1-2. (a) Ana ŵandu ŵane akusasangalalila chichi? (Alole libokosi lyakuti “Ana Chaka Chakusangalalila Yaka 50 Chaliji Chichi?”) (b) Ana Yesu jwaŵechete yamtuli pa Luka 4:16-18?

M’YILAMBO yine, ŵandu akusasangalala kuti akwanisye yaka 50 payakutendekwa yine yakwe yakusosekwa mnope. Ndaŵi sine chisangalalochi akusachikolangaga kuti Chaka Chakusangalala. Yisangalalo yeleyi mpaka yijigale lisiku limo, wiki jamtundu, kapena kupunda pelepo, nambo panyuma pakwe chikusamalaga soni ŵandu akusaliŵalila ya chisangalalocho.

² Kala Aisalaeli ŵasangalalilagasoni yaka 50 yiliyose soni chisangalalocho chaŵaga kwa chaka chosope. Chisangalalochi chapaga ufulu Aisalaeli. Ligongo chichi tukusosekwa kulijiganya ya chisangalalochi? Ligongo lyakwe lili lyakuti chisangalalochi chikusatukumbusya ya yindu yakusatutendela Yehofa mwakutupa mtendele wangamala waŵawukolasile Yesu.—Aŵalanje Luka 4:16-18.

3. Mwakamulana ni Lefitiko 25:8-12, ana Aisalaeli ŵapindulaga chamtuli ni Chaka Chakusangalala?

³ Mpaka tupikanichisye chenene yaŵagopolelaga Yesu paŵasalaga ya mtendele mwakukambilana chandanda dongosolo jaŵatesile Mlungu kwa Aisalaeli jakola Chaka Chakusangalala. Yehofa ŵasalile Aisalaeli kuti, “Pakutenda myoyo nikuti chaka cha 50 mchiŵisile pajika, nipo mjenesye kuti upagwe mtendele mchilambo mosopemo, kwa ŵandu wosope ŵali mwelemo. Pachaka chelechi chakusangalalila kuti papite yaka 50, chindu chilichose chiŵachisumile tachichiwuchisya kwa msyene, kapena kwa yisukulu yakwe, nipo jwalijose juŵamsumile mpela kapolo tachimwuchisya kwiŵasa kwakwe.” (Aŵalanje Lefitiko 25:8-12.) Mungani jipite jila twalijiganyisye mwaŵapindulilaga Aisalaeli ni lisiku lyakupumula. Nambi ana Aisalaeli ŵapindulaga chamtuli ni Chaka Chakusangalala chele ŵachikolangagasoni kuti  Chaka cha Ufulu? Jemanjaji ŵapindulaga mnope. Mwachisyasyo, naga mundu jwakwete ngongole mwamti amsalile kuti asumisye malo gakwe kuti awusye ngongolejo, pa Chaka cha Ufuluchi ŵamwuchisyaga malo gakwego. Myoyo mundujo ‘ŵamwuchisyaga yindu yakwe’ soni msogolo ŵanache ŵakwe ŵajigalaga malogo kuŵa gawo. Mwinesoni mundu jwine jwakwete ngongole jekulungwa, jwayikanaga pakusumisya mwanache jwakwe kapena kulisumisya msyenejo ku ukapolo kuti akombole kuwusya ngongolejo. M’chaka cha Ufulu, kapolojo ‘jwawujilaga kwiŵasa kwakwe.’ Myoyo achikapolo wosope ŵakolaga chembecheyo chakuti chachiwujila kumangwawo. Kusala yisyene dongosoloji jalosyaga kuti Yehofa akusiŵaganichisya ŵandu ŵakwe.

4-5. Ligongo chichi kulijiganya yakwamba chisangalalo chaŵatendaga Aisalaeli mpaka kutukamuchisye?

⁴ Ana Chaka Chakusangalala chakwetesoni umbone wine wapi? Yehofa jwasasile kuti, “Ambuje takampe upile mchilambo chitakampecho. Pangali mundu jwalijose jwamtundu wenu jutachiŵa jwakulaga.” (Det. 15:4) Kusala yisyene, yeleyi yili yakulekangana ni mwakutendela ŵandu masiku agano, pele ŵandu ŵakusichila agamba kusichilape soni ŵakulaga agamba kulagape.

