu ŵa ku Iguputo. Pelepa, Yosefe ŵamanyilile kuti Yehofa ni juŵampele mbote soni kumjaliwa.—Gen. 45:5-9.

12. Ana cici cacamkamucisye Yesu kuti ajendelecele kuŵa jwakulupicika atamose paŵasimanaga ni yakusawusya?

¹² Nombe najo Yesu Klistu, ŵapocele mbote ligongo lyakuti jwalakwe ŵajendelecele kupikanila Mlungu atamose paŵasimanaga ni yakusawusya yejinji. Ana cici cacamkamucisye kupilila? Maloŵe ga Mlungu gakusasala kuti, ‘ligongo lya cisangalalo caŵam’ŵicile pasogolo pakwe, jwalakwe ŵapilile citela cakulagacisya. Jwalakwe nganasamala kuti yakutesya sooni ciyimtendecele.’ (Ahe. 12:2) Yesu ŵasangalele mnope ligongo lyakuti ŵakombwele kuswejesya lina lya Mlungu. Yakuyicisya yakwe, Mlungu ŵamjiticisye jwalakwe soni ŵampele maukumu gapajika. Baibulo jikusasala kuti, jwalakwe ‘atemi ku mkono wamlyo wa citengu ca ucimwene ca Mlungu.’ Jikusasalasoni kuti, “Mlungu ŵamkwesisye jwalakwe ni kum’ŵika pa malo gapenani soni ŵampele lina lyakupunda lina lililyose.”—Afi. 2:9.

13, 14. Ana Yehofa akusapikana wuli mumtima patukwakamucisya ŵane?

¹³ Mpaka tuŵe ŵakusimicisya kuti Yehofa akusayamicila yosope yatukusatenda pakumtumicila. Patukuliwona kuti ngatukutenda cenene yineyakwe soni naga tukulikayicila, jwalakwe akusatupikanicisya. Akusakola canasa naga tukulagasika nganisyo ligongo lyakusoŵa mbiya soni naga tukulepela kutenda yejinji mu undumetume ligongo lya kulwalalwala. Tukusosekwa kumanyilila kuti Yehofa akusayamicila ŵakutumicila ŵakwe ligongo lyakuŵa ŵakulupicika kwa jwalakwe.—Aŵalanje Ahebeli 6:10, 11.

¹⁴ Tukumbucilejesoni kuti mpaka tupopele kwa Yehofa tuli tukwete cikulupi cakuti catupikanile, ligongo jwalakwe ali “Jwakupikana lipopelo.” (Sal. 65:2) ‘Atati ŵacanasa cekulungwa soni Mlungu jwakusatutondoya m’litala lililyose’ cacitupa mwakoloŵa magasa cilicose catukusosecela kuti tuŵepe paunasi ni jwalakwe. Ndaŵi sine mpaka atende yeleyi kupitila mwa ŵakulambila acimjetu. (2 Akoli. 1:3) Mtima wa Yehofa ukusasangalala mnope patukulosya kuti tukusaganicisya ŵandu ŵane. Baibulo jikusasala kuti, ‘Jwakumtendela yambone mundu jwakulaga akumjasima Yehofa. Jwalakwe cacim’wucisya pa yosope yakutenda.’ (Miy. 19:17; Mat. 6:3, 4) M’yoyo, patukwakamucisya ni mtima wosope abale ni alongo ŵetu pakusimana ni yakusawusya, Yehofa akusayiwona yatukutendayo kuti tukumkongosya jwalakwe. Yehofa cacitupa mbote ligongo lya umbone mtima watukusalosya.

15. Ana tukwembeceya kuti citupocela mbote syapi? (Alole ciwulili cacili kundanda kwa nganiji.)

¹⁵ Aklistu ŵasagulwe ni msimu akwembeceya kupocela ‘cisoti caucimwene ca cilungamo cele Ambuje, ŵakwelusya mwacilungamo, cacapa . . . mpela mbote pa lisikulyo.” (2 Tim. 4:7, 8)  Nambope, naga tukwete cembeceyo cine, ngayikulosya kuti nganituŵa ŵakusosekwa kwa Mlungu. “Ngondolo sine” sya Yesu mamiliyoni gejinji sikwembeceya mwalung’wanu kuti tisipocele mbote jakutama ni umi wangamala pacilambo capasi ca paladaiso. Jemanjaji, “cacisangalala ni mtendele wejinji.”—Yoh. 10:16; Sal. 37:11.

