1. Ana jwamlume jwa Chiklistu akusasosekwa kutenda chichi kuti yindu yimjendele chenene?

 MWENYE Daudi ŵamsalile Solomo kuti, “Mlimbe mtima nipo mŵe ŵamachili.” (1 Ayi. 2:​1-3) Achalume ŵa Chiklistu masiku aganosoni mpaka atende chenene kukamulichisya masengo mfundoji. Kuti yindu yajendele chenene jemanjaji akusosekwa kupikanilaga malamusi ga Mlungu soni kukamulichisya masengo mfundo sya m’Baibulo pa umi wawo. (Luk. 2:52) Ligongo chichi yili yakusosekwa kuti abale ŵachinyamata aŵe achalume ŵa Chiklistu ŵakudalilichika?

2-3. Ligongo chichi m’bale jwachinyamata akusasosekwa kuŵa Mklistu jwakudalilichika?

² Jwamlume jwa Chiklistu akusakola maudindo gakusosekwa mnope mwiŵasa soni mu mpingo. Mwangakayichila jemanja abale ŵachinyamata mkusaganichisya ya maudindo gachimchikola msogolo. Mpaka mganisyeje yakuŵa jwakutumichila jwa ndaŵi syosope, jwakutumichila jwakamuchisya, soni jwamkulungwa jwa mumpingo. Kombolekasoni kuti mpaka mganisyeje yakulombela soni kukola ŵanache. (Aef. 6:4; 1 Tim. 3:1) Kuti chimkole maudindo gelega soni kuti yindu chiyimjendeleje chenene mkusosekwa kuŵa Mklistu jwakudalilichika. b

³ Ana ni chichi champaka chimkamuchisye kuti mŵe Mklistu jwakudalilichika? Pana yindu yakusosekwa mnope yamkusosekwa kuyikwanilisya. Sambano ana mkusosekwa kutenda chichi kuti yindu chiyimjendeleje chenene pa maudindo gachimchikola msogologa?

4. Ana mpaka apate kwapi yisyasyo yambone ya ŵandu yampaka ajigalile? (Alole chiwulili.)

⁴ Msaguleje yisyasyo yambone yakuti myisyasyeje. M’baibulo mwana yisyasyo yambone yejinji yampaka achalume ŵachinyamata myisyasyeje.  Achalume ŵakala ŵeleŵa ŵamnonyelaga Mlungu soni ŵakwete maudindo gakulekanganalekangana pakwasamalila ŵandu ŵakwe. Mpaka myipatesoni yisyasyo yambone pasikati pa achalume ŵakudalilichika ŵa Chiklistu ŵali mu liŵasa soni mu mpingo mwenu. (Aheb. 13:7) Nambosoni mkwete Yesu Klistu jwali chisyasyo chambone mnope. (1 Pet. 2:21) Pamkulijiganya mwakusamala ya yisyasyo yeleyi, mganichisyeje ya ndamo syawo syambone. (Aheb. 12:​1, 2) Kaneko mganichisyeje yamkusosekwa kutenda kuti mwasyasyeje.

5. Ana mpaka atende chichi kuti aŵe ŵaganisya chenene? Ligongo chichi kutenda yeleyi kuli kwakusosekwa? (Salimo 119:9)

⁵ Mkoleje soni ‘kusunga ndamo . . . jakupakombola ganichisya chenenepe yamsogolo.’ (Mis. 3:21) Jwamlume jwakusaganisya chenene akusaganichisya kaje mwakusamala yakusosekwa kutenda mkanayitende. Myoyo mkusosekwa kulimbichila kuti mkomboleje kutenda yeleyi. M’chilambochi achalume ŵachinyamata ŵajinji akusasagula yakutenda pakujigalila mwakusachila kapena mwakupikanila. (Mis. 7:7; 29:11) Yindu mpela TV, mafidiyo soni malo gakunguluchila ga pa intaneti mpaka yimlongolele pa katende kenu kayindu. Nambo ana mpaka mtende yamtuli kuti mpakomboleje kuganisya chenene? Chandanda mkusosekwa kulijiganyaga mfundo sya m’Baibulo ni kuganichisyaga kusosekwa kwa mfundosyo. Kaneko mkusosekwa kukamulichisya masengo mfundo syelesyo pakusagula yakutenda yampaka yimsangalasye Yehofa. (Aŵalanje Salimo 119:9.) Naga mkutenda yeleyi, yichimkamuchisya kuti mŵe jwamlume jwa Chiklistu jwakudalilichika. (Mis. 2:​11, 12; Aheb. 5:14) Mganichisye yampaka kujile kuganisya chenene pakumkamuchisya pa mbali siŵili asi: (1) pamkutenda yindu ni alongo soni (2) yamkusasagula pa kawale soni kawoneche kenu.

