1. Ligongo chichi Yesu jwalandenye ŵakumkuya ŵakwe ni ngondolo?

YESU jwalandenye unasi wakwe ni ŵakulijiganya ŵakwe ni unasi wawukusapagwa pasikati pa m’busa ni ngondolo syakwe. (Yoh. 10:14) Yeleyitu yili yakupikanika. Ngondolo sikusammanyilila m’busa jwawo soni kupikanila maloŵe gakwe. Pakusaka kwitichisya yeleyi mundu jwine jwatite, “Twasakaga kusijambula ngondolo mwamti twatendaga yakuti situŵandichile. Nambo nganisituŵandichila ligongo nganisimanyililaga maloŵe getu. Kaneko kayiche kamnyamata kakachingaga ngondolosyo. Mwamti paŵasiŵilasile syamkuyiye.”

2-3. (a) Ana ŵakulijiganya ŵa Yesu akusalosya chamtuli kuti akusapikana maloŵe gakwe? (b) Ana mungani ajino soni jakuyichisya chitukambilane chichi?

² Yaŵasimene najo munduju yikusatukumbusya maloŵe ga Yesu gakwamba ngondolo syakwe ŵali ŵakulijiganya ŵakwe. Jwalakwe jwatite, “Tisichipikana maloŵe gangu.” (Yoh. 10:16) Nambotu apano Yesu ali kwinani. Sano ana mpaka tupikane chamtuli maloŵe gakwe? Tukusapikana maloŵe gakwe patukulijiganya yaŵasasile kuti tutendeje soni tukusamkuya jwalakwe patukukamulichisya masengo paumi wetu yindu yaŵajiganyisye jwalakwe.—Mat. 7:24, 25.

³ Mungani ajino soni jakuyichisya chitukambilane yine mwa yindu yaŵajiganyisye Yesuyi. Pachitukambilaneje chituyiwone kuti Yesu jwasasile kuti pana yindu yine yangatukusosekwa kutenda soni yine yatukusosekwa kutenda. Nambo chandanda chitulole yindu yiŵili yaŵatujiganyisye Yesu kuti ngatukusosekwa kutenda.

4. Mwakamulana ni Luka 12:29, ana chichi champaka chitutendekasye ‘kudandawula’?

⁴ Aŵalanje Luka 12:29. Yesu jwalimbikasisye ŵakumkuya ŵakwe kuti aleche ‘kudandawula’ ni yindu yakusosekwa paumi  wawo. Tukumanyilila kuti ndaŵi syosope malangiso ga Yesu gakusaŵa galunda soni gakamuchisya. Tukusasaka kamulichisya masengo malangisoga, nambo ndaŵi sine yikusaŵa yakusawusya. Ana ligongo chichi yikusatusawusya?

5. Ligongo chichi ŵandu ŵane mpaka adandawuleje ligongo lyakusoŵa kwa yakusosechela ya paumi?

⁵ Ŵandu ŵane mpaka adandawuleje mwampaka apatile yindu mpela yakulya, yakuwala, soni pagona. Komboleka kuti jemanjaji akutama mchilambo chakulaga chele kupata masengo kukusaŵa kwakusawusya. Jemanjaji mpaka alajeje kupata mbiya syakamulichisya masengo pa liŵasa lyawo. Kapena mpaka yisimanikwe kuti mundu jwaŵalikamuchisyaga liŵasa lyawo jwawile ni kulileka liŵasali lili lyangali chilichose. Kombolekasoni kuti ulwele wa COVID-19 watendekasisye kuti ŵane ŵatyosye masengo. (Jwak. 9:11) Naga tukusimana ni yakusawusya yine mwa yeleyi, ana mpaka tukamulichisye masengo chamtuli malangiso ga Yesu gakuti tukadandawulaga?

6. Alondesye yayamtendechele ndumetume Petulo pandaŵi jine.

⁶ Pandaŵi jine ndumetume Petulo ni ŵandumetume ŵane ŵaliji m’liboti pa Nyasa ja Galileya. Pandaŵiji kwatendaga chimbungo chamachili, soni ŵam’weni Yesu ali mkwenda pamesi. Petulo jwatite, “Ambuje naga ali ŵalakwe, andamule kuti mbiche kwali ŵalakwe pamesipo.” Yesu ali amsalile kuti “yikani,” Petulo jwakopweche mwiboti “ni ŵatandite kwenda pamesi kwawula kuŵaliji Yesu.” Alole yayatendekwe kaneko. Petulo “piŵalolite mujapujilaga mbungo, ŵatesile woga, ni ŵatandite kutitimila, nipo ŵagumisile kuti, ‘Ambuje angulupusye!’” Kaneko Yesu ŵatambasukwile mkono wakwe ni ŵamkulupwisye. Tukumbuchile kuti Petulo jwakombwele kwenda pamesi ligongo lyakuti jwamlolaga Yesu. Nambo pajwatandite kulola  chimbungo chila, jwalakwe wamkamwile woga soni ŵatandite kayichila kaneko jwatandite kutiŵila.—Mat. 14:24-31.

7. Ana tukulijiganya chichi kwa Petulo?

⁷ Chisyasyo cha Petulochi mpaka chitujiganye yejinji. Jwalakwe ali agambile kopoka mwiboti ni kutanda kwenda pa nyasa, nganajembecheyaga kuti chakole woga ni kutanda kutiŵila. Petulo jwasakaga kwenda pamesipo mpaka kwaŵaliji Yesu. Nambo jwalakwe jwatandite ganichisya ya chimbungo chila mmalo mwaganichisya yakuja kumsimana Yesu. Kusala yisyene uweji nganituŵa tujesile pamesi, nambo tukusasimana ni yindu yakulinga chikulupi chetu. Naga tukulepela ganichisya ya Yehofa soni yindu yachachitutendela kusogoloku, tuchitanda kutiŵila mwausimu. Chinga chitusimane ni yakusawusya yamtuli paumi wetu, tukusosekwa kupitilisyape ganichisya ya Yehofa soni kuti jwalakwe chachitukamuchisya. Ana mpaka tutende chamtuli yeleyi?

8. Ana chichi champaka chitukamuchisye kuti tukadandawulaga mnope ni yakusosechela yetu yakuchilu?

⁸ Mmalo mwakudandawula ni yindu yine yakwe tukusosekwa tumdalileje Yehofa. Tukumbuchileje kuti Atati ŵetu ŵachinonyelo Yehofa, akusatusimichisya kuti chachitupa yakusosechela yetu naga tukuŵika yindu ya Uchimwene pamalo gandanda paumi wetu. (Mat. 6:32, 33) Jwalakwe akusakombola kwanilisya yindu yasasile kuti chachitenda. (Det. 8:4, 15, 16; Sal. 37:25) Naga Yehofa akusasamalila yijuni soni maluŵa, ngatukusosekwa kudandawula pakwamba yakulya kapena yakuwala. (Mat. 6:26-30; Afil. 4:6, 7) Mpela mwayikusaŵela kuti chinonyelo chikusichatendekasya achinangolo kwasamalila ŵanache ŵawo, nombe Atati ŵetu ŵakwinani akusiŵasamalila ŵandu ŵakwe mwakuchilu ligongo lya chinonyelo. Myoyo, ngatukusosekwa kayichila kuti Yehofa chachitusamalila.

