1. Ana tukusasosekwa kutenda chichi kuti tuŵe paujakwe ni mundu?

NDAŴI syejinji, kuti tuŵe paujakwe ni mundu jwine chandanda tukusasosekwa kumanyigana kaje. Pakukambilana ni mundu yindu yasimene nayo paumi soni jwalijose pakusala nganisyo syakwe, yikusatendekasya kuti aŵe paujakwe. Nambo kuti tuŵe paujakwe ni Yesu, ndaŵi sine yikusaŵa yakusawusya. Ligongo chichi tukuŵecheta myoyo?

2. Ana chakusawusya chandanda chatukusasimana nacho chili chapi?

² Chakusawusya chandanda chili chakuti m’wejo nganituwoneganeje ni Yesu. Nombe nawo Aklistu ŵane ŵajinji ŵa m’yaka 100 yandanda ŵasimene ni chakusawusyachi. Atamose kuti yaliji myoyo, ndumetume Petulo jwasasile kuti, “Jwalakweju nganimumwoneje, nambope mkusimumnonyela, soni mkusakulupilila mwa jwalakwejo atamose kuti pandaŵi jejino ngamkumwona.” (1 Pet. 1:8) Myoyo yili yakomboleka kuŵa paujakwe wambone ni Yesu atamose kuti nganitumwoneje.

3. Ana chakusawusya chaŵili chatukusasimana nacho chili chichi?

³ Chakusawusya chaŵili chili chakuti nganituŵa tukombwele kuŵechetana ni Yesu. Patukupopela tukusaŵa tuli mkusalila Yehofa nganisyo syetu. Yisyene kuti tukusapopela kupitila m’lina lya Yesu, nambo ngatukusapopela kwa Yesujo. Konjechesya pelepa, Yesu jwangasaka kuti tupopeleje kwa jwalakwe. Tukusala yeleyi ligongo lyakuti lipopelo lili mbali ja kulambila kwetu, soni Yehofape ni jwakusosekwa kumlambila. (Mat. 4:10) Atamose  kuti yili myoyo, yili yakomboleka kulosya kuti tukusamnonyela Yesu.

4. Ana chakusawusya chatatu chili chapi, soni ana chitukambilane chichi munganiji?

⁴ Chakusawusya chatatu chili chakuti Yesu akusatama kwinani. Myoyo nganituŵa tutemi najo. Nambope mpaka tumanyilile yejinji yakwamba Yesu atamose kuti jwalakwe akusatama kwinani. Chitukambilane yindu mcheche yampaka tutende kuti tuŵe paujakwe wambone ni Yesu. Nambo chandanda, kwende tulole kaje umbone wakuŵa paujakwe wambone ni Klistu.

5. Ligongo chichi tukusosekwa kuŵa achimjakwe ŵa Yesu? (Alole libokosi lyakuti “Kuŵa pa Ujakwe ni Yesu Kukusatukamuchisya Kuti Tuŵe Achimjakwe ŵa Yehofa” soni lyakuti “Awuwoneje Mwakuŵajilwa Udindo Wakwete Yesu.”)

⁵ Tukusosekwa kuŵa paujakwe ni Yesu kuti tuwe paunasi wambone ni Yehofa. Ligongo chichi tukuŵecheta myoyo? Aganichisye magongo gaŵili gakuyichisyaga. Ligongo lyandanda, Yesu ŵasalile ŵakumkuya ŵakwe kuti, “Atati asyenewo akumnonyela jemanja ligongo mkunonyela une.” (Yoh. 16:27) Jwasasilesoni kuti, “Pangali mundu jwakwawula kwa Atati akaŵe kupitila mwa une basi.” (Yoh. 14:6) Kuŵa mjakwe jwa Yehofa nambo mkaniwuŵe kuŵa paujakwe wambone ni Yesu kuli mpela kwinjila m’nyumba nambo ngapitila pamlango. Yesu jwakamulichisye masengo chisyasyo mpela chelechi pajwalikolasile msyene kuti ali “mlango wa ngondolo.” (Yoh. 10:7) Ligongo lyaŵili lili lyakuti Yesu jwakombwele kulosya chenene ndamo sya Atati ŵakwe. Jwalakwe jwasalile ŵakumkuya ŵakwe kuti, “Mundu jwambweni une ŵawenisoni Atati.” (Yoh. 14:9) Myoyo litala lyambone lyakummanyilila chenene Yehofa lili kulijiganya yakwamba umi wa Yesu. Patukulijiganya yakwamba Yesu, pelepo tuchitanda kumnonyela mnope. Myoyo, patukumnonyela  mnope Yesu, chinonyelo chetu pa Yehofa chichikulasoni mnope.

