1. Ligongo cici kubatiswa kuli mbali jakusosekwa mnope? (Alole ciwulili cacili penanipa.)

CAKA cilicose ŵakulijiganya Baibulo ŵajinji akusabatiswa. Ŵajinji akusaŵa ŵacinyamata soni ŵacinandipile. Ŵane akusaŵa ŵaŵapagwile mu liŵasa lya Mboni, nambo ŵane iyayi. Ana wawojo ali jumo mwa ŵandu ŵeleŵa? Naga yili m’yoyo, ŵatesile cenene kwabasi. Mklistu akusosekwa kubatiswa kuti cakulupuce ni kupocela umi wangamala.—Mat. 28:19, 20; 1 Pet. 3:21.

2. Ligongo cici ngakusosekwa kogopa kulipeleka kwa Yehofa?

² Atamose kuti kubatiswa kukusawugula litala lyakupatila majali, nambope uli ukumu wekulungwa. Ligongo cici tukuti m’yoyo? Ligongo lyakuti palisiku lyaŵabatiswe ŵajanjile kuti elo pa ciwusyo cakuti, “Kupitila mu mbopesi ja Yesu Klistu, ana alesile yakulemwa yawo ni kulipeleka asyene kwa Yehofa kuti atende lisosa lyakwe?” Kubatiswa kwawo kwalosisye kuti ŵalipelece kwa Yehofa. Pelepa nikuti wawojo ŵatesile cilanga cakuti camnonyeleje Yehofa ni kuŵika lisosa lyakwe pamalo gandanda. Jelejitu jili ngani jekulungwa.  Ana akusaligamba ligongo lyakuti ŵabatiswe? Iyayi, ngakusosekwa kuligamba ata panandi. Kusagula Yehofa kuti ŵalongoleleje nganiciŵa cisagula cakulemweceka. Nambi wuli naga mundu ngakulipeleka kwa Yehofa? Mundu jwamti m’yoyo nikuti akusagula kuti alongoleledweje ni ulamusi wa Satana. Satana jwangasaka kuti wawojo cakulupuce. Jwalakwe akusasaka kuti wawojo aŵe najo kumbali jimpepe pakukana ulamusi wa Yehofa. Sonitu, jwalakwe mpaka aŵe jwakusangalala mnope kwawona wawojo ali alepele kupata umi wangamala.

3. Ana mundu mpaka apate umbone wamtuli ligongo lya kulipeleka kwa Yehofa?

³ Mwakulekangana ni kuŵa ku mbali ja Satana, akusosekwa ganicisyaga ya umbone wapatile ligongo lya kulipeleka soni kubatiswa. Ligongo lyakuti ŵapelece umi wawo kwa Yehofa, mpaka alimbe mtima kuŵeceta kuti, “Yehofa ali kumbali jangu. Ngasinjogopa. Ana mundu mpaka andende cici?” (Sal. 118:6) Pangali cindu cakusosekwa mnope pa umi mpela kuŵa ku mbali ja Yehofa soni kunonyeledwa ni jwalakwe.

4, 5. (a) Ligongo cici kulipeleka uli ukumu wa mundu jwalijose pajika? (b) Ana yakulingwa yapi yele ŵacinandipile ŵangakangala kusimana nayo?

⁴ Unasi ni Yehofa nganiwuŵa mpela cipanje cele acinangolo ŵawo cacalecela pacaciwa. Yeleyi yikulosya kuti atamose akutama pamlango ni acinangolo ŵawo, wawojo pajika akwete ukumu wakulinganya unasi wawo ni Yehofa kuti cakulupuce. Ligongo cici kumbucila yeleyi kuli kwakusosekwa? Ligongo jwalijose jwetuwe kusogolo cacisimana ni yakulinga cikulupi cakwe. Mwambone, naga wawojo ŵabatiswe ali jwacinandipile, mwangakayicila pandaŵijo nganakola yakusawusya jejinji. Nambo sambano pali jwacinyamata casimaneje ni yakusawusya ya mtundu wine. Msikana jwine jwa yaka 18 jwaŵecete kuti, “Ndaŵi syejinji jwacinandipile pali kusukulu mpaka akombole kana kutenda nawo yindimba yangakamulana ni Baibulo ligongo lyakuti ali Jwamboni sya Yehofa. Nambo pakukula, nganisyo syakumbila yagonana sikusaŵa syamacili mnope, m’yoyo pandaŵi jeleji jwacinyamata akusasosekwa kusimicisya mumtima mwakwe kuti kupikanila malamusi ga Yehofa kuli kwakamucisya ndaŵi syosope.”

⁵ Nambo yeleyi ngayikulosya kuti ŵacinyamatape ni ŵampaka asimaneje ni yakusawusya. Atamose ŵandu ŵaŵabatiswe ali ŵacikulile akusasimana ni yindu yakulinga cikulupi cawo. Yine mwa yakulingayi mpaka asimaneje nayo mu ulombela, pakulwala, kapena ku masengo. Kusala yisyene, mwangajigalila yaka yatukwete, citusimaneje ni yakulinga cikulupi nambo citusosekweje kulosya kuti tuli kumbali ja Yehofa.—Yak. 1:12-14.

6. (a) Ana kulipeleka kwa Yehofa atamose yindu yili yisawisye kukusagopolela cici? (b) Ana mpaka alijiganye cici pa lilemba lya Afilipi 4:11-13?

⁶ Campaka cakamucisye kuŵa ŵakulupicika ndaŵi syosope cili kumbucila kuti ŵatesile cilanga cakuti camtumicileje Yehofa atamose yindu yili yisawisye. Yeleyi yikugopolela kuti ŵamsalile Jwakulamula jwacilambo cosope kuti wawojo cacijendelecela kumtumicila atamose acimjawo kapena acinangolo ŵawo ali alesile usyesyene. (Sal. 27:10) Ndaŵi syosope amŵendeje Yehofa kuti ŵakamucisye kwendelecela kuŵa ŵakulupicika.—Aŵalanje Afilipi 4:11-13.

7. Ana kulinganya cikulupusyo cawo “mwawoga soni kutetemela” kukusagopolela cici?

⁷ Yehofa akusasaka kuti aŵe najo paunasi. Nambo kuti unasiwu ujendelecele soni kuti alinganye cikulupusyo cawo akusosekwa mtawu. Ni ligongo lyakwe pa Afilipi 2:12 pakusati, “Ajendelecele kulinganya cikulupusyo cawo, mwawoga soni kutetemela.” Maloŵega gakulosya kuti akusosekwa kuganicisya yampaka atende kuti alimbisye unasi wawo ni Yehofa, soni kwendelecela  kuŵa ŵakulupicika mwangajigalila yakusawusya yampaka asimane nayo. Naga asimene ni yakusawusya ngakusosekwa kulijegamila. Ligongo kulijegamila kutendekasisye ŵandu ŵane ŵaŵele mkutumicila Yehofa kwa ndaŵi jelewu kuleka usyesyene. Nambo ana mpaka atende wuli kuti alinganye cikulupusyo cawo?

8. Ana kulijiganya Baibulo kwapajika kukusapwatikapo cici, soni ligongo cici kuli kwakusosekwa?

⁸ Kuti aŵe paunasi ni Yehofa akusosekwa kutenda yindu yiŵili, kuŵeceta najo soni kupikanila pakuŵeceta kwa wawojo. Kulijiganya Baibulo kwapajika kuli litala lyakusosekwa mnope lyakupikanila yakuŵeceta Yehofa. Yeleyi yikusapwatikapo kulijiganya ni kuganicisya yayili m’Baibulo, ni mabuku gakutagulila ya m’Baibulo. Pakutenda yeleyi, akumbucileje kuti kulijiganya Baibulo kuli kwakulekangana ni kulijiganya ya kusukulu. Ŵanace ŵasukulu akusagamba kwinjisya maloŵe mumtwe kuti akombole mayeso. Nambo kulijiganya Baibulo kwambone kukusaŵa kuwungunya mwakusokoka kuti amanyilile ndamo sine sya Yehofa. Kutenda yeleyi kucakamucisya kuti amŵandicile Mlungu, mwamti pambesi pakwe jwalakwe cacaŵandicilasoni wawojo.—Yak. 4:8.

