Pelepa chiwundo chekulungwa cha pa Detulonomo 22:25-27, nganichiŵa chakulola kuti naga jwamlumeju ali jwakulemwa kapena iyayi. Yili myoyo ligongo lyakuti mwayiwonechele kala munganiji jwalakwe ŵaŵaga kuti alemwisye kala mwakutenda chikululu. Nambo lilamusili kusyesyene lyasakaga kusala ya ungalemwa wa jwamkongwejo. Kwende tulole ngani josope.

Ndime syamunyuma sya m’bukuji sikusala ya jwamlume jwele amkamulile jwamkongwe jwamtomeledwe. Yeleyi yikutendechela “mu msinda.” Pakutenda yeleyi yaŵaga kuti jwamlumejo atesile chikululu ligongo lyakuti jwamkongwejo jwajigalidwaga mpela jwamlombedwe. Nambi wuli pakwamba ya jwamkongwe jwakukamulilidwa nambo ni ‘ngakugumila’? Jwalakwe akagumile nikuti ŵandu akapikene soni akamkamuchisye. Nambo ligongo lyakuti nganagumila, nikuti wosope ŵajigalidwaga kuti alemwisye mwakutenda chikululu.—Det. 22:23, 24.

Chilamusichi chasalagasoni chakutendekwa chine. Chatite, ‘Mwine mwakwe jwamlume jwine, akumkamulila mwali jwamtomeledwe ni kutenda najo chikululu mwakumkanganichisya, kwitinji kwati myoyo. Naga yili myoyo jwamlume pejo ni jwakwenela kuwulajidwa. Jwamkongwejo mkamtenda kandu kalikose, ligongo nginatenda chindu chakulemwa chakwenela kuwulajidwa. Magambo gelega gakulandana ni magambo gakuti, mundu amtandite mele mjakwe ni akuwulajidwa mundu jwamtandite mjakwejo. Jwamlumejo atesile kumkamulila jwamkongwe ni kutenda najo chikululu kwitinji. Atamose kuti jwamkongwejo ŵagumisile, paliji pangali mundu jwakamkulupwisye.’—Det. 22:25-27.

Pa chakutendekwa mpela chelechi, ŵakulamula ŵamkulupililaga jwamkongwejo. Ligongo chichi? Ligongo yawonekaga kuti atamose “jwamkongwejo ŵagumisile paliji pangali mundu jwakamkulupwisye.” Myoyo jwalakwe nganatenda chikululu. Nambope jwamlumejo jwakolaga magambo ga kutenda chikululu soni kamulila jwamkongwe jwamtomeledwe ligongo lyakuti ‘akutenda najo chikululu mwakumkanganichisya.’

Atamose kuti chilamusi chasalaga mnope ya ungalemwa wa jwamkongwe, nambope nganiji jasalagasoni ya magambo gaŵakolaga jwamlume ga chikululu soni kamulila. Pelepa mpaka tuŵe ŵakusimichisya kuti ŵakulamula magambo ‘ŵajiwungunyaga chenene nganiji’ soni kutenda chisagula chakamulana ni malamusi gele Mlungu ŵaliji ali agaŵechete kwandaŵi syejinji.—Det. 13:14; 17:4; Eks. 20:14.