9. Ana yalyasimene nayo liŵasa line yikutujiganya chichi?

⁹ Kwende tulole chisyasyo chachikulosya kuti Yehofa chachitupa yakusosechela yetu ya paumi. Liŵasa line lyalyatendaga upayiniya, lyajesile pagalimoto jawo jakalakala ulendo wakupunda awala jimo. Jemanjaji ŵajawulaga kukwajigala alongo ŵaŵatamaga kumalo gakusunjila ŵandu ŵakutila kumangwawo kuti akatende misongano. Jwamlume jwa mliŵasali jwatite, “Pajamasile misongano twaŵilasile alongoŵa kuti tukalye kunyumba. Nambo kaneko twakumbuchile kuti nganitukola chakulya chilichose.” Ana liŵasali likatesile chichi? M’baleju jwatite, “Patwakopochelaga panyumba, twagaweni majumbo gaŵili gekulungwakulungwa ga yakulya gali pamlango. Nambo nganitumanyililaga juŵaŵisile yakulyayi. Yehofa jwatukamuchisye.” Pali papitile ndaŵi, galimoto jawo jila jajonasiche. Galimotoji jakamuchisyaga mu utumiki, nambo nganakola mbiya jakuja kulinganyichisya. Jemanjaji ŵajijawisye galimotoji kumalo gakulinganyichisya kuti akamanyilile mbiya syampaka sisosekwe kuti jikomboleche. Kaneko payiche jwamlume jwine ni jwawusisye kuti, “Ana galimotoji asyene ŵani?” M’bale jula jwasasile kuti jili jakwe soni kuti jikusosekwa kujilinganya. Jwamlume jula jwatite, “Yangali kandu. Ŵamkwangu akusaka galimoto mpela jeleji soni mtundu wakwe ni welewu. Ana akusaka nape mbiya silingwa?” M’baleju jwamsumisye jwamlume jula galimotojo, soni jwapatile mbiya syakwanila kusumila galimoto jine jambone. Jwalakwe jwatite, “Palisikuli twasangalele mnope, soni twayimanyi kuti Yehofa ni juŵatendekasisye yeleyi.”

10. Ana pa Salimo 37:5 pakusatulimbikasya chamtuli kuti tukadandawulaga ni yakusosechela yetu ya paumi?

¹⁰ Patukumpikanila Yesu soni kuleka kudandawula mnope ya yindu yakusosechela paumi wetu, tuchiŵa ŵakusimichisya kuti Yehofa chachitupa yakusosechela yetu. (Aŵalanje Salimo 37:5; 1 Pet. 5:7) Aganichisye yakutendekwa yayikolasile mundime 5. Komboleka kuti Yehofa aŵele ali mkukamulichisya masengo mtwe wa liŵasa lyawo kapena ŵandu ŵane pakwapa yakusosechela  ya paumi wawo lisiku lililyose. Naga apano mtwe wa liŵasa ukulepela kupata yakusosechela ya paumi wetu kapena atutyosisye masengo, Yehofa chatukamuchisye mmatala gane. Mwati tukakayichilaga yeleyi. Kwende sambano tukambilane chindu chine chiŵasasile Yesu kuti ngatukusosekwa kutenda.

11. Mwakamulana ni Mateyu 7:1, 2, ana Yesu jwatusalile kuti tukatendaga chichi? Ligongo chichi kutenda yeleyi mpaka kuŵe kwakusawusya?

¹¹ Aŵalanje Mateyu 7:1, 2. Yesu jwamanyililaga kuti ŵandu ali ŵangali umlama soni akusaganichisya mnope yakulepela ya ŵane. Jwalakwe jwatite, “Mkasimwalamulaga ŵandu ŵane.” Mwine mpaka tulinjelinjeje kuŵambala kwalamula abale ni alongo. Nambo ligongo lyakuti tuli ŵangali umlama, ndaŵi sine mpaka tulepele kutenda yeleyi. Ana tukusosekwa kutenda chichi naga ndaŵi sine tukusayiwona kuti tukusaganichisya mnope yakulepela ya ŵane? Tukusosekwa kupikanila maloŵe ga Yesu mwakuleka kwalamula ŵane.

12-13. Ana kuganichisya muŵamwonelaga Yehofa Mwenye Daudi mpaka kutukamuchisye chamtuli kuŵambala kwalamula ŵane?

