NGANI JAKULIJIGANYA 16
“Alumbuŵenu chajimuche”
“Yesu ŵamsalile [Malita] kuti, ‘Alumbuŵenu chajimuche.’”—YOH. 11:23.
NYIMBO NA. 151 Jwalakwe Chachaŵilanga
YACHITULIJIGANYE a
1. Ana jwachinyamata jwine jwalosisye chamtuli kuti jwakwete chembecheyo chakuti ŵandu ŵaŵawile chachijimuka?
AGANICHISYE yajwasimene nayo jwachinyamata jwine lina lyakwe Matthew. Jwalakwe jwalwasile ulwele wine wakwe wekulungwa wawatendekasisye kuti atendedwe maopaleshoni gejinji. Pandaŵi jine jwalakwe ali akwete yaka 7, jwalolelaga pologalamu ja JW Broadcasting yalumo ni ŵandu ŵa mwiŵasa mwakwe. Chakumbesi kwa pologalamujo, jemanjaji ŵalolele fidiyo ja nyimbo jajalosyaga ŵandu ali mkwapochela achalongo achimjawo ŵaŵawile. b Ali amalisisye kulolela pologalamujo, Matthew jwapite paŵatemi achinangolo ŵakwe. Jwalakwe jwakamwile makono ni kwasalila kuti, “Ayiweni baba ni mama? Atamose ndili mbwile nikuti chinjijimuka pandaŵi jichachijimukaga ŵandu ŵaŵawile. Atamose ndili mbwile tuchiwoneganasoni.” Kusala yisyene, achinangoloŵatu ŵasangalele mnope kumanyilila kuti mwanache jwawo akwete chikulupi chakulimba chakuti ŵandu ŵaŵawile chachijimuka.
2-3. Ligongo chichi yili yakamuchisya kwa m’weji ganichisya yakuti ŵandu ŵaŵawile chachijimuka?
2 Ndaŵi syosope mpaka tutende chenene ganichisyaga yajikusasala Baibulo yakwamba chilanga chakuti ŵandu ŵaŵawile chachijimuka. (Yoh. 5:28, 29) Ligongo chichi tukusosekwa kutenda yeleyi? Ligongo ngatukusamanyilila ndaŵi jampaka tusimane ni yakusawusya mpela kulwala kapena ndaŵi jampaka ajasiche jwachinasi jwetu. (Jwak. 9:11; Yak. 4:13, 14) Myoyo, chembecheyo chetu chakuti ŵandu ŵaŵawile chachijimuka, mpaka chitulimbikasye patusimene ni yakusawusya mpela yeleyi. (1 Ates. 4:13) Maloŵe ga Mlungu gakusatusimichisya kuti Atati ŵetu ŵakwinani akusatumanyilila chenene soni akusatunonyela mnope. (Luk. 12:7) Yehofa akusatumanyilila chenene, mwamti jwalakwe chachitujimusya nikuŵa mpela mutwaŵelele pandanda. Kusala yisyene Yehofa akusatunonyela mnope, mwamti jwalakwe akusasaka kuti tutameje ni umi mpaka kalakala. Myoyo atamose tuli tuwile, jwalakwe chachitujimusya.
3 Munganiji chitukambilane yindu yitatu. Chandanda, chitulole ligongo lyakwe tukusakulupilila yakuti ŵandu ŵaŵawile chachijimuka. Chaŵili, chitukambilane maloŵe gakulimbikasya gagali mu lilemba lyalikulongolela nganiji gakuti, “Alumbuŵenu chajimuche.” (Yoh. 11:23) Pakumalisya chitukambilane yampaka tutende kuti tukulupilileje mnope chembecheyo chelechi.
LIGONGO CHICHI TUKUSAKULUPILILA YAKUTI ŴANDU ŴAŴAWILE CHACHIJIMUKA?
4. Ana chichi champaka chitutendekasye kukulupilila yindu yasasile mundu jwine? Apeleche chisyasyo.
4 Kuti amkulupilile mundu jwasasile kuti chachatendela yine yakwe, akusosekwa kuŵa ŵakusimichisya kuti mundujo ali jwakusachilila soni akwete machili gakutendela yinduyo. Kuti tupikanichisye yeleyi tuŵanichisye myi: Tujile kuti nyumba jawo jijonasiche ni chimbungo chamachili. Kaneko mjawo akwika ni kwasalila kuti, ‘Chinakamuchisye kulinganyasoni nyumbaji.’ Mjawojo ali jwakusimichisya kuti chiŵakamuchisye soni wawojo akuyiwona kuti chiyikomboleche. Mpaka amkulupilile mnope mjawojo naga akusamanyilila masengo ga yakutaŵataŵa soni naga akwete yida yakwanila. Nambi uli pakwamba yasasile Mlungu kuti chachajimusya ŵandu ŵaŵawile? Ana jwalakwe ali jwakusachilila soni akwete machili gakutendela yeleyo?
