Iyayi. Satana nganamsalila Hawa kuti pachachilya chisogosi chele Mlungu ŵalekasisye chachiwa soni kuti mbali jine jangawoneka ni meso ja mchilu mwakwe (jele ŵandu ŵane masiku agano akusati msimu wangawa) jichipitilisyape kuŵa ni umi. Satana jwamsalile Hawa kupitila mu lijoka kuti naga jwalakwe akulya chisogosi cha chitela chelecho ni kuti ‘ngasawa’ kose. Jwalakwe jwagopolelaga kuti chachitamaga ni umi wambone mpaka kalakala soni mwangamdalila Mlungu.—Gen. 2:17; 3:3-5.

Naga chijiganyo chakuti msimu wangawa nganichityochela mu Edeni, nambi ni chatandite chakachi? Ngatukumanyilila. Nambo yatukumanyilila yili yakuti dini syosope syaunami syapyajilidwe mundaŵi ja Chigumula cha mu ndaŵi ja Nowa. Pakuti Nowa ni liŵasa lyakwe ni ŵaŵakulupwiche pa Chigumulachi soni wosope ŵaliji ŵakulupichika, pangali jwakajiganyisye nganisyo sya dini jawunami.

Myoyo chijiganyo chakuti msimu wangawa ni kuti chatandite panyuma pa Chigumula. Mlungu paŵasokonasisye yiŵecheto pa Babulo soni kwapwilinganya ŵandu “pa chilambo chapasi.” Mwangakayichila jemanjaji piŵabalalikanganaga, ŵakwete nganisyo syakuti mundu akwete msimu wangawa. (Gen. 11:8, 9) Mwangasamala kandu kuti chijiganyochi chatandite chakachi, mpaka tuŵe ŵakusimichisya kuti Satana jwali “atati ŵa unami” jwalongolelaga yeleyi soni jwaliji jwakusangalala kuyiwona yeleyi yili mkuwanda pa chilambo chosope.—Yoh. 8:44.