ANA lisiku lyaŵasangalele mnope paumi wawo lili lyapi? Ana lili lisiku lya ulombela wawo kapena lyaŵapagwile mwanace jwawo jwandanda? Kapena lili lisiku lyaŵalosisye kulipeleka kwawo kwa Yehofa mwakubatiswa? Komboleka kuti akusaliwona lisikulyo kuŵa lyakusosekwa soni lyakusangalasya mnope. Ŵakulambila acimjawo ŵasangalelesoni mnope paŵaweni wawojo ali mkulosya pelanga kuti akusamnonyela Mlungu ni mtima wawo wosope, umi wawo wosope soni ni macili gawo gosope.—Maliko 12:30.

Mwangakayicila, aŵele ali mkusangalala ni kumtumicila Yehofa kutandila paŵabatiswe. Nambope, ŵakulalicila ŵane apano ngakusangalala mpela mwaŵatendelaga kala. Ligongo cici jemanjaji ngakusangalala? Nambo ana ligongo cici tukusosekwa kwendelecela kumtumicila Yehofa mwakusangalala?

Mwangakayicila, tukusasangalala mnope ni ngani syambone syatukusalalicila syakwamba ya cilanga ca Yehofa cakuti pacangakaŵapa camasye cilambo cakusakalaci ni kutujinjisya m’cilambo casambano. Konjecesya pelepa, lilemba lya Zefaniya 1:14 likusatusimicisya kuti, “Lisiku lyekulungwa lya Yehofa liŵandicile. Liŵandicile, soni likwanguya mnope kwisa.” Mpaka tuŵe ŵangasangalala soni mpaka tulece kutenda yejinji mu undumetume wetu ligongo lyakwembeceya kwandaŵi jelewu lisiku lya Yehofa.—Miy. 13:12.

Kunguluka ni ŵakutumicila ŵa Mlungu kucitukamucisya kwendelecela kuŵa ŵakusangalala patukumtumicila Yehofa. Komboleka kuti ndamo syambone sya ŵakutumicila ŵa Yehofa ni syasyatutendekasisye kuti tutande kumlambila Yehofa soni kuti tumtumicileje jwalakwe mwakusangalala. (1 Pet. 2:12) Nambi, ana mpaka atende cici naga Mklistu mjawo amjamwice ligongo lyakulepela kuya malamusi ga Mlungu? Mu yakutendekwa mpela yeleyi, ŵandu ŵaŵatandite usyesyene ligongo lya ndamo syakusalosya ŵandu ŵa Yehofa mpaka atenguce soni mpaka aŵe ŵangasangalala.

Yakusatenda ŵandu ŵakwenesya yamalonda ŵa m’cilambo ca Satanaci, mpaka yitutendekasyesoni kuŵa ŵangasangalala. Cilambo ca Satanaci cikusatutendekasya kulupilila kuti tukusasosecela yindu yayili yangasosekwa mnope paumi. Nambope ngatukusosekwa kuliŵalila maloŵe ga Yesu gakuti, “Kapolo ngaŵa mkutumicila acambuje ŵaŵili, pakuŵa cacim’ŵenga ni jumo ni kumnonyela jwinejo, kapena caciŵa jwakulupicika kwa jumo ni kumnyosya jwinejo. Nganaŵa akombwele kumtumicila Mlungu soni Cipanje pandaŵi jimo.” (Mat. 6:24) Ngaŵa mkomboleka kumtumicila Yehofa mwakusangalala  kwineku tuli mkulingalinga kuti tupate cipanje cejinji.

Ŵandu ŵakusamnonyela Yehofa ngakusakuwona kumtumicila jwalakwe kuŵa kwakusitopesya. (1 Yoh. 5:3) Akaliŵalila maloŵe ga Yesu gakuti, “Yikani kwa une wosope ŵakamula masengo gakusitopesya soni ŵakusitopelwa, ni cinjapumusya. Atwicile likongwa lyangu ni alijiganye kwa une, ligongo ndili jwakuweŵa ni jwakulinandiya mtima, ni tacipata cipumulisi ca umi wawo. Pakuŵa likongwa lyangu lili lyakuweŵa soni ndundu syangu sili syangasitopa.” (Mat. 11:28-30) Kutwicila likongwa lya Klistu kuli kwakamucisya soni kwakusangalasya. Mwangakayicila tukwete magongo gakuŵela ŵakusangalala patukumtumicila Yehofa. Kwende sambano tutagulilane magongo gatatu gakusosekwