1-2. Mwakamulana ni chisyasyo cha Angelito, ana jwalijose jwetuwe akusosekwa kutenda chichi?

ANA achinangolo ŵawo ali Ŵamboni sya Yehofa? Naga yili myoyo, amanyilile kuti wawojo ngaŵa mkuŵa paunasi wambone ni Yehofa ligongo lyakuti achinangolo ŵawo ali paunasi wambone ni jwalakwe. Chinga achinangolo ŵetu akusamtumichila Mlungu kapena iyayi, jwalijose jwetuwe akusosekwa kulimbisya unasi wakwe ni Yehofa.

² Aganichisye chisyasyo cha m’bale jwine lina lyakwe Angelito. Achinangolo ŵakwe ŵaliji Ŵamboni. Nambope, pajwaliji mwanache jwalakwe nganalipikanaga kuti ali paunasi wambone ni Mlungu. Jwalakwe jwatite, “Namtumichilaga Yehofa ligongo lyakuti nagambaga kusaka kutenda yaŵatendaga achinangolo ŵangu.” Kaneko Angelito jwalinganyisye yakuti amalileje ndaŵi jakwe pakuŵalanga Maloŵe ga Mlungu soni kugaganichisya mnope. Nambosoni ŵatandite kupopela kwa Yehofa ndaŵi syosope. Ana yakuyichisya yakwe yaliji yamtuli? Jwalakwe jwatite, “Nalijiganyisye kuti litala lyambone lyakwaŵandichila Atati ŵangu Yehofa, lili kwamanyilila chenene.” Yaŵasimene nayo Angelito yikututendekasya kuliwusya yiwusyo yakusosekwa mnope ayi, Ana pana kulekangana kwamtuli pasikati pa kumanyilila yindu yamnono yakwamba Yehofa ni kummanyilila chenene jwalakwe? Soni ana mpaka tutende wuli kuti tummanyilile chenene Yehofa?

3. Ana pana kulekangana kwamtuli pasikati pa kummanyilila Yehofa ni kummanyilila chenene jwalakwe?

³ Mpaka tuganisyeje kuti tukummanyilila Yehofa ligongo lyakuti tukumanyilila lina lyakwe kapena yindu yine yaŵasasile kapena kuyitenda. Nambo kummanyilila chenene Yehofa kukusapwatikapo  yejinji. Tukusasosekwa kola ndaŵi jakulijiganya yakwamba Yehofa soni ndamo syakwe syapenani. Kaneko mpaka tupikanichisye ligongo lyakwe jwalakwe akusaŵecheta kapena kutenda yindu yine yakwe. Yeleyi mpaka yitukamuchisye kumanyilila naga jwalakwe akusasangalala ni yatukusaganisya kapena yatukusatendaga. Patumanyilile yakusasaka Yehofa kuti tutendeje, tukusosekwa kutendaga yeleyo.

4. Ana kulola yisyasyo yine ya m’Baibulo mpaka kutukamuchisye chamtuli?

⁴ Ŵandu ŵane mpaka atunyosyeje ligongo lyakuti tukusaka kumtumichila Yehofa, soni mpaka atusisyeje patutandite kusongana ni Ŵamboni. Nambope, naga tukusamkulupilila Yehofa, jwalakwe ngasatuleka. Tuchiŵa tuli mkulinganya unasi wetu ni Mlungu wawuchiŵapo kwa umi wetu wosope. Ana yili yakomboleka kummanyilila chenene Yehofa? Elo, mpaka yikomboleche! Yisyasyo yaŵalosisye ŵandu ŵane ŵangali umlama mpela Mose soni Mwenye Daudi, yikusalosya kuti yeleyi yili yakomboleka. Chitupate kwanga kwa yiwusyo yiŵili yakuyichisyayi patukulijiganya yaŵatesile jemanjaji. Yiwusyo yakwe yili yakuti, Ana chichi chachakamuchisye kuti ammanyilile Yehofa? Soni ana mpaka tulijiganye chichi kutyochela ku yisyasyo yawo?

