Ngani Jakulijiganya 52
Achinangolo Ŵajiganyeje Ŵanache Ŵawo Kumnonyela Yehofa
“Ŵanache ali mtuka wakutyochela kwa Ambuje.”—SAL. 127:3.
NYIMBO 134 Ŵanache Ali Mtuka Wakutyochela kwa Yehofa
YACHITULIJIGANYE *
1. Ana Yehofa apeleche udindo wamtuli kwa achinangolo?
YEHOFA ŵalipanganyisye liŵasa lyandanda ni nganisyo syakuti jemanjaji asacheje kola ŵanache. Baibulo jikusala kuti, “Ŵanache ali mtuka wakutyochela kwa Ambuje.” (Sal. 127:3) Ana yeleyi yikugopolela chichi? Aganichisye kuti mjawo jwapamtima ŵaŵendile kuti amsunjile mbiya syejinji. Ana mpaka apikane wuli? Mwangakayichila mpaka ayiwone kuti mjawojo akusiŵadalilaga. Nambo mwine mpaka adandawuleje kuti chasamalile chamtuli mbiyasyo. Yehofa jwali Mjetu jwapamtima mnope, jwapeleche chindu chakusosekwa mnope kupunda mbiya kwa achinangolo kuti achisamalileje. Jwalakwe jwapele udindo wakulolechesya kuti ŵanache ŵawo akusamalilidwa chenene soni akusangalala.
2. Ana chitukambilane yiwusyo yapi?
2 Ana wuli udindo wa ŵani kusagula kuti ŵandu ŵalombane akole ŵanache kapena iyayi? Soni ana achinangolo mpaka atende chichi kuti ŵakamuchisye ŵanache ŵawo kuŵa ŵakusangalala? Kwende tulole yindu yine yayikusasimanikwa m’Maloŵe ga Mlungu yampaka yakamuchisye Aklistu ŵalombane kusagula mwalunda.
KUCHIMBICHISYA YASAGWILE ŴALOMBANE
3. (a) Ana wuli udindo wa ŵani kusagula kola ŵanache kapena iyayi? (b) Ana ni yiwundo ya m’Baibulo yapi yele achimjawo ni ŵachibale ŵa ŵandu ŵalombane akusosekwa kuyikumbuchila?
3 M’madela gane ŵandu akusajembecheya kuti ŵandu palombene chakole ŵanache mwachitema. Ŵachibale soni ŵandu ŵane akusiŵakanganichisya ŵalombanewo kuti akole ŵanache mwachitema. M’bale jwine jwa ku Asia lina lyakwe Jethro jwatite, “Kumpingo wetu, ŵandu ŵane ŵakwete ŵanache akusiŵakanganichisya ŵandu ŵanganakola ŵanache kuti akole ŵanache.” M’bale jwine jwa ku Asia peko lina lyakwe Jeffrey jwatite, “Ŵandu ŵane akusiŵasalila ŵandu ŵanganakola ŵanache kuti kusogolo ngasakola jwakwasamalila pachachikalambala.” Nambope, ŵalombanewo ni ŵakusosekwa kusagula jika kola ŵanache kapena ngakola. Pangali jwakusosekwa kwasagulila, ligongo uli udindo wawo. (Aga. 6:5) Yili yisyene kuti ŵachibale soni achimjawo ŵa ŵandu ŵalombane akusasaka kuti jemanjajo asangalaleje. Nambo wosope akusosekwa kumbuchila kuti pangani jakola ŵanache kapena iyayi ŵalombanewo akusosekwa kusagula jika.—1 Tim. 5:13.
4-5. Ana ni yindu yiŵili yapi yele ŵandu ŵalombane akusasosekwa kukambilana, soni ana akusosekwa kambilana yeleyi pandaŵi japi? Alondesye.