⁵ Mpela Aklistu, nganituŵa pasi pa Chilamusi cha Mose. Yeleyi yikugopolela kuti ngatukusakuya chisangalalo chaŵatendaga Aisalaeli chele chagopolaga achikapolo, kululuchilana ngongole, nambosoni kuwusya malo ga achimsyene. (Alo. 7:4; 10:4; Aef. 2:15) Nambope kulijiganya yakwamba chisangalalochi mpaka kutukamuchisye mnope. Tukusala myoyo Ligongo lyakuti yeleyi yikusatukumbusya yatutendele Yehofa pakutugopola ku ulemwa.

6. Ana ŵandu akusosekwa kugopoledwa ku chichi?

⁶ Ŵandu wosopem’we tukusosekwa kugopoledwa ligongo tuli achikapolo ŵa ulemwa, wawuli ukapolo wangasa mnope. Ligongo lyakuti twajigalile ulemwa, tukusakalambala, kulwala, nambosoni kuwa. Ŵajinji akusajitichisya yeleyi pakulilolela pa ligalasi kapena papite kuchipatala kuti akapochele mtela. Tukusatenguka patutesile ulemwa. Ndumetume Paulo jwasasile kuti jwalipikanaga “kuŵa kapolo jwa lilamusi lya ulemwa [lyalyaliji mchilu mwakwe].” Jwasasilesoni  kuti, “Kongwene! Ana nduni jutachingulupusya une ku ndamo jangu jitijinjigalile ku chiwaji?”—Alo. 7:23, 24.

7. Ana Yesaya jwasasile yamtuli pakwamba ya kugopoledwa?

⁷ Chakusangalasya chili chakuti, Mlungu ŵalinganyisye litala lyakuti tugopoledwe ku ulemwa. Yesu ni juŵatendekasisye kuti kugopoledwaku kukomboleche. Kuli kusigele yaka yakupunda 700 Yesu mkanayiche pachilambo chapasi, jwakulochesya Yesaya jwasasile ya chaka cha kugopoledwa. Kugopoledwa kwekulungwaku kwaliji kwambone mnope kupunda Chaka cha Ufulu chaŵakolaga Aisalaeli. Jwalembile kuti, “Msimu wa Ambuje Mlungu ugumbele mwa une. Ambuje asagwile ni kunduma une, kuti ngalalichile ngani syambone kwa ŵandu ŵakulaga, ngaposye ŵandu ŵamitima jakupweteka, kukwasalila achikapolo ya kugopolwa kwawo.” (Yes. 61:1) Ana yakulochesyayi yasalaga ya ŵani?

8. Ana yakulochesya ya Yesayayi yasalaga ya ŵani?

⁸ Yakulochesya yakusosekwa mnopeyi yakwamba kugopoledwa yakwanilichikwe pandaŵi jele Yesu jwatandite utumiki wakwe. Yesu pajwapite ku nyumba jakupopelela kumangwakwe ku Nasaleti, jwalakwe jwaŵalasile maloŵe ga jwakulochesya Yesaya kwa Ayuda ŵaŵasongene kumaloko. Yesu jwasasile kuti maloŵe gaŵalembile Yesaya gasalaga ya jwalakwe, maloŵe gakwe gali gakuti, “Msimu wa Ambuje Mlungu uli pa une, asagwile une kuti lalichile ngani syambone kwa ŵakulaga. Jwalakwejo andumile kuti njenesye kwa ŵataŵidwe kuti tachigopoledwa ni kwa ŵakutatala kuti tachipakombola kulolasoni. Andumile kuti mbeleche mtendele kwa ŵandu ŵali mkusawusidwa, ni kulalichila ya ndaŵi jitachakulupusya Ambuje ŵandu ŵakwe.” (Luk. 4:16-19) Ana Yesu jwakwanilisye chamtuli yakulochesyayi?

9. Ana ŵandu ŵajinji mundaŵi ja Yesu, ŵajembecheyaga kuti chagopoledwe ku chichi?

⁹ Kugopoledwa kwaŵakusasile Yesayaku nambosoni kwaŵakuŵalasile Yesu kwatandite kamula masengo mu yaka 100 yandanda. Mpaka tukulupilile yeleyi ligongo Yesu ŵaŵechete kuti, “Lelo, lilemba lyagambile kulipikanali likwanilichikwe.” (Luk. 4:21) Ŵajinji ŵaŵampikanilaga Yesu pajwaŵalangaga komboleka kuti ŵajembecheyaga kuchenga pangani syandale, soni kugopoledwa ku ulamusi wa Loma. Komboleka ŵaganisyaga mpela achalume ŵaŵili ŵaŵaŵechete kuti, “Uwe twajembecheyaga kuti jwelejo ni jutiŵawombole Aisalaeli.” (Luk. 24:13, 21, NW) Nambo tukumanyilila kuti Yesu nganiŵaŵenda ŵakumkuya ŵakwe kuti ajimuchile ulamusi wangasa wa Loma. M’malo mwakwe, jwalakwe  jwasalile jemanjajo kuti, “Pelekani kwa Mwenye yayili yakwe ya Mwenye.” (Mat. 22:21) Sano ana Yesu akagopwele chamtuli ŵandu pandaŵijo?

10. Ana Yesu ŵatugopwele ku yindu yapi?

¹⁰ Mwanache jwa Mlungu jwayiche kuti ŵagopole ŵandu mmatala gaŵili. Litala lyandanda, Yesu jwagopwele ŵandu ku yijiganyo ya unami yakusajiganya achimlongola ŵa dini. Ayuda ŵajinji pandaŵijo ŵaliji achikapolo ŵa yikulupi soni yijiganyo ya unami. (Mat. 5:31-37; 15:1-11) Ŵandu ŵaŵalongolelaga achimjawo payindu ya usimu nganammanyililaga chenene Mlungu, myoyo jemanjaji ŵaliji mpela ŵangalola. Ligongo lyakuti ŵamkanile Mesiya soni usyesyene waŵajiganyaga, jemanjajo ŵaŵelepe m’chipi cha usimu. (Yoh. 9:1, 14-16, 35-41) Ligongo lyakuti Yesu jwajiganyaga yakuwona soni kupeleka chisyasyo chambone, jwalakwe jwalosisye ŵandu ŵakulinandiya mwampaka agopochele ku yijiganyo ya unami.—Maliko 1:22; 2:23–3:5.

11. Ana Yesu ŵatugopwele m’litala line lyapi?

¹¹ Litala lyaŵili, Yesu ŵagopwele ŵandu ku ukapolo wa ulemwa waŵajigalile kwa achinangolo ŵawo. Kupitila mu mbopesi ja Yesu, Mlungu chachikululuchila yakulemwa ya ŵandu naga akusakulupilila kuti ŵawomboledwe soni naga akulosya chikulupi mu yitendo yawo. (Aheb. 10:12-18) Yesu jwatite, “Naga mwanachejo akumgopola, jwalakwejo tachiŵa mlukosyo” kapena kuti jwagopoka. (Yoh. 8:36) Kugopoledwa kweleku kwaliji kwakusosekwa mnope kulekangana ni kwaŵakolaga Aisalaeli pa Chaka cha Ufulu. Mwachisyayo, mundu juŵagopoledwaga pa Chaka Chakusangalala yakombolekagasoni kuŵa kapolo, soni mkupita kwandaŵi jwawaga. Nambo kugopoledwa kuŵapeleche Yesu, kuchiŵapo mpaka kalakala.

12. Ana ŵani ŵachachiŵa ŵandanda kupindula ni kugopoledwa kuŵakusasile Yesu?

¹² Pa Pentekosite mu 33 C.E., Yehofa ŵasagwile ni msimu weswela ŵandumetume soni achalume ni achakongwe ŵane ŵakulupichika. Jwalakwe ŵajigele jemanjaji mpela ŵanache ŵakwe kuti kusogolo chiŵajimusye ku ŵawe kuti akalamulile ni Yesu kwinani. (Alo. 8:2, 15-17) Jemanjaji ni ŵaŵaliji ŵandanda kupindula ni kugopoledwa kwaŵakusasile Yesu mnyumba jakupopelela ku Nasaleti. Achalume ni achakongweŵa nganaŵasoni achikapolo ŵa yijiganyo ya unami soni yikulupi yangatyochela m’Malemba ya achimlongola ŵadini ja Chiyuda. Mlungu ŵawenisoni kuti agopoledwe ku ulemwa wawukusayikasya chiwa. Yehofa jwalinganyisye dongosolo jakwagopola ŵandu kuti aŵe pa ufulu m’chaka cha 33 C.E. Pandaŵiji ŵakumkuya ŵa Klistu ŵapochele msimu weswela soni dongosoloji jichimala panyuma pa Ulamusi wa Yaka 1,000 wa Yesu. Ana pandaŵi jelejo pachiŵa pali pakwanilichikwe yindu yapi?

13-14. Kupwatika pa ŵasagulwe, ana ni ŵandu ŵane ŵapi ŵachachisangalala ni kugopoledwa kuŵakusasile Yesu?

¹³ Masiku agano, ŵandu ŵakulupichika ŵajinji ŵakutyochela m’mitundu josope ali ŵa “ngondolo sine.” (Yoh. 10:16) Jemanjaji nganaŵilanjidwa ni Mlungu kuti akalamulile ni Yesu kwinani. Nambo akwete chembecheyo chachili m’Baibulo chakutama pachilambo chapasi mpaka kalakala. Komboleka wawojosoni akwete chembecheyochi.

¹⁴ Atamose apano akusangalala ni yindu yambone yakusangalala nayo ŵandu ŵasagulwe. Ligongo lyakulupilila mbopesi jiŵapeleche Yesu, mpaka amŵende Yehofa kuti ŵakululuchile yakulemwa yawo. Kutenda yeleyo mpaka kwakamuchisye kola chikumbumtima chambone pameso pa Mlungu. (Aef. 1:7; Ciw. 7:14, 15) Aganichisyesoni ya upile wakusangalala nawo ligongo lya kugopoledwa ku yikulupi ya unami. Yesu jwatite, “Timchichimanyilila chakuwona, ni chakuwonacho tichichimgopola jemanja.” (Yoh. 8:32) Kusala yisyene yili yakusangalasya kola ufulu welewu.

15. Ana kusogoloku tuchisangalala ni ufulu soni upile wamtuli?

¹⁵ Tukwembecheya ndaŵi jele tuchiŵa pa ufulu wekulungwa. Pachangakaŵapa, Yesu chachijonanga dini ja unami soni ulamusi wangali chilungamo wa ŵandu. Mlungu chachikulupusya “likuga lya ŵandu ŵangaŵalanjika” ŵakusamtumichila jwalakwe. Kaneko jemanjajo chachisangalala ni umi mu paladaiso pachilambo chapasi.  (Ciw. 7:9, 14) Ŵandu ŵajinji chachajimusya ku ŵawe soni chachikola upile wakugopoledwa ku ulemwa wa Adamu.—Mase. 24:15.

16. Ana kusogoloku ŵandu chachigopoledwa ku chichi?

¹⁶ Mu Ulamusi wa Yaka 1,000, Yesu pampepe ni ŵandu ŵachachilamulila najo, chachakamuchisya ŵandu kuŵa ŵamlama mwakuchilu soni mwausimu. Mpela muŵasangalalilaga Aisalaeli panyuma pa yaka 50, ŵandu chachisangalala ni mtendele wekulungwa mu Ulamusi wa Yaka 1,000. Yeleyi yikugopolela kuti ŵandu wosope ŵakusamtumichila Yehofa mwakulupichika chachiŵa ŵamlama soni chachigopoledwa ku ulemwa mpaka kalakala.

17. Ana pa Yesaya 65:21-23 pakusasala kuti ŵandu ŵa Mlungu chachitendaga chichi? (Alole chiwulili chapachikuto.)

¹⁷ Pa Yesaya 65:21-23, pakusasala mwawuchiŵela umi kusogoloku pachilambo chapasi. (Aŵalanje.) Ngaŵa kuti pandaŵijo ŵandu chachigambaga kutama ngakamulaga masengo. Mmalo mwakwe Baibulo jikusalosya kuti ŵandu ŵa Mlungu pandaŵijo chachikamulaga masengo gakusosekwa mnope, soni gakusangalasya. Mpaka tuŵe ŵakusimichisya kuti kumapeto kwa Ulamusi wa Yaka 1,000, ‘Mlungu chachiyigopola yakupanganyidwa yosope ku ukapolo wakuwola ni kupochela ufulu ni uchimbichimbi wa ŵanache ŵa Mlungu.’—Alo. 8:21.

18. Ligongo chichi ngatukukayichila kuti tuchikola sogolo jambone?

¹⁸ Mpela muyaŵelele ni Aisalaeli kuti Yehofa ŵalinganyisye yakuti ajiwoneje mwakuŵajilwa ngani ja kukamula masengo soni kupumula, yichiŵasoni myoyo kwa ŵandu ŵakwe kusogoloku mu Ulamusi wa Yaka 1,000 wa Klistu. Pandaŵijo, ŵandu chachikolaga ndaŵi ja kumlambila Mlungu. Kumlambila Mlungu kukusatendekasya ŵandu kuti asangalaleje masiku agano. Yeleyi ni yayichitendekwasoni m’chilambo chasambano. Kusala yisyene, tukwete magongo gambone gakuŵela ŵakusangalala pa masengo gambone soni yakutendekwa ya usimu yatukwembecheya kuti ŵandu ŵakulupichika tuchisangalala nayo mu Ulamusi wa Yaka 1,000 wa Klistu.