5. Ana Mose jwasagwile kutenda chichi?

⁵ Mose jwasagwile kutumichila Mlungu. Pajwakwete yaka chiŵandika 40, Mose jwasagwile kuti atendeje yindu yimpepe ni ŵandu ŵa Mlungu Aisalaeli, mmalo mwakumanyika kuti “chisukulu cha Mwenye jwa ku Iguputo.” (Aheb. 11:24) Mose jwalesile malo gapenani. Pakusagula kuŵa mbali ja Aisalaeli ŵaŵaliji achikapolo ku Iguputo, jwalakwe jwamanyilile kuti Falawo chatumbile. Paja Falawo jwaliji jwamachili mnope jwelesoni ŵandu ŵa ku Iguputo ŵamwonaga mpela mlungu. Kusala yisyene Mose jwakwete chikulupi chakulimba. Mose ŵamkulupililaga mnope Yehofa. Chikulupi chelechi ni chachamkamuchisye Mose kuŵa paunasi wambone ni Yehofa kwa umi wakwe wosope.—Mis. 3:5.

6. Ana tukulijiganya chichi kutyochela ku chisyasyo cha Mose?

⁶ Ana tukulijiganya chichi pelepa? Mpela Mose, wosopem’we tukusasosekwa kusagula yakutenda. Ana tuchisagula kumtumichila Mlungu soni kutenda yindu ni ŵandu ŵakwe? Mpaka tusosekwe kulipeleka kuti tumtumichile Mlungu, soni tumanyilileje kuti ŵandu ŵangakummanyilila Yehofa mpaka atusisye. Nambo naga tukwakulupilila Atati ŵetu ŵakwinani, tuchiŵa ŵakusimichisya kuti chachitukamuchisya.

7-8. Ana Mose jwapitilisye kulijiganya chichi?

⁷ Mose jwapitilisye kulijiganya ndamo sya Yehofa soni kutenda yajwasakaga Yehofajo. Mwachisyasyo, Yehofa paŵamŵendile Mose kuti ŵalongolele Aisalaeli kukopoka m’chilambo cha Iguputo, jwalakwe jwalikayichile soni mwakuwilisyawilisya jwalakwe jwamsalile Yehofa kuti nganaŵa akombwele. Yaŵatesile Mlungu pakumjanga jwalakwe, yalosisye kuti jwapikanichisye mujwapikanilaga Mose soni ŵamkamuchisye. (Eks. 4:10-16) Yakuyichisya yakwe, Mose jwakombwele kuja kusala utenga wamachili kwa Falawo. Kaneko Mose wam’weni Yehofa ali mkamulichisya masengo machili gakwe pakwakulupusya Aisalaeli soni pakumwulaga Falawo pampepe ni asilikali ŵakwe panyasa Jechejewu.—Eks. 14:26-31; Sal. 136:15.

⁸ Mose ali ŵakopwesye Aisalaeli m’chilambo cha Iguputo, Aisalaeliwo ŵatandite kudandawula. Atamose kuti yaliji myoyo, Mose jwakuweni kuwusimana mtima kwa Mlungu pa ŵandu ŵakwe ŵaŵakopwesye mu Iguputo. (Sal. 78:40-43) Mose jwam’wenisoni Yehofa ali mkulosya kulinandiya pajwachenjile nganisyo syakwe syakwajonanga Aisalaeli ligongo lyakuti Mosejo jwaŵendile kuti akajonanga.—Eks. 32:9-14.

9. Mwakamulana ni Ahebeli 11:27, ana unasi wa Mose ni Yehofa waliji wamtuli?

 ⁹ Pali papitile ndaŵi, Mose jwaŵele pa unasi ŵakulimba ni Yehofa mwamti yaliji mpela akwawona Atati ŵakwe ŵakwinani. (Aŵalanje Ahebeli 11:27.) Pakusala ya muwaŵelele unasiwo, Baibulo jikusati, “Ambuje ŵaŵechetanaga ni Mose pameso ni pameso, mpela mundu mwakusaŵechetelanaga ni m’mbusangagwe” kapena kuti mjakwe.—Eks. 33:11.