¹² Kuganichisya mwakusatendela yindu Yehofa mpaka kutukamuchisye mnope. Jwalakwe akusalola yindu yambone mwa ŵandu. Tukusayiwona yeleyi ni muŵatendele yindu ni Mwenye Daudi juŵatesile yakulemwa yekulungwa. Mwachisyasyo, jwalakwe jwatesile chikululu ni Betiseba, soni jwayikene pakwawulaga ŵamkwakwe Betisebajo. (2 Sam. 11:2-4, 14, 15, 24) Yakusakala yaŵatesile Daudiyi, yakwayiyesoni liŵasa lyakwe lyosope. (2 Sam. 12:10, 11) Pandaŵi jine, Daudi jwalosisye kuti nganamdalilaga Yehofa mwakwaŵalanga asilikali ŵa Aisalaeli, yindu yele Mlungu nganamlamula kuti atende. Komboleka kuti Daudi jwatesile yeleyi ligongo lyakuti jwasangalalaga ni winji wa asilikaliwo soni jwadalilaga mnope mmalo mwakumdalila Yehofa. Ana yakuyichisya yakwe yaliji yamtuli? Aisalaeli 70,000 ŵawile ligongo lya mlili.—2 Sam. 24:2-4, 10-15.

¹³ Yikaŵe kuti wawojo ŵapali mundaŵi ja Aisalaeli, ana akam’weni wuli Daudi? Ana akam’weni jwalakwe kuti ngakuŵajilwa chanasa cha Yehofa? Nambotu Yehofa nganamwona myoyo. Jwalakwe jwaganichisyaga ya kulupichika kwa Daudi kuŵakulosisye paumi wakwe wosope nambosoni kuti jwapitikwiche mtima. Yakuyichisya yakwe Yehofa ŵamkululuchile Daudi. Yehofa jwamanyililaga kuti Daudi jwamnonyelaga mnope jwalakwe soni kuti jwasakaga kutenda yambone. Ana nganiyiŵa yakusangalasya kumanyilila kuti Mlungu akusalola yambone yatukusatendaga?—1 Ayi. 9:4; 1 Mbi. 29:10, 17.

14. Ana chichi chachikusakamuchisya Aklistu kuti akalamulaga ŵane?

¹⁴ Ligongo lyakuti Yehofa jwangajembecheya kuti tutendeje yindu mwangalemwesya, m’wejisoni tukusosekwa tukajembecheyaga kuti ŵane akalemwesyaga soni tuloleje yambone mwa achimjetu. Yili yangasawusya kulola yakulemwecheka mwa ŵandu ŵane. Nambope, mundu jwali paunasi wambone ni Yehofa mpaka alole yakulemwa mwa ŵane nambo ni ngaleka kutenda nawo yindu. Maganga ga dayamondi gangawonekaga chenene naga nganagalinganya, nambo mundu jwalunda akusamanyilila kuti pachagalinganyepo chigaŵe gakusosekwa mnope. Mwakulandana ni Yehofa soni Yesu, ngatukusosekwa kwambaga kulola yakulepela ya ŵane, mmalo mwakwe tuloleje yambone mwa achimjetu.

15. Ana kuganichisya mwayiŵelele yindu paumi wa ŵane mpaka kutukamuchisye chamtuli kuŵambala kwalamula ŵane?

¹⁵ Kupwatika pa kulola yindu yambone mwa ŵane, ana chichi champaka chitukamuchisye kuti tukaganichisyaga mnope yakulepela ya ŵane? Alinjeje ganichisya mwawuŵelele umi wawo. Lisiku line Yesu ali kunyumba ja Mlungu,  ŵam’weni jwamkongwe jwamasije jwine ali mkuponya tumbiya tuŵili m’libokosi lyakuponyamo mbiya. Yesu nganawusya kuti, “Ligongo chichi jwamkongweju nganaponya mbiya syejinji?” Mmalo mwaganichisya ya mbiya syajwapeleche jwamkongwe jwamasijeju, Yesu jwaganichisye ya chakulinga cha jwamkongwejo soni muyaŵelele yindu paumi wakwe. Mwamti jwayamichile ligongo lyakutenda yakakombwele.—Luk. 21:1-4.

