NGANI JAKULIJIGANYA 18
Yampaka Tutende Kuti Twalimbikasyeje Ŵane Patuli Pamisongano ja Mpingo
“Kwende tuganichisyaneje soni tulimbikasyaneje.”—AHEB. 10:24, 25.
NYIMBO NA. 88 Amanyisye Matala Gawo
YACHITULIJIGANYE a
1. Ligongo chichi tukusajanga pamisongano ja mpingo?
ANA ligongo chichi tukusatendaga misongano ja mpingo? Chakulinga chetu chekulungwa chikusaŵa kumchimbichisya Yehofa. (Sal. 26:12; 111:1) Chakulinga chine chikusaŵa kuti twalimbikasye ŵandu ŵane patukutama mundaŵi jakusawusyaji. (1 Ates. 5:11) Myoyo patukwanga pamisongano ja mpingo tukusaŵa tuli mkukwanilisya mbali syosopesi.
2. Ana ni ndaŵi japi jampaka tujanje pamisongano ja mpingo?
2 Wiki jilijose tukusakola upile wakwanga pamisongano ja mpingo. Mwachisyasyo, pamsongano wa kumbesi kwa wiki tukusakola upile wakwanga pandaŵi ja lijiganyo lya Sanja ja Mlonda. Pele pamsongano wamkati mwa wiki tukusakola upile wakwanga pandaŵi ja Mfundo Syakamuchisya, Lijiganyo lya Baibulo lya Mpingo nambosoni mbali sine syakambilana.
3. Ana ni yakusawusya yapi yampaka tusimane nayo patukupeleka ndemanga? Ana lilemba lya Ahebeli 10:24, 25 mpaka litukamuchisye chamtuli?
3 Wosopewe tukusasaka kumchimbichisya Yehofa soni kwalimbikasya Aklistu achimjetu. Nambo ndaŵi sine patukupeleka ndemanga pamisongano jampingo mpaka tusimane ni yakusawusya yakuyichisyayi. Mpaka tutendeje woga kuti tujanje pamisongano ja mpingo, kapenasoni mpaka tusachilileje kuti tujanjeje mwakuwilisyawilisya nambo nikusimanikwa kuti ngakutulanjila. Ana mpaka tumalane chamtuli ni yakusawusya yosopeyi? Chikalata cha ndumetume Paulo chakwawula kwa Ahebeli mpaka chitukamuchisye kupata kwanga kwa yiwusyo yeleyi. Jwalakwe pajwasalaga yakusosekwa kwa kusongana pampepe, jwasasilesoni yakusosekwa kwa ‘kulimbikasyana.’ (Aŵalanje Ahebeli 10:24, 25.) Myoyo patumanyilile kuti ŵandu ŵayiche pamisongano jampingojo mpaka apindule mnope papikene ndemanga atamose jili jakata mpaka tutende chenene kupeleka ndemanga jetu. Nambosoni naga ngakutulanjila mwakuwilisyawilisya kuti tupeleche ndemanga mpaka tuŵe ŵakusangalala kumanyilila kuti ŵandu ŵane apatile upile wakwanga.—1 Pet. 3:8.
4. Ana munganiji chitukambilane yindu yitatu yapi?
4 Mungani ajino chitukambilane yindu yitatu. Chandanda chitulole yampaka tutende naga tukusasongana mumpingo wamwana mwele ŵandu ŵakuŵalanjikape ni ŵakusapeleka ndemanga. Kaneko chitulole yampaka tutende kuti twalimbikasye ŵane mumpingo wekulungwa mwele ŵandu ŵajinji akusajimikaga mkono kuti ajanje. Pakumalisya chitulole yampaka tutende kuti tupelecheje ndemanga syetu m’litala lyakwalimbikasya ŵane.
