1. Ana chichi chichamtendekasisye Abulahamu kupitilisya kwembecheya yakuti chachikola mwanache?

 YEHOFA ŵamsalile Abulahamu kuti mitundu josope ja pachilambo chapasi jichipochela upile kupitila mwa ŵanache ŵakwe. (Gen. 15:5; 22:18) Ligongo lyakuti Abulahamu ŵamkulupililaga mnope Mlungu, jwamanyililaga kuti yindu yaŵamsalile Mlungu yichitendekwa. Atamose kuti yaliji myoyo, Abulahamu paŵakwete yaka 100 soni ŵamkwakwe paŵakwete yaka 90, jemanjaji ŵalijipe mkanakole mwanache. (Gen. 21:​1-7) Nambope, Baibulo jikusasala kuti, “Abulahamu ŵajembecheyaga kuti chachiŵa baba jwa ŵandu ŵamitundu jejinji . . . mwakamulana ni yaŵaŵechete Mlungu.” (Alo. 4:18) Tukumanyilila kuti yaŵajembecheyaga Abulahamu yakwanilichikwe. Mwamti jwalakwe jwaŵele nangolo jwa Isaki mwanache juŵamjembecheyaga kwandaŵi jelewu. Ligongo chichi Abulahamu jwakulupililaga kuti Yehofa chachikwanilisya yajwasasile?

2. Ligongo chichi Abulahamu jwakulupililaga kuti yasasile Yehofa yichitendekwa?

² Ligongo lyakummanyilila chenene Yehofa, Abulahamu “ŵaliji jwakusimichisya kuti Mlungu chachikwanilisya” yajwasasile. (Alo. 4:21) Yehofa ŵamjitichisye Abulahamu soni ŵamkolasile kuti ali jwakulungama ligongo lyakuti jwakwete chikulupi. (Yak. 2:23) Mpela mwalikuŵechetela lilemba lya Aloma 4:​18, Abulahamu jwakwete chikulupi soni chembecheyo. Sambano kwende tukambilane maloŵe gajŵaŵechete ndumetume Paulo gakwamba chembecheyo, gagakusimanikwa mu chaputala 5 cha buku ja Aloma.

3. Ana Paulo jwasasile yamtuli yakwamba chembecheyo?

³ Paulo jwalondesisye ligongo lyakwe tukusosekwa kuŵa ŵakusimichisya kuti ‘chembecheyo [chetu] ngaŵa mkututengusya.’ (Alo. 5:5) Jwalakwe jwatukamuchisyesoni kumanyilila yampaka tutende kuti tuyikulupilileje mnope yindu yatukwembecheya. Pachitukambilaneje yayili pa Aloma 5:​1-5, jwalijose mpaka atende chenene kuganichisya yachitite pakulimba chembecheyo chakwe cha yindu yamsogolo. Kukambilana nganiji chikutukamuchisyesoni kumanyilila yampaka tutende kuti tuyikulupilileje mnope yindu yatukwembecheya.  Sambano kwende tukambilane ya chembecheyo chakusangalasya mnope chaŵasasile Paulo kuti ngaŵa mkututengusya.

4. Ana pa Aloma 5:​1, 2, pana ngani jamtuli?

⁴ Aŵalanje Aloma 5:​1, 2. Paulo jwalembele maloŵe gelega ŵandu ŵa mu mpingo wa ku Loma. Abale ni alongo ŵa mu mpingowu ŵalijiganyisye yakwamba Yehofa soni Yesu, ŵakwete chikulupi, nambosoni ŵaŵele Aklistu. Myoyo, Mlungu ‘ŵaweni [jemanjajo] kuŵa ŵakulungama ligongo lya chikulupi,’ mwamti ŵasagwile jemanjajo ni msimu weswela. Apatu jemanjaji ŵapatile chembecheyo chakusangalasya mnope.