6. Ana ni ligongo line lyapi lyalikusatutendekasya kuŵa paunasi ni Yesu? Alondesye.

⁶ Tukusosekwa kuŵa paunasi wambone ni Yesu kuti mapopelo getu gajanjidwe. Yeleyi yikulosya kuti patukupopela tukusosekwa kutenda yejinji kupunda gamba kuŵecheta maloŵe gakuti, “kupitila mwa Yesu” kumbesi kwa lipopelo. Tukusosekwa kupikanichisya yakusati Yehofa pakumkamulichisya masengo Yesu kuti mapopelo getu gajanjidweje. Yesu ŵasalile ŵandumetume kuti, “Tinjitenda chilichose chitachiŵenda mu lina lyangu.” (Yoh. 14:13) Atamose kuti Yehofa ni jwakusapikanila soni kwanga mapopelo getu, jwalakwe akusamkamulichisya masengo Yesu pakwanga mapopelo getugo. (Mat. 28:18). Jwalakwe mkanaŵe kwanga mapopelo getu, akusalola kaje naga m’wejo tukusakuya yaŵasasile Yesu. Mwachisyasyo, Yesu jwatite, “Naga mkwakululuchila ŵandu yakulemwa yawo, nombe Atati ŵenu ŵakwinani tachimkululuchila jemanjasoni. Nambo naga ngamkwakululuchila ŵandu yakulemwa yawo, nombe nawo Atati ŵenu ngasamkululuchila yakulemwa yenu.” (Mat. 6:14, 15) Kusala yisyene yikusaŵa yakusangalasya mnope naga tukwatendela yindu ŵandu ŵane mwakusatendela Yehofa ni Yesu kwa m’weji.

7. Ana ŵani ŵachachipindula ni mbopesi jakutuwombola ja Yesu?

⁷ Ŵandu ŵali paujakwe wambone ni Yesu ni ŵampaka apindule ni mbopesi jakutuwombola jaŵapeleche jwalakwe. Ana tukumanyilila chamtuli yeleyi? Yesu jwasasile kuti ‘chachipeleka umi wakwe’ mmalo mwa achimjakweŵa. (Yoh. 15:13) Ŵandu ŵakulupichika ŵaŵatemi ni umi Yesu mkanaŵe kwika pachilambopa, chachilijiganya yakwamba Yesu soni chachimnonyelaga jwalakwe. Ŵandu mpela Abulahamu, Sala, Mose, soni Lahabu pachachijimuka kuŵawe, chachisosekwa kuŵa paujakwe ni Yesu kuti chakole umi wangamala.—Yoh. 17:3; Mase. 24:15; Aheb. 11:8-12, 24-26, 31.

8-9. Mwakamulana ni Yohane 15:4, 5, ana kuŵa paujakwe ni Yesu kukusatukamuchisya kutenda chichi, soni ligongo chichi yeleyi yili yakusosekwa?

⁸ Tukusaŵa ŵakusangalala mnope patukukamula yimpepe ni Yesu masengo gakulalichila soni kwiganya ngani syambone syakwamba Uchimwene wa Mlungu. Yesu pajwaliji pachilambopa jwajiganyaga ŵandu. Soni pajwawujile kwinani, Yesu mpela mtwe wa mpingo akupitilisya kulongolela masengo ga kulalichila soni kwiganya ŵandu. Jwalakwe akusalola soni kuyamichila yosope yatukusatenda pakwakamuchisya ŵandu kuti ammanyilile jwalakwe soni Atati ŵakwe. Nambope, tukusakombola kutenda masengoga ni chikamuchisyo chakutyochela kwa Yehofa soni Yesu.—Aŵalanje Yohane 15:4, 5.

⁹ Maloŵe ga Mlungu gakusatusalila kuti tukusosekwa kupitilisya kumnonyela Yesu kuti tumsangalasye Yehofa. Sambano kwende tulole yindu mcheche yampaka tutende kuti tuŵe achimjakwe ŵa Yesu.

