Ana aŵalasile mwakusamala magasini ga Sanja ja Mlonda ga chaka achino? Kwende alole naga chakombole kwanga yiwusyo yakuyichisyayi:

Ana pakusasosekwa chichi kuti mkombole ‘kuchenga nganisyo syenu’? (Alo. 12:2)

Pakusasosekwa kutenda yindu yejinji kupunda kwamba kutenda yambone. Yikusapwatikapo kumanyilila umundu wetu wamkati, soni kuchenga palipose papakusosechela kuchenga ni chakulinga chakuti tupikanileje malamusi ga Yehofa.—w23.01, pp. 8-9.

Ana mpaka tulosye chamtuli kuti tuli ŵakusamala patukulola yakutendekwa ya m’chilambochi?

Tukusatenda chidwi mnope patukuyiwona kuti yindu yayikutendekwa apano yikukwanilisya yakulochesya ya m’Baibulo. Nambo mmalo mwakwasalila ŵane yindu yangali umboni yampaka yisokonasye mkamulano mumpingo, tuŵecheteje yindu yayikusasimanikwa m’mabuku gajikusawandisya gulu ja Yehofa. (1 Akoli. 1:10)—w23.02, p. 16.

Ana Ubatiso wa Yesu Ukusalekangana Chamtuli ni Ubatiso Wakusatenda Ŵakumkuya Ŵakwe?

Yesu nganasosekwaga kulipeleka kwa Yehofa ligongo lyakuti jwapagwile mu mtundu wawalipeleche kala kwa Yehofa. Yesu jwaliji mundu jwamlama. Mwamti nganasosekwaga kugalawuka mtima ligongo nganakola chakulemwa chilichose.—w23.03, p. 5.

Ana mpaka twakamuchisye chamtuli ŵane kuti ajanjeje pamisongano ja mpingo?

Mpaka tutende yeleyi mwakupeleka ndemanga syakata, yampaka yape ŵane upile wakwanga. Tukusosekwasoni kuŵambala kusala mfundo syejinji patukwanga. Yeleyi yikusakamuchisyasoni kuti ŵane apate yakwanga.—w23.04, p. 23.

Ana “Msewu Weswela” wakusawukolanga pa Yesaya 35:8 ukusajimila chichi?

Chandanda, msewu wakuwanichisyawu wajimilaga ulendo wa Ayuda wakutyoka ku Babulo kuwujila kumangwawo. Nambi uli pakwamba ya mundaŵi jetu jino? Yaka yejinji mkanichiyiche chaka cha 1919, patendekwe masengo gagopolela soni kupulinta ma Baibulo nambosoni yindu yine. Ŵakutumichila ŵa Mlungu aŵele ali mkwenda pa “Msewu Weswela” wakwawula ku paladaiso jwausimu, wawukusiwalongolela kuti chapate upile wakutyochela ku Uchimwene wa Mlungu.—w23.05, pp. 15-19.

Ana pa Misyungu chaputala 9 pana malangiso gakutukamuchisya kwamanyilila chenene achakongwe ŵaŵili ŵapi ŵakuwanichisya?

Buku ja Misyungu jikusasala ya “jwamkongwe jwakuloŵela” jwele kuŵilanga kwakwe kukusalongolela ku “malembe.” Bukuji jikusasalasoni ya “lunda” pakuwanichisya ni jwamkongwe jwele kuŵilanga kwakwe kukusalongolela ku “umanyilisi” soni ku umi. (Mis. 9:​1, 6, 13, 18)—w23.06, pp. 22-24.

Ana yindu yajwatesile Yehofa kwa Loti yikusatukamuchisya chamtuli kumanyilila kuti jwalakwe akusapikana ya ŵane?

Yehofa ŵamsalile Loti kuti atyoche mu msinda wa Sodomu ni kutilila ku dela ja matumbi. Nambo Loti pajwaŵendile kuti atilile ku Sowali, Yehofa jwakundile.—w23.07, p. 21.

Ana jwamkongwe mpaka atende yamtuli naga ŵamkwakwe alolelele yakuŵagula?

Jwalakwe akusosekwa kumbuchila kuti ngakusosekwa kulijimba magambo. Akusosekwasoni kulimbisyaga unasi wakwe ni Yehofa, soni kuganichisya yisyasyo ya m’Baibulo ya achakongwe ŵaŵasimene ni yakusawusya ŵele Mlungu jwakamuchisye kupilila. Amanyililejesoni kuti mpaka akombole kwakamuchisya ŵamkwakwe kuti akasimana ni yakusawusya yekulungwa.—w23.08, pp. 14-17.

Ana lunda mpaka lutukamuchisye chamtuli kutenda yindu mwakuwusimana mtima ŵane pakutusisya pa yindu yatukusakulupilila?

Mpaka tutende yeleyi mwakuchiwona chiwusyo kapena ngani jatandisye mundujo mpela upile wetu wakumanyilila yayili munganisyo mwakwe. Patutesile yeleyi mpaka tukombole kwanga mwakuwusimana mtima.—w23.09, p. 17.

Ana mpaka tulijiganye chichi kwa Maliya pangani ja kuŵenda ŵane kuti atulimbikasye?

Maliya pajwamanyilile kuti chachiŵa nangolo jwa Mesiya, jwalakwe jwakundile kuti ŵane amlimbikasye. Gabuliyele soni Elisabeti ŵamlimbikasisye Maliya pakamulichisya masengo Malemba. M’wejisoni Aklistu achimjetu mpaka atulimbikasye.—w23.10, p. 15.

Ana Yehofa mpaka ajanje chamtuli mapopelo getu?

Jwalakwe jwasasile kuti chachipikanila mapopelo getu ni kulola naga gali gakamulana ni chakulinga chakwe. (Yel. 29:12) Yehofa mpaka ajanje mwakulekangana payindu yakulandana yaŵendile ŵandu, nambope nganaŵa alesile kutukamuchisya.—w23.11, pp. 21-22.

Ligongo chichi ali achikolasile “chembecheyo” pa Aloma 5:2 ŵachikolasilesoni mundime 4?

Panyuma pakupikana ngani syambone, mundu mpaka akole chembecheyo chakusangalala ni umi wangamala mu paladaiso. Nambo panyuma pakusimana ni yakusawusya ni kuyipilila, nambosoni kulola yakuti Mlungu pakumpa upile, chembecheyo chakwe chikusakula mwamti akusatanda kuyikulupilila mnope yindu yakwembecheya.—w23.12, pp. 12-13.