6. Ana kuganisya chenene mpaka kwakamuchisye chamtuli abale ŵachinyamata kuti ŵakamuchisyeje alongo?

⁶ Kuganisya chenene kukusamkamuchisya jwachinyamata kuti ŵachimbichisyeje achakongwe. Nganikuŵa kulemwa naga m’bale jwachinyamata akusaka kummanyilila chenene mlongo jwa Chiklistu. Nambope mnyamata jwakusaganichisya chenene nganaŵa aŵechete, kulemba kapena kutenda yiliyose yampaka yilosye kuti akumsaka mlongo nambo ali nganakola nganisyo syakuŵa najo pa ulombela. (1 Tim. 5:​1, 2) Nambosoni naga ali pa chitomelo ni mlongo chachiŵambala kumjonanjila  mbili jakwe jambone mwakuŵambala kuŵa ŵaŵilipe pali pangali mundu jwine.—1 Akoli. 6:18.

7. Ana kuganisya chenene mpaka kumkamuchisye chamtuli m’bale jwachinyamata kutenda yindu mwalunda pangani ja kawale soni kalisalalisye?

⁷ Litala line lyampaka alochesye jwamlume jwachinyamata kuti ali jwakuganisya chenene lili kusagula mwakuŵajilwa kalisalalisye soni kawale. Ndaŵi syejinji, ŵakusalinganya soni kuwandisya masitayilo ga yakuwala ngakusamchimbisya Yehofa nambosoni akusaŵa ŵandamo syakusakala. Nganisyo syawo syakusakala sikusawonechela pa masitayilo ga yakuwala yakukamula chilu mnope soni yakumtendekasya jwamlume kuwoneka mpela jwamkongwe. Mnyamata jwali Mklistu jwakudalilichika pakusagula yakuwala chachilolechesya kuti akulongoleledwa ni mfundo sya m’Baibulo soni yisyasyo yambone ya abale ŵa mu mpingo. Anyamata mpaka mtende chenene kuliwusya kuti, ‘Ana yangusasagula yikusalosya kuti ngusaganisya chenene soni kwachimbichisya ŵane? Ana kawale kangu kakusikakamuchisya ŵane kumanyilila mwangasawusya kuti ndili jwakutumichila jwa Mlungu?’ (1 Akoli. 10:​31-33; Tit. 2:6) Mnyamata jwakusaganisya chenene akusapata ulemu pasikati pa abale ni alongo. Kupunda pelepa Yehofa akusamnonyela mnope.

8. Ana m’bale jwachinyamata mpaka atende yamtuli kuti aŵe jwakudalilichika?

⁸ Mŵeje jwakudalilichika. Mnyamata jwakudalilichika akusalipeleka mnope pakukwanilisya maudindo gakwe gosope. (Luk. 16:10) Mganichisye ya chisyasyo chambone mnope cha Yesu. Jwalakwe nganatendaga yindu yakwayana ni udindo wakwe mwangaŵichila mtima. Mmalomwakwe jwalipeleche pakwanilisya udindo waŵampele Yehofa atamose pandaŵi jayawonekaga kuti kutenda yeleyi chikuŵiche umi wakwe pangosi. Jwalakwe jwanonyelaga mnope ŵandu mnopemnope ŵakulijiganya ŵakwe mwamti mwakusachilila ŵayikene pakupeleka umi wakwe ligongo lya jemanjajo. (Yoh. 13:1) Mjigalileje chisyasyochi mwakuŵa ŵakulipeleka mnope kuti mkwanilisyeje mautumiki gampegwile. Naga ngamkumanyilila yampaka mtende pa utumiki winewakwe, mwakulinandiya mwaŵendeje abale ŵakumanyilila yejinji kuti amkamuchisye. Mlimbichileje, mkaŵaga jwaulesi. (Alo. 12:11) Mmalomwakwe, mmalisyeje utumiki wampegwile, mtendeje yeleyi “mpela kuti mkutendela Yehofa ngaŵaga ŵandu.” (Akolo. 3:23) Yili yisyene kuti nganimŵa jwamlama, myoyo mŵeje jwalikulinandiya soni mjitichisyeje yamlemwisye.—Mis. 11:2.