4 Ŵalombane ŵakuganisya yakola ŵanache, akusosekwa kukambilana yiwusyo yiŵili yakusosekwa mnope. Chandanda, ana ni ndaŵi japi jachachisaka kola ŵanache? Chaŵili, ana akusaka kuti chakole ŵanache ŵalingwa? Sano, ana ni ndaŵi japi jele ŵalombane akusosekwa kambilana yeleyi? Soni ligongo chichi kambilana yiwusyo yeleyi kuli kwakusosekwa?
5 Ndaŵi syejinji ŵalombane akusosekwa kukambilana ngani jakola ŵanache mkanalombane. Ligongo chichi akusosekwa kambilana mkanalombane? Ligongo lyakwe lili lyakuti kola nganisyo syakulandana panganiji kuli kwakusosekwa mnope. Nambosoni akusosekwa kuganichisya naga mpaka akombole udindo welewu. Ŵalombane ŵane akusasagula kutama chaka chimo kapena yiŵili chilombanile mkanakole ŵanache. Akusatenda yeleyo ligongo kola ŵanache kukusasaka ndaŵi soni machili gejinji kuti ŵasamalileje ŵanachewo. Myoyo jemanjajo akusayiwona kuti kwembecheya kaje panandi mpaka kwakamuchisye kuti amanyigane chenene.—Aef. 5:33.
6. Ana ŵalombane ŵane asagwile kutenda chichi ligongo lya ndaŵi jakusawusya jatukutamaji?
6 Aklistu ŵane asagwile kutenda yaŵatesile ŵanache ŵatatu ŵa Nowa ni achiŵamkwawo. Jemanjaji ŵasagwile kuti akakola ŵanache mwachitema. (Gen. 6:18; 9:18, 19; 10:1; 2 Pet. 2:5) Yesu ŵalandenye ndaŵi jetu jino ni “ndaŵi ja Nowa,” soni ngatukukayichila kuti tukutama mu “ndaŵi ja yakusawusya.” (Mat. 24:37; 2 Tim. 3:1) Paligongo lyeleli, ŵalombane ŵane asagwile kuti akakola ŵanache ni chakulinga chakuti alipelecheje mnope pamasengo gakulalichila.
Ŵandu pakusagula kukola ŵanache soni kuti chakole ŵalingwa, ŵalombane ŵalunda “akusaŵalanjila mtengo wakwe” (Alole ndime 7) *
7. Ana yiwundo yayikusasimanikwa pa Luka 14:28, 29 soni Misyungu 21:5, mpaka yakamuchisye chamtuli ŵalombane?
7 Ŵandu pakusagula kukola ŵanache soni kuti chakole ŵalingwa, ŵalombane ŵalunda ‘akusaŵalanjila mtengo wakwe.’ (Aŵalanje Luka 14:28, 29.) Achinangolo ŵalelitepo ŵanache akusajitichisya kuti kulela ŵanache ngaŵa kuti kukusasaka mbiyape nambo kukusasakasoni ndaŵi ni machili. Kukusasakasoni ndaŵi ni machili. Paligongoli ŵalombane akusosekwa ganichisya yiwusyo yakuyichisyayi; ‘Ana tuchikamulaga masengo wosope kuti tupateje yakusosechela ya liŵasa lyetu? Ana tukamulene chimpepe pa yindu yayili yakusosekwa mnope m’liŵasa lyetu? Naga wosope tuchisosekwa kukamula masengo, ana ŵani ŵachachasamalilaga ŵanache ŵetu? Ana ŵanachewo chachijigalilaga nganisyo sya ŵani?’ Ŵalombane ŵakusakambilana yiwusyoyi mwakuwusimana mtima chachikamulana ni maloŵe gagakusasimanikwa pa Misyungu 21:5.—Aŵalanje.
Jwamlume jwachinonyelo akusatenda yampaka akombole pakwakamuchisya ŵamkwakwe (Alole ndime 8)
8. Ana maŵasa ga Chiklistu gakusajembecheya kusimana ni yakusawusa yamtuli, soni ana achalume ŵachinonyelo akusatenda chichi?
