Ana aŵalasile mwakusamala magasini ga Sanja ja Mlonda ga chaka achino? Kwende alole, naga chakombole kwanga yiwusyo yakuyichisyayi:

Ana tukusosekwa tutendeje yindu mwamtuli ni Aklistu ŵasagulwe?

Tukusayamichila mnope chikulupi chawo. Myoyo ngatukusitwachimbichisya mwakupelenganya. Tukusaŵambalasoni ‘kwalumba.’ (Yud. 16) Ngatukusosekwa kwawusya jemanjaji yiwusyo yakwayana ni chembecheyo chawo.—w20.01, p. 29.

Ana chichi champaka chatendekasye kusimichisya kuti Yehofa akusiŵamanyilila chenene wawojo?

Baibulo jikusasala kuti Yehofa ŵamanyilile wawojo mkanaŵe kupagwa. Jwalakwe akusapikanasoni mapopelo gawo. Yehofa akusamanyilila yayili mumtima mwawo soni yakusaganisyaga. Yindu yakusatenda wawojo yikusakwayaga mwakusapikanila Yehofa. (1 Mbi. 28:9; Mis. 27:11) Jwalakwe ŵawutile wawojo kuti aŵe najo paunasi.—w20.02, p. 12

Ana ni ndaŵi japi jatukusosekwa kuŵecheta soni ni ndaŵi japi jangatukusosekwa kuŵecheta?

Tukusasangalala kuŵecheta yakwamba Yehofa. Tukusaŵecheta patum’weni mundu jwine kuti akutenda yindu yampaka yimtendekasye ulemwa. Achakulungwa akusasosekwa kuŵecheta pakumpa mundu chamuko naga pali mkusosechela kutenda myoyo. Ngatukusosekwa  kuŵecheta chilichose chakwamba masengo getu m’yilambo yele boma jagalekasisye. Ngatukusosekwa kusala yindu yachimsisi.—w20.03, pp. 20-21.

Ana sombe syaŵasikolasile mu buku ja Yoweli chaputala 2 sikulekangana chamtuli ni sya m’buku ja Chiwunukuko chaputala 9?

Pa Yoweli 2:20-29 pakusasala kuti Mlungu ŵasitopolenye sombe kuti sijawule kwine, jwalakwe jwasasilesoni kuti chachilinganya yindu yayajonasiche ni sombe. Panyuma pakwe, Mlungu jwapeleche msimu weswela. Yindu yeleyi yatendekwe pandaŵi jele Ababulo ŵajimuchile Aisalaeli. Pa Chiwunukuko 9:1-11 pakusasala ya sombe syasikwimila ŵasagulwe ŵamasiku agano. Jemanjaji akusalalichila kuti chilambo chakusakalachi Mlungu chachijonanje. Yeleyi yikusatendekasya kuti ŵandu ŵane akasangalalaga.—w20.04, pp. 3-6.

Ana ŵani ŵakwimila mwenye jwa kumpoto masiku agano?

Russia ni yilambo yayikusakamulana ni chilambochi. Jemanjaji aŵele ali mkwalagasya ŵandu ŵa Mlungu, kulekasya masengo gakulalichila soni alosisye kuti akusaŵengana mnope ni ŵa Mboni sya Yehofa. Mwenye jwa kumpoto aŵele ali mkulimbana ni mwenye jwa kummwela.—w20.05, p. 13.

Ana ndamo syakusikolanga pa Agalatiya 5:22, 23, ni ‘syaukusakoposya msimu weswela’ basi kapena pana sine?

Iyayi. Msimu weswela ukusatukamuchisya kuti tukole ndamo sine syambone mpela chilungamo. (Aef. 5:8, 9)—w20.06, p. 17.

Ana pana kogoya kwamtuli naga tukusaŵika yindu yakwamba uwejo pa malo gakunguluchila ga pa intaneti?

Yindu yakusaŵikaga pa intaneti yikusalosya naga wawojo ali ŵakulikwesya kapena ŵakulinandiya.—w20.07, pp. 6-7.

Ana Aklistu ŵakusalalichilaga mpaka alijiganye chichi kwa ŵakuwulaga somba?

Akusakamulaga masengo gawo pandaŵi jakuŵajilwa nambosoni pamalo gasikusasimanikwa somba. Akusalijiganya mwampaka akamulichisye masengo yida yakuŵajilwa. Akusakamulaga masengo gawo mwakulimba mtima atamose nyengo pajichenjile. Tukusosekwa kutenda yeleyi patukukamula masengo getu gakulalichila.—w20.09, p. 5.

Ana mpaka tumkamuchisye chamtuli jwakulijiganya Baibulo kuti amnonyeleje mnope Yehofa?

Mpaka tumlimbikasye kuti aŵalanjeje Baibulo lisiku lililyose soni kuti aganichisyeje mnope yaŵalasileyo. Soni mpaka tumjiganye kupopela.—w20.11, p. 4.

Ana maloŵe gakuti ‘wosope ŵatachijimuka’ gakupwatikapo ŵani?—1 Akoli. 15:22.

Paulo nganasalaga ya mundu julijose jutachijimuka. Mmalo mwakwe ŵasalaga ya ŵasagulwe ŵele ŵawile . . . mwa Klistu.” (1 Akoli. 1:2; 15:18)—w20.12, pp. 5-6.

Ana ŵasagulwe chachitenda chichi pachachichenga mpela kukupila kwa liso, pandaŵi jele lipenga lya mbesi tilichilila’?—1 Akoli. 15:51-53.

Jemanjaji chachikamula masengo yimpepe ni Yesu gakwalongolela ŵandu. (Chiw. 2:26, 27)—w20.12, pp. 12-13.