ANA akusalipikana kuti ali mundu jwakuyamichila? Wosopem’we tukusosekwa ganichisya chiwusyo chelechi. Baibulo jasasile kala kuti mundaŵi jetu jino ŵandu chachiŵa “ŵangatogolela” kapena kuti ŵangayamika. (2 Tim. 3:2) Komboleka kuti asimenepo ni ŵandu ŵakusasaka kuti agambeje kupedwa yindu. Mpaka yiwoneche kuti ali ŵangayamichila pa yindu yakusapochela. Mpaka ajitichisye kuti kutama ni ŵandu mpela ŵeleŵa kukusaŵa kwakusawusya.

Mwakulekangana ni jemanjaji, ŵakutumichila ŵa Yehofa akusiŵasalila kuti ‘aŵeje ŵakuyamichila.’ Tukusasosekwa ‘kumyamichila Mlungu mu yosope yene.’ (Akolo. 3:15; 1 Ates. 5:18) Myoyo, tukusosekwa tuŵeje ŵakuyamichila. Pana magongo gejinji gakututendekasya kuyamichila.

Ligongo limo lyekulungwa lyakuŵela ŵakuyamichila lili lyakuti kukusatutendekasya kuŵa ŵakusangalala. Mundu jwakusiŵayamichila ŵane akusaŵa jwakusangalala. Nombe mundu jwayamichiledwejo akusasangalalasoni. Ligongo chichi kwayamichila ŵane kukusatutendekasya m’weji soni achimjetu kuŵa ŵakusangalala? Mwachisyasyo, naga mundu jwine akusachilila kutenda chindu chinechakwe pakusaka kutukamuchisya, yikusagopolela kuti jwalakwe ayiweni kuti ni yatukusosechela. Nikuti akusatuganichisya. Patumanyilile yeleyo, tukusasangalala mnope. Yeleyi ni yayamtendechele Lute. Bowasi jwalosisye koloŵa magasa kwa Lute. Mwangakayichila Lute jwaliji jwakusangalala mnope paŵayimanyi kuti Bowasi akusamganichisya.—Lut. 2:10-13.

Yili yakusosekwa mnope kuti tumyamichileje Mlungu. Mwangakayichila, aŵele ali mkuganichisya yakusatutendela Mlungu mwausimu soni mwakuchilu nambosoni akupitilisyape kututendela yeleyo. Myoyo tukusosekwa ganichisya mwakusokoka yosope yakusatutendela Yehofa. (Det. 8:17, 18; Mase. 14:17) Kuganichisya yakusati Mlungu pakoloŵa magasa mpaka kututendekasye kumyamichila mnope jwalakwe soni kukusatutendekasya kupikanichisya yakusati jwalakwe pakutunonyela soni kutuyamichila pa yatukusatendaga.—1 Yoh. 4:9.

Tukusosekwa tuganichisyeje yakusatutendela Yehofa nambosoni tuyamichileje umbone wakwe. (Sal. 100:4, 5) Ni ligongo lyakwe ŵane akusati, “Kwayamichila ŵane kukusatendekasya ŵandu kuŵa ŵakusangalala.”

Ligongo line lyalikulosya umbone wakuyamichila lili lyakuti kukusakamuchisya ŵandu kuŵa ŵakamulana. Wosopem’we tukusasaka kuyamichilidwa. Pamyamichile mjawo kutyochela pasi pamtima ligongo lya yambone yatesile, akusaŵa ŵakamulana mnope. (Alo. 16:3, 4) Konjechesya pelepa, ŵandu ŵakwete mtima wakulosya kuyamichila akusaŵa ŵakoseka kwakamuchisya ŵane. Jemanjaji akusayiwonaga yakutenda ŵane pakwalosya chinonyelo, mwamti akusasakasoni kuti ŵatendeleje ŵane iyoyo. Yisyene, kwakamuchisya ŵane kukusatutendekasya kuŵa ŵakusangalala. Yeleyi yikukamulana ni yaŵasasile Yesu kuti, “Kupeleka kukusampa upile mundu kulekangana ni kupochela.”—Mase. 20:35.

Mundu jwine lina lyakwe Robert Emmons jwali jwamkulungwa jwakulolela majiganyo pa Unifesite ja California, jwasasile pakwamba ya ngani ja kuyamichila kuti, “Mundu kuti aŵe jwakuyamichila akusosekwa kumanyilila kuti ŵanduwe tukusadalilanaga. Ndaŵi sine tukusapochela yindu soni pane tukusasosekwa kupeleka.” Kuti tuŵe ni umi wakusangalala yikusadalila chikamuchisyo cha ŵane.  Mwachisyasyo, achimjetu mpaka atukamuchisye mwakutupa yakulya soni chikamuchisyo cha mtela. (1 Akoli. 12:21) Mundu jwakuyamika akusayamichilaga yamtendele ŵane. Sano, ana tujile kuti wawojo akwete chisyoŵe chakwayamichila ŵane paŵatendele yindu yambone?