9. Ana wawojo akusakamulicisya masengo yida yapi pa kulijiganya kwawo kwapajika?

⁹ Pakusaka kwakamucisya ŵacinyamata kuti atendeje lijiganyo lya Baibulo lyapajika lyakamula mtima, likuga lya Yehofa likopwesye yida yakamucisya. Mwambone, pa webusayiti ja jw.org/ny pakusimanikwa mbali jakuti “Zoti Muchite Pophunzira Baibulo” jajili pasi pa mtwe wakuti “Achinyamata.” Mbaliji mpaka jakamucisye ŵacinyamata kulijiganya ngani syejinji sya m’Baibulo. Nambosoni pa webusayitiji pana mbali ja yakamucisya pakulijiganya buku ja “Ana Baibulo Jikusajiganya Cici Kusyesyene?” Mbaliji mpaka jakamucisye kulimbisya cikulupi cawo. Yayikusimanikwa pamaloga, mpaka yakamucisye kumanyilila yampaka aŵecete naga ŵane ŵawusisye yakusakulupilila. Yindu yine yakamucisya yikusimanikwa mu Ajimuce! ja April 2009, pa mtwe wakuti “Zimene Achinyamata Amadzifunsa . . . Kodi Ndingatani Kuti Kuwerenga Baibulo Kuzindisangalatsa?” Kulijiganya soni kuganicisya yalijiganyisyeyo kuli kwakamucisya mnope pa kulinganya cikulupusyo cawo.—Aŵalanje Salimo 119:105.

10. Ligongo cici lipopelo lili lyakusosekwa mnope kwa Mklistu jwam’batiswe?

¹⁰ Cinesoni campaka cakamucisye kuti aŵe paunasi ni Yehofa cili kuŵecetana najo mwipopelo. Mklistu ngakusosekwa kupopelaga kwa Yehofa mwacisyoŵe kapena kuliwona lipopelo mpela “cisasi” cakumkamucisya kupata yindu yine yakwe. Nambo akusosekwa kuliwonaga lipopelo kuŵa kuŵecetana kusyesyene ni Mkupanganya jwetu. Yehofa akusasacilila kupikana maloŵe gawo. (Aŵalanje Afilipi 4:6.) Baibulo jikusatulimbikasya kuti patusimene ni yakulagasya nganisyo yiliyose tukusosekwa ‘kumtulila Yehofa.’ (Sal. 55:22) Ana akusakulupilila maloŵe gelega? Pana abale ni alongo ŵajinji ŵampaka ŵasimicisye kuti maloŵega gakamucisye jemanjaji. Soni mpaka gakamucisye wawojo.

11. Ligongo cici tukusosekwa kum’yamicila Yehofa ndaŵi syosope?

¹¹ Nambope, ngakusosekwa kupopela kwa Yehofa pandaŵi jakusakape kuti ŵakamucisye. Baibulo jikusasala kuti, “Alosyeje kuti ali ŵakuyamicila.” (Akolo. 3:15) Ndaŵi sine tukusaganicisya mnope ya yakusawusya yetu, mpaka kwikana pakuliŵalila yindu yambone yatutendele Yehofa. Wuli lisiku lililyose ngaganicisya yindu atamose yitatupe yayitusangalesye? Kaneko, am’yamicile nayo Yehofa mwipopelo. Msikana jwine jwa yaka 18, juŵabatiswe ali ni yaka 12, ŵatite, “Nguyiwona kuti Yehofa ni jwakusosekwa kum’yamicila kupunda jwalijose. Tukusosekwa kum’yamicila ndaŵi jilijose pa yindu yambone yatutendele.”

