Pa 2 Akolinto 12:2, Paulo akusala ya mundu jwine jwakwe ‘juŵamjigalile kwinani kwatatu.’ Ana mundu jweleju jwaliji ŵani? Pakuwulembela cikalata mpingo wa ku Kolinto, Paulo jwagombelecesye kuti Mlungu ŵamkamulicisyaga masengo jwalakwe mpela ndumetume. (2 Akoli. 11:5, 23) Kaneko, jwasasile yaŵamlosisye Yehofa m’mesomkulola soni yaŵamjuwulile. Mungani josopeji Paulo nganasala ya abale ŵane. M’yoyo, jwalakwe jwalisalaga msyene mpela mundu jwele Ambuje ŵamjuwulile soni kumlosya mesomkulola.—2 Akoli. 12:1, 5.

M’yoyo, Paulo ni ‘juŵamjigalile kwinani kwatatu’ soni “ku paladaiso.” (2 Akoli. 12:2-4) Jwalakwe jwakamulicisye masengo liloŵe lyakuti ‘kujuwula,’ pakusala ya yindu yaŵayiweni yayicitendekwa msogolo.

Ana Paulo jwaciweni cici “kwinani kwatatu”?

M’Baibulo, liloŵe lyakuti “kwinani” mpaka ligopolele kwinani kusyesyene. (Gen. 11:4; 27:28; Mat. 6:26) Nambo liloŵeli mpaka likamulesoni masengo m’matala gane. Ndaŵi sine likusagopolela ya ulamusi wa ŵandu. (Dan. 4:20-22) Kapena mpaka ligopolele ya kulamulidwa ni Mlungu kupitila mu Ucimwene wakwe.—Ciw. 21:1.

Paulo jwakuweni “kwinani kwatatu.” Ana jwalakwe jwagopolelaga cici? Ndaŵi sine Baibulo jikusasala cindu cimo mwakuciwilisyawilisya mpaka katatu pakusaka gombolecesya. (Yes. 6:3; Esek. 21:27; Ciw. 4:8) Yikuwoneka kuti Paulo pajwaŵecetaga ya “kwinani kwatatu,” jwagopolelaga kuti Ucimwene wa Mesiya wawucilamulilidwaga ni Yesu Klistu ni ŵa  144,000, uli wapenani mnope. Ucimwene wa Mesiya welewu ni waŵawusasile Petulo kuti tukwembeceya “kwinani kwa sambano” mwakamulana ni cilanga ca Mlungu.—2 Pet. 3:13.

Nambi wuli pakwamba ya “paladaiso” juŵamsasile Paulo?

Maloŵe gakuti “paladaiso” mpaka gagopolelesoni yindu yejinji. (1) Mpaka gagopolele paladaiso jucaciyika pacilambo capasi. (2) Mpaka gagopolelesoni paladaiso jwausimu jucacisangalala najo ŵandu ŵa Mlungu m’cilambo casambano. (3) Konjecesya pelepa, mpaka gajimile mwayiŵelele yindu kwinani “m’paladaiso jwa Mlungu” mwakamulana ni yayili pa Ciwunukuko 2:7.—Alole Sanja ja Mlonda ja July 15, 2015, p. 8. ndime 8.

Komboleka kuti Paulo jwasalaga ya yindu yitatu yeleyi paŵalembaga 2 Akolinto 12:4 pakusala yajwasimene nayo.

Kusala mwakata:

“Kwinani kwatatu” kwakukusala pa 2 Akolinto 12:2, uli Ucimwene wa Mesiya wawuli m’miyala mwa Yesu Klistu soni ŵa 144,000, wakusawukolanga kuti “kwinani kwasambano.”—2 Pet. 3:13.

Kukusakolanjidwa kuti “kwinani kwatatu” ligongo lyakuti Ucimwenewu uli wapenani mnope.

Ku paladaiso ‘kuŵamjigalile’ Paulo m’mesomkulola kukugopolela (1) paladaiso jucaciyika pacilambo capasi, (2) Paladaiso jwausimu jucaciyika, jucaciwa jwamkulungwa mnope kulekangana ni paladaiso jwausimu jwatukwete apano, soni (3) “paladaiso jwa Mlungu” jucaciŵa kwinani pandaŵi jaciciŵaga cilamboci paladaiso.

M’yoyo, patukuŵeceta ya paladaiso, yikupwatikapo kwinani kwasambano ni cilambo capasi casambano. Yiciŵa kwene yasambano ligongo yicipwatikapo ulamusi wa Ucimwene wakwinani soni ŵandu ŵacacimtumicilaga Yehofa pacilambo capasi ca paladaiso.