9. Ligongo chichi m’bale jwachinyamata akusasosekwa kumanyilila katende ka yindu yineyakwe?

⁹ Kuti mŵe jwamlume jwa Chiklistu jwakudalilichika, mkusosekwa kumanyililaga yindu yineyakwe. Yindu yeleyi yichimkamuchisya kuti chimkomboleje kukwanilisya maudindo ga mumpingo, kulisamalila mwasyene kapena liŵasa lyenu. Yichimkamuchisyasoni kuŵa paunasi wambone ni ŵane. Kwende tukambilane yine mwa yinduyi.

10-11. Ana kumanyilila kulemba soni kuŵalanga chenene mpaka kumkamuchisye chamtuli jwachinyamata paumi wakwe soni pali mumpingo? (Salimo 1:​1-3) (Alole chiwulili.)

¹⁰ Mlijiganyeje kuŵalanga soni kulemba chenene. Baibulo jikusasala kuti mundu jwakusaŵalanga  Maloŵe ga Mlungu soni kuganichisya yaŵalasile akusaŵa jwakusangalala soni yindu yikusiyimjendela chenene. (Aŵalanje Salimo 1:​1-3.) Kuŵalanga Baibulo lisiku lililyose, kukusamkamuchisya mundu kuti amanyilileje nganisyo sya Yehofa. Yeleyi yikusiyimkamuchisya kuti mganisyeje chenene soni kukombola kukamulichisya masengo chenene malemba. (Mis. 1:​3, 4) Achalume ŵamti myiyi ni ŵakusasosekwa mu mpingo. Ligongo chichi tukuŵecheta myoyo?

¹¹ Abale ni alongo akusasosekwa achalume ŵakudalilichika ŵampaka ŵakamuchisyeje kukuya mfundo sya m’Baibulo. (Tit. 1:9) Naga mkuŵalanga soni kulemba chenene mpaka yimkamuchisye kuti mŵecheteje ngani soni kupeleka ndemanga syakulimbikasya. Mpaka mkombolejesoni kulemba manosi gakamuchisya pamkulijiganya pajika, pamli pa misongano ja mpingo, jadela soni ja chigawo. Mfundo syelesi sichimkamuchisya kulimbisya chikulupi chenu soni kwalimbikasya ŵane.

12. Ana chichi champaka chimkamuchisye jemanja ŵachinyamata kuti mŵeje ŵakunguluchika?

¹² Mŵeje ŵakunguluchika soni ŵagopoka. Jwamlume jwa Chiklistu akusosekwa kulingalinga kuti aŵeje jwakunguluchika. Jwamlume jwali jwakunguluchika akusaŵa jwakupikanichisya mwakulipikanila ŵane. (Mis. 20:5) Mpaka mkombole kuyimanyilila yayikumtendechela mundu jwine kupitila pakaŵechete, kawoneche soni kajende ka mundujo. Yeleyi nganiyiŵa yikomboleche naga ngamkupata ndaŵi jakunguluka ni ŵandu. Naga ndaŵi syosope mkusagamba kukamulichisya masengo yipangiso yamakono pakunguluka, mpela kulembelana mameseji kapena kutumichisyana mautenga pa foni, mpaka yinandiye upile wakunguluka ni ŵandu pameso ni pameso. Myoyo, mlinjejelinjeje kupata mapesa gakunguluka ni ŵane pameso ni pameso.—2 Yoh. 12.