12, 13. Ana Yehofa ŵatendele yindu yambone yapi wawojo, soni ligongo cici akusosekwa kuganicisyaga yatesile Yehofa pakwakamucisya?

¹² Mwenye Daudi jwasimene ni yakusawusya yejinji, nambo Yehofa ŵamkamucisye. Jwalakwe ŵalembile kuti, “Apasye ni calole kuti Yehofa ali jwambone. Akwete upile mundu jwakusatilila kwa jwalakwe.” (Sal. 34:8) Lilembali likulosya kuti tukusosekwa kumbucila yatutendele Yehofa pakutukamucisya. M’Baibulo, m’mabuku getu soni kumisongano ja mpingo tukusapikana yaŵatesile Mlungu pakwakamucisya ŵandu ŵane kuti aŵe ŵakulupicika. Nombe wawojo pakukula mwausimu, akusosekwa aloleje yakutenda Yehofa pakwakamucisya. Ana wawojo apasisye umbone wa Yehofa?

¹³ Yehofa ŵaŵilasile Aklistu kuti aŵe paunasi ni jwalakwejo soni Mwanagwe. Lyeleli lili litala limo lyakupasya umbone wa Yehofa. Yesu jwatite, “Pangali mundu jwampaka ayice kwa une akaŵe naga Atati ŵaŵandumile am’wutile kwa une.” (Yoh. 6:44) Ana akusakulupilila kuti Yehofa ŵawutile wawojo? Jwacinyamata mwine mpaka aganisyeje kuti, ‘Yehofa jwawutile acinangolo ŵangu, ni une nagambile kwakuya jemanjajo.’ Nambo pagambile kulipeleka ni kubatiswa, nikuti wawojo pajika ali paunasi ni Yehofa. Sambano ali ŵakumanyikwa ni jwalakwejo. Baibulo jikusatusimicisya kuti, “Naga mundu akumnonyela Mlungu, jwalakwejo akusamanyika kwa Mlungu.” (1 Akoli. 8:3) M’yoyo, ayamicileje mnope kuti ali mu likuga lya Yehofa.

14, 15. Ana undumetume mpaka ulimbikasye camtuli cikulupi cawo?

¹⁴ Litala line lyakupacisya umbone wa Yehofa lili kulola yakusatenda jwalakwejo pakwakamucisya wawojo pakusala ya cikulupi cawo kwa ŵane. Mpaka asale ya cikulupi cawo pali mu undumetume nambosoni kusukulu. Ŵacinyamata ŵane akusajogopa kulalicila kwa acimjawo pali kusukulu. Mwine wawojo akupikanicisya ligongo lyakwe. Ndaŵi syejinji ngawukusamanyilila kuti cajanje yamtuli. Mpaka yiŵesoni yakusawusya kutagulila yindu pa likuga lya ŵandu kulekangana ni jwalijose pajika. Ana mpaka atende wuli pandaŵi mpela jeleji?

¹⁵ Candanda, akusosekwa kumanyilila ligongo lyakwe akusayiwona yakusakulupilila kuŵa  yisyene. Ana pa webusayiti ja jw.org ja m’ciŵeceto cawo pakusimanikwa yakamucisya kulijiganya buku ja “Ana Baibulo Jikusajiganya Cici Kusyesyene?” Naga ngakumanyilila, wuli alinje kulola! Yindu yeleyi ŵayipanganyisye m’litala lyakwakamucisya ganicisya yakusakulupilila, ligongo lyakwe akusayikulupilila, soni yampaka atende pakwasalila ŵane ya cikulupi cawo. Cikulupi cawo pacilimbile soni pambesi pakosecela cenene, mpaka yalimbikasye kutendela umboni lina lya Yehofa.—Yer. 20:8, 9.

