1. Ana tukusosekwa kutenda chichi kuti tuŵe Mklistu jwakudalilichika?

 YAKUSATI mwanache pakukula mwachitema ni kuŵa mundu jwamkulungwa yikusaŵa yakusimonjesya. Yeleyi yikusawoneka mpela yigambile kutendekwa jika. Myoyo, kuti mundu aŵe Mklistu jwakudalilichika yangagamba kutendekwa mwajika.  b (1 Akoli. 13:11; Aheb. 6:1) Kuti yeleyi yikomboleche, tukusasosekwa kuŵa paunasi wambone ni Yehofa. Tukusasosekwasoni msimu weswela kuti utukamuchisye kola ndamo syakusasaka Mlungu, kulijiganya yindu yampaka yitukamuchisye paumi wetu, soni kukosechela maudindo ga msogolo.—Mis. 1:5.

2. Ana tukusalijiganya chichi pa Genesesi 1:27? Ana chitukambilane yamtuli munganiji?

² Yehofa ŵalinganyisye yakuti ŵandu apagweje jwamlume kapena jwamkongwe. (Aŵalanje Genesesi 1:27.) Yisyene kuti achalume ni achakongwe mwachipago ali ŵakulekangana. Nambope jemanjaji akusalekanganasoni m’matala gane. Mwachisyasyo, Yehofa ŵapanganyisye achalume soni achakongwe kuti akwanilisyeje maudindo gawo. Myoyo, jemanjaji akusasosekwa kola ndamo soni maluso gampaka gakamuchisye kukwanilisya maudindo gawogo. (Gen. 2:18) Munganiji chitukambilane yampaka atende alongo ŵachisikana kuti aŵe Aklistu ŵakudalilichika. Mungani jakuyichisya tuchikambilana yampaka atende abale ŵachinyamata kuti aŵe Aklistu ŵakudalilichika.

3-4. Ana alongo ŵachisikana mpaka apate kwapi yisyasyo yampaka ajigalile? (Alole chiwulili.)

³ Baibulo jikusasala ya achakongwe ŵambone ŵaŵamnonyelaga soni kumtumichila Yehofa. (Alole pa jw.org ngani jakuti, “Kodi  Tingaphunzire Chiyani kwa Akazi Otchulidwa m’Baibulo?”) Mpela mwalikuŵechetela lilemba lyakulongolela nganiji, jemanjaji ‘ŵatendaga yindu mwangapundanganya malile’ soni ŵaliji “ŵakulupichika pa yindu yosope.” Kupwatika pelepa, alongo ŵachisikana mpaka apatesoni mumpingo mwawo alongo ŵachikulile ŵampaka ajigalile yisyasyo yawo.

⁴ Jemanja alongo ŵachisikana, mpaka mtende chenene kupata alongo ŵachikulile ŵa Chiklistu ŵampaka mjigalile yisyasyo yawo. Mloleje ndamo syambone syakwete jemanjaji, kaneko mloleje yampaka mtende pakusyasya ndamosyo. Mundime syakuyichisyasi chitukambilane ndamo siŵili syambone mnope syakusasosekwa kola alongo ŵakudalilichika.

5. Ligongo chichi kulinandiya kuli kwakusosekwa mnope kwa jwamkongwe jwa Chiklistu jwakudalilichika?

⁵ Kulinandiya jili ndamo jakusosekwa mnope kuti mundu aŵe Mklistu jwakudalilichika. Naga jwamkongwe ali jwakulinandiya akusaŵa paunasi wambone mnope ni Yehofa soni ŵandu ŵane. (Yak. 4:6) Mwachisyasyo, jwamkongwe jwakusamnonyela Yehofa akusapikanila mwakulinandiya dongosolo jaŵalinganyisye jwalakwe jakola ŵandu ŵakwete udindo. (1 Akoli. 11:3) Dongosolo jeleji jikusakamula masengo mnope mumpingo soni mu liŵasa. c

6. Ana alongo ŵachisikana mpaka alijiganye chichi kutyochela kwa Labeka?

⁶ Aganichisye chisyasyo cha Labeka. Jwalakwe jwaliji jwamkongwe jwalunda, mwamti kwa umi wakwe wosope jwasagulaga yindu mwaganisya chenene. (Gen. 24:58; 27:​5-17) Atamose kuti yaliji myoyo, jwalakwe jwaliji jwaulemu soni jwakupikanila. (Gen. 24:​17, 18, 65) Naga jemanjasoni mkutenda yindu mwakulinandiya mpela Labeka ni kwapikanilaga ŵandu ŵele Yehofa ŵapele udindo, chimchiŵa chisyasyo chambone kwa ŵandu ŵa mwiŵasa mwenu nambosoni mumpingo.