10. Ana tukusosekwa kutenda chichi kuti tummanyilile chenene Yehofa?

¹⁰ Ana tukulijiganya chichi pelepa? Kuti tummanyilile chenene Yehofa, ngatukusosekwa kwamba kulijiganya ya ndamo syakwepe nambo tukusasosekwasoni kutendaga yakusasaka jwalakwe. Masiku agano Yehofa akusaka kuti “jwalijose akulupusidwe nambosoni kuti amanyilile chakuwona chisyesyene.” (1 Tim. 2:3, 4) Litala limo lyampaka tutendele yakusasaka Mlungu lili mwakwajiganya ŵane yakwamba Yehofa.

11. Ana mpaka tummanyilile chenene Yehofa chamtuli, patukwajiganya ŵane yakwamba jwalakwe?

¹¹ Yili yangakayikasya kuti patukwajiganya ŵane yakwamba Yehofa ni patukusammanyilila chenene jwalakwe. Mwachisyasyo, tukusawuwona umboni wakuti Yehofa akusiŵaganichisya ŵane pakutulongolela kwa ŵandu wakusaka kuŵa pa unasi wambone ni jwalakwe. (Yoh. 6:44; Mase. 13:48) Tukusalola machili ga Maloŵe ga Mlungu gali mkukamula masengo patukwawona ŵandu ŵatukusalijiganya nawo Baibulo ali mkuchenga ndamo syawo syakusakala ni kutanda kutenda yambone. (Akolo. 3:9, 10) Soni tukusakuwona kuwusimana mtima kwa Mlungu pa ŵandu, pakusatutumisya kwajemanjajo mwakuwilisyawilisya kuti tukakamuchisye kulijiganya ya jwalakwe kuti chakulupuche.—Alo. 10:13-15.

12. Mwakamulana ni Ekisodo 33:13, ana Mose jwaŵendile chichi, soni ligongo chichi jwaŵendile yeleyo?

¹² Mose jwawuwonaga unasi wakwe ni Yehofa kuŵa wakusosekwa mnope. Atamose kuti Yehofa ŵamkamulichisye masengo Mose kutenda yakusimonjesya yekulungwa, nambope Mose jwaŵendile kuti amkamuchisyepe kummanyilila chenene Yehofajo. (Aŵalanje Ekisodo 33:13.) Mose jwaliji ali akwete yaka 80 pajwaŵendaga yeleyi, nambope jwalakwe jwamanyililaga kuti akusosekwa kumanyilila yejinji yakwamba Atati ŵakwe ŵa kwinani.

13. Ana litala limo lyapi lyampaka tulosye kuti tukusayamichila unasi wetu ni Mlungu?

¹³ Ana tukulijiganya chichi pelepa? Mwangasamala kandu kuti tutumichile Yehofa kwandaŵi jelewu, tukusosekwa kuwuwona unasi wetu ni jwalakwe kuŵa wakusosekwa mnope. Litala limo lyakusosekwa mnope lyampaka tulosye kuti tukusayamichila unasi wetu ni Mlungu lili kuŵechetana najo mwipopelo.

14. Ligongo chichi lipopelo mpaka litukamuchisye kummanyilila mnope Mlungu?

¹⁴ Naga tukusaka kuŵa pa unasi wambone ni mundu jwine jwakwe, tukusasosekwa kuŵechetanaga ni mundujo ndaŵi syosope. Myoyo kuti tumŵandichile Mlungu tukusasosekwa kupopela kwa jwalakwe ndaŵi syosope, soni tukatendaga woga kumsalila ya mumtima mwetu. (Aef. 6:18) Mlongo jwine jwa ku Turkey lina lyakwe Krista jwatite, “kumnonyela kwangu Yehofa soni chikulupi changu pa jwalakwe chikusalimba panguŵechetana ni jwalakwe mwipopelo ndaŵi syosope soni ngusayiwona jwalakwe ali mkungamuchisya. Pangulola Yehofa ali mkwanga mapopelo gangu, yingamuchisye kumwona jwalakwe mpela Atati ŵangu ŵachinonyelo soni Mjangu.”

