1-2. Ana tukusosekwa kutendega chichi patukwembecheya chilambo chasambano?

 TUKUSAYAMICHILA mnope yatusalile Yehofa yakuti chachityosya chilambo chakusakalachi ni kuyikasya chilambo chasambano chachichiŵa chambone mnope. (2 Pet. 3:13) Atamose kuti ngatukumanyilila kuti yeleyi yichitendekwa chakachi, nambope maumboni gakulosya kuti chilambo chasambano chiŵandichile.—Mat. 24:32-34, 36; Mase. 1:7.

² Mwangasamala kandu ya ulewu wandaŵi jatutemi mu gulu ja Yehofa, wosopewe pandaŵi ajino tukusosekwa kulimbisyaga chikulupi chetu pa yaŵasasile Yehofa yakwamba chilambo chasambanochi. Ligongo chichi tukuŵecheta myoyo? Ligongo lyakuti atamose mundu jwakwete chikulupi chakulimba mpaka yikomboleche kuwujila munyuma. Ni ligongo lyakwe ndumetume Paulo pakusala yakupelembela kwa chikulupi jwatite uli “ulemwa wawukusatutega mwangasawusya.” (Aheb. 12:1) Myoyo kuti tulimbisyeje chikulupi chetu, ndaŵi syosope tukusosekwa kulolaga maumboni gagakulosya kuti chilambo chasambano chiŵandichile.—Aheb. 11:1.

3. Ana mungani ajino chitukambilane chichi?

³ Munganiji, chitukambilane matala gatatu gampaka gatukamuchisye kukulupilila mnope yaŵasasile Yehofa yakwamba chilambo chasambano. Chitulole yeleyi (1) mwakuganichisya mnope ya mbopesi jakutuwombola. (2) Mwakuganichisya mnope ya machili gakwete Yehofa. Soni (3) mwakuŵa ŵakulipeleka mnope pakumtumichila Yehofa. Kaneko chitukambilane yagakusati maloŵe ga Yehofa gaŵamsalile Habakuku pakutukamuchisya m’weji masiku agano. Nambo chandanda kwende tukambilane yakutendekwa yatukusasimana nayo masiku agano yayikusasosekwa kuti tukulupilileje mnope yakwika kwa chilambo chasambano.

YAKUTENDEKWA YAMPAKA YISACHE CHIKULUPI CHAKULIMBA

4. Ana ni yakusagula yapi yayikusasaka kola chikulupi chakulimba?

⁴ Lisiku lililyose tukusakola yakusagula yayikusasaka chikulupi  chakulimba. Mwachisyasyo, tukusasagula ŵandu ŵakunguluka nawo, yindu yakusangalasya yatukusayinonyela, majiganyo gatukusosekwa kutenda, mundu jwatukusosekwa kulombana najo, ngani jakola ŵanache nambosoni masengo. Myoyo mpaka yiŵe chenene kuliwusyaga kuti, ‘Ana yangusasagula yikusalosya kuti ngusakulupililaga kuti chilambo chakusakalachi chisigele panandi kumala, soni kuti chilambo chasambano cha Mlungu chikwika? Kapena ana yangusasagula yikusalosya kuti ngusajigalila mwakusaganichisya ŵandu mchilambochi kuti chiwa chili mbesi ja yindu yosope?’ (Mat. 6:19, 20; Luk. 12:16-21) Mpaka tusagule yindu mwalunda naga tukulimbisya chikulupi chetu chakuti chilambo chasambano chiŵandichile.

5-6. Ligongo chichi tukusasosekwa kukola chikulupi chakulimba patukusimana ni yakusawusya? Apeleche chisyasyo.

⁵ Tukusasimanasoni ni yakusawusya yayikusasaka kukola chikulupi chakulimba. Yakusawusyayi mpaka yiŵe mpela: Kulagasidwa, kulaga ni ulwele wekulungwa nambosoni yindu yine yejinji yampaka yitutendekasye kuŵa ŵakutenguka. Patusimene ni yindu mpela yeleyi mwine pandanda mpaka tulinjeje kulimbana nayo, nambo yakusawusyayi payikujigala ndaŵi mpaka tusosekwe kola chikulupi chakulimba kuti tukombole kupilila ni kupitilisya kumtumichila Yehofa mwakusangalala.—Alo. 12:12; 1 Pet. 1:6, 7.