Ligongo line lyatukusosechela kuŵa ŵakuyamichila lili lyakuti yikusatukamuchisya kulola yambone mmalo mwakulola yakulepela ya ŵane. Nganisyo syetu sikusakamula masengo mpela sefa. Naga tuli ŵakuyamichila, yichitukamuchisya ganichisya mnope yindu yambone ngaŵaga yakulepela. Patukukusya ndamo ja kuyamichila, ni patukusalolasoni yambone mwaŵane, yayikusatutendekasya kuŵa ŵakuyamichila mnope. Naga tukusaŵika nganisyo syetu payindu yampaka tuyamichile, mpaka yitukamuchisye kutenda yindu yaŵasasile ndumetume Paulo kuti, “Msengweje kapena kuti msangalaleje mwa Ambuje ndaŵi syosope.”—Afil. 4:4.

Kuyamichila kukusatukamuchisya kuti tuganichisyeje yambone. Naga tuli ŵakuyamichila nganituŵa tutesile jelasi, kutumbila kapena kupya mtima. Ŵandu ŵakuyamichila ŵangaganichisyaga mnope yindu yakuchilu. Jemanjaji akusayamichila yindu yakwete soni ŵangakola mtima wakusaka kola yejinji.—Afil. 4:12.

Aklistuwe, tukusamanyilila kuti Satana akusasaka kuti tukasangalalaga ligongo lya yakusawusya yatukusasimana nayo masiku gakumalisya gano. Jwalakwe akusasangalala naga tukusagamba kudandawula yiliyose soni kola nganisyo syakusakala. Naga tukusatenda yeleyi, mpaka yiŵe yakusawusya mnope kuti ŵandu atupikanile patukwalalichila ngani syambone. Mmalo mwakwe, kuyamichila kukusakamulana ni ndamo sine syele msimu wa Mlungu ukusakoposya. Yisogosiyi yikusapwatikapo kusangalala ni yambone yatupele Mlungu soni kulupilila yosope yasasile kuti chachitenda.—Aga. 5:22, 23.

Pakuŵa tuli ŵandu ŵa Yehofa, mwangakayichila mpaka tukamulane ni yajikusala nganiji pakwamba ya kuyamichila. Nambope, tukumanyilila kuti kutenda yeleyi ndaŵi sine mpaka kuŵe kwakusawusya. Nambo tukakunda kuti yeleyi yitulepelekasye kuŵa ŵakuyamichila. Mpaka tukombole kusya soni kupitilisya kuŵa ŵakuyamichila. Ana mpaka tutende chamtuli yeleyi? Lisiku lililyose apateje ndaŵi jakuganichisya yindu yine paumi wawo yampaka yatendekasye kuti aŵe ŵakuyamichila. Patukutenda yeleyo, ni patuchikombola kuŵa ŵakuyamichila mnope. Yeleyi mpaka yitutendekasye kuŵa ŵakuyamichila mnope kulekangana ni ŵandu ŵakusatamila ganichisya yakusawusya yawo. Tuganichisyeje yindu yambone yakulimbikasya yakusatutendela Mlungu soni ŵandu. Tuganichisyejesoni yindu yayikusatutendekasya kuŵa ŵakusangalala. Mwine mpaka tutande kuyilemba kaje. Pa yindu yeleyo, mpaka tupate yindu yiŵili kapena yitatu yayitutendekasisye kuŵa ŵakuyamichila lisiku lililyose.

Ŵakuwungunya apatile kuti naga tukwete ndamo jakwayamichila ŵane, mpaka yichenje kakamule masengo ka ututu wetu, yayikusatendekasya kuti tusangalaleje ni umi. Mundu jwakuyamichila akusaŵa jwakusangalala. Myoyo tuganichisyeje ya yindu yambone yatupatile, tusangalaleje ni yindu yambone yayikusatutendechela soni kuyamichilaga pa yiliyose. Mmalo mwakwamba kuyiwona yindu mwakupepuka, “Twayamichileje Ambuje, pakuŵa ali ŵambone.” Elo, ‘tumyamichileje Mlungu mu yosope yene.’—1 Mbi. 16:34; 1 Ates. 5:18.