10. Ana ni chindu chandanda chapi chatukusosekwa kutenda kuti tuŵe achimjakwe ŵa Yesu?

¹⁰ (1) Kummanyilila Yesu. Mpaka tutende yeleyi mwakuŵalanga mabuku ga m’Baibulo mpela Mateyu, Maliko, Luka, soni Yohane. Patukuganichisya ngani sya m’Baibulo syakwamba umi wa Yesu, tukusatanda kumnonyela soni kumchimbichisya Yesu patukulola mwaŵatendelaga yindu ni ŵandu. Mwachisyasyo, atamose kuti ni juŵalongolelaga ŵakulijiganya ŵakwe, nambope nganiŵawonaga mpela achikapolo. Mmalo mwakwe, jwasalilaga yajwaganisyaga soni mwajwapikanilaga mumtima. (Yoh. 15:15) Yesu jwadandawulaga jemanjajo pasimene ni yakusawusya. (Yoh. 11:32-36) Atamose ŵandu ŵaŵamsisyaga ŵamanyililaga kuti jwalakwe  ŵanonyelaga ŵandu ŵaŵampikanilaga. (Mat. 11:19) Naga tukusyasya muŵatendelaga yindu Yesu ni ŵakumkuya ŵakwe, nikuti tuchiŵa paunasi ŵambone ni ŵane. Nambosoni tuchiŵa ŵakusangalala mnope, soni tuchitanda kumnonyela mnope jwalakwe.

11. Ana ni chindu chaŵili chapi chatukusosekwa kutenda kuti tuŵe achimjakwe ŵa Yesu, soni ligongo chichi kutenda yeleyi kuli kwakusosekwa?

¹¹ (2) Tusyasyeje kaganisye soni katende ka yindu ka Yesu. Patukummanyilila chenene Yesu soni kuganisya mpela jwalakwe, yikusakamuchisya kuti tuŵe najo paujakwe. (1 Akoli. 2:16) Ana mpaka tumsyasye wuli Yesu? Kwende tugambe kulola chisyasyo chimo. Yesu ŵaganisyaga mnope yakwakamuchisya ŵane mmalo mwakulisangalasya jikape. (Mat. 20:28; Alo. 15:1-3) Ligongo lya yeleyi, jwalakwe jwakululuchilaga ŵane soni jwaliji jwakulipeleka. Jwalakwe nganatumbilaga chitema ligongo lya yindu yaŵamŵechetelaga ŵandu. (Yoh. 1:46, 47) Kupwatika pelepa, Yesu nganakundaga kuti yakulemwa yajwatesile mundu jwine munyuma yimtendekasye kuchenga muŵawonelaga ŵandu ŵane. (1 Tim. 1:12-14) Yesu jwatite, “Naga mkunonyelana jwine ni mjakwe, pelepo ŵandu wosope tachimanyilila kuti jemanja mli ŵakulijiganya ŵangu.” (Yoh. 13:35) Mpaka yiŵe chenene kuliwusya kuti, “Ana ngukuya chisyasyo cha Yesu mwakutenda yiliyose yampaka ngombole kuti mbe pamtendele ni abale ni alongo?”

12. Ana ni chindu chatatu chapi chatukusosekwa kutenda kuti tuŵe achimjakwe ŵa Yesu, soni mpaka tutende yeleyi chamtuli?

¹² (3) Twakamuchisyeje achalongo achimjakwe ŵa Klistu. Yesu akusayiwona yindu yatukusitwatendela Aklistu ŵasagulwe, mpela kuti tukumtendela jwalakwe. (Mat. 25:34-40) Litala limo lyakusosekwa mnope lyampaka tulosye kuti tukwakamuchisya Aklistu ŵasagulwe lili kukamula masengo ga gaŵatupele Yesu gagali kulalichila soni kwajiganya ŵandu. (Mat. 28:19, 20; Mase. 10:42) Masengo gakulalichilaga gakukomboleka ligongo lyakuti ‘ŵangondolo sine’ akukamuchisya. (Yoh. 10:16) Naga wawojo ali m’likuga lya ŵangondolo sine, akusosekwa kumanyilila kuti pakukamula masengo gakulalichila ngaŵa kuti akusaŵa ali mkwakamuchisya ŵasagulwepe, pelepa akusaŵa ali mkulosya kuti akusamnonyela Yesu.