YAMPAKA TUTENDE KUTI TWALIMBIKASYEJE ŴANE MUMPINGO WAMWANA
5. Ana mpaka twalimbikasye chamtuli ŵane naga mumpingo mwetu tukusasongana ŵandu ŵamnono?
5 Mumpingo wamwana mukusakolasoni ŵandu ŵamnono ŵakusajanga pamisongano. Ndaŵi sine pakusajigala ndaŵi kuti papatikane mundu jwakwimika mkono. Yeleyi mpaka yitendekasyeje kuti misongano jiwonecheje kuchelewa kumala yampaka yiŵe yakupesya. Ana mpaka atende uli kuti yeleyi yikatendekwaga? Aŵeje ŵakusachilila kwimika mkono mwakuwilisyawilisya. Kutenda yeleyi yichalimbikasya ŵane kuti nombe nawo ajimicheje mkono mwakuwilisyawilisya.
6-7. Ana chichi champaka chitukamuchisye kuti tunandiye woga patukwanga pamisongano?
6 Nambi uli naga akusatenda woga mnope kuti ajanje pamisongano ja mpingo? Mwelemu ni mwakusapikanila ŵandu ŵajinji. Nambope pakusaka kwalimbikasya abale ni alongo ŵawo mpaka atende yampaka akombole kuti anandiye woga welewo kuti apelecheje ndemanga pamisongano ja mpingo. Ana mpaka atende chamtuli yeleyi?
7 Mpaka apate mfundo syampaka syakamuchisye kupeleka ndemanga mwangasawusya mu Sanja sya Mlonda syasyakopweche munyumamu. b Mwachisyasyo mfundo jakuti kukosechela chenene. (Mis. 21:5) Pajipikanichisye chenene nganijo ni pakusayiwonasoni kuŵa yangasawusya kuti akapeleche ndemanga jawo. Nambosoni mfundo jakuti kupeleka ndemanga syakata. (Mis. 15:23; 17:27) Kupeleka ndemanga syakata mpaka kwakamuchisye kuti akatendaga woga. Myoyo pakupeleka ndemanga syakata soni m’maloŵe gawogawope chachilosya kuti akosechele chenene soni ajipikanichisye chenene nganijo.
8. Ana Yehofa akusakuwona chamtuli kulingalinga kwetu kuti tupelecheje ndemanga?
8 Nambi uli panyuma pakulinjilila matala gelega akuyiwonape kuŵa yakusawusya kuti apelecheje ndemanga syakupunda jimo kapena siŵili? Aŵeje ŵakusimichisya kuti Yehofa chachiyamichila kulingalinga kwawo pakupeleka ndemanga. (Luk. 21:1-4) Yehofa jwangatusalilaga kutenda yindu yanganituŵa tukombwele. (Afil. 4:5) Myoyo tuŵeje ŵakusimichisya kupeleka ndemanga, tukoleje chakulinga, nambosoni tupopeleje kuti mtima wetu uŵeje m’malo. Atendeje yeleyi ni chakulinga chakuti akomboleje kupeleka ndemanga jakata.
YAMPAKA TUTENDE KUTI TWALIMBIKASYEJE ŴANE MUMPINGO WEKULUNGWA
9. Ana mumpingo wekulungwa mukusaŵa chakusawusya chapi?
9 Nambi mpingo wawukwete ŵakulalichila ŵajinji ukusasimana ni chakusawusya chapi? Komboleka mumpingomu mpaka alepeleje kumlanjila mundu kuti ajanje ligongo lya winji wa ŵandu ŵajimiche mkono kuti ajanje. Mwachisyasyo, mlongo Danielle akusasangalala pakupeleka ndemanga pamisongano. c Jwalakwe akusakuwona kwanga kuŵa mbali jakum’chimbichisya Mlungu, kwalimbikasya ŵane nambosoni jakulimbikachisya chikulupi chakwe. Nambo mlongoju paŵasamile mumpingo wekulungwa, nganamlanjilaga kaŵilikaŵili nambosoni mwine msongano wamalaga ngamlanjila. Jwalakwe jwatite. “Yeleyi yandengusyaga, nayiwonaga kuti ngupelembela kanekakwe. Mwamti payatendekwaga ndaŵi ni katema naganisyaga kuti jwakutendesyajo akutenda mwamelepe.”
10. Ana mpaka tutendeje uli kuti tukole upile wakwanga pamisongano?
10 Ana wawojo pakwete palipikene mpela mwaŵapikanilaga mlongo Danielle? Naga yili myoyo mwine mpaka atenguche nikuleka kwimika mkono nikwambaga kupikanila misongano. Nambo ngakusosekwa kuleka kwimika mkono kuti ajanje. Ana chichi champaka chakamuchisye kuti akombole kutenda yeleyi? Yeleyi mpaka yikomboleche naga akukosechela ndime syejinji kuti akajanje. Mwamti naga akulepela kwalanjila kuti ajanje chakundanda mpaka akolepe upile wakwanga mkatikati mwa msonganowo. Pakukosechela lijiganyo lya Sanja ja Mlonda aganichisyeje yajikuti kakamulane ndime jilijose ni mfundo jekulungwa ja nganijo. Naga akukosechela mulitala lyeleli chachikola yindu yejinji yakuti ajanje mu lijiganyolyo. Konjechesya pelepa mpaka atende chenenesoni kukosechela mfundo syakusawusya kusilondesya. (1 Akoli. 2:10) Ligongo chichi akusosekwa kutenda yeleyi? Ligongo lyakuti ŵandu ŵamnono ni ŵakusajimika makono kuti ajanje mundime jajikwete mfundo syakusawusya kusilondesya. Nambi uli panyuma pakulingalinga yindu yosopeyi ngakwalanjilape kuti ajanje? Apa sambano mpaka ajawule kwa jwakutendesya lijiganyo ni kumsalila kuti akusaka chajanje pandime jinejakwe.
11. Ana lilemba lya Afilipi 2:4 likutulimbikasya kutenda chichi?
11 Aŵalanje Afilipi 2:4. Mwakusalilidwa ndumetume Paulo jwalimbikasisye Aklistu achimjakwe kuti aganichisyeje yakusaka ya ŵane. Ana mpaka tukamulichisye masengo chamtuli malangisoga patukupeleka ndemanga pamisongano ja mpingo? Mpela mwayikusaŵela kuti m’weji tukusasachilila tuli tujanjile, tukumbuchileje kuti nombe achimjetu akusasaka kwanga.
Mpela mwayikusaŵela kuti wawojo akusapeleka upile wakuŵecheta kwa achimjawo pakukunguluka, apelechejesoni upile wakwanga kwa Aklistu achimjawo pali pamisongano ja mpingo (Alole ndime 12)
12. Ana ni litala lyambone lyapi lyakwalimbikachisya abale ni alongo ŵetu pamisongano ja mpingo? (Alole chiwulili.)
12 Aganichisye ayi: Tuwanichisye kuti akukunguluka ni achimjawo, ana wawojo mpaka asangalale kwambaga kuŵecheta jika achimjawowo ni ngapata upile wakuŵechetapo? Ngatukukayichila kuti nganaŵa asachile kutenda yeleyi. Mpaka asangalale mnope nombe achimjawowo ali mkuŵechetapo. Mwakulandana ni yeleyi, nombe m’weji tukusasaka kuti abale ni alongo akole upile wakwanga pali pamisongano ja mpingo. Mwamti litala limo lyakwalimbikachisya abale ni alongo ŵetu, lili kwapa upile wakulondesya ya chikulupi chawo. (1 Akoli. 10:24) Kwende tukambilane mwampaka tutendele yeleyi.
13. Ana mpaka tutende uli kuti twapeje ŵane upile wakwanga pamisongano?
13 Chimo mwa yindu yampaka yitukamuchisye kutenda yeleyi chili kupeleka ndemanga syakata. Kutenda yeleyi mpaka kwape upile ŵane wakupeleka ndemanga syawo. Achakulungwa ŵa mumpingo soni Aklistu ŵane ŵakumanyilila yejinji ni ŵakusosekwa kuŵa chisyasyo chambone pambali jeleji. Chaŵili chili kuŵambala kusala mfundo syejinji. Akusosekwa kutenda yeleyi atamose ndemanga jawo jili jakata. Naga akusala mfundo syejinji syakusilondesya mu ndimesyo, ŵane nganaŵa apatile mfundo syakuti asale. Mwachisyasyo, mundime ajino tukambilene mfundo siŵili, kupeleka ndemanga syakata soni kuŵambala kusala mfundo syejinji. Naga wawojo ali ŵandanda kwalanjila kuti ajanje mundime ajino, uli ngalinga kwamba kusala mfundo jimo, jinejo ni kwalechela ŵane kuti ajanje.