16. Ana pa 1 Yohane 3:19, 20 tukusapata maloŵe gakutondoya gapi?

¹⁶ Ndaŵi sine mpaka tulipikaneje kuti tukutenda yamnono pakumtumicila Yehofa, kapena mpaka tukayicileje naga jwalakwe akusangalala ni yakulingalinga yetu. Mwine mpaka tukayicilejesoni naga tuli ŵakuŵajilwa kupocela mbote jilijose. Nambope, tukusosekwa kumbucilaga kuti ‘Mlungu ali jwamkulungwa kujipunda mitima jetu soni akusamanyilila yindu yosope.’ (Aŵalanje 1 Yohane 3:19, 20.) Jwalakwe cacitupa mbote pa yiliyose yatukusatenda pakumtumicila ligongo lya cikulupi soni cinonyelo cetu pa jwalakwe, atamose yiwonece kuŵa yamwana kwetuwe.—Maliko 12:41-44.

17. Ana sine mwa mbote syatukusangalala nasyo apanopano ni syapi?

¹⁷ Atamose m’masiku gakumalisya ga cilambo ca Satana gano, Yehofa akwapa majali ŵandu ŵakwe. Jwalakwe akulolecesya kuti tukupocela umanyilisi wejinji soni tukusangalala mu paladaiso jwausimu jwatuli. (Yes. 54:13) Mpela muŵalagucisye Yesu, Yehofa akutupa mbote apanopano mwakutukunda kuti tuŵe m’liŵasa lya abale ni alongo ŵausimu ŵapacilambo cosope. (Maliko 10:29, 30) Konjecesya pelepa, ŵandu ŵakusamsosa Mlungu ni mtima wosope akusapocela mbote syapajika mnope, syasili kola mtendele wamumtima, kuŵa ŵakwikutila soni ŵakusangalala.—Afi. 4:4-7.

18, 19. Ana ŵakutumicila ŵa Yehofa akusapikana wuli mumtima ligongo lya mbote syakupocela apanopano?

¹⁸ Ŵakutumicila ŵa Yehofa pacilambo cosope akusangalala ni mbote syapocele kutyocela kwa jwalakwe. Mwambone, mlongo jwine jwa ku Germany lina lyakwe Bianca ŵasasile kuti, “Ngulepela kum’yamicila Yehofa ligongo lya cikamucisyo cakusamba pa yakusawusya yangu soni pakuŵa ni une lisiku lililyose. Cilamboci cigumbele ni yakusokonasya yejinji. Nambo pangukamula masengo ni Yehofa, ngusalipikana kuŵa jwakuteteyeka. Pa cilicose cangusampa jwalakwe, akusambucisya majali gejinji.”

¹⁹ Kwende tuganicisyesoni ya mlongo jwine jwa ku Canada lina lyakwe Paula jwakwete yaka 70. Mlongoju akulaga ni ulwele wa mgongo. Jwalakwe ŵaŵecete kuti, “Atamose kuti ngusalepela kwenda nambo yeleyi ngayikugopolela kuti nandiye undumetume wangu. Apano ngusalalicila pakamulicisya masengo foni soni kulalicila mwaupile. Kuti nalilimbikasyeje, ngusasunga kabuku kangusalembamo malemba soni songa sine syakutyocela m’mabuku getu syangusaŵalanga ndaŵi ni katema. Kabukuka ngusakakolanga kuti ‘Kabuku Kangu Kakungulupusya.’ Mpaka tunandiye kutenguka naga tukulupilila yalagucisye Yehofa. Yehofa akusaŵa jwakoseka kutukamucisya, mwangajigalila mtundu wa yakusawusya yetu.” Komboleka kuti yakusawusya yakusasimana nayo paumi mpaka yiŵe yakulekangana ni ya Bianca kapena Paula. Nambope mpaka aganicisye matala gele Yehofa akamulicisye masengo pakupeleka mbote kwa wawojo soni kwa abale ni alongo ŵane. Yili yakusangalasya mnope kuganicisya mwele Yehofa akupelecela mbote kwa wawojo apanopano soni mucacapela msogolo!

20. Naga tukumtumicila Yehofa ni mtima wosope, ana tucipocela cici?

²⁰ Tukaliŵalila kuti Mlungu ‘cacitupa mbote jekulungwa’ ligongo lya mapopelo getu gakutyocela pasi pa mtima. Tukusosekwa kusimicisya kuti ‘panyuma pakutenda yosope yakusasaka Mlungu, tucipocela yaŵalagucisye jwalakwe.’ (Ahe. 10:35, 36) M’yoyo, kwende tujendelecele kulimbisya cikulupi cetu soni kutenda yosope ni umi wetu wosope mpela kuti tukumtendela Yehofa. Mpaka tutende yeleyi ligongo lyakumanyilila kuti Yehofa cacitupa mbote pandaŵi jakwe.—Aŵalanje Akolose 3:23, 24.