5. Ana ŵasagulwe akwete chembecheyo chamtuli?

⁵ Kaneko Paulo jwalembele Aklistu ŵasagulwe ŵa ku Efeso yakwamba chembecheyo chaŵapele Mlungu jemanjajo. Chembecheyo chelecho chaliji chakuti chachipochela “chipanje chapenani chaŵasunjile ŵaswela wosope.” (Aef. 1:18) Paulo jwasalilesoni Aklistu ŵa ku Kolose kuchachipochelela mboto jawo. Jwalakwe jwajikolasile mbotoji kuti jili ‘chembecheyo chakwete chakuti chachipochela yindu yaŵasunjile kwinani.’ (Akolo. 1:​4, 5) Myoyo, chembecheyo chakwete Aklistu ŵasagulwe chili chakuti chachijimuka ku chiwa nikuja kupochela umi wangamala kwinani kuchachilamulila ni Klistu.—1 Ates. 4:​13-17; Chiw. 20:6.

6. Ana m’bale jwine jwamsagulwe jwasasile yamtuli pakwamba ya chembecheyo chakwe?

⁶ Aklistu ŵasagulwe akusanyadila mnope ya chembecheyo chelechi. Mwamti M’bale Frederick Franz jumo jwa jemanjaji jwasasile maloŵe gakuyichisyaga pakwamba ya chembecheyo chakwe. Jwalakwe jwatite, “Chembecheyo chetu chili chisyesyene, mwamti chichikwanilichikwa kwa jwalijose jwetuwe jwali mu gulu ja 144,000. Mboto jetu jichiŵa jambone mnope kupunda yatuŵele tuli mkuyiganichisya.” Panyuma pakumtumichila Mlungu mwakulupichika kwa yaka yejinji, mu 1991 M’bale Franz jwasimichisye kuti, “Nganituleka kukuwona kusosekwa kwa chembecheyo chelecho. . . . Patukwembecheya kwandaŵi jelewu, ni patukusasangalala mnope ni chembecheyochi. Chili chindu chakusosekwa kuchijembecheya, atamose kwa yaka mamiliyoni. Ngusayamichila  mnope ya chembecheyo chetu kupundana ni kalakose.”

7-8. Ana ŵandu ŵajinji akwete chembecheyo chamtuli? (Aloma 8:​20, 21)

⁷ Ŵandu ŵajinji ŵakusamtumichilaga Yehofa masiku agano akwete chembecheyo chakulekangana ni chakwete ŵasagulwe. Jemanjaji akwete chembecheyo chajwakwete Abulahamu chakutama ni umi wangamala pachilambopa mu ulamusi wa Uchimwene wa Mlungu. (Aheb. 11:​8-10, 13) Paulo jwalembile yindu yambone yakwembecheya ŵandu ŵakwete chembecheyo chelechi. (Aŵalanje Aloma 8:​20, 21.) Ana wawojo ŵasangalele mnope ni chichi paŵalijiganyisye kandanda yajikusasala Baibulo pakwamba yamsogolo? Ana chaliji chakuti lisiku line chachiŵa jwamlama? Kapena ŵasangalele mnope paŵalijiganyisye yakuti lisiku line ŵachinasi ŵawo chachikolasoni umi mu paladaiso? Ligongo lya chembecheyo chatupele Mlungu, akwete yindu yejinji yakwembecheya kuyiwona yili mkukwanilichikwa.

⁸ Chinga tukwete chembecheyo chakutama ni umi wangamala kwinani kapena pachilambopa, wosopewe tukwete magongo gambone gakusangalalila ligongo lya chembecheyo chetu. Sonitu chembecheyo chatukwete mpaka chikule mnope. Paulo jwasasile yampaka tutende kuti yeleyi yikomboleche. Kwende tulole yajwalembile jwalakwe pakwamba ya chembecheyo chetu. Kutenda yeleyi chikutukamuchisye kuti tukakayichilaga yakuti yindu yatukwembecheya yichitendekwa.

9-10. Mwakamulana ni chisyasyo cha Paulo, ana Aklistu mpaka ajembecheye kusimana ni chichi? (Aloma 5:3) (Alole yiwulili.)