13. Ana mpaka tukamulichisye masengo chamtuli yaŵasasile Yesu pa Luka 16:9?

¹³ Mpaka tuŵesoni achimjakwe ŵa Yehofa soni Yesu patukupeleka mbiya syetu kuti sikamuchisye pamasengo gakugalongolela. (Aŵalanje Luka 16:9.) Mwachisyasyo, mpaka tukamuchisye pamasengo gapachilambo chosope mwakupeleka mbiya syakamuchisya pamasengo gakulalichila ngani syambone ku madela gagali kwakutalichila. Mpaka tukamuchisyesoni pamasengo gakutaŵa ni kulinganya malo gakulambilila, soni kwakamuchisya ŵandu ŵele yindu yawo yajonasiche ligongo lya ngosi syachilengedwe. Mpaka tupelechesoni mbiya syakamuchisya pamasengo ga pampingo wetu soni kwakamuchisya abale ni alongo ŵetu ŵakusosechela chikamuchisyo. (Mis. 19:17) Gelega gali matala gampaka twakamuchisye achalongo achimjakwe ŵa Klistu.

14. Mwakamulana ni Aefeso 4:15, 16, ana ni chindu chamcheche chapi chatukusosekwa kutenda kuti tuŵe achimjakwe ŵa Yesu?

¹⁴ (4) Tukamulaneje ni yalikusatenda likuga lya Yehofa. Mpaka tulimbisye unasi wetu ni Yesu jwali mtwe wa mpingo naga tukusakamulana ni abale ŵasagulidwe kuti atulongoleleje. (Aŵalanje Aefeso 4:15, 16.) Mwachisyasyo, apano tukulinga kuti nyumba syosope sya Uchimwene sikamuleje masengo mwakuŵajilwa. Kuti yeleyi yikomboleche mipingo jine ajipwatikenye soni kuchenga malile ga madela gakusalalichilaga. Yeleyi yikamuchisye kuti tukajonanga mbiya syejinji sya likuga. Yitendekasisyesoni kuti ŵakulalichila ŵane achenje yindu yine paumi  wawo. Ŵane mwa ŵakulalichilaŵa akusaŵa kuti atumichile mumpingo wine kwa yaka yejinji soni komboleka kuti ŵakamulanaga mnope ni abale ni alongo ŵa mumpingowo. Nambo sambano akusosekwa kuti akatumichileje kumpingo wine. Kusala yisyene, Yesu akusasangalala mnope pakwawona ŵakulalichila ali mkutenda yindu yakulosya kuti akukamulana ni yeleyi.

15. Ana kusogoloku tuchiŵa chamtuli paunasi wambone ni Yesu?

¹⁵ Ŵasagulwe ni msimu weswela akwete chembecheyo chakuja kulamulila ni Yesu mu Uchimwene wa Mlungu mpaka kalakala. Jemanjaji chachitamaga ni Klistu. Yeleyi yikugopolela kuti chachimwonaga, kuŵechetana najo soni kutendela najo yindu yimpepe. (Yoh. 14:2, 3) Wosope ŵakwete chembecheyo chakutama pachilambo chapasi chachisangalala ni chinonyelo cha Yesu. Atamose kuti jemanjaji ngasamwona Yesu, nambope jemanjaji chachiŵa paunasi wambone ni jwalakwe soni chachisangalala ni umi wele Yehofa ni Yesu chachapa pandaŵijo.—Yes. 9:6, 7.

16. Ana kuŵa paujakwe wambone ni Yesu kukusatukamuchisya chamtuli?

¹⁶ Patukulingalinga kuti tuŵe paujakwe wambone ni Yesu tuchipata yindu yambone yejinji. Mwachisyasyo, tukusasangalala ni chinonyelo soni chikamuchisyo chakusatupa apano. Tukwetesoni chembecheyo chakutama ni umi mpaka kalakala. Chakusosekwa mnope chili chakuti kuŵa paujakwe ni Yesu mpaka kutukamuchisyesoni kuti tuŵe paunasi wakulimba mnope ni Yehofa. Kusala yisyene, wuli upile wekulungwa mnope kuŵa achimjakwe ŵa Yesu.