Ana ni ndaŵi japi jampaka tusagule kuti tukakwesya mkono wetu kuti tupeleche ndemanga? (Alole ndime 14) f
14. Ana chichi champaka chitukamuchisye kusagula ya winji wa ndaŵi jatukusaka kwanga pamisongano? (Alole chiwulili.)
14 Aganichisyeje mwalunda maulendo gakusosekwa kwanga pamisongano jampingo. Naga tukwimika mkono wetu mwakuwilisyawilisya mpaka yiŵe mpela tukumkanganichisya jwakutendesya lijiganyolyo kuti atulanjileje mwakuwilisyawilisya, yampaka yitendekasye kuti ŵane akapata upile wakwanga. Yeleyi mpaka yatengusye ŵane mwamti mpaka aleche kwimika mkono wawo.—Jwak. 3:7.
15. (a) Ana tukusosekwa kutenda uli naga nganatulanjila kuti tujanje pamisongano? (b) Ana jwakutendesya mpaka alosye chamtuli kuti akumganichisya jwalijose? (Alole libokosi lyakuti “ Yampaka Atende Naga Akwete Mbali Jakuti Ŵane Ajanje.”)
15 Naga abale ni alongo ŵajinji akwimika mkono kuti apeleche ndemanga syawo pamisongano ja mpingo, mpaka yiŵe yakusawusya kuti tupeleche ndemanga syejinji mpela mwatwasachilaga. Ndaŵi sine, jwakutendesya mbalijo nganaŵa akombwele kutulanjila atamose kampepe. Payitendekwe yeleyi tuŵambaleje kutumbila, ligongo yikusaŵa kuti nganatenda mwamele.—Jwak. 7:9.
16. Ana mpaka twalimbikasye chamtuli ŵandu ŵapeleche ndemanga pamisongano?
16 Ana mpaka atende uli naga ngayikomboleka kupeleka ndemanga mpela muŵasachilaga? Mpaka atende chenene kupikanilaga mwakusamala abale ni alongo ŵane pakupeleka ndemanga syawo. Yeleyi mpaka yakamuchisye kuti panyuma pamisongano akombole kwayamichila jemanjajo. Pakwayamichila abale ni alongo ŵawo mpaka yalimbikasye mnope jemanjajo mpela mwasikalimbikachisye ndemanga syawo. (Mis. 10:21) Kwayamichila ŵane lili litala line lyakwalimbikachisya achimjetu.
MATALA GANE GAMPAKA TWALIMBIKACHISYE ACHIMJETU
17. (a) Ana achinangolo mpaka ŵakamuchisye chamtuli ŵanache ŵawo kuti apelecheje ndemanga syambone? (b) Mwakamulana ni fidiyoji, ana ni matala mcheche gapi gampaka tukuye patukukosechela kwanga pamisongano?(Alole maloŵe gamwiŵanda.)