⁹ Aŵalanje Aloma 5:3. Palilembali pakulosya kuti yakusawusya mpaka yitukamuchisye kuti tuyikulupilileje mnope yindu yatukwembecheya. Komboleka akusimonga ni yeleyi. Nambotu ŵakumkuya wosope ŵa Klistu mpaka ajembecheye kusimana ni yakusawusya. Aganichisye chisyasyo cha Paulo. Jwalakwe jwasalile Aklistu ŵa ku Tesalonika kuti, “Jemanja mkumanyilila chenene kuti patwaliji kweleko, twaliji kumsalila kuti tuchisimana ni yakusawusya, sonitu yeleyi ni yayitendekwe kwene.” (1 Ates. 3:4) Kwa Aklistu ŵa ku Kolinto jwalembele kuti, “Ngatukusaka kuti jemanja  achalongo achimjetu mkamanyilila ya yakusawusya yatwasimene nayo . . . Twakayichilaga naga chituŵesoni ni umi.”—2 Akoli. 1:8; 11:​23-27.

¹⁰ Nombe masiku agano Aklistu mpaka ajembecheyeje kusimana ni yakusawusya. (2 Tim. 3:12) Nambi uli pakwamba ya wawojo? Ana pakwete palagasidwe ligongo lya kumkulupilila Yesu soni kuŵa jwakumkuya jwakwe? Komboleka achimjawo soni ŵachinasi ŵawo ŵanyosisye kapena kwatendela yindu mwangasa. Kombolekasoni ŵasimene ni yakusawusya kumasengo ligongo lyakutenda yindu mwakuwona mtima. (Aheb. 13:18) Mwinesoni pakwete palagasidwe ni ŵaboma ligongo lyakwalalichila ŵane. Chinga tukusimana ni yakusawusya yamtuli, Paulo jwasasile kuti tukusosekwa kusangalala. Ligongo chichi Paulo jwasasile yeleyi?

11. Ligongo chichi tukusosekwa kuŵa ŵakusimichisya kupilila yakusawusya yampaka tusimane nayo?

¹¹ Mpaka tusangalaleje patukusimana ni yakusawusya ligongo tukusamanyilila kuti mpaka yitukamuchisye kola ndamo jakusosekwa mnope. Pa Aloma 5:3 pakusasala kuti, ‘yakusawusya yikusatutendekasya kuŵa ŵakupilila.’ Ligongo lyakuti Aklistu wosope chachisimana ni yakusawusya, jemanjaji akusosekwa kuŵa ŵakupilila. Myoyo tukusosekwa kuŵa ŵakoseka kuyipilila yakusawusya yiliyose yampaka tusimane nayo. Patukutenda yeleyo tuchikombola kukuwona kukwanilichikwa kwa yindu yatukuyijembecheya. Ngatukusosekwa kuŵa mpela ŵandu ŵaŵaganichisyaga Yesu pajwaŵechetaga ya mbeju syasyagwilile palwala. Pandanda jemanjaji akusajitichisya maloŵe ga yisyesyene mwakusangalala, nambo “pasimene ni yakusawusya kapena pakulagasidwa,” akusajasa chikulupi chawo ndaŵi jijojo. (Mat. 13:​5, 6, 20, 21) Yisyene kuti yakusawusya kapena kulagasidwa nganiyiŵa yakusangalasya, nambope patukuyipilila tukusapata upile wekulungwa. Ana upilewu ukusayika m’litala lyapi?

12. Ana kupilila yakusawusya kukusatukamuchisya chamtuli?

¹² Yakobo jwasasile upile wawukusayika ligongo lyakupilila yakusawusya. Jwalakwe jwalembile kuti, “Mkunde kuti kupililako kumalisye masengo gakwe, ni chakulinga chakuti mŵeje ŵakwanila chenene, ŵangali chakulemwecheka chilichose soni ŵangapelembela pa chilichose.” (Yak. 1:​2-4) Yakobo jwakulondesisye kupilila mpela kuti kukwete masengo gakuti kukamule. Ana masengo gakwe gapi? Kupilila mpaka kwakamuchisye kukusya ndamo mpela kuwusimana mtima, chikulupi, soni kumdalila Mlungu. Nambope panasoni chindu chine chakusosekwa mnope chatukusapata patukupilila yakusawusya.