⁶ Patukulaga mnope ni yakusawusyayi, mwine mpaka tutande kuganisya kuti chilambo chasambano chaŵasasile Yehofa ngasichiyika. Naga tutandite kuganisya mu litala lyeleli, ana yikusagopolela kuti nganitukola chikulupi chakulimba? Ngaŵa kusyesyene. Aganichisye chisyasyo achi: Patuli mu ndaŵi jakusisima mnope mwine mpaka tutande kuganisya kuti ndaŵi jachitukuta ngasijiyika. Nambope ndaŵi jachitukuta jikusayikaga. Mwakulandana ni yeleyi, patutengwiche mnope mpaka tutande kuganisya kuti chilambo chasambano ngasichiyika. Nambope naga chikulupi chetu chili chakulimba tukusamanyilila kuti yaŵasasile Yehofa yichikwanilichikwa. (Sal. 94:3, 14, 15; Aheb. 6:17-19) Naga tukukola chikulupi chelechi tuchipitilisya kuŵika pa malo gandanda yindu yakwayana ni kumtumichila Yehofa.

7. Ana nganisyo syapi syatukusosekwa kusiŵambala?

⁷ Tukusasosekwasoni chikulupi chakulimba patukukamula masengo gakulalichila. Ŵandu ŵajinji ŵatukusitwalalichila akusaganisya kuti “ngani syambone” syakwamba kwika kwa chilambo chasambano cha Mlungu jili ngani jakusawusya kujikulupilila. (Mat. 24:14; Esek. 33:32) Ngatukusosekwa kukunda yeleyi kusokonasya kaganisye ketu. Kuti yeleyi yikatutendechela, tukusosekwa kulimbisyaga chikulupi chetu. Kwende tulole matala gatatu gampaka gatukamuchisye kutenda yeleyi.

TUGANICHISYEJE YA MBOPESI JAKUTUWOMBOLA

8-9. Ana kuganichisya ya mbopesi jakutuwombola mpaka kulimbisye chamtuli chikulupi chetu?

⁸ Litala limo lyakutukamuchisya kulimbisya chikulupi chetu lili kuganichisya ya mbopesi jakutuwombola. Mbopesi jakutuwombola jikusapeleka umboni wakulosya kuti yaŵasasile Yehofa yichitendekwa nditu. Naga tukuganichisya mwakusamala mnope ligongo lyakwe mbopesi jakutuwombola japelechedwe nambosoni yajikugopolela, yikusalimbisya chikulupi chetu chakuti yaŵasasile Yehofa yakwamba umi wangali mbesi mchilambo chasambano yichikwanilichikwa. Ligongo chichi tukuŵecheta myoyo?

⁹ Tukuŵecheta yeleyi pakuganichisya yiyatendekwe kuti mbopesiji jipelechedwe. Yehofa ŵamtumisye Mwanache jwakwe jwandanda jwapamtima, mjakwe jusyesyene kutyochela kwinani ni kwika pachilambopa ni kupagwa mpela mundu jwamlama. Yesu ali pa chilambo chapasi jwapilile yindu yakusawusya yejinji kaneko jwalasile ni kuwa chiwa chakupweteka mnope. Pelepatu nikuti Yehofa jwalipile chindu chamtengo wapenani. Mlungu jwetu jwakunonyelwa ngamkanakunda kuti Mwanache jwakwe alaje ni kuwa ni chakulinga chakuti agambe kutupa umi wambone nambo wangatamilisya.  (Yoh. 3:16; 1 Pet. 1:18, 19) Kulipila kwa mbopesi jamtengo wapenani kweleku yikulosya kuti Yehofa akusimichisya kuti umi wangali mbesi mchilambo chasambano uli usyesyene soni uchiyika.

TUGANICHISYEJE YA MACHILI GAKWETE YEHOFA

10. Mwakamulana ni Aefeso 3:20, ana Yehofa mpaka akombole kutenda chichi?

¹⁰ Litala lyaŵili lyampaka litukamuchisye kulimbisya chikulupi chetu lili kuganichisya ya machili gakwete Yehofa. Jwalakwe akwete machili gakwanilichisya chilichose chasasile kuti chatende. Ŵandu ŵajinji masiku agano akusakayichila yakukwanilichikwa kwa yindu yaŵasasile Yehofa yakuti ŵandu chachikola umi wangamala mchilambo chasambano. Nambo mwakuwilisyawilisya Yehofa akusatusalila kuti chachikwanilisya yeleyi. Jwalakwe ali Mlungu Jwamachiligosope. (Yob. 42:2; Maliko 10:27) Myoyo tukakayichilaga pakutusalila Yehofa kuti chachitenda yindu yineyakwe yatukusaganisya kuti nganiyiŵa yikomboleche.—Aŵalanje Aefeso 3:20.

11. Apeleche chisyasyo chimo chakulosya kukwanilichikwa kwa yindu yiŵasasile Yehofa yayawonekaga kuti nganiyiŵa yikomboleche. (Alole libokosi lyakuti “ Yindu Yine Yayakwanilichikwe Yaŵasasile Yehofa Kuti Chatende.”)

¹¹ Kwende tukambilane yindu yine yaŵasasile Yehofa kuti chayitende kwa ŵandu ŵane munyumamu yayawonekaga kuŵa yakusawusya kuyikulupilila kuti mpaka yikwanilichikwe. Jwalakwe jwasimichisye Abulahamu ni Sala kuti chakole mwanache atamose kuti ŵaliji ali akalambele. (Gen. 17:15-17) Jwamsalilesoni Abulahamu kuti yisukulu yakwe chachiyipa chilambo cha Kanani. Nambope Ayisalayeli ŵaŵaliji yisukulu ya Abulahamu paŵaliji achikapolo ku Iguputo, yaliji yakusawusya kusimichisya kuti yaŵasasile Mlunguyi yichikwanilichikwa. Nambope yatendekwe. Kaneko, Yehofa ŵamsalile mundu jwamkalambale Elisabeti kuti chakole mwanache. Ŵamsalilesoni Maliya juŵaliji mwali kuti chachiŵeleka Mwanache jwa Mlungu. Kupagwa kwa Mwanacheju kwaliji kwakuti chikukwanilisye yaŵasasile Yehofa yaka masawusande gejinji munyumamo mu mgunda wa Edeni. Mwamti yeleyi yakwanilichikwe.—Gen. 3:15.

12. Ana lilemba lya Yoswa 23:14 soni Yesaya 55:10, 11, likusatusimichisya yamtuli pakwamba ya machili ga Yehofa?

¹² Tukusakulupilila yakuti Yehofa chachiyika nacho chilambo chasambano patukuganichisya yindu yaŵele ali mkukwanilisya munyumamu. (Aŵalanje Yoswa 23:14; Yesaya 55:10, 11.) Yeleyi yikusatutendekasya kuti tuŵeje ŵakoseka kwakamuchisya ŵane kumanyilila yasasile Yehofa pakwamba ya chilambo chasambano kuti nganisiŵa sagamisi soni adisi. Sonitu pakwamba ya kwinani kwasambano soni chilambo chapasi chasambano, Yehofa msyenejo akutusalila kuti maloŵega gali “gakudalilichika soni gasyesyene.”—Chiw. 21:1, 5.