13. Ana ni yindu yine yapi yampaka alijiganye mnyamata? (1 Timoteyo 5:8) (Alole chiwulili.)

¹³ Mlijiganyeje masengo gampaka gamkamuchisye pa umi wenu. Mklistu jwakudalilichika akusosekwa akomboleje kulisamalila msyene soni kwasamalila ŵa mwiŵasa mwakwe. (Aŵalanje 1 Tim. 5:8.) M’yilambo yine, abale ŵachinyamata akusalijiganya masengo kutyochela kwa baba ŵawo kapena kwa ŵachinasi ŵawo. Pele mu yilambo yine, anyamata akusalijiganya masengo kapena bisinesi pali ku sekondale. Mulimose mwampaka yiŵele, mfundo jakusosekwa jili jakuti mkusosekwa kulijiganya yineyakwe yampaka yimkamuchisye kupata masengo msogolo. (Mase. 18:​2, 3; 20:34; Aef. 4:28) Mlimbichileje mnope soni mlipelecheje pa masengo gamkukamula. Yeleyi yichitendekasya kuti ŵandu amyamichileje. Nambosoni kutenda yeleyi kuchimkamuchisya kuti chimpate masengo. Mfundo nambosoni masengo gatukambilenega yili yakusosekwa kwa Mklistu jwamlume kuti chapakombole kukwanilisya maudindo ga msogolo. Kwende tukambilane gane mwa maudindoga.

14. Ana m’bale jwachinyamata mpaka atende uli kuti chatende utumiki wandaŵi syosope?

¹⁴ Kutenda utumiki wa ndaŵi syosope. Achalume ŵa Chiklistu ŵakudalilichika ŵajinji ŵatandite utumiki wa ndaŵi syosope ali anyamata. Upayiniya ukusamkamuchisya jwachinyamata kuti akomboleje kutumichila chenene ni ŵandu ŵakulekanganalekangana. Ukusamkamuchisyasoni kuti akomboleje kukamulichisya chenene masengo mbiya syakwete. (Afil. 4:​11-13) Mlango wakwinjilila ku utumiki wa ndaŵi syosope uli upayiniya wakamuchisya. Ŵajinji akusatenda upayiniya wakamuchisya kwa kandaŵi nditu, yayikusiyakamuchisya kuti aŵe mpayiniya jwakutamilichika. Upayiniya ukusapeleka upile wakutenda mautumiki ga ndaŵi syosope gane mpela kukamula masengo ga yakutaŵa kapena kuja kutumichila pa Beteli.

15-16. Ana m’bale jwachinyamata mpaka atende uli kuti aŵajilwe kutumichila mumpingo?

¹⁵ Kuŵa jwakutumichila jwakamuchisya kapena jwamkulungwa jwa mumpingo. Achalume ŵa Chiklistu akusosekwa kukola chakulinga chakukwanilisya kuŵa achakulungwa ŵa mumpingo kuti ŵatumichileje abale ni alongo. Baibulo jikusasala kuti achalume ŵakulingalinga kuti aŵe pa udindowu “akusachilila masengo gambone.” (1 Tim. 3:1) M’bale mkanatande kutumichila mpela jwamkulungwa jwa mumpingo akusatumichila kaje pa udindo wa jwakutumichila jwakamuchisya. Jwakutumichila jwakamuchisya akusiŵakamuchisya achakulungwa ŵa mumpingo m’matala gejinji. Mwakulinandiya achakulungwa ŵa mumpingo pampepe ni ŵakutumichila ŵakamuchisya akusiŵatumichila abale ni alongo, soni akusalipeleka mnope pamasengo gakulalichila. Abale ŵachinyamata mpaka aŵajilwe kutumichila pa udindo wa jwakutumichila jwakamuchisya atamose pali ŵachinyamata mnope. Jwakutumichila jwakamuchisya jwakutenda chenene pa utumiki wakwe mpaka aŵichidwe kuŵa jwamkulungwa jwa mumpingo atamose pali ni yaka ya mma 20.

¹⁶ Pana yindu yakusosekwa kutenda jwachinyamata kuti akwanilisye maudindoga. Yakusosekwa kuyikwanilisya yigonile pa kumnonyela Yehofa, kulinonyela liŵasa lyawo, soni kwanonyela abale ni alongo mu mpingo. (1 Tim. 3:​1-13; Tit. 1:​6-9; 1 Pet. 5:​2, 3) Alolechesyeje kuti akuyipikanichisya yeleyi. Amŵendeje Yehofa kuti ŵakamuchisye kukwanilisya mbalisi. c

17. Ana m’bale jwachinyamata mpaka atende yamtuli pakosechela kuti chaŵe jwamlume jwamlombele soni mtwe wa liŵasa? (Alole chiwulili.)

¹⁷ Kulombela soni kuŵa mtwe waliŵasa. Mpela muŵasalile Yesu, achalume ŵa Chiklistu ŵakudalilichika ŵane akusasagula ngalombela. (Mat. 19:12) Nambope, naga mkusagula kulombela ni kuti mkonjechesya udindo wine wakuŵa jwamlume jwamlombele soni mtwe waliŵasa. (1 Akoli. 11:3) Yehofa akusajembecheya jwamlume jwamlombele kuti ŵanonyeleje  ŵamkwakwe soni kwasamalila mwakwapa yakusosechela ya paumi, yausimu soni kwapikanichisya mwakupikanila mumtima. (Aef. 5:​28, 29) Yindu yatukambilene mu nganiji, mpela kuganisya chenene, kwachimbichisya achakongwe soni kuŵa ŵakudalilichika, yichimkamuchisya pamlombele. Chimchiŵa ŵakoseka kutenda chenene pa udindo wenu mpela jwamlume jwamlombele soni mtwe waliŵasa.

18. Ana m’bale jwachinyamata mpaka akosechele chamtuli kuti chaŵe mtati?

¹⁸ Kuŵa mtati. Panyuma pakuti mlombele, komboleka kuti chim’chiŵa mtati. Ana mpaka mlijiganye chichi kutyochela kwa Yehofa kuti chimŵe mtati jwambone? Pana yejinji yampaka mlijiganye. (Aef. 6:4) Yehofa ŵamsalilaga Mwanache jwakwe, Yesu kuti akusamnonyela soni akusasangalala najo. (Mat. 3:17) Naga chimchiŵa mtati, chimlolechesye kuti mkwasalila ŵanache ŵenu ndaŵi ni katema kuti mkusimwanonyela. Chimwayamichileje pa yambone yakukombola kutenda. Atati ŵakusajigalila chisyasyo cha Yehofa akusiŵakamuchisya ŵanache ŵawo kuti aŵe achalume soni achakongwe ŵa Chiklistu ŵakudalilichika. Mpaka mtende chenene kutanda kukosechela apano ya udindowu. Mpaka mtende yeleyi mwakwasamalila ŵandu ŵa mwiŵasa mwenu soni Aklistu achimjenu, nambosoni mwakulingalinga kwalosyaga chinonyelo soni kwayamichila jemanjajo. (Yoh. 15:9) Yeleyi yichimkamuchisya kuti chimkwanilisye kutenda chenene udindo wenu wamsogolo wakuŵa jwamlume jwamlombele soni mtati. Nambosoni chiyimkamuchisye apano kuŵa mundu jwakusosekwa mnope kwa Yehofa, mu liŵasa mwenu soni mu mpingo.

19-20. Ana chichi champaka chakamuchisye abale ŵachinyamata kuti aŵe Aklistu ŵakudalilichika? (Alole chiwulili chapachikuto.)

¹⁹ Jemanja abale ŵachinyamata, mkusosekwa kumanyilila kuti yangatendekwa mwajika kuti mundu aŵe jwamlume jwa Chiklistu jwakudalilichika. Mkusosekwa kusagula yisyasyo yambone yamkusasosekwa kujigalila. Mkusosekwasoni kuŵa ŵakuganisya chenene, ŵakudalilichika, kulijiganya masengo soni kukosechela chenene maudindo genu ga msogolo.

²⁰ Jemanja ŵachinyamata ndaŵi sine mpaka mlipikaneje kuti nganimŵa mkombwele kukwanilisya maudindo gelega. Nambope mkalikayichilaga. Mkumbuchileje kuti Yehofa ali jwakusachilila kumkamuchisya. (Yes. 41:​10, 13) Nambosoni abale ni alongo mu mpingo mpaka amkamuchisye. Mmanyilileje kuti naga chimchikwanilisya kuŵa jwamlume jwa Chiklistu jwakudalilichika, chimchiŵa ŵakusangalala mnope. Tukusamnonyela mnope jemanja ŵachinyamata. Lili lipopelo lyetu lyakuti Yehofa amlongolele pamkulingalinga kutenda yampaka mkombole kuti chimŵe achalume ŵa Chiklistu ŵakudalilichika.—Mis. 22:4.