8 Mwanache akusasaka ndaŵi soni machili ga achinangolo ŵakwe wosope. Naga mwiŵasa akuŵeleka ŵanache mwakutotoganya mpaka yiŵe yakusawusya kuti amkamuchisyeje chenene mwanache jwalijose. Maŵasa gane gagaŵeleche ŵanache mwakutotoganya gasasilepo kuti yikusaŵa yakusawusya mnope kwasamalila ŵanachewo. Jwamkongwe akusalagasika nganisyo soni akusaŵa jwakupela mnope. Yeleyi nganiyiŵa yimpele mpata wakulijiganya, kupopela kapena kulalichila mwakutamilichika. Mpaka yiŵesoni yakusawusya kuti apikanileje chenene pali pamisongano soni kupindula ni misonganojo. Yili yisyene kuti achalume ŵakusiŵanonyela achiŵamkwawo akusatenda yampaka akombole pakwakamuchisya achiŵamkwawo kusamalila ŵanache chinga pamisongano kapena kunyumba. Mwachisyasyo, mpaka ŵakamuchisye ŵamkwawo kukamula masengo ga pamlango. Akusatendasoni yakomboleka kuti wosope apinduleje ni kulambila kwapeŵasa. Kupwatika pelepa achalume ŵa Chiklistu akusajawula yimpepe ni liŵasa lyawo kukulalichila ndaŵi syosope.
KWAJIGANYA ŴANACHE KUTI AMNONYELEJE YEHOFA
9-10. Ana achinangolo akusosekwa kutenda chichi kuti ŵakamuchisye ŵanache ŵawo?
9 Ana ni yindu yine yapi yampaka atende achinangolo pakwakamuchisya ŵanache ŵawo kuti amnonyeleje Yehofa? Ana mpaka atende wuli pakwachenjela ku ndamo syakusakala? Kwende tulole yindu yine yampaka atende achinangolo.
10 Apopeleje kwa Yehofa. Kwende tulole chisyasyo cha Manowa ni ŵamkwakwe ŵaŵaliji achinangolo ŵa Samusoni. Manowa paŵayimanyi kuti ŵamkwakwe chakole mwanache, jwalakwe ŵamŵendile Yehofa kuti ŵakamuchisye mwampaka amsamalile mwanachejo.
11. Ana achinangolo mpaka asyasye chamtuli chisyasyo cha Manowa mwakamulana ni Ŵakulamula 13:8?
11 M’bale Nihad jwakutyochela ku Bosnia, soni Mlongo Alma jwakutyochela ku Herzegovina ŵalijiganyisye kutyochela ku chisyasyo cha Manowa. Jemanjaji ŵatite, “Mpela Manowa, twamŵendile Yehofa kuti atukamuchisye kuŵa achinangolo ŵambone. Soni Yehofa ŵajanjile mapopelo getu kupitila m’Baibulo, mabuku gakusala ya Baibulo, misongano ja mpingo soni jekulungwakulungwa.”—Aŵalanje Ŵakulamula 13:8.
12. Ana Yosefe ni Maliya ŵapeleche chisyasyo chamtuli kwa ŵanache ŵawo?
12 Ŵajiganyeje mwa yitendo yawo. Yakusaŵecheta yikusaŵa yakusosekwa, nambope yakusatendaga ni yampaka yakamuchisye mnope ŵanache ŵawo. Mpaka tuŵe ŵakusimichisya kuti yaŵatesile Yosefe ni Maliya yapeleche chisyasyo chambone mnope kwa ŵanache ŵawo, kupwatikapo Yesu. Yosefe jwakamulaga masengo mnope kuti alikamuchisyeje liŵasa lyakwe. Kupwatika pelepa, Yosefe ŵalimbikasyaga ŵamwiŵasa mwakwe kunonyela yindu yausimu. (Det. 4:9, 10) Atamose kuti paliji pangali lilamusi lyakumchisya Yosefe kuti alijigalileje liŵasa lyakwe ku Yelusalemu, “chaka ni chaka” ku chindimba cha Pasaka, nambope jwalakwe jwajawulaga ni liŵasa lyakwe. (Luk. 2: 41, 42) Achalume ŵane mu ndaŵi jeleji komboleka kuti ŵagawonaga mawulendoga kuwa gakusawusya, gakonanga ndaŵi soni mbiya. Nambope, Yosefe ndaŵi syosope jwayamichilaga yindu ya usimu soni jwajiganyaga ŵanache ŵakwe kutenda yeleyi. Atamosesoni Maliya jwamanyililaga chenene malemba. Mwangakayichila, jwalakwe jwajiganyaga ŵanache ŵakwe kunonyela Maloŵe ga Mlungu kupitila mu maloŵe soni yitendo yakwe.
13. Ana liŵasa line lyakuyisye chamtuli chisyasyo cha Yosefe ni Maliya?
13 Nombe Nihad soni Alma, ŵatwakolasile ŵala, ŵasakaga kujigalila chisyasyo cha Yosefe ni Maliya. Ana yeleyo yakamuchisye chamtuli kumlela chenene mwanache jwawo kuti amnonyeleje soni kumtumichila Mlungu? Jemanjaji ŵatite, “Pa umi wetu twalingaga kumlosya mwanache jwetu umbone wakutama mwakamulana ni malamusi ga Yehofa.” Nihad jwajonjechesye kuti, “Atendeje yindu yakusasaka kuti nombe mwanache jwawo atendeje.”
14. Ligongo chichi achinangolo akusasosekwa kwamanyilila ŵandu ŵakusakunguluka ni ŵanache ŵawo?
14 Ŵakamuchisyeje ŵanache ŵawo kusagula achimjawo ŵambone. Achinangolo wosope mwiŵasa akusosekwa kumanyililaga ŵandu ŵakusakunguluka ni ŵanache ŵawo soni yakutenda. Yeleyi yikupwatikapo kuti achinangolowo amanyilileje ŵandu ŵakusakunguluka ni ŵanache ŵawo pa intaneti kupitila m’mafoni gawo. Ŵandu ŵelewo mpaka achenje kaganisye soni katende kayindu ka ŵanache ŵawo.—1 Akoli. 15:33.
15. Ana achinangolo mpaka alijiganye chichi kutyochela kwa Jessie?
15 Ana achinangolo mpaka atende wuli naga ŵangamanyilila chenene kamulichisya masengo ma kompyuta kapena mafoni? Mtati jwine jwa ku Philippines lina lyakwe Jessie, jwatite, “Ngatukusamanyilila mnope yipangiso yamakono. Nambo yeleyi yangatulepelekasya kwakalamusya ŵanache ŵetu ya kogoya kwakamulichisya masengo yipangiso yamakono mwakulemwecheka.” Jwalakweju nganiŵalekasyaga ŵanache ŵakwe kamulichisya masengo yipangiso yamakono ligongo lyakuti jwangayimanyilila. Jwalakwe jwatite, “Nalimbikasyaga ŵanache ŵangu kuti akamulichisyeje masengo yipangiso yamakonoyo pakulijiganyila chiŵecheto chine, kosechela misongano, soni kuŵalanga Baibulo lisiku lililyose.” Naga ali achinangolo, ana pakwete paŵalasile soni kukambilana ni ŵanache ŵawo yindu yakamuchisya yakwamba kulembelana mameseji soni kutumuchisyana yiwulili yayikusasimanikwa pambali jakuti “Achinyamata” pa jw.org®? Ana pakwete palolelele yimpepe ni ŵanache ŵawo mafidiyo gakuti Ana Mafoni Gawo Gakwalamulila Kapena Akugalamulila soni Akamulichisyeje Masengo Mwalunda Malo Gakunguluchila ga pa Intaneti? * Yindu yeleyi mpaka yakamuchisye pakwajiganya ŵanache ŵawo mwampaka akamulichisye masengo mwalunda yipangiso yamakono.—Mis. 13:20.
16. Ana achinangolo ŵane atesile chichi, soni yakuyichisya yakwe yiŵele yamtuli?
16 Achinangolo ŵajinji akusalolechesya kuti ŵanache ŵawo akung’anda ni ŵandu ŵachisyasyo chambone pakumtumichila Mlungu. Mwachisyasyo, N’Déni soni Bomine, liŵasa line lya ku Côte d’Ivoire, likusiŵaŵilanga ŵakulola mkuli kuti akayichile kumangwawo. N’Déni jwatite, “Yeleyi yakwete yakuyichisya yambone kwa mwanache jwetu jwamlume. Jwalakwe jwatandite upainiya soni apano akutumichila mpela jwakulolela mkuli jwakamuchisya.” Ana nombe wawojo mpaka atende yakulandanayi?
17-18. Ana achinangolo akusosekwa kutanda kwajiganya ŵanache ŵawo pandaŵi japi?
17 Atandeje kwajiganya ŵanache ŵawo ali ŵachinandipile. Pakusaŵa umbone wekulungwa naga achinangolo akutanda kwajiganya ŵanache ŵawo ali ŵachinandipile. (Mis. 22:6) Aganichisye ya chisyasyo cha Timoteo, jwele pandaŵi jine jwajesile ni ndumetume Paulo. Mamagwe ŵa Timoteo a Yunisi, soni anganga ŵakwe a Loisi ŵamjiganyisye jwalakwe ‘kutandila ali mwanache.’—2 Tim. 1:5; 3:15.
18 Liŵasa line lya ku Côte d’Ivoire, mena gawo Jean-Claude soni Peace, ŵakombwele kwalela ŵanache ŵawo wosope ŵakwana 6 kuti amnonyeleje soni kumtumichila Yehofa. Ana chichi chachakamuchisye kuti akombole kutenda yeleyo? Jemanjaji ŵakuyisye chisyasyo cha Yunisi soni Loisi. Ŵatite, “Twajiganyisye ŵanache ŵetu Maloŵe ga Mlungu kutandila ali ŵanache, paŵagambile kupagwa kwene.”—Det. 6:6, 7.
19. Ana kwajiganya ŵanache Maloŵe ga Mlungu kukusagopolela chichi?
19 Ana ‘kwajiganya’ ŵanache Maloŵe ga Yehofa kukusagopolela chichi? Pa Detulonomo 6:6, 7, maloŵe ga Chihebeli gakuti ‘kwajiganya’ mpaka gagopolele “mwakuwilisyawilisya.” Kuti akombole kutenda yeleyi, achinangolo akusasosekwa kola ndaŵi jakwanila jakunguluka ni ŵanache ŵawo. Ndaŵi sine achinangolo mpaka atenguche ligongo lyakuti chasosekweje kwasalila malangiso ŵanache ŵawo mwakuwilisyawilisya. Nambope achinangolo mpaka alinjilile kuliwona litalali kuŵa lyakwakamuchisya ŵanache ŵawo kupikanichisya Maloŵe ga Mlungu ni kugakamulichisyaga masengo.
Achinangolo akusosekwa ganichisya mwampaka amjiganyichisye mwanache jwalijose pajika (Alole ndime 20) *
20. Ana lilemba lya Salimo 127:4, mpaka likamule masengo chamtuli pakwalela ŵanache? Alondesye?
20 Ŵamanyilileje chenene ŵanache ŵawo. Pa Salimo 127 akusiŵawanichisya ŵanache ni mipamba. (Aŵalanje Salimo 127:4.) Mpela mwayikusaŵela ni mipamba kuti akusajipanganya kutyochela ku yindu yakulekanganalekangana, soni jikusaŵa jakulekangana ukulu wakwe, nombe mwanache jwalijose akusaŵa jwakulekangana ni mjakwe. Myoyo achinangolo akusosekwa kumanyilila mwampaka amjiganyile mwanache jwalijose. Liŵasa line lya ku Israel jwa masiku agano lyalyakombwele kulela chenene ŵanache ŵawo ŵaŵili kuti amtumichileje Yehofa ŵasasile chachakamuchisye. Jemanjaji ŵatite, “Twamjiganyaga Baibulo mwanache jwalijose pajika.” Nambope mtwe wa liŵasa lililyose ukusosekwa kusagula naga mpaka akombole kumjiganya mwanache jwalijose pajika.
YEHOFA CHACHAKAMUCHISYA
21. Ana Yehofa mpaka ŵakamuchisye chamtuli achinangolo?
21 Ndaŵi sine achinangolo akusayiwona kuŵa yakusawusya kwajiganya ŵanache ŵawo, nambo ŵanache ali mtuka wakutyochela kwa Yehofa. Jwalakwe akusaŵa jwakoseka kwakamuchisya. Akusaŵa jwakusachilila kupikanila mapopelo ga achinangolo. Jwalakwe akusajanga mapopelo gawo kupitila m’Baibulo, m’mabuku getu, nambosoni yisyasyo ya achinangolo ŵakomangale ŵamumpingo.
22. Ana ni yindu yambone yapi yampaka achinangolo apeleche kwa ŵanache ŵawo?
22 Ŵandu ŵane akusaŵecheta kuti pakusajigala yaka 20 achinangolo ali mkusamalila mwanache jwawo. Nambope achinangolo akusapitilisya kwasamalila ŵanache ŵawo. Yindu yambone yampaka achinangolo apeleche kwa ŵanache ŵawo yili kwanonyela, ndaŵi, soni kwajiganya Baibulo. Ŵanacheŵa pakwajiganya nganaŵa atesile yakulandana. Nambope ŵanache ŵajinji ŵaleledwe ni achinangolo ŵakusamnonyela Yehofa akusalipikana mpela muŵalipikanilaga mlongo jwine jwa ku Asia lina lyakwe Joanna Mae. Jwalakwe jwatite, “Pangukumbuchila yamunyuma ya majiganyo ganapochele kutyochela kwa achinangolo ŵangu, ngusayamichila mnope kuti ŵangamuchisye kuŵa mundu jwambone nambosoni kumnonyela Yehofa. Ngaŵa kuti jemanjaji ŵagambile kumba umi, nambo ŵanjiganyisye kuti ngole umi wambone mnope.” (Mis. 23:24, 25) Aklistu ŵajinji akusaŵecheta yakulandana ni yeleyi.
NYIMBO 59 Kwende Tumlumbe Ya
^ ndime 5 Naga ali ŵalombele, ana akusaka kola ŵanache? Naga yili myoyo ana chachikola ŵanache ŵalingwa? Ana mpaka ŵajiganye chamtuli ŵanachewo kumnonyela soni kumtumichila Yehofa? Nganiji jikusala ya yisyasyo ya masiku agano soni yiwundo ya m’Baibulo yampaka yitukamuchisye kwanga yiwusyoyi.
^ ndime 15 Alolesoni Undumetume ni Umi Wetu Wachiklistu wa Juni 2018, “Kogoya kwa Malo Gakunguluchila ga pa Intaneti.”
^ ndime 60 KULONDESYA YIWULILI: Liŵasa lya Chiklistu likukambilana naga chachisosekwa kola ŵanache, soni kulola yambone soni yakusawusya yampaka asimane nayo.
^ ndime 64 KULONDESYA YIWULILI: Liŵasa likwajiganya ŵanache ŵawo jwalijose pajika mwakamulana ni yaka soni lunda lwakwete.