17 Ana ni litala line lyapi lyampaka twalimbikachisye ŵane patuli pamisongano? Naga ali achinangolo mpaka ŵakamuchisye ŵanache ŵawo kukosechela ndemanga pakujigalila msingu wawo. (Mat. 21:16) Ndaŵi sine, mpaka yisimanikwe kuti tukulijiganya ngani jakusawusya, mwine jajikusala yakusawusya ya mu ulombela kapena ndamo sine. Nambo pane munganijo mpaka musimanikwe ndime siŵili kapena jimo jampaka ajanje mwanache. Mpaka atende chenenesoni kwakamuchisya ŵanache ŵawo kumanyilila kuti nganiyiŵa yikomboleche kuti ndaŵi syosope pajimiche mkono mpaka ŵalanjileje kuti ajanje. Kumanyilila yeleyi mpaka kwakamuchisye ŵanachewo kuti akatumbilaga naga nganiŵalanjila kuti ajanje.—1 Tim. 6:18. d
18. Ana mpaka tutende uli kuti tuŵambaleje kulilapilila patukupeleka ndemanga? (Misyungu 27:2)
18 Wosopewe mpaka tukosechele ndemanga syampaka simchimbichisye Yehofa soni syampaka syalimbikasye Aklistu achimjetu. (Mis. 25:11) Yisyene kuti ndaŵi sine mpaka tusosekwe kuŵecheta mwakata yakwamba m’weji patukupeleka ndemanga jetu. Nambope tukusosekwa kuŵambala kuŵecheta yindu yejinji yakulilapilila. (Aŵalanje Misyungu 27:2; 2 Akoli. 10:18) Mmalomwakwe, tulinjelinjeje kuganichisya yakwamba Yehofa, Maloŵe gakwe, soni ŵandu ŵakwe wosope. (Chiw. 4:11) Yisyene kuti naga chiwusyo cha pandime chikwaŵenda kuti asale yindu yine yaŵasimene nayo paumi, pelepo yikusaŵa yakuŵajilwa kutenda yeleyo. Chisyasyo cha yeleyi chikusimanikwa mundime jakuyichisyaji.
19. (a) Ana mpaka paŵe yakuyichisya yamtuli naga tukulosya kuganichisyana pandawi ja misongano ja mpingo? (Aloma 1:11, 12) (b) Ana ni chichi chachikusichasangalasya wawojo pangani ja kwanga pamisongano ja mpingo?
19 Atamose kuti pangali malamusi pakwamba mwampaka tupelechele ndemanga syetu, wosopewe mpaka tutende chenene kuganichisya yakupeleka ndemanga syetu m’litala lyakwalimbikasya ŵane. Yeleyi mpaka yikomboleche mwakulingalinga kupeleka ndemanga ndaŵi syosope nambo mwakwaganichisya ŵane. Mpaka yikombolechesoni mwakuŵa ŵakwikutila ni upile wakupeleka ndemanga watupatile, nambosoni mwakuŵa ŵakusangalala ŵane papatile upile wakupeleka ndemanga. Myoyo patukulingalinga kuŵika yakusaka ya ŵane pamalo gandanda pandaŵi ja misongano jampingo, wosopewe tuchisangalala mnope ‘ni kulimbikasyana pa chikulupi.’—Aŵalanje Aloma 1:11, 12.
NYIMBO NA. 93 Ajaliwe Misongano Jetu!
a Patukwanga pamisongano ja mpingo tukusalimbikasyaga ŵane. Nambope ŵane akusatenda woga kuti ajanje pamisonganoji. Ŵane akusasangalalaga pakupeleka ndemanga nambope akusasaka kuti ŵalanjileje ndaŵi ni katema. Chinga tukusatenda woga patukwanga pamisongano kapena tukusasangalalaga patukwanga mwakuwilisyawilisya, ana wosopewe mpaka tutende uli kuti tulosyeje kwaganichisya soni kwalimbikasya ŵane? Soni mpaka tutende uli kuti tupelecheje ndemanga syampaka syalimbikasye abale ni alongo kutenda yindu yambone? Nganiji chijijanje yiwusyo yeleyi.
b Naga akusaka kumanyilila yejinji alole Sanja ja Mlonda ja Januwale 2019, pp. 8-13, nambosoni Sanja ja Mlonda ja Chichewa ja Sepetemba 1, 2003, pp. 19-22.
c Mena gane munganiji gachenjile.
d Alole fidiyo ja pa jw.org jakola mtwe wakuti Aŵe Mjakwe jwa Yehofa—Mkosecheleje Kwanga pa Misongano.
e Alole Sanja ja Mlonda ja Chichewa ja Julayi 15, 2013, p. 32; soni ja Sepetemba 1, 2003, pp. 21-22.
f KULONDESYA CHIWULILI: M’bale jwapeleche kala ndemanga jakwe mumpingo wekulungwa akupeleka upile kwa achimjakwe kuti nombe nawosoni apeleche ndemanga syawo.