13-14. Ana kupilila kukusakola yakuyichisya yamtuli? Ana yeleyi yikusakamulana chamtuli ni chembecheyo?

¹³ Aŵalanje Aloma 5:4. Paulo jwasasile kuti kupilila “kukusamtendekasya Mlungu kuti atujitichisye.” Myoyo Yehofa akusiŵajitichisya wawojo naga akupilila. Nambotu yeleyi ngayikugopolela kuti Yehofa akusasangalala pakwawona wawojo ali mkusimana ni yakusawusya. Mmalomwakwe jwalakwe akusaŵa jwakusangalala wawojo pakupilila mwakulupichika. Kusala yisyene yili yakulimbikasya kumanyilila kuti patukupilila Yehofa akusasangalala.—Sal. 5:12.

¹⁴ Akumbuchile kuti Mlungu ŵamjitichisye Abulahamu ligongo lyakuti jwapilile yakusawusya. Mwamti jwaliji paujakwe ni Yehofa soni ŵamwonaga jwalakwe kuti ali jwakulungama. (Gen. 15:6; Alo. 4:​13, 22) Yeleyi ni yampaka yitutendechelesoni m’weji. Mlungu jwangatujitichisyaga pakujigalila winji wa masengo gatukusatendaga pakumtumichila kapena maudindo gatukwete. Mmalomwakwe,jwalakwe akusatujitichisyaga ligongo lya kupilila kwetu mwakulupichika. Nambosoni wosopewe mpaka tukombole kupilila mwangajigalila yaka yatukwete, lunda lwatukwete kapena mwayiŵelele yindu paumi wetu. Ana wawojo akupilila mwakulupichika chakusawusya chinechakwe apano? Naga yili myoyo, amanyilile kuti yakutendayo yikusamsangalasya Mlungu. Kumanyilila kuti Mlungu akutujitichisya mpaka kutukamuchisye kuti tuyikulupilileje mnope yindu yatukwembecheya.

15. Ana ni mfundo jine japi jaŵajisasile Paulo? Ligongo chichi yeleyi mpaka yasimonjesye ŵane?

¹⁵ Mpela yaŵatite Paulo pakulondesya, Yehofa akusatujitichisya patukupilila yakusawusya mwakulupichika. Paulo jwapitilisye mwakusala kuti, “Patujitichisye [Mlungu] tukusakola chembecheyo, soni chembecheyocho ngaŵa mkututengusya.” (Alo. 5:​4, 5) Komboleka yeleyi mpaka yasimonjesye ŵane. Tukuŵecheta yeleyi ligongo mwakamulana ni Aloma 5:​2, Paulo jwasasile kuti Aklistu ŵa ku Loma ŵaliji ali akwete kala, ‘chembecheyo chakuti chachipochela uchimbichimbi wakutyochela kwa Mlungu.’ Nambo komboleka ŵane mpaka akole chiwusyo chakuti, ‘Naga Aklistu ŵelewo ŵakwete kala chembecheyo, ligongo chichi Paulo jwasasilesoni ya chembecheyo kusogolo kwa ngani jakweji?’

16. Ana chembecheyo chikusatanda chamtuli kukula mwa mundu? (Alole yiwulili.)

¹⁶ Mpaka tupikanichisye yajwagopolelaga Paulo patukuganichisya yakuti chembecheyo chili chindu chachikusakula. Kuti tupikanichisye yeleyi kwende tuganichisye ayi: Ana akukumbuchila ndaŵi jele ŵapikene kandanda ya yindu yakusangalasya yayikusasimanikwa m’Maloŵe ga Mlungu? Komboleka kuti pandaŵi jelejo ŵaganisyaga kuti yakutama ni umi wangamala mu paladaiso kugambile kuŵa kumbila yindu yambone. Nambope, paŵatandite kummanyilila chenene Yehofa soni yindu yajikusasala Baibulo kuti yichitendekwa kusogoloku, ŵatandite kuyiwona kuti chembecheyo cha yindu yamsogolo chili chisyesyene.