15. Ana Yehofa jwaŵechete yamtuli pakwamba ya Mwenye Daudi?

¹⁵ Mwenye Daudi jwapagwile ku mtundu wawamtumichilaga Yehofa Mlungu. Nambope Daudi jwatesile yejinji kupunda kwamba kukuya yaŵatendaga achinangolo ŵakwe pakulambila. Jwalakwe jwaŵele paunasi wakulimba ni Mlungu, soni Yehofa ŵamnonyelaga mnope Daudi.  Mwamti Yehofa ŵamkolasile Daudi kuti jwaliji mundu “jwapamtima [Pakwe].” (Mase. 13:22) Ana chichi chachamkamuchisye Daudi kuŵa pa unasi welewo ni Yehofa?

16. Ana yakupanganyidwa yamjiganyisye chichi Daudi pakwamba ya Yehofa?

¹⁶ Daudi jwalijiganyisye ya Yehofa kutyochela ku yakupanganyidwa. Daudi pajwaliji mwanache jwamalilaga ndaŵi jakwe ali kwitinji kukulisya ngondolo sya babagwe. Komboleka kuti ndaŵi jelejo ni jaŵatandite kuganichisya yindu yaŵapanganyisye Yehofa. Mwachisyasyo, Daudi paŵalolite kwinani chilo ngaŵa kuti ŵagambile kusiwona ndondwape syejinji, nambo komboleka jwalakwe jwaganichisyaga ya ndamo sya juŵayipanganyisye yinduyo. Kaneko Daudi jwalembile kuti, “Yakwinani yikusajenesya ya lumbili lwa Mlungu; nipo lipananga [liwunde] likulosya masengo ga magasa gakwe.” (Sal. 19:1, 2) Daudi pajwaganichisyaga yaŵatite Yehofa pakwapanganya ŵandu, jwayiweni kuti Yehofa akwete lunda mnope. (Sal. 139:14) Daudi paŵaganichisyaga ya masengo ga Yehofaga, jwalakwe jwaliweni kuti ali mwanache pakulandanya ni Yehofa.

17. Ana mpaka tulijiganye chichi patukuganichisya ya yindu yakupanganyikwa?

¹⁷ Ana tukulijiganya chichi pelepa? Atendeje chidwi ni yindu yakupanganyikwa. Aganichisyeje mnope ya chilambo chakusalala chaŵapanganyisye Yehofachi, soni achiwoneje kuti chili chakusimonjesya. Lisiku lililyose, aganichisyeje yampaka alijiganye pakwamba ya Yehofa kutyochela ku yindu mpela yakumela, yinyama, soni ŵandu. Kutenda yeleyo kuchakamuchisya kuti lisiku lililyose alijiganyeje yejinji yakwamba Atati ŵawo ŵachinonyelo. (Alo. 1:20) Soni lisiku lililyose chachilola kuti kumnonyela kwawo Mlungu kuchikula mnope.

18. Mwakamulana ni Salimo 18, ana Daudi jwamanyilile chichi?

¹⁸ Daudi jwayimanyi kuti Yehofa akumkamuchisya. Mwachisyasyo, Daudi paŵakombwele kusichenjela ngondolo sya babagwe ku lisimba soni chimbalangondo, jwayimanyi kuti Yehofa ni juŵamkamuchisye kuti akombole kutenda yeleyo. Daudi pajwamwuleje Goliyati, jwawuweni umboni wakuti Yehofa jwamlongolelaga. (1 Sam. 17:37) Soni pajwamtilaga Mwenye Sauli, Daudi jwamanyilile kuti Yehofa ni juŵamkulupwisye. (Sal. 18, tumaloŵe twapenani) Yikaŵe kuti Daudi jwaliji jwakunyada nikuti akaganisyaga kuti jwakombwele kutenda yeleyo pajika. Nambo Daudi jwaliji jwakulinandiya, myoyo jwakombwele kumanyilila kuti Yehofa ŵamkamuchisyaga pa umi wakwe.—Sal. 138:6.