5-6. Ligongo chichi tuli ŵakusimichisya kuti Yehofa ali jwakusachilila kwajimusya ŵandu ŵaŵawile?
5 Ana Yehofa ali jwakusachilila kwajimusya ŵandu ŵaŵawile? Yeleyi yili yangalajila kuwusya, ligongo jwalakwe jwasalile ŵakulemba Baibulo ŵajinji kulemba yakuti ŵandu ŵaŵawile chachijimuka ku chiwa. (Yes. 26:19; Hos. 13:14; Chiw. 20:11-13) Nambosonitu, naga Yehofa aŵechete yindu ndaŵi syosope akusayikwanilisyaga. (Yos. 23:14) Kusala yisyene, Yehofa ali jwakusachilila kwajimusya ŵandu ŵaŵawile. Ligongo chichi tukuŵecheta yeleyi?
6 Aganichisye ya maloŵe gajwaŵechete Yobu. Jwalakwe jwaliji jwakusimichisya kuti atamose ali awile, Yehofa chachimjimusya. (Yob. 14:14, 15) Yehofa chachitendasoni yeleyi kwa ŵakutumichila ŵakwe wosope ŵaŵawile. Jwalakwe ali jwakusachilila kuti chiŵajimusye jemanjaji ku chiwa kuti chiŵape yilu yambone soni chaŵe ŵakusangalala. Nambi uli pakwamba ya ŵandu mabiliyoni gejinji ŵaŵawile mkanaŵe kulijiganya yisyesyene yakwamba Yehofa? Mlungu jwetu jwachinonyelo alisoni jwakusachilila kwajimusya jemanjaji. (Mase. 24:15) Jwalakwe ali jwakusachililasoni kuti jemanjaji chakole upile wakuŵa najo paunasi wambone soni kuti chatame ni umi wangamala pachilambopa. (Yoh. 3:16) Kusala yisyene, Yehofa akusachilila mnope kuti chiŵajimusye ŵandu ku chiwa.
7-8. Ligongo chichi tuli ŵakusimichisya kuti Yehofa akwete machili gakwajimusya ŵandu ŵaŵawile?
7 Ana Yehofa akwetesoni machili gakwajimusya ŵandu ŵaŵawile? Ayisoni yili yangalajila kuwusya. Ligongo jwalakwe ali “Jwamachiligosope.” (Chiw. 1:8) Jwalakwe ali jwamachili mnope mwamti mpaka amgomeche mmagongo jwalijose atamose chiwa. (1 Akoli. 15:26) Kumanyilila yeleyi kukusatupa machili soni kukusatulimbikasya. Aganichisye yayamtendechele mlongo jwine lina lyakwe Emma Arnold. Mlongoju yalumo ni liŵasa lyakwe ŵasimene ni yindu yejinji yakulinga chikulupi pandaŵi ja Ngondo Jaŵili Japachilambo Chosope. Myoyo pakusaka kumlimbikasya mwanache jwakwe jwamkongwe ligongo lya chiwa cha ŵachinasi ŵawo ŵaŵawile mundaŵi ja chipani cha Nazi, Mlongo Emma jwamsalile mwanachejo kuti, “Naga ŵandu ŵaŵawile ngasakolasoni umi nikuti mmagongo jwetu chiwa ali jwamachili mnope kumpunda Mlungu. Nambo yeleyi nganiyiŵa yikomboleche.” Kusala yisyene, pangali chilichose chachikwete machili gakumpunda Yehofa. Mlungu jwetu Jwamachiligosope juŵapanganyisye umi akwete machili gakuwuchisya umi wa ŵandu wosope ŵaŵawile.
8 Ligongo line lyalikusatutendekasya kumanyilila kuti Mlungu akwete machili gakwajimusya ŵandu ŵaŵawile lili lyakuti jwalakwe akusakumbuchilaga chilichose chachikutendekwa. Mwambone, jwalakwe akusajikolanga ndondwa jilijose ni lina lyakwe. (Yes. 40:26) Nambosoni jwalakwe akusiŵakumbuchilaga ŵandu wosope ŵaŵawile. (Yob. 14:13; Luk. 20:37, 38) Yehofa akusakumbuchila atamose tuyindu twamwanamwana twakwamba ŵandu ŵele chachajimusya ku chiwa mpela muŵawonechelaga, ndamo syawo nambosoni kaganisye kawo.
9. Ligongo chichi wawojo akusakulupilila yasasile Yehofa kuti chachajimusya ŵandu ŵaŵawile?
9 Pakwika apano, tuyiweni kuti mpaka tukulupilile yakuti Yehofa chachajimusya ŵandu ŵaŵawile ligongo jwalakwe ali jwakusachilila soni akwete machili gakutendela yeleyo. Kwende tukambilanesoni ligongo line lyampaka litukamuchisye kukulupilila yaŵasasile Mlungu yakuti chachajimusya ŵandu ŵaŵawile. Yehofa pakwete paŵajimwisye ŵandu ŵaŵawile. Munyumamu, jwalakwe jwapele achalume ŵane ŵakulupichika kupwatikapo Yesu machili gakwajimusya ŵandu ŵaŵawile. Kwende tukambilane chisyasyo chimo cha mundu jwele Yesu ŵamjimwisye ku chiwa chachikusasimanikwa m’buku ja Yohane chaputala 11.
CHIWA CHA MJAKWE JWAMPATIMA JWA YESU
10. Ana ni chichi chachatendekwe pandaŵi jine Yesu ali mkulalichila lisi line lya lusulo lwa Yolodani paŵatyochelaga ku Betaniya? Ana jwalakwe jwatesile chichi? (Yohane 11:1-3)
10 Aŵalanje Yohane 11:1-3. Aganichisye ya ngani jajatendekwe ku Betaniya chakumbesi kwa chaka cha 32 C.E. Yesu jwakwete achimjakwe m’musi welewu, Lasalo soni achalumbugwe ŵaŵaliji Maliya ni Malita. (Luk. 10:38-42) Nambo Lasalo jwatandite kulwala, mwamti achalumbugwewo ŵadandawulaga mnope. Jemanjaji ŵamtumichisye Yesu utenga pajwaliji lisi line lya lusulo lwa Yolodani, lutando lwakwenda masiku gaŵili kutyochela ku Betaniya. (Yoh. 10:40) Chakutesya chanasa, Lasalo jwawile mundu juŵamtumile utenga jula ali agambile kopochela kwene kwa Yesu. Atamose kuti Yesu jwamanyilile kuti mjakwe awile, jwalakwe jwaŵelepe kumaloko kwa masiku gane gaŵili. Kaneko jwalinganyisye yakwawula ku Betaniya. Mwamti Yesu pajwakopochelaga ku Betaniya, paliji pali pamasile masiku mcheche chiwile Lasalo. Nambotu yaliji yakuti Yesu chatende chindu chine chakwe pakusaka kumchimbichisya Mlungu nambosoni pakusaka kwakamuchisya achimjakwewo.—Yoh. 11:4, 6, 11, 17.
11. Ana nganiji jikutujiganya yamtuli pakwamba ya ŵandu ŵali paujakwe?
11 Ngani jeleji jikusatujiganya yakusasosekwa kutenda ŵandu ŵali paujakwe wambone. Aganichisye ayi: Maliya ni Malita paŵamtumichisyaga utenga Yesu, jemanjajo nganasala kuti Yesujo ajawule ku Betaniya. Mmalomwakwe ŵagambile kummanyisya Yesu kuti mjakwe akulwala. (Yoh. 11:3) Pajwawile Lasalo, yikakomboleche Yesu kumjimusya ali kuŵalijipeko. Nambope, Yesu jwasagwile kwawula ku Betaniya kuti akaŵe ni Maliya soni Malita. Ana akwete mjawo jwampaka ayiche kukwakamuchisya yineyakwe atamose yili mkuti nganamŵenda? Naga akwete mjawo mpela jweleju, mpaka amdalileje kuti jwalakwejo mpaka ŵakamuchisye “pa ndaŵi ja yisawusyo.” (Mis. 17:17) M’wejisoni, twatendeleje achimjetu yindu mpela muŵatendelaga Yesu. Sambano kwende tuwujile ku ngani jila kuti tulole yayatendekwe.
12. Ana Yesu ŵamsimichisye Malita ya chichi? Ligongo chichi jwalakwe jwasosekwaga kukulupilila yeleyo? (Yohane 11:23-26)
12 Aŵalanje Yohane 11:23-26. Malita pajwapikene kuti Yesu aŵandichile ku Betaniya jwamchingamile jwalakwe. Paŵamsimene, ŵamsalile kuti, “Ambuje, akaŵe kuti wawojo ŵaliji akuno, alumbuŵangu ngamkanawa.” (Yoh. 11:21) Yisyene kuti Yesu akamposisye Lasalo. Nambotu Yesu jwaganisyaga yakutenda chindu chine chachaliji chakusimonjesya mnope. Jwalakwe ŵamsalile Malita kuti, “Alumbuŵenu chajimuche.” Yesu pakusaka kumkamuchisya Malita kulupilila maloŵe gelega ŵamsalile kuti, “Une ndili kwimuka soni umi.” Kusala yisyene, Mlungu ŵampele machili Yesu gakuchipunda chiwa nambosoni umi. Yeleyi mkaniyitendekwe, Yesu jwaliji ali akajimwisye kamsikana kakaliji kali kagambile kuwa kwene. Nambosoni jwaliji ali akajimwisye kamnyamata palisiku lyakawile pelyo. (Luk. 7:11-15; 8:49-55) Nambo ana jwalakwe akakombwele kumjimusya mundu jwele paliji pali papitile masiku mcheche chiwile, soni jwele chilu chakwe chaliji chili chitandite konasika?
“LASALO, MKOPOCHE!”
Yesu chamkamwile mnope chanasa paŵaweni achimjakwe ali mkulila (Alole ndime 13-14)
13. Mwakamulana ni lilemba lya Yohane 11:32-35, ana Yesu jwatesile chichi paŵam’weni Maliya soni ŵandu ŵane ali mkulila? (Alole chiwulili.)
13 Aŵalanje Yohane 11:32-35. Kwende tulole yayatendekwe. Nombe Maliya juŵalijisoni mlumbugwawo Lasalo jwamchingamile Yesu. Jwalakwe jwawilisyesoni maloŵe gaŵaŵechete Malita gala gakuti, “Ambuje, akaŵe kuti wawojo ŵaliji akuno, alumbuŵangu ngamkanawa.” Jwalakweju pampepe ni ŵandu ŵaŵaliji najo ŵaliji ŵachanasa mnope. Yesu chamkamwile mnope chanasa paŵaweni jemanjajo ali mkulila, mwamti nombe najo ŵalisile. Yesu jwapikanichisyaga mwayikusaŵela yakupweteka naga mlongo mjetu awile. Mwamti jwalakwe jwaliji jwakusachilila kwamyalasya jemanjajo mwakumjimusya Lasalo.
14. Ana chanasa chichamkamwile Yesu paŵam’weni Maliya ali mkulila chikutujiganya chichi pakwamba ya Yehofa?
14 Yaŵatesile Yesu paŵam’weni Maliya ali mkulila, yikusatujiganya kuti Yehofa ali Mlungu jwachanasa chekulungwa. Ligongo chichi tukuŵecheta yeleyi? Mpela mwatwayiwonele mungani jipite jila, Yesu akusasyasya ndendende mwakusaganichisya soni kupikanila Atati ŵakwe. (Yoh. 12:45) Myoyo, patukuŵalanga yakuti Yesu chamkamwile chanasa mnope pajwaweni achimjakwe ali mkulila mwamti nombe najo jwayikene pakulila, yikusatukamuchisya kumanyilila kuti nombe Yehofa yikusamkwaya mnope pakutuwona tuli mkulila soni kudandawula. (Sal. 56:8) Ana yeleyi ngayikwatendekasya wawojo kusachilila kuŵa paunasi wambone ni Mlungu jwetu jwali jwachanasa chekulungwaju?
Yesu jwalosisye kuti akwete machili gakwajimusya ŵandu ku chiwa (Alole ndime 15-16)
15. Mwakamulana ni lilemba lya Yohane 11:41-44, ana kulilembe lyaŵamgoneche Lasalo kwatendekwe yamtuli? (Alole chiwulili.)
15 Aŵalanje Yohane 11:41-44. Yesu jwakopochele kulilembe lyaŵamgoneche Lasalo, mwamti ŵaŵendile ŵanduwo kuti atyosye liganga lyaŵawugalile pamlango wa lilembelyo. Nambo Malita nganakamulana nayo mwamti jwaŵechete kuti komboleka kuti atandite kununga. Nambo Yesu ŵamjanjile kuti, “Ana nganinamsalila kuti naga mkukulupilila chimwuwone uchimbichimbi wa Mlungu?” (Yoh. 11:39, 40) Kaneko Yesu jwalolite kwinani ni kupopela pameso pa ŵanduwo. Jwalakwe jwatesile yeleyi pakusaka kuti uchimbichimbi wosope ujawule kwa Yehofa pa yindu yajwasakaga kutendayo. Kaneko Yesu jwaŵilasile kuti, “Lasalo, mkopoche!” Papopo Lasalo jwakopweche mwilembemo. Apatu Yesu jwatesile yindu yele ŵandu ŵane ŵayiwonaga kuti nganiyiŵa yikomboleche.—Alole ngani ja mtwe wakuti “N’chifukwa Chiyani Yesu Anatenga Masiku Anayi Asanafike ku Manda a Lazaro?” mu Sanja ja Mlonda ja Chichewa ja Januwale 1, 2008.
16. Ana ngani jajikusasimanikwa m’buku ja Yohane chaputala 11 jikusalimbikasya chamtuli chembecheyo chetu chakuti ŵandu ŵaŵawile chachijimuka?
16 Ngani jajikusasimanikwa mu buku ja Yohane chaputala 11 jikusalimbisya chikulupi chetu chakuti ŵandu ŵaŵawile chachijimuka. Ana yeleyi yikusakomboleka chamtuli? Akumbuchile ya maloŵe gaŵamsalile Yesu Malita gakuti, “Alumbuŵenu chajimuche.” (Yoh. 11:23) Mpela Atati ŵakwe, Yesu jwaliji jwakusachilila soni jwakwete machili gakukwanilisya yaŵasasileyi. Nambosoni kulila kwa Yesu kwalosisye kuti jwalakwe ali jwakusachilila kwajimusya ŵandu ŵaŵawile soni kumasya yakusawusya yosope yayikusayika ligongo lya chiwa. Sonitu Lasalo pajwakopokaga mmalembemo Yesu jwalosisye kuti akwete machili gakwajimusya ŵandu ŵaŵawile. Nambosonitu paja Yesu ŵamsalile Malita kuti, “Ana nganinamsalila kuti naga mkukulupilila chimwuwone uchimbichimbi wa Mlungu?” (Yoh. 11:40) Kusala yisyene tukwete magongo gejinji gakututendekasya kukulupilila kuti yaŵasasile Mlungu yakwamba kwajimusya ŵandu ŵaŵawile yichitendekwa nditu. Sano ana ni chindu chine chapi champaka tutende kuti tukulupilileje mnope chembecheyo chelechi?
YAMPAKA TUTENDE KUTI TUKULUPILILEJE MNOPE YAKUTI ŴANDU ŴAŴAWILE CHACHIJIMUKA
17. Ana tukusosekwa kukumbuchila chichi patukuŵalanga m’Baibulo ngani sya ŵandu ŵaŵajimwiche ku chiwa?
17 Tuŵalanjeje soni kuganichisya ngani sya ŵandu ŵaŵajimwiche ku chiwa munyumamu. Baibulo jikusasala ya ŵandu ŵakwana 8 ŵaŵajimwiche ku chiwa pachilambopa. c Uli ngalinga kupata ndaŵi jakuŵalanga ngani sya ŵandu ŵaŵajimwiche ku chiwaŵa. Pakuŵalanga nganisi, akumbuchileje kuti jemanjaji ŵaliji achalume, achakongwe soni ŵanache ŵasyesyene. Mpaka atende chenenesoni kuganichisya yindu yakulijiganya. Aganichisyejesoni yajikuti ngani jilijose pakulosya kuti Yehofa ali jwakusachilila soni kuti akwete machili gakwajimusya ŵandu ŵaŵawile. Konjechesya pelepa, aganichisyejesoni ya kwimuka kwa Yesu ku chiwa kwakwaliji kwakusosekwa mnope. Tukumbuchileje kuti ŵandu ŵajinji ŵatendele umboni ya kwimuka kwa Yesu ku chiwa, mwamti yeleyi yikusalimbikasya mnope chikulupi chetu. —1 Akoli. 15:3-6, 20-22.
18. Ana mpaka tukamulichisye masengo chamtuli nyimbo syasikusasala ya chembecheyo chakwimuka ku chiwa? (Alole maloŵe ga mwiŵanda.)
18 Tukamulichisyeje masengo mwalunda “nyimbo sya usimu” syasikusasala ya chembecheyo chetu chakwamba kwimuka ku chiwa. d (Aef. 5:19) Nyimbosi sikusatukamuchisya kuti tujiwoneje ngani ja kwimuka ku chiwa kuŵa jisyesyene soni sikusatulimbikasya kuti tukulupilileje mnope chembecheyochi. Apikanileje nyimbosi ndaŵi syosope, alijiganyeje nyimbosi soni kukambilana maloŵe gakwe pakutenda kulambila kwa peŵasa. Asimanyilileje chenene nyimbosi soni kuganichisya yasikusala. Kaneko pasimene ni yakusawusya mpela chiwa cha mlongo mjawo, msimu wa Yehofa uchakumbusya nyimbosi mwamti sichalimbikasya.
19. Ana ni yindu yine yapi yampaka tuganichisye yakwamba kwimuka ku chiwa? (Alole libokosi lyakuti “ Ana Chachawusya Chichi Ŵandu Ŵachachijimuka ku Chiwa?”)
19 Tuliwanichisyeje tuli m’chilambo chasambano. Yehofa jwatupele lunda lwakutukamuchisya kombola kuliŵanichisya tuli m’chilambo chasambano. Mlongo jwine jwasasile kuti, “Kwandaŵi jelewu mbele ndili mkuliwanichisya ndili m’chilambo chasambano kwineku ndili mkusangalala ni kusalala kwa maluŵa soni kununjila kwakwe.” Aganichisye kuti akuwonegana ni achalume soni achakongwe ŵakulupichika ŵakusiŵakolanga m’Baibulo. Ana wawojo ali ŵakusachilila kuti chawonegane ni ŵani? Ana ni yiwusyo yapi yakusasaka kuti chiŵawusye jemanjajo? Aganichisyesoni ali awonegene ni achalongo achimjawo ŵaŵawile kalakala. Ni alinje ganichisya mwayichiŵela pachachisimana ni jemanjajo, mpela maloŵe gandanda gachachiŵechetena, yachachijila pakumbatilana, nambosoni mwachachisangalalila.
20. Ana tukusosekwa kusimichisya kutenda chichi?
20 Kusala yisyene tuli ŵakuyamichila mnope ligongo lya chembecheyo chatupele Yehofa chakuti ŵandu ŵaŵawile chachijimuka. Ngatukukayichila kuti yaŵasasile Yehofayi yichikwanilichikwa ligongo jwalakwe ali jwakusachilila soni akwete machili gakutendela yeleyi. Myoyo kwende wosopewe tulimbisyeje chikulupi chetu pa chembecheyo chambone mnopechi. Kutenda yeleyi kuchitukamuchisya kuti tuŵe paunasi wambone mnope ni Mlungu jwetu jwakutusalila kuti, ‘Ŵakunonyelwa ŵenu chachijimuka.’
NYIMBO NA. 147 Chilanga cha Umi Wangamala
a Naga pakwete pajasiche mlongo mjawo, ngatukukayichila kuti chilanga chakuti ŵandu ŵaŵawile chachijimuka chikusichalimbikasya. Ana mpaka ŵalondechesye chamtuli ŵandu ŵane ligongo lyakwe akusakulupilila chilanga chelechi? Soni ana mpaka atende uli kuti alimbisyeje mnope chembecheyo chawo chakuti ŵandu ŵaŵawile chachijimuka? Chakulinga cha nganiji chili kutukamuchisya wosopewe kulimbisya chikulupi chetu chakuti ŵandu ŵaŵawile chachijimuka.
b Fidiyo ja nyimboji jakwete mtwe wakuti Chilambo Chasambano Chiŵandichile soni jikusasimanikwa mu pologalamu ja JW Broadcasting ja Nofemba 2016.
c Alole libokosi lyakuti, “Ŵandu 8 Ŵaŵajimwiche ku Ŵawe Ŵakusakolanjikwa M’Baibulo” mu Sanja ja Mlonda ja Ogasiti 1, 2015, p. 4.
d Alole nyimbo syakuyichisyasi m’buku jakuti Amjimbile Yehofa Mwakusangalala: “Aliwoneje Ali M’chilambo Chasambano” (Nyimbo Na. 139), “Meso Gawo Gaŵeje pa Mbote!” (Nyimbo Na. 144), soni jakuti “Jwalakwe Chachaŵilanga” (Nyimbo Na. 151). Alolesoni nyimbo syetu syasikusasimanikwa pa jw.org mpela syakuti, “Chilambo Chasambano Chiŵandichile,” “Chilambo Chambone,” soni jakuti “Mlole Mmwe.”