7. Ana alongo ŵachisikana mpaka amsyasye chamtuli Esitele pangani ja kulinandiya?

⁷ Aklistu wosope ŵakudalilichika akusasosekwa kuŵa ŵakulinandiya. Baibulo jikusasala kuti “lunda lukusaŵa ni ŵandu ŵakulinandiya.” (Mis. 11:​2, NWT.) Nombe Esitele jwaliji jwamkongwe jwakulinandiya juŵamtumichilaga Mlungu. Kulinandiya  kwamkamuchisye jwalakwe kuŵambala kutenda yindu mwakunyada. Mmalomwakwe jwalakwe jwapikanile soni kukuya malangiso ga Modekayi juŵaliji jwachikulile soni juŵaliji msuŵani jwakwe. (Est. 2:​10, 20, 22) Jemanjasoni mpaka mlosye kulinandiya mpela Esitele mwakuwusya malangiso kwa ŵane soni kugakuya.—Tit. 2:​3-5.

8. Mwakamulana ni 1 Timoteyo 2:​9, 10, ana kulinandiya mpaka kumkamuchisye chamtuli mlongo kusagula yindu mwalunda pangani ja kawale soni kalisalalisye?

⁸ Esitele jwalosisye kulinandiya m’litala linesoni. Jwalakwe jwaliji “jwakusalala soni jwakunonyelesya.” Nambope jwalakwe jwaŵambalaga kutenda yindu yakuti amanyiche. (Est. 2:​7, 15) Ana chisyasyo cha Esitele mpaka chimkamuchisye chamtuli jemanja alongo ŵa Chiklistu? Litala limo likusasimanikwa pa 1 Timoteyo 2:​9, 10. (Aŵalanje.) Palilembali, ndumetume Paulo jwasalile achakongwe ŵa Chiklistu kuti awaleje mwakulichimbichisya soni mwakulosya kuti ali ŵaganisya chenene. Maloŵe ga Chigiliki gaŵagakamulichisye masengo palilembali gakusalosya kuti jwamkongwe jwa Chiklistu akusasosekwa kuganichisya mwampaka yakwayile ŵane yakuwala yakwe. Tukusamyamichila mnope jemanja alongo ŵa Chiklistu ligongo lyakuti mkusakuya malangiso gelega mwakuwala mwakulichimbichisya.

9. Ana mpaka tulijiganye chichi kutyochela pa chisyasyo cha Abigelo?

⁹ Kuganisya chenene jili ndamo jinesoni jakusakola alongo ŵa Chiklistu ŵakudalilichika. Ana kuganisya chenene kukusagopolela chichi? Kuganisya chenene kuli kulekanganya chindu chambone ni chakusakala kaneko nikusagula kutenda yambone. Aganichisye chisyasyo cha Abigelo. Pandaŵi jine, ŵamkwakwe ŵatesile yindu mwangaganisya chenene yayikatendekasisye kuti liŵasa lyawo lisimane ni yakusawusya. Nambo Abigelo jwatesile yindu mwachitema. Ligongo lyakuti jwalakwe jwatesile yindu mwalunda jwakulupwisye ŵandu ŵa mwiŵasa mwakwe. (1 Sam. 25:​14-23, 32-35) Kuganisya chenene kukusatukamuchisyasoni kuti tumanyilileje ndaŵi jakuŵecheta soni ndaŵi jakutama jii. Nambosoni kukusatukamuchisya kuti tuŵambaleje kwinjilila ngani sya achimsyene patukusaka kumanyilila mwayiŵelele yindu paumi wawo.—1 Ates. 4:11.

10-11. Ana kulemba soni kuŵalanga chenene mpaka kumkamuchisye chamtuli mlongo jwachisikana soni ŵandu ŵane? (Alole chiwulili.)

¹⁰ Jwamkongwe jwa Chiklistu akusasosekwa kulijiganya yindu yampaka yimkamuchisye paumi wakwe. Yindu yine yakusalijiganya msikana ali jwachinandipile yikusamkamuchisya kwa umi wakwe wosope. Kwende tulole yine mwa yindu yeleyi.

¹¹ Mlijiganyeje kulemba soni kuŵalanga chenene. M’madela gane, ŵandu akusayiwona kuti jwamkongwe ngakusasosekwa kulijiganya kulemba soni kuŵalanga. Nambope, yindu yeleyi yili yakusosekwa mnope kwa Mklistu jwalijose. d (1 Tim. 4:13) Myoyo, akakunda chilichose kuti chalepelekasye kulijiganya kulemba soni kuŵalanga chenene. Ana kutenda yeleyi kuchakamuchisya chamtuli? Naga akusamanyilila  kulemba soni kuŵalanga chenene mpaka yakamuchisye kuti apate masengo. Mpaka yakamuchisyesoni kuti alijiganyeje Baibulo soni kwajiganya ŵane mwangalajilila. Kupunda pa yosopeyi, kuŵalanga soni kuganichisya yaŵalasile m’Baibulo kuchakamuchisya kuŵa paunasi wambone ni Yehofa.—Yos. 1:8; 1 Tim. 4:15.

12. Ana lilemba lya Misyungu 31:26 mpaka lyakamuchisye chamtuli alongo ŵachisikana kuti aŵechetaneje chenene ni ŵane?

¹² Mlijiganyeje kuŵechetana mwaulemu ni ŵane. Aklistu akusasosekwa kuŵechetana chenene. Yakobo jwapeleche malangiso gambone mnope panganiji. Jwalakwe jwatite, “Mundu jwalijose aŵeje jwakwanguya kupikana, jwangawutuchila kuŵecheta.” (Yak. 1:19) Pamkwapikanila chenene ŵane pakuŵecheta, mkusalosya kuti ‘mkwaganichisya’ jemanjajo. (1 Pet. 3:8) Naga nganimpikanichisya yakuŵecheta mundu, mpaka mtende chenene kumwusya mwaulemu kuti mpikanichisye. Kaneko mpaka mtende chenene kuganichisya mkanimŵe kuŵecheta. (Mis. 15:28) Mpaka mliwusye kuti, ‘Ana yangusaka kuŵechetayi yili yisyene soni yakulimbikasya? Ana chiyilosye kuti ngumchimbichisya soni kumganichisya munduju?’ Mpaka mtende chenene kulijiganya kutyochela kwa alongo ŵachikulile ŵakusakombola kuŵechetana chenene ni ŵane. (Aŵalanje Misyungu 31:26.) Mlolechesyeje yakusati jemanjajo pakuŵecheta ni ŵane. Pamkulimbichila mnope kulijiganya yampaka mjile pakuŵechetana ni ŵane, ni pamkusaŵasoni paunasi wambone ni jemanjajo.

13. Ana alongo ŵachisikana mpaka alijiganye chamtuli masengo gakusamalila panyumba? (Alole chiwulili.)

¹³ Mlijiganyeje masengo ga pamlango. M’madela gejinji achakongwe ni ŵakusakamula masengo gejinji ga pamlango. Nangolo jwamkongwe kapena mlongo jwakusamanyilila chenene masengogo mpaka ŵajiganye alongo ŵachisikana. Mlongo Cindy jwatite, “Chindu chakusosekwa mnope chaŵambele mama ŵangu chaliji kunjiganya kuti mundu akusasangalala pakulimbichila kukamula masengo. Kulijiganya yindu mpela kuteleka, kuswejesya pamlango, kutota yakuwala, soni kukamulichisya masengo mbiya mwakuŵajilwa pakusuma yindu yingamuchisye kuti ngomboleje kulisamalila namsyene soni kuti ngomboleje kutenda yejinji pakumtumichila Yehofa. Mama ŵanjiganyisyesoni kwapochela chenene achalendo. Yeleyi yingamuchisye kuti ngole upile wakusimana ni abale soni alongo ŵakwete yisyasyo yambone yampaka njigalile.” (Mis. 31:​15, 21, 22) Kusala yisyene, jwamkongwe jwakusakombola kulinganya chenene panyumba pakwe soni kwapochela chenene achalendo, akusakamuchisya kuti ŵandu ŵa mu liŵasa lyakwe soni ŵa mumpingo mwakwe aŵeje ŵakusangalala.—Mis. 31:​13, 17, 27; Mase. 16:15.

14. Ana alongo ŵachisikana akulijiganya chichi kwa Mlongo Crystal, soni akusosekwa kukumbuchila chichi?

¹⁴ Mlijiganyeje kuŵa jwakulijimila pajika. Kulijimila pajika kuli chindu chakusosekwa mnope kuti mundu aŵe Mklistu jwakudalilichika. (Afil. 4:11) Mlongo Crystal jwatite, “Panaliji ku sukulu achinangolo ŵangu ŵangamuchisye kusagula majiganyo gampaka gangamuchisye paumi wangu. Baba ŵangu ŵanimbikasisye kuti ndende majiganyo gakuŵalanjila mbiya. Yeleyi yangamuchisye mnope.” Kupwatika pakulijiganya yindu yampaka yimkamuchisye kupata masengo, mpaka mtende chenenesoni kulijiganya kakamulichisye masengo ka mbiya mwalunda.  Yeleyi mpaka yimkamuchisye kuti mŵambaleje ngongole syangasosekwa. (Mis. 31:​16, 18) Myoyo, naga mkukombola kulijimila pajika soni kuŵambalaga ngongole syangasosekwa, yichimkamuchisya kuti mkombole kutenda yejinji pakumtumichila Yehofa.—1 Tim. 6:8.

15-16. Ana alongo ŵangalombela akusiŵakamuchisya chamtuli ŵane? (Maliko 10:​29, 30)

¹⁵ Mpaka mkosechele maudindo ga msogolo mwakulingalinga kola ndamo syambone soni kulijiganya yindu yampaka yimkamuchisye paumi wenu. Kwende tulole yine mwa yindu yeleyi.

¹⁶ Mpaka msagule kutama ngalombela kwakandaŵi. Mwakamulana ni maloŵe ga Yesu, achakongwe ŵane akusasagula kuti akalombela. Jemanjaji akusasagula kutenda yeleyi atamose yili mkuti kutenda yeleyo kuli kwakutesya sooni kumangwawoko. (Mat. 19:​10-12) Nambo ŵane mpaka atame ŵangalombela pamagongo gakulekanganalekangana. Myoyo, mkusosekwa kumanyilila kuti Yehofa soni Yesu jwangamwona jemanja kuŵa ŵakutuluka ligongo lyakuti mli ŵangalombela. Pachilambo chosope, alongo ŵangalombela akusaŵa yisyasyo yambone mumpingo. Ligongo lyakuti jemanjaji akusiŵanonyela ŵane, akusaŵa achinangolo ŵa ŵandu ŵajinji mumpingo.—Aŵalanje Maliko 10:​29, 30; 1 Tim. 5:2.

17. Ana mlongo jwachisikana mpaka akosechele chamtuli kuti chatende utumiki wandaŵi syosope?

¹⁷ Mpaka mtende utumiki wandaŵi syosope. Achakongwe ŵa Chiklistu akusakamuchisya mnope pamasengo gakulalichila pachilambo chosope. (Sal. 68:11) Ana apano mpaka mlinganye yakutanda utumiki wandaŵi syosope? Mpaka mtumichile mpela mpayiniya, kamuchisya pamasengo ga yakutaŵa, kapena kutumichila pa Beteli. Mpaka mtende chenene kumsalila Yehofa ya chakulinga chimkwete. Mpaka yiŵe chenenesoni kwawusya ŵandu ŵakwanisye kutenda utumiki wamkusakawo, ni kulola yampaka mtende kuti mkombole utumikiwo. Kaneko mkusosekwa kulinganya pulani jampaka jimkamuchisye kuti yamkusakayo yikomboleche. Pamtandite utumiki wandaŵi syosope, chimchikola upile wakumtumichila Yehofa mmatala gejinji.