19. Ana mpaka tulijiganye chichi kutyochela pa chisyasyo cha Daudi?

¹⁹ Ana tukulijiganya chichi pelepa? Tukusasosekwa kutenda yejinji kupunda kwamba kuŵenda chikamuchisyo kwa Yehofa. Tukusasosekwasoni kumanyilila ndaŵi jakusapeleka Yehofa chikamuchisyo soni mwakusapelechela chikamuchisyocho. Naga mwakulinandiya tukusamanyilila malile getu, tuchimanyilila kuti Yehofa ni jwakusatukamuchisya kutenda yindu yanganituŵa tuyikombwele pajika. Soni ndaŵi jilijose patukuyiwona kuti Yehofa akutukamuchisya, unasi wetu ni jwalakwe ukusalimba mnope. M’bale jwine jwa ku Fiji lina lyakwe Isaac, jwaŵatumichile Yehofa kwa yaka yejinji, jwayiweni kuti yeleyi yili yisyene. Jwalakwe jwatite, “Pangukumbuchila ya munyuma, ngusayiwona yaŵatite Yehofa pakungamuchisya kutandila panatandaga kulijiganya Baibulo mpaka apano. Myoyo, Yehofa ali jusyesyene kwa une.”

20. Ana tukulijiganya chichi kutyochela pa unasi wawapali pasikati pa Daudi ni Mlungu?

²⁰ Daudi jwakuyaga ndamo sya Yehofa. Yehofa ŵatupanganyisye kuti tukomboleje kukuya ndamo syakwe. (Gen. 1:26) Patukulijiganya mnope yakwamba ndamo sya Yehofa, ni patukusakombola kukuya ndamosyo chenene. Daudi jwamanyilile  chenene Atati ŵakwe ŵakwinani, myoyo jwakombwele kwasyasya pajwatendaga yindu ni ŵane. Kwende tulole chisyasyo chimo. Daudi jwamlemwechesye Yehofa pajwatesile chikululu ni Betiseba soni pajwawuleje ŵamkwakwe Betisebajo. (2 Sam. 11:1-4, 15) Nambo Yehofa jwasagwile kumtendela chanasa Daudi, ligongo lyakuti jwalakwe jwatendelagasoni ŵane chanasa. Ligongo lyakuti Daudi jwaliji pa unasi wambone ni Yehofa, Aisalaeli ŵamnonyelaga mnope. Soni Yehofa ŵamkamulichisye masengo jwalakwe kuŵa chisyasyo chambone kwa mayimwene gane ga Chiisalaeli.—1 Ayi. 15:11; 2 Ayi. 14:1-3.

21. Mwakamulana ni Aefeso 4: 24 soni 5:1, ana pana yakuyichisya yamtuli naga ‘tukumsyasya Mlungu’?

²¹ Ana tukulijiganya chichi pelepa? Tukusosekwa ‘kumsyasya Mlungu.’ Patukumsyasya Mlungu, tuchipindula mnope soni tuchimanyilila yejinji yakwamba jwalakwe. Patukukuya ndamo syakwe syambone, tuchilosyasoni kuti tuli ŵanache ŵakwe.—Aŵalanje Aefeso 4:24; 5:1.

22-23. Ana chichitendekwa chichi naga tukukamulichisya masengo yatulijiganyisye pakwamba ya Yehofa?

²² Mpela mwatuyiwonele, Yehofa akusalimanyikasya kwa m’weji kupitila mu yakupanganyikwa soni Maloŵe gakwe Baibulo. Baibuloji jikwete yisyasyo yejinji ya ŵakutumichila ŵa Mlungu ŵakulupichika ŵampaka twasyasye, mpela Mose soni Daudi. Yehofa atesile mbali jakwe. Myoyo tukusosekwa kutenda mbali jetu mwampaka tukombolele pakulijiganya mnope yakwamba jwalakwe.

²³ Ngasituleka kulijiganya yakwamba Yehofa. (Jwak. 3:11) Chindu chakusosekwa mnope nganichiŵa kutupa kwa yindu yatukumanyilila yakwamba jwalakwe, nambo yatukusatenda ni yindu yatukumanyililayo. Naga tukusayikamulichisya masengo yindu yatulijiganyisye soni kulinga kwasyasya Atati ŵetu ŵachinonyelo, jwalakwe chachipitilisya kutuŵandichila. (Yak. 4:8) Kupitila m’Maloŵe gakwe, jwalakwe akutusimichisya kuti ngasiŵaleka ŵandu ŵakumsosasosa jwalakwe.