16. Ana mpaka tulijiganye chichi pa chisyasyo cha Mlongo Veronica?

¹⁶ Kuganichisya mwayiŵelele yindu paumi wa ŵane mpaka kutukamuchisye mnope. Kuti tupikanichisye yeleyi kwende tulole chisyasyo cha Mlongo Veronica. Mumpingo wajwasonganaga mwapali mlongo jwangalombela juŵakwete mwanache jwamlume. Mlongo Veronica jwatite, “Yawonekaga mpela kuti mlongoju nganatendaga yejinji mumpingomu. Ligongo lya yeleyi namwonaga mwakulemwecheka. Nambo lisiku line najinjile mu utumiki ni mlongoju. Jwalakwe jwasalile yakusawusya yajwasimanaga nayo ni mwanache jwakwe juŵaliji jwamseseŵale. Jwalakwe jwalingagalingaga kutenda yakuti alisamalileje mwakuchilu soni mwausimu. Ndaŵi sine ligongo lya ulwele wa mwanache jwakwewu, jwajawulaga kukutenda misongano kumpingo wine.” Pambesi pakwe Veronica jwatite, “Nganimanyililaga kuti mlongoju akusasimana ni yakusawusya yeleyi. Sambano ngusinamchimbichisya soni kumyamichila ligongo lya yindu yosope yakusatenda pakumtumichila Yehofa.”

17. Ana lilemba lya Yakobo 2:8 likusatusalila kuti tutendeje chichi? Ana mpaka tutende chamtuli yeleyi?

 ¹⁷ Ana tukusosekwa kutenda chichi patumanyilile kuti twaganichisyaga mnope yakulepela ya ŵakulupilila achimjetu? Tukumbuchileje kuti tukusosekwa kwanonyela abale ni alongo. (Aŵalanje Yakobo 2:8.) Tukusosekwa kupopela kwa Yehofa kuti atukamuchisye kuŵambala kwalamula ŵane. Tukusosekwa kutendasoni yindu mwakamulana ni yatuŵendileyo mwakuŵechetana ni mundu jwatuŵele tuli mkumganichisya yindu yakulemwechekajo. Yeleyi mpaka yitukamuchisye kuti tummanyilile chenene mundujo. Mpaka tumŵende mundujo kuti tujende najo mu utumiki kapena kumŵilanjila yakulya. Patukulingalinga kwamanyilila chenene abale ni alongo ŵetu, tuchikombola kumsyasya Yehofa soni Yesu mwakulola yindu yambone mwa ŵane. Patukutenda yeleyi, tuchilosya kuti tukupikanila lilamusi lyaŵajiganyisye Yesu lyakuti tuŵambaleje kwalamula ŵane.

18. Ana mpaka tulosye chamtuli kuti tukusapikanila yaŵajiganyisye Yesu?

¹⁸ Mpela mwayikusaŵela kuti ngondolo sikusampikanila m’busa jwawo, nombe ŵakumkuya ŵa Yesu akusapikanila maloŵe gakwe. Naga tukulingalinga kuŵambala kudandawula ni yakusosechela ya paumi wetu soni kuleka kwalamula ŵane, Yehofa ni Yesu chachitupa upile. Chinga tuli “kakuga kangondolo,” kapena “ŵangondolo sine,” wosope tukusosekwa kupikanila yaŵajiganyisye Yesu. (Luk. 12:32, NWT; Yoh. 10:11, 14, 16) Mungani jakuyichisya, tuchikambilana yindu yiŵili yaŵasalile Yesu ŵakumkuya ŵakwe kuti atendeje.