Ana aŵalasile mwakusamala magasini ga Sanja ja Mlonda gapacangakaŵapa? Kwende tulole naga cakombole kwanga yiwusyo yakuyicisyayi:

Ligongo cici acinangolo ŵasamile cilambo cine akusosekwa kuciwona ciŵeceto kuŵa cakusosekwa mnope pakwakamucisya ŵanace ŵawo kukula mwausimu?

Ŵanace ŵawo mpaka alijiganye ciŵeceto ca kumalo kwakutama pali ku sukulu, atamosesoni kwa ŵandu ŵaŵasyungulile. Mpaka yiŵe yakamucisya naga mwanace akumanyilila yiŵeceto yakupunda cimo. Acinangolo akusosekwa kuganicisya kwampaka ŵanace ŵawo apikane usyesyene mwangasawusya soni kukula mwausimu. Mpaka asagule cinga mpingo wa ciŵeceto cakumaloko kapena wa ciŵeceto cawo. Acinangolo ŵaciklistu akusosekwa kuŵika nganisyo syawo pa usimu wa ŵanace ŵawo m’malo mwa yakusaka yawo.—w17.05, pp. 9-11.

Ana Yesu ŵasalaga ya cici paŵam’wusisye Petulo kuti, “Ana mkusanonyela une kupunda ayi?” (Yohane 21:15)

Yikuwoneka kuti Yesu ŵasalaga ya somba syele Petulo ŵaliji ali agambile kuwulaga kwene kapena bisinesi jakwe jakusumisya somba. Panyuma pa ciwa ca Yesu, Petulo ŵawujile pa masengo gakwe gaŵatendaga pandanda gakuwulaga somba. Aklistu akusosekwa kuŵika masengo gakulembedwa pa malo gakwe.—w17.05, pp. 22-23.

Ligongo cici Abulahamu ŵasalile ŵamkwakwe kuti asale kuti ŵaliji mlumbugwe? (Gen. 12:10-13)

Kusala yisyene, Sala jwaliji mlumbugwe Abulahamu, ŵagambile kulekangana mama ŵawo basi. Yikaŵe kuti Sala ŵasasile kuti Abulahamu ali ŵamkwakwe, ni kuti Abulahamujo akawulajidwe. Yeleyi niyikatendekasisye kuti mbeju jaŵalagucisye Mlungu jikapitila mwa jwalakwe.—wp17.3, pp. 14-15.

Ana Elias Hutter jwatesile cici pakusaka kwakamucisya ŵandu ŵaŵasakaga kulijiganya Cihebeli?

Pakusaka kwakamucisya ŵakulijiganya ŵakwe, jwalakwe ŵalekanganyaga kawonece ka maloŵe gapasikati ni maloŵe gakusogolo kapena panyuma pakwe. Maloŵe gapasikatiga galiji gepiliwu mnope kulekangana ni maloŵe gakupwatika kusogolo kapena munyuma. Pakulemba Baibulo jacisungu ja Cilambo Casambano jakola malifalensi ŵakamulicisyesoni masengo litala mpela lyeleli m’maloŵe gamwiŵanda.—wp17.4, pp. 11-12.

Ana ni yindu yapi yakusosekwa kuganicisya Mklistu mkanasagule yakola uti kuti alicenjeleje najo kwa ŵandu ŵane?

Yindu yakwe yili, Mlungu akusawuwona umi wa mundu kuŵa wakusosekwa mnope. Yesu nganiŵasalila ŵakumkuya ŵakwe kujigala maupanga kuti alicenjeleje. (Luk. 22:36, 38) Ŵandu ŵa Mlungu tukusasyana maupanga getu kuŵa majela. Umi uli wakusosekwa mnope kupunda yindu yakucilu. Tukusacimbicisya cikumbumtima ca ŵane, soni tukusasaka kuŵa cisyasyo cambone kwa ŵane. (2 Akoli. 4:2)—w17.07, pp. 31-32.

Ligongo cici yaŵalembile Mateyu pakusala yayatendekwe kundanda kwa umi wa Yesu yili yakulekangana ni yaŵalembile Luka?

Mateyu ŵalembile mnope yakwaya Yosefe, mpela yaŵatesile Yosefe ali apikene kuti Maliya akwete citumbo soni utenga wakuti atilile ku Iguputo soni kaneko yakuwujila. Luka ŵalembile mnope yakwayana ni Maliya. Mwambone, ulendo wakwe wakwawula kukumlola Elisabeti soni yaŵatesile pandaŵi jele Yesu ŵasigalile ku nyumba jakupopelela.—w17.08, p. 32.

Ana Baibulo jipilile yindu yapi?

Kucenga kwa yiŵeceto, kutamilicika kwa ciŵeceto cimo ligongo lya ndale, soni ŵakusisya masengo gagopolela Baibulo.—w17.09, pp. 19-21.

Ana jwalijose akwete lilayika lyalikusamkamucisya?

Iyayi. Yesu ŵaŵecete ya malayika ga ŵakumkuya ŵakwe kuti gakusalola ngope ja Mlungu. (Mat. 18:10) Pelepa, jwalakwe jwagopolelaga kuti malayika gakusakola lung’wanu ni jwakulijiganya jwakwe jwalijose, ngaŵa kuti malayikaga gakusamcenjela jwalijose pajika mwakusimonjesya.—wp17.5, p. 5.

Ana cinonyelo cakupunda pa yosope cili camtundu wapi?

Naga cinonyeloco cikamulana ni ndamo syambone, nikuti akusacikolanga kuti a ga’pe. Cinonyeloci cikusapwatikapo kwatendela ŵane yambone soni ngalinonyela.—w17.10, p. 7.