Ana aŵalasile mwakusamala magasini ga Sanja ja Mlonda gapacangakaŵapa? Kwende tulole naga cakombole kwanga yiwusyo yakuyicisyayi:

Ana ni umboni wa m’Malemba wapi wawukulosya kuti Mlungu akusatutendela canasa?

Aisalaeli paŵaliji ku ukapolo ku Iguputo, Mlungu yamkwayiye soni kumpweteka mumtima. (Eks. 3:7; Yes. 63:9) M’weji mpaka tulosye canasa, ligongo lyakuti Mlungu ŵatupanganyisye m’ciwanicisyo cakwe. Jwalakwe akusatutendela canasa atamose kuti tukusaliwona kuti tuli ŵangaŵajilwa canasa ca Mlungu.—wp18.3, pp. 8-9.

Ana yaŵajiganyaga Yesu yakamucisye camtuli ŵandu kumasya lusagu?

Ayuda ŵajinji mundaŵi ja Yesu ŵaliji ŵa lusagu. Klistu jwagombelecesye kusosekwa kwa kulinandiya soni jwasasile kuti kuli kulemwa kuwuwona mtundu wetu kuŵa wapenani mnope kupunda wa ŵane. Jwalimbikasisye ŵakumkuya ŵakwe kuti ŵawoneje ŵane mpela mlongo mjaŵo.—w18.06, pp. 9-10.

Ana tukulijiganya cici kutyocela pa yaŵatesile Mlungu pangamkunda Mose kuti akajinjile nawo m’Cilambo Celagucisye?

Mose jwaliji paunasi wambone mnope ni Yehofa. (Det. 34:10) Paŵaliji m’cipululu, yili yisigele panandi kumala yaka 40, ŵandu ŵadandawile mawulendo gakwana gaŵili ligongo lyakusoŵa mesi. Mlungu ŵamsalile Mose kuti aŵecete kwa lwala. M’malo mwakwe, Mose jwaputile lwala. Komboleka kuti Mlungu jwatumbile ligongo lyakuti Mose nganakuya yaŵamsalile jwalakwe soni Mose nganapeleka ucimbicimbi kwa Mlungu pa cakusimonjesya caŵatesile. (Num. 20:6-12) Yeleyi yikutujiganya kusosekwa kwakumpikanila Yehofa soni kupeleka ucimbicimbi kwa jwalakwe.—w18.07, pp. 13-14.

Ana mpaka tulemwesye camtuli naga tukumjelusya mundu pakwamba kujigalila yakuti kawonece?

Pana yindu yitatu yayikusiyatendekasya ŵandu ŵajinji kuti ŵajelusyeje ŵane pakujigalila yakuti kawonece. Yindu yakwe yili, Cilambo cakutyocela mundu, kapate ka mbiya, soni yaka ya mundu. Mpaka yiŵe cenene kuti twawoneje ŵane mwangali lusagu mpela mwakusatendela Mlungu. (Mase. 10:34, 35)—w18.08, pp. 8-12.

Ana aklistu ŵacekulupe mpaka ŵakamucisye ŵane m’matala gane gapi?

Mklistu jwamcekulupe jwele undumetume wakwe wacenjile akusajendelecelape kuŵa jwakusosekwa kwa Mlungu soni mpaka atende yejinji pakwakamucisya ŵane. Jwalakwe mpaka ŵakamucisye ŵamkwakwe m’bale kapena mlongo ŵali ŵangakulupilila, kwakamucisya abale ni alongo ŵaŵalesile kutenda yindu ni mpingo, kutendesya majiganyo ga Baibulo, soni kutenda yejinji mu undumetume.—w18.09, pp. 8-11.

Ana Aklistu akwete yindu yapi yayili mu Yida Yakamulicisya Masengo Pakwiganya?

Pana makadi soni tumapepala twakwaŵilanjila ŵandu. Panasoni tumapepala twakwana 8 soni magasini ga Sanja ja Mlonda ni Ajimuce! Mwanasoni tumabuku, mabuku gaŵili gakwiganyicisya Baibulo soni mafidiyo mcece gakamucisya, kupwatikapo fidiyo jakuti Ligongo Cici Tukusosekwa Kulijiganya Baibulo?—w18.10, p. 16.

Ana Mklistu mpaka asume camtuli usyesyene mpela mwakusaŵecetela pa Misyungu 23:23?

Usyesyene ngatukusasuma ni mbiya. Nambope tukusasosekwa kumalila ndaŵi jejinji soni kulimbicila kuti tuwupate usyesyene.—w18.11, p. 4.

Ana yaŵatesile Hoseya kwa ŵamkwakwe, Gomeli, yikutujiganya cici?

Gomeli jwatendaga cikululu mwakuwilisyawilisya. Nambo Hoseya jwamkululucile mwamti jwandelecele kutama najo mpela ŵamkwakwe. Naga mklistu jwamlombele atesile cikululu, mjakwe jwanganalemwajo mpaka asagule yamkululucila kapena iyayi. Naga jwamlume kapena jwamkongwe akutandilasoni gonana ni mjawo jwatesile cikululujo, nikuti pangalisoni magongo ga m’Malemba gakumacisya ulombelawo.—w18.12, p. 13.