NGANI JAKULIJIGANYA 15
Yampaka Tulijiganye Kutyochela pa Yakusimonjesya Yaŵatesile Yesu
“Jwalakwe ŵajendaga ni kwatendelaga ŵandu yambone soni kwaposya.”—MASE. 10:38.
NYIMBO NA. 13 Klistu Ali Chisyasyo Chetu
YACHITULIJIGANYE a
1. Ana ni chakusimonjesya chapi chandanda chaŵatesile Yesu?
AGANICHISYE yayatendekwe chakumbesi kwa chaka cha 29 C.E., Yesu pajwatandaga utumiki wakwe. Jwalakwe yimpepe ni mamagwe ŵaŵaliji Maliya soni ŵandumetume ŵane, ŵaŵilanjidwe ku pwando ja ukwati ku Kana. Musiwu waliji kumpoto kwa tawuni ja Nasaleti kukwaliji kumangwawo Yesu. Maliya jwakungulukaga ni liŵasa lyalyatendekasyaga ulombelawo, myoyo ŵamŵendile kuti ŵapocheleje achalendo. Nambo pwando ja ukwati pajaliji mkati, patendekwe chindu chine chachikasokonasisye pwandojo. Finyo jajapali jamasile. b Komboleka kuti yeleyi yatendekwe ligongo lyakuti ŵandu ŵatupile mnope. Myoyo Maliya jwapite kwa Yesu ni kumsalila kuti, “Finyotu jwamalile ŵanduŵa.” (Yoh. 2:1-3) Ana Yesu jwatesile chichi? Jwalakwe jwatesile chakusimonjesya mwakugatendekasya mesi kuŵa “finyo jwambone.”—Yoh. 2:9, 10.
2-3. (a) Ana ni yakusimonjesya yine yapi yaŵatesile Yesu? (b) Ana kuganichisya yaŵatesile Yesuyi mpaka kutukamuchisye chamtuli?
2 Yesu jwatesile yakusimonjesya yejinji pa utumiki wakwe. c Jwalakwe jwakamulichisye masengo machili gakwe gakutendela yakusimonjesya pakwakamuchisya ŵandu ŵajinji. Mwachisyasyo, pa yakusimonjesya yakwe yiŵili yine, jwalakwe jwalisisye achalume 5,000 kaneko achalume 4,000. Yikaŵe kuti chiŵalanjilochi ŵapwatichepo achakongwe ni ŵanache nikuti chikapundile 27,000. (Mat. 14:15-21; 15:32-38) Nambosoni Yesu jwaposisye ŵandu ŵajinji ŵaŵalwalaga. (Mat. 14:14; 15:30, 31) Kusala yisyene yaŵatesile Yesu pakwaposya soni kwalisya ŵanduŵa yasimonjesye mnope jemanjajo.
3 Masiku agano mpaka tulijiganye yejinji kutyochela ku yakusimonjesya yaŵatesile Yesu. Mungani ajino, chitukambilane yakusimonjesya yine yampaka yilimbikasye chikulupi chetu. Kaneko chitulole yampaka tutende pakumsyasya Yesu pangani jakulosya chanasa soni kulinandiya.
YAKUSIMONJESYA YIKUSATUJIGANYA YAKWAMBA YEHOFA SONI YESU
4. Ana yakusimonjesya yaŵatesile Yesu yikusatukamuchisya kuti twakulupilileje mnope ŵani?
4 Yakusimonjesya yaŵatesile Yesu yangagamba kutujiganya kuti tumkulupilileje mnope jwalakwe, nambo yikusatukamuchisyasoni kuti twakulupilileje mnope Atati ŵakwe. Nambosonitu machili gakutendela yakusimonjesyayi gatyochelaga kwa Yehofa. Lilemba lya Masengo 10:38 likusati, “Mlungu ŵamsagwile [Yesu] ni msimu weswela soni ŵampele machili. Jwalakwe ŵajendaga ni kwatendelaga ŵandu yambone soni kwaposya wosope ŵaŵalagasidwaga ni Satana, ligongo Mlungu ŵaliji ni jwalakwejo.” Akumbuchilejesoni kuti yindu yosope yaŵaŵechetaga soni kuyitenda Yesu kupwatikapo yakusimonjesya ŵajigalilaga mwakusatendela yindu Atati ŵakwe. (Yoh. 14:9) Myoyo, kwende tulole yindu yitatu yampaka tulijiganye kutyochela ku yakusimonjesya yaŵatesile Yesu.
5. Ana chichi chachamtendekasisye Yesu kutenda yakusimonjesya? (Mateyu 20:30-34)
5 Chandanda, Yesu ni Atati ŵakwe akusatunonyela mnope. Paŵaliji pachilambo chapasipa, Yesu jwalosisye kuti akusiŵanonyela mnope ŵandu mwakamulichisya masengo machili gakwe gakutendela yakusimonjesya pakwakamuchisya ŵandu ŵaŵasimanaga ni yakusawusya. Paulendo wine, ŵandu ŵaŵili ŵangalola ŵamŵendile Yesu kuti ŵakamuchisye. (Aŵalanje Mateyu 20:30-34.) Yesu “chamkamwile mnope chanasa” mwamti kaneko ŵaposisye ŵanduwo. Maloŵe ga Chigiliki gaŵagagopolele kuti “chamkamwile mnope chanasa” gakusagopolela kuti ŵatendele chanasa mnope mumtima mwakwe. Chanasa chelechi chalosisye kuti Yesu akwete chinonyelo, mwamti ni chachamtendekasisye jwalakwe kwalisya ŵandu ŵasala soni kwaposya ŵamatana. (Mat. 15:32; Maliko 1:41) Tuli ŵakusimichisya kuti Yehofa jwali Mlungu jwa “chanasa chekulungwa” soni Mwanache jwakwe akusatunonyela mnope, mwamti jemanjaji yikusiyapweteka patukusimana ni yakusawusya. (Luk. 1:78; 1 Pet. 5:7) Kusala yisyene, jemanjaji ali ŵakusachilila mnope kumasya yakusawusya yakusasimana nayo ŵandu.
6. Ana Mlungu ŵampele Yesu machili gamtuli?
6 Chaŵili, Yehofa ampele Yesu machili gakumachisya yakusawusya yakusimana nayo ŵandu. Mwakutenda yakusimonjesya, Yesu jwalosisye kuti akwete machili gakumachisya yakusawusya yakusasimana nayo ŵandu, yanganaŵa akombwele kumalana nayo mwajika jawo. Mwachisyasyo, jwalakwe akwete machili gakumasya ulemwa, soni ulwele ni chiwa yayikusayika ligongo lya ulemwawo. (Mat. 9:1-6; Alo. 5:12, 18, 19) Yakusimonjesya yajwatesile jwalakwe yikusalosya kuti akwete machili gakwaposya ŵandu wosope ku yilwele yamtundu uliwose soni kwajimusya ŵandu ku chiwa. (Mat. 4:23; Yoh. 11:43, 44) Nambosoni jwalakwe akwete machili gakwimika mbungo jamachili soni kukoposya yiŵanda yakusakala mwa ŵandu. (Maliko 4:37-39; Luk. 8:2) Kusala yisyene yili yakusangalasya kumanyilila kuti Yehofa ŵampele machili Mwanache jwakwe.
7-8. (a) Ana yakusimonjesya yaŵatesile Yesu yikusatusimichisya ya chichi? (b) Ana wawojo akusajembecheya kuchiwona chakusimonjesya chapi m’chilambo chasambano?
7 Chatatu, yakusimonjesya yaŵatesile Yesu yikusatusimichisya kuti yindu yambone yiŵasasile Mlungu yichitendekwa mu Uchimwene wakwe. Yakusimonjesya yaŵatesile Yesu ali pachilambo chapasi, yikusatujiganya kuti jwalakwe chachitenda yindu yejinji mu Uchimwene wa Mlungu. Agambe ganichisya mwayichiŵela yindu pachangakaŵapa Yesu pachachitanda kulamulila. Tuchikola yilu yambone, ligongo Yesu tachimasya yilwele soni kulemala kwa mtundu uliwose. (Yes. 33:24; 35:5, 6; Chiw. 21:3, 4) Ngasitulagasoni ni sala kapena kusimana ni yakusawusya yayikusayika ligongo lya ngosi sya chilengedwe. (Yes. 25:6; Maliko 4:41) Tuchiŵa ŵakusangalalasoni kwapochela achalongo achimjetu “ŵali m’malembe.” (Yoh. 5:28, 29) Ana wawojo akusajembecheya kuchiwona chakusimonjesya chapi m’chilambo chasambano?
8 Yesu pajwatendaga yakusimonjesya jwalosisye kuti ali jwakulinandiya soni jwa chanasa. Myoyo, m’wejisoni tukusosekwa kujigalila ndamo syelesi. Kwende tukambilane yisyasyo yiŵili, nambo chitutande kukambilana ngani jajatendekwe ku pwando ja ukwati ku Kana.
YAKUSIMONJESYA YAŴATESILE YESU YIKUSATUJIGANYA KUŴA ŴAKULINANDIYA
9. Ligongo chichi Yesu jwachenjile mesi nikuŵa finyo pa pwando ja ukwati? (Yohane 2:6-10)
9 Aŵalanje Yohane 2:6-10. Ana Yesu jwasingalilwe pajwamasile finyo pa pwando ja ukwatiwu? Iyayi. Pangali yakulochesya yiliyose yayasasile kuti Mesiya chachichenga mesi ni kuŵa finyo. Nambo aganisye mwampaka apikanile wawojo yili mkuti yakumwa yimasile pa pwando ja ukwati wawo. Yeleyi ni yayamtendekasisye Yesu kulitendela chanasa liŵasali mnopemnope ŵandu ŵaŵalombanagawo. Mwamti jwatesile yakuti jemanjajo akatenda sooni. Mpela mwatuŵechetele kundanda kula jwalakwe jwatesile chakusimonjesya mwakuchenga mesi ni kuŵa finyo jwambone mnope jwakwana malita 390. Komboleka kuti jwalakwe jwatendekasisye kuti paŵe finyo jwamjinji ni chakulinga chakuti finyo jwine jusigale kuti chakamulichisye masengo kapena kusumisya kuti mbiya syakwe chisikamuchisye liŵasa lyasambanolyo. Kusala yisyene liŵasa lyasambanolyo lyayamichile mnope yaŵatesile Yesuyi.
Tumsyasyeje Yesu mwakuŵambala kupoka payindu yatukombwele kutenda (Alole ndime 10-11) e
10. Ana buku ja Yohane chaputala 2 jikusatujiganya yamtuli pakwamba ya chakusimonjesya chaŵatesile Yesu? (Alole chiwulili.)
10 Aganichisyesoni yaŵatite pakulondesya chenene nganiji mu buku ja Yohane chaputala 2. Yesu nganagumbasya lulosyo ni mesi mwakusimonjesya. Mmalomwakwe jwasalile ŵamasengo kuti agumbasye lulosyo ni mesi. (Ndime 6, 7) Panyuma pakuti agachenjile mesigo nikuŵa finyo, Yesu nganajigala finyojo ni kwawula najo kwa jwamkulungwa jwa pwando. Mmalomwakwe jwasalile ŵamasengo kuti atende yeleyo. (Ndime 8) Nambosoni Yesu nganateka finyojo nikwawulaga najo kukwaliji achalendo kwineku ali mkuŵecheta kuti, ‘Agambe kupasya finyo jwambanganyisyeju.’
11. Ana mpaka tulijiganye chichi pa chakusimonjesya chiŵatesile Yesu?
11 Ana mpaka tulijiganye chichi kutyochela ku chakusimonjesya chaŵatesile Yesu mwakuchenga mesi nikuŵa finyo? Pelepa tukulijiganya ndamo ja kulinandiya. Yesu nganatanda kupoka ligongo lya chakusimonjesya chiŵatesilecho. Nambosoni jwalakwe nganapochejepo ligongo lya yindu yaŵatesile paumi wakwe. Mmalomwakwe, jwalakwe mwakulinandiya jwapelekaga ulemu wosope kwa Atati ŵakwe. (Yoh. 5:19, 30; 8:28) Naga tukumsyasya Yesu mwakuŵa ŵakulinandiya, tuchiŵambala kupoka pa yindu yatukombwele kutenda. Chinga tukombwele kutenda yamtuli pakumtumichila Yehofa, tukusasosekwa kuŵambala kulilapilila achimsyewe. Mmalomwakwe, tutendeje yakuti uchimbichimbi wosope ujawuleje kwa Yehofa. (Yel. 9:23, 24) Kwende ndaŵi syosope tumpeje Yehofa uchimbichimbi wakusasosechela. Nambosoni tukumbuchileje kuti pangali chindu chilichose champaka tukombole kutenda pali pangali chikamuchisyo cha Yehofa.—1 Akoli. 1:26-31.
12. Ana ni litala line lyapi lyampaka litukamuchisye kumsyasya Yesu pangani jakuŵa ŵakulinandiya? Alondesye.
12 Kwende tulole litala line lyampaka litukamuchisye kumsyasya Yesu pangani jakuŵa ŵakulinandiya. Aganichisye ya chakutendekwa achi: Jwamkulungwa jwa mumpingo amalile ndaŵi jejinji pakumkamuchisya jwakutumichila jwakamuchisya jwachinyamata kukosechela ngani jakwe ja wosope jandanda. Yakuyichisya yakwe, m’bale jwachinyamatajo aŵechete chenene nganijo. Kaneko panyuma pa misongano, mundu jwine akwawula kwa jwamkulungwa jwa mumpingo jula ni kumsalila kuti, ‘Kusala yisyene m’bale jwamti jwamti jula aŵechete chenene ngani jakwe.’ Ana pelepa jwamkulungwa jwa mumpingoju akusosekwa kuŵecheta kuti, ‘Nayimanyiji kuti chaŵechete chenene ngani jila, ligongo malile ndaŵi jejinji ndili kumkamuchisya.’ Kapena mwakulinandiya mpaka aŵechete kuti, ‘Elo aŵechete chenene ngani jila, mwamti unesoni jisangalesye mnope.’ Naga tuli ŵakulinandiya nganituŵa tulilapilile payindu yambone yatwatendele ŵane. Tukusaŵa ŵakusangalala kumanyilila kuti Yehofa akusalola soni kuyamichila yindu yambone yatwatendele ŵane. (Alole Mateyu 6:2-4; Aheb. 13:16) Kusala yisyene, tukusamsangalasya Yehofa patukumsyasya Yesu mwakuŵa ŵakulinandiya.—1 Pet. 5:6.
YAKUSIMONJESYA YAŴATESILE YESU YIKUSATUKAMUCHISYA KUŴA ŴACHANASA
13. Ana Yesu jwayiweni yamtuli pajwaŵandichilaga msinda wa Naini? Ana jwalakwe jwatesile chichi? (Luka 7:11-15)
13 Aŵalanje Luka 7:11-15. Agambe ganichisya ya chakusimonjesya chine chaŵatesile Yesu cha mkatikati mwa utumiki wakwe. Jwalakwe jwaliji pa ulendo wakwawula ku Naini, msinda wa ku Galileya wawaliji chiŵandika ni Shunemu kwele jwakulochesya Elisa ŵamjimwisye ku chiwa mwanache jwa jwamkongwe jwine, yaka 900 munyumamo. (2 Ayi. 4:32-37) Yesu pajwayikaga chiŵandika chipata cha msindawo, ŵaweni ŵandu ali mkwawula kukwasa malilo. Yeleyi yaliji yakupweteka mnope kwa jwamkongwejo ligongo jwakwete mwanache jumpepe pejo basi. Nambo jwamkongwejo nganaŵa jikape, jwalijisoni ni gulu ja ŵandu. Yesu ŵajimiche ŵandu ŵaŵanyakwile malilogo ni kutenda chindu chakusimonjesya mwakumjimusya ku chiwa mwanache jujwawilejo. Pa ŵandu ŵatatu ŵele Yesu ŵajimwisye ku chiwa, mwanacheju jwaliji jwandanda mwakamulana ni yagakusasala mabuku ga Ngani Syambone.
Tumsyasyeje Yesu mwakwalosya chanasa ŵandu ŵawililwe (Alole ndime 14-16)
14. Ana ni yindu yine yapi yakuyilondesya chenene mu buku ja Luka chaputala 7? (Alole chiwulili.)
14 Kwende tulole yaŵatite pakulondesya chenene nganiji mu buku ja Luka chaputala 7. Ana ayiweni kuti Yesu “paŵam’weni” jwamkongwe jwakuwilwajo kaneko “chamkamwile mnope chanasa”? (Ndime 13) Komboleka kuti Yesu ŵamtendele mnope chanasa jwamkongwejo paŵam’weni ali mkulila pajwajendaga chiŵandika mtembo wa mwanache jwakwejo. Yesu nganagamba kumtendela chanasape jwamkongwejo, nambo jwatesileposoni kandu. Jwalakwe jwaŵechetene ni jwamkongwejo, soni ngatukukayichila kuti ŵaŵechete mwakumlimbikasya paŵamsalilaga kuti “mleche kulila.” Kaneko jwatesile chindu chakusimonjesya pakusaka kumkamuchisya jwamkongwejo. Mwamti ŵamjimwisye mwanachejo ku chiwa ni ŵampeleche kwa mamagwe.—Ndime 14, 15.
15. Ana mpaka tulijiganye chichi pachakusimonjesya chaŵatesile Yesu?
15 Ana mpaka tulijiganye chichi pa chakusimonjesya chaŵatesile Yesu pakumjimusya ku chiwa mwanache jwa jwamkongweju. Tukulijiganya kuti tukusosekwa kwalosyaga chanasa ŵandu ŵakulila. Yisyene kuti m’weji nganituŵa tukombwele kwajimusya ŵandu ku chiwa mpela muŵatendele Yesu. Nambope mpela muŵatendele Yesu mpaka twalosye ŵane chanasa mwakumanyilila yayikwatendechela Aklistu achimjetu. Mpakasoni twalosye chanasa ŵandu ŵane mwakuŵecheta kapena kutenda yindu yampaka yalimbikasye. d (Mis. 17:17; 2 Akoli. 1:3, 4; 1 Pet. 3:8) Atamose kwatendela chindu chamnono soni kwaŵechetela maloŵe gakulimbikasya mpaka yakamuchisye mnope.
16. Mwakamulana ni chiwililicho, ana alijiganyisye chichi kutyochela kwa mlongo jwine jwele mwanache jwakwe jwajasiche?
16 Aganichisye ya chakutendekwa achi: Yaka yipiteyo, mlongo jwine pajwajimbaga nyimbo m’Nyumba ja Uchimwene, ŵam’weni mlongo jwine juŵaŵandikene najo ali mkulila. Nyimboji jasalaga ya chembecheyo chakwamba kwimuka ku chiwa. Mlongo juŵalilagajo yaliji yakuti mwanache jwakwe jwamkongwe jwaliji ali agambile kuwa kwene. Ligongo lyakuti mlongo jwinejo jwamanyilile yeleyi, jwapite pajwaliji mlongo juŵalilagajo ni kumkamula m’makoyo gakwe mpaka pajamalile nyimbojo. Mlongo juŵalilaga jula pajwakumbuchilaga yeleyi jwatite, “Nayiweni kuti abale ni alongo akusanonyela mnope.” Mlongoju jwasangalele mnope ligongo lyakuti palisikuli jwasimanikwe pa misongano ja mpingo. Jwalakwe jwasasilesoni kuti, “Ku Nyumba ja Uchimwene ni kwatukusapata yindu yakutukamuchisya.” Myoyo kwende ndaŵi syosope tukakayichilaga yakuti Yehofa akusalola soni kuyamichila yiliyose yatukusatenda pakwalosya chinonyelo ŵandu ŵawililwe soni “ŵajasile mtima.”—Sal. 34:18.
KUPATA MFUNDO SYAKULIMBIKASYA PATUKULIJIGANYA MALOŴE GA MLUNGU
17. Ana tulijiganyisye chichi munganiji?
17 Tukusapindula mnope patukuŵalanga yakusimonjesya yaŵatesile Yesu yayalembedwe m’Baibulo. Yakusimonjesyayi yikusatujiganya kuti Yehofa soni Yesu akusatunonyela mnope, nambosoni kuti Yesu akwete machili gakumachisya yakusawusya yosope yakusasimana nayo ŵandu. Ngatukukayichilasoni kuti yindu yambone chiyitendekwe mu Uchimwene wa Mlungu pachiwutande kulamulila pachangakaŵapa pachilambo chapasi. Patukuganichisya ngani syelesi, mpaka tulolesoni matala gane gampaka tusyachisye ndamo syaŵakwete Yesu. Uli ngalinganya yakutanda kulijiganya Baibulo pajika kapena kutenda Kulambila kwa Peŵasa ni ganichisyaga yindu yaŵatendaga Yesu. Mpaka alole yindu yampaka alijiganye ni kwasalilagasoni ŵane yindu yalijiganyisyeyo. Kutenda yeleyi mpaka kukamuchisye kuti yakambilana yawo yiŵe yakulimbikasya mnope.—Alo. 1:11, 12.
18. Ana tuchikambilana chichi mungani jakuyichisya?
18 Chakumbesi kwa utumiki wakwe, Yesu jwatesile chakusimonjesya chatatu cha kumjimusya mundu ku chiwa. Sonitu chelechi chaliji chakusimonjesya chakumalisya pa yakusimonjesya yitatu yajwatesile jwalakwe yakwajimusya ŵandu ku chiwa yayalembedwe m’Baibulo. Chakusimonjesyachi chaliji chakulekangana ni yine yila ligongo pandaŵiji Yesu ŵamjimwisye ku chiwa mjakwe jwapamtima. Ana mpaka tulijiganye chichi kutyochela pa chakusimonjesya chelechi? Ana chakusimonjesyachi mpaka chilimbikasye chamtuli chikulupi chetu chakwamba ya chembecheyo cha kwimuka ku chiwa? Ngani jakuyichisya jichijanga yiwusyo yeleyi.
NYIMBO NA. 20 Ŵatupele Mwanagwawo Jumopejo!
a Yikusaŵa yakusangalasya patukuŵalanga yaŵatesile Yesu. Mwachisyasyo, jwalakwe jwajimiche mbungo jamachili, kwaposya ŵakulwala soni kwajimusya ŵawe. Yindu yeleyi nganagamba kuyilemba m’Baibulo kuti yitusangalasyeje nambo ŵayilembile kuti yitujiganyeje. Munganiji, chitulole yampaka yijile yakusimonjesyayi pakutukamuchisya kumkulupilila mnope Yehofa soni Yesu. Chitulolesoni yampaka yijile pakutukamuchisya kola ndamo syambone.
b Jwamlijiganye ya Baibulo jwine jwasasile kuti, “Mundaŵi ja m’Baibulo kwapochela ŵandu ŵakuwonaga kuŵa kwakusosekwa mnope. Mwamti ŵandu ŵawuwonaga kuti waliji udindo wawo kwapa achalendo yindu yaŵasosechelaga. Mnopemnope kwa mundu jwakwete pwando ja ukwati jwasosekwaga kwapatila ŵandu yakumwa soni yakulya yejinji.”
c Mabuku ga Ngani Syambone gakusasala yakusimonjesya yaŵatesile Yesu yakupunda 30. Yesu jwatesile yakusimonjesya yejinji, nambo Baibulo jangasala chakusimonjesya chilichose pajikapajika. Pandaŵi jine, ŵandu wosope ŵa mumsinda wine wakwe ŵapite kwa Yesu, mwamti jwalakwe ‘ŵaposisye ŵandu ŵajinji ŵaŵalwalaga.’—Maliko 1:32-34.
d Naga akusaka kumanyilila yampaka atende kapena kuŵecheta pakusaka kwalimbikasya ŵandu ŵawililwe, alole ngani jakuti, “Muzitonthoza Anthu Amene Aferedwa, Ngati Mmene Yesu Anachitira” mu Sanja ja Mlonda ja Chichewa ja Nofemba 1, 2010.
e KULONDESYA CHIWULILI: Yesu ajimi kunyuma ni akwalolechesya ŵandu ŵayiche ku pwando ja ukwati nambosoni jwamlume ni jwamkongwe ŵakulombanawo pakusangalala ni finyo jwambone jwapanganyisye jwalakwe.