17. Ana chembecheyo chawo chikusakula chamtuli panyuma pakulipeleka soni kubatisidwa?

¹⁷ Atamose palipeleche kwa Yehofa soni kubatisidwa, akusayikulupilila mnope yindu yakwembecheya kusogoloku pakupitilisya kulijiganya soni kumanyilila yejinji. (Aheb. 5:13–6:1) Mwamti komboleka kuti yikusiyatendechela yindu yakusayikolanga pa Aloma 5:​2-4. Wawojo akusimana ni yakusawusya yejinji, nambo akukombola kuyipilila mwamti Mlungu akwajitichisya. Ligongo lyakumanyilila kuti Mlungu akusiŵanonyela soni kusangalala ni wawojo, yikwatendekasya kuti akulupilileje mnope yindu yakwembecheya kusogoloku. Mwamti chembecheyo chawo chili  chakulimba mnope kupundana ni pandanda. Yili myoyo ligongo lyakuti apano yindu yakwembecheyayo akusayiwona kuŵa yisyesyene. Mwamti yikusakwaya chilichose chakutendekwa paumi wawo, mpela mwakusatendela yindu ni ŵandu ŵamwiŵasa mwawo, yindu yakusasagula kutenda, nambosoni yakusati pakukamulichisya masengo ndaŵi jawo.

18. Ana Yehofa jwasimichisye chichi?

¹⁸ Ndumetume Paulo jwasasilesoni chindu chine chakusosekwa mnope pakwamba ya chembecheyo chatukusakola panyuma pakuti Mlungu atujitichisye. Jwalakwe jwatusimichisye kuti chembecheyo chetu chichikwanilichikwa. Ligongo chichi tukusosekwa kuyikulupilila yeleyi? Mlungu jwamsalile Paulo kwasimichisya Aklistu kuti, “Chembecheyocho ngaŵa mkututengusya. Yeleyi yili myoyo ligongo Mlungu agumbesye chinonyelo chakwe m’mitima mwetu kupitila mwa msimu weswela waŵatupele m’weji.” (Alo. 5:5) Kusala yisyene tukwete magongo gambone gakututendekasya kulupilila mnope chembecheyo chatukwete.

19. Ana akusosekwa kusimichisya ya chichi pakwamba ya chembecheyo chawo?

¹⁹ Yehofa ŵamsalile Abulahamu kuti chachimtendela yindu yele nganayijembecheyaga, soni Yehofa ŵamjitichisye jwalakwe mwamti ŵaliji paujakwe wambone. Yindu yaŵajembecheyaga Abulahamu yatendekwe. Baibulo jikusati, “Abulahamu paŵalosisye kuti ali jwakuwusimana mtima, ŵapochele upile welewu.” (Aheb. 6:15; 11:​9, 18; Alo. 4:​20-22) Kusala yisyene, Abulahamu jwasangalele ligongo yaŵajembecheyaga yatendekwe. Nombe wawojo naga akupitilisya kuŵa ŵakulupichika chachipochela yindu yakuyijembecheya. Akwete magongo gejinji gakwatendekasya kusangalala ligongo akumanyilila kuti yindu yakwembecheya yichitendekwa. (Alo. 12:12) Paulo jwalembile kuti, “Mlungu jwakusapeleka chembecheyo ampe jemanja chisangalalo chosope soni mtendele ligongo mkusimumkulupilila. Jwalakwe atende yeleyi kuti mkole chembecheyo chisyesyene mwamachili ga msimu weswela.”—Alo. 15:13.