16. Ana cici campaka cakamucisye kumasya woga pakusaka kusala yakusakulupilila?

¹⁶ Nambo atamose ali akosecele cenene, mwine mpaka ajogopejepe kusala yakusakulupilila. Mlongo jwine jwa yaka 18, juŵabatiswe ali ni yaka 13, jwatite, “Ngusamanyilila yangusakulupilila, nambope ndaŵi sine yikusandema kuyiŵeceta.” Ana mlongoju akusatenda wuli kuti amalane ni yeleyi? Jwalakwe jwatite, “Acimjangu ŵamkalasi akusasala mwagopoka yindu yakusatenda. Unesoni ngusalinjilila kusala yangusatenda. Jemanjajo pakuŵeceta ngani jinejakwe, ngusagamba kwinjilila ni kuŵeceta maloŵe mpela gakuti, ‘Unesoni lisiku line panalijiganyaga Baibulo ni mundu jwine . . . ’ Kaneko ngusasala yangusaka kuti jemanjajo alijiganye. Atamose kuti yanguŵecetayo nganiyiŵa mnopemnope yakwamba Baibulo, nambope ŵandu akusakola lung’wanu kuti amanyilile yangusatenda pa lijiganyo lya Baibulo. Mwamti ndaŵi sine akusambusya yiwusyo. Kutenda yeleyi mwakuwilisyawilisya kukusangamucisya kwasalila ŵane ya cikulupi cangu mwangasawusya. Pambesi pakwe, ngusaŵaga jwakusangalala mnope.”

17. Ana cici campaka cakamucisye kuti ŵasalileje ŵane ya cikulupi cawo mwangasawusya?

¹⁷ Naga akusaŵecetana ni ŵandu mwakwacimbicisya soni kwalosya kuti akwete nawo lung’wanu, jemanjajo mpaka apikanile yakusaka kwasalila. Mlongo jwine jwa yaka 17, juŵabatiswe ali jwacinandipile jwatite, “Ndaŵi syosope panakungulukaga ni acimjangu, najogopaga kolanga ya Baibulo pakuyiwona kuti acimjangu ngasangalala nayo.” Kaneko mlongoju jwacenjile kaganisye kakweka. M’malo mwaganicisya mnope ya woga, jwalakwe jwatandite ganisya kuti, “Ŵacinyamata ŵajinji ŵangamanyilila yejinji yakwamba Mboni sya Yehofa. Nambo Ŵamboni ŵampaka ŵakamucisye mwangasawusya jemanjajo tuli m’weji ŵatuli ŵacinyamatasoni. M’yoyo, naga tukutenda sooni kapena kogopa kusala yatukusakulupilila, mpaka atande kutuwona mpela ngatukusangalala kuti tuli Ŵamboni. Ligongo lyakulikayicilaku mpaka atande kutugamba. Nambo naga tukuŵeceta ya cikulupi cetu mwakusimicisya, soni mwangajogopa, cacitanda kutucimbicisya.”

18. Ana mpaka atende wuli kuti akombole kulinganya cikulupusyo cawo?

¹⁸ Mpela mwatulijiganyicisye, kulinganya cikulupusyo cawo uli ukumu wekulungwa mnope. Kuti akombole kutenda yeleyi akusosekwa kuŵalanga ni kuganicisyaga Maloŵe ga Mlungu, kupopela kwa Yehofa, soni akumbucileje yindu yele Yehofa ŵatendele. Kutenda yeleyi kucakamucisya kusimicisya kuti Yehofa ali mjawo jusyesyene. Yeleyi yicalimbikasya kwasalila acimjawo mwangali woga ya cikulupi cawo.—Aŵalanje Salimo 73:28.

19. Ligongo cici yakusatenda pa kulinganya cikulupusyo cawo yili yakusosekwa mnope?

¹⁹ Yesu ŵasasile kuti, “Naga mundu akusaka kunguya une, alikane jika ni kutwicila citela cakwe cakulagasicila soni kwendelecela kunguya.” (Mat. 16:24) Kuti tuŵe ŵakumkuya Klistu, tukusosekwa kulipeleka soni kubatiswa. Yeleyi yicakamucisya kupata majali gejinji apano soni kola cembeceyo ca umi wangamala m’cilambo casambano. Kusala yisyene, ŵacinyamata akwete magongo gamajinji gakwatendekasya kulinganya cikulupusyo cawo!