TULIPELECHEJE MNOPE PAKUMTUMICHILA YEHOFA

13. Ana misongano mpaka jilimbisye chamtuli chikulupi chetu? Alondesye.

¹³ Litala lyatatu lyampaka tulimbikachisye chikulupi chetu lili kulipeleka mnope pa kumtumichila Yehofa. Mwachisyasyo aganichisye maumbone gatukusapata patuli pamisongano ja mpingo. Mlongo Anna, jwaŵele ali mkutenda utumiki wandaŵi syosope mmatala gakulekanganalekangana jwasasile kuti, “Misongano jikusangamuchisya kukola chikulupi chakulimba. Atamose jwakuŵecheta ngani ali mkuŵecheta mwangakamula mtima, nambope ngusapataga kandu kanekakwe kakakusangamuchisya kupikanichisya mfundo ja m’Baibulo. Yeleyi yikusalimbikasya chikulupi changu.” b Yili yangakayikasya kuti wosopewe tukusayamichilasoni ndemanga syakulimbikasya syakusapeleka abale ni alongo ŵetu patuli pa misongano ja mpingo.—Alo. 1:11, 12; 10:17.

14. Ana kukamula masengo gakulalichila kukusalimbisya chamtuli chikulupi chetu?

¹⁴ Tukusalimbisyasoni chikulupi chetu patukukamula masengo gakulalichila. (Aheb. 10:23) Barbara jwaŵele ali mkutumichila Yehofa kwa  yaka yakupunda 70 jwatite, “Nayiweni kuti ndaŵi syosope pangukamula masengo gakulalichila chikulupi changu chikusaŵa chakulimba. Pangwasalila ŵane ya yindu yakusimonjesya yasasile Yehofa ni pachikusalimba mnope chikulupi changu.”

15. Ana lijiganyo lyapajika likusalimbisya chamtuli chikulupi chetu? (Alole yiwulili.)

¹⁵ Mbali jinesoni jajikusalimbisya chikulupi chetu jili lijiganyo lyapajika. Susan akusayiwona kuti yikusaŵa yakamuchisya kukola ndandanda ja lijiganyo lyapajika. Jwalakwe akusala kuti, “Lyamlungu ngusatenda lijiganyo lyapajika mwakosechela lijiganyo lya Sanja ja Mlonda lya wiki jakuyichisya. Lyakulemba ni Lyaŵili ngusatenda lijiganyo lyapajika mwakosechela misongano ja mkati mwa wiki. Pele masiku ganego ngusakola lijiganyo lyapajika mwakulijiganya ngani syakulekanganalekangana.” Kuya mwakutamilichika ndandanda jeleji kumkamuchisye Susan kulimbisya chikulupi chakwe. Nambosoni Irene jwaŵele ali mkutumichila kwa yaka yejinji ku likulu lyetu lya pachilambo chosope, juyiweni kuti kulijiganya ngani sya m’Baibulo syakwamba yakulochesya kulimbisye chikulupi chakwe. Jwalakwe jwatite, “Ngusaŵa jwakusangalala kuyiwona kuti yakulochesya yasasile Yehofa yikusakwanilichikwa yosope yene atamose tumbali twamwanamwana.” c

“YICHIYIKAPE NDITU”

16. Ana ligongo chichi yaŵamsalile Yehofa Habakuku yili yakamuchisya kwetuwe masiku agano? (Ahebeli 10:36, 37)

¹⁶ Ŵakutumichila ŵajinji ŵa Yehofa aŵele ali mkwembecheya kumala kwa chilambo chakusakalachi kwandaŵi jelewu. Malingana ni kaganisye ketu ka umundu, kukwanilichikwa kwa yindu yaŵasasile Yehofa mpaka kuwonecheje kuti kukuchelewa. Nambope Yehofa ŵamsimichisye jwakulochesya Habakuku ya ngani jeleji kuti, “Mwulembe pakuti ndaŵi jakwe nganijikwane kuti ukwanilisidwe. Nambo ndaŵi jakwe jikwisa mwakwanguya, nipo yitinjimlosya mmwejo tiyichitendekwa. Naga yikuwoneka kuti yikokoŵa, timyijembecheyejepe. Yichiyikape nditu, ngaŵa kokoŵa iyayi.” (Hab. 2:3) Ana yaŵasasile Yehofayi yamkamuchisye Habakukupe?  Kapena maloŵe gelega gakutukamuchisyasoni m’weji masiku agano? Mwakusalilidwa ni Mlungu, ndumetume Paulo jwasasile maloŵe gelega kwa Aklistu ŵakwembecheya chilambo chasambano. (Aŵalanje Ahebeli 10:36, 37.) Kusala yisyene tuli ŵakusimichisya kuti atamose yiwonecheje kuti yatusalile Yehofa kuti chatukulupusye mchilambo chakusakalachi yikuchelewa, “yichiyikape nditu ngaŵa kokoŵa iyayi.”

17. Ana mlongo jwine jwakamulichisye chamtuli malangiso gaŵapeleche Yehofa kwa Habakuku?

¹⁷ Kwandaŵi jelewu ŵakutumichila ŵajinji ŵa Yehofa aŵele ali mkukamulichisya masengo malangiso gaŵapeleche Yehofa kwa Habakuku gakuti ‘mjembecheyeje.’ Mwachisyasyo, Mlongo Louise jwatandite kutumichila Yehofa mu 1939. Jwalakwe jwatite, “Pandaŵiji naganisyaga kuti Alamagedo chijiyiche mkanimalisye majiganyo gangu ga kusekondale. Nambo nganiyitendekwa. Kwa yaka yejinji, kuŵalanga ngani syangusasikolanga kuti ‘ngani syakwembecheya’ kungamuchisye mnope. M’Baibulo akusasala ya Nowa, Abulahamu, Yosefe nambosoni ŵakutumichila ŵane ŵaŵaŵele ali mkwembecheya kwandaŵi jelewu kuti apochele yindu yaŵajembecheyaga yaŵasalile Yehofa kuti chiŵape. Kola mtima wakwembecheya kungamuchisye nambosoni kwakamuchisye ŵandu ŵane kukulupilila yakuti chilambo chasambano chiŵandichile.” Ŵandu ŵatumichile Yehofa kwandaŵi jelewu mpaka ajitichisye yeleyi.

18. Ana kuganichisya yachilengedwe mpaka kulimbisye chamtuli chikulupi chetu chakuti chilambo chasambano chikwika?

¹⁸ Yili yisyene kuti chilambo chasambano nganichiŵe kwika. Nambope aganichisye ayi. Pana yindu yejinji yayitusyungulile mpela ndondwa, yitela, yinyama nambosoni ŵandu. Pangali mundu jwampaka akayichile kuti yindu yeleyi yili yisyesyene atamose kuti papali ndaŵi jele yindu yeleyi kwaliji kuli kwangali. Nambope sambano yipali ligongo lyakuti Yehofa jwayipanganyisye. (Gen. 1:1, 26, 27) Mlungu jwetu alinganyisyesoni yakuti chachitamilikasya chilambo chasambano. Jwalakwe chachikwanilisya yeleyi. Mchilambo chasambano ŵandu chachisangalala ni umi wangamala soni wakola yilu yambone mnope. Ngatukukayichila kuti pandaŵi jiŵalinganyisye Mlungu chilambo chasambano chichiyika nditu mpela mwayiŵelele yindu yayitusyungulile mchilambochi lelojino.—Yes. 65:17; Chiw. 21:3, 4.

19. Ana mpaka tulimbisye chamtuli chikulupi chetu?

¹⁹ Pandaŵi ajino kwende tukamulichisyeje masengo upile uliwose watukwete wakulimbisya chikulupi chetu. Tuyamichileje mnope mbopesi jakutuwombola. Tuganichisyeje mnope ya machili gakwete Yehofa. Nambosoni tulipelecheje mnope pakutenda yindu yakwayana ni kumtumichila Mlungu. Patukutenda yeleyi tuchiŵa mu gulu ja “ŵandu ŵele ligongo lya chikulupi soni kuwusimana mtima kwawo, Mlungu ŵapele yindu yaŵatite chachapa.”—Aheb. 6:11, 12; Alo. 5:5.