18. Ligongo chichi mlongo akusasosekwa kusagula mwakusamala mundu jwakusaka kulombana najo? (Alole chiwulili.)

¹⁸ Mpaka msagule kulombela. Ndamo soni yindu yine yatulijiganyisye munganiji yichimkamuchisya kuŵa jwamkongwe jwambone. Yisyene kuti naga mkusaka kulombela, mkusosekwa kusagula mwakusamala mundu jwakulombana najo. Tukuŵecheta yeleyi ligongo lyakuti kusagula mundu jwakulombana najo chili chimo mwa yindu yakusosekwa mnope yachimchisosekwa kutenda paumi wenu. Mkumbuchileje kuti chimchisosekwa kumpikanila jwamlume jwachimchilombana najo. (Alo. 7:2; Aef. 5:​23, 33)  Myoyo, mkusosekwa kuliwusya kuti, ‘Ana jwalakwe ali Mklistu jwakudalilichika? Ana akusaŵika pamalo gandanda yindu yakwayana ni kumtumichila Yehofa? Ana akusasagula yindu mwalunda? Ana mpaka ajitichisye yakulemwa yakwe? Ana akusiŵachimbichisya achakongwe? Ana mpaka akombole kungamuchisya kuŵa paunasi wambone ni Yehofa, kumbatila yakusosechela yakuchilu soni kuŵa mjangu jwambone? Ana akusatenda chenene maudindo gakwe? Mwachisyasyo, ana ni maudindo gapi gakwete mumpingo soni akusagatenda mwamtuli?’ (Luk. 16:10; 1 Tim. 5:8) Nambope mkumbuchileje kuti mpaka mpate jwamlume jwambone, naga nombe mmwejosoni mli jwamkongwe jwambone.

19. Ligongo chichi jwamkongwe ngakusosekwa kudandawulaga pakukolanjidwa kuti ‘jwakwakamuchisya’ ŵamkwakwe?

¹⁹ Baibulo jikusasala kuti jwamkongwe jwambone akusiŵakamuchisya ŵamkwakwe soni akusaŵa “mjakwe jwakuŵajilana najo.” (Gen. 2:18) Ana yeleyi yikugopolela kuti jwamkongwe ali jwakutuluka pameso pa ŵamkwakwe? Iyayi. Kuli kumchimbichisya mnope jwamkongwe kumpa udindo wakwakamuchisya ŵamkwakwe. Akumbuchile kuti atamose Yehofa ndaŵi sine m’Baibulo akusakolanjidwa kuti ‘jwakamuchisya.’ (Sal. 54:4; Aheb. 13:6) Kusala yisyene, jwamkongwe akusiŵakamuchisya ŵamkwakwe pakamulana ni yindu yasagwile ŵamkwakwewo yampaka yikamuchisye liŵasa lyawo. Nambosoni ligongo lyakumnonyela Yehofa, jwamkongwe akusaŵambala kutenda yindu yampaka yijonanje mbili ja ŵamkwakwe. (Mis. 31:​11, 12; 1 Tim. 3:11) Mpaka mkosechele apano maudindo gachimchikola kusogologa mwakumnonyela mnope Yehofa soni mwakwakamuchisya ŵandu ŵa mu liŵasa lyenu soni abale ni alongo.

20. Ana ni yindu yambone yapi yampaka atende jwamkongwe jwakwete ŵanache?

²⁰ Komboleka chimchiŵa nangolo. Panyuma pa kulombela, komboleka chimchikola ŵanache. (Sal. 127:3) Myoyo, mpaka mtende chenene kukosechela chile maudindo gelego. Ndamo soni yindu yine yatukambilene munganiji, yichimkamuchisya pachimchilombela kapena pachimchikola ŵanache. Kwanonyela ŵane soni kutenda yindu mwakuwusimana mtima, yichimkamuchisya kuti chimkole liŵasa lyakusangalala, mwamti ŵanache ŵenu chachisangalalaga mnope.—Mis. 24:3.

21. Ana tukusapikana uli ni yakusatenda alongo ŵetu, soni ligongo chichi? (Alole chiwulili chapachikuto.)

²¹ Tukusamyamichila mnope jemanja alongo pa yindu yosope yimkusatenda pakumtumichila Yehofa soni pakwakamuchisya Aklistu achimjenu. (Aheb. 6:10) Mkusalipeleka mnope kuti mkole ndamo syambone, kulijiganya masengo gampaka gamkamuchisye mwachimsyene soni ŵandu ŵane, nambosoni pakukosechela chenene maudindo ga msogolo. Kusala yisyene, jemanja mli ŵakusosekwa mnope mu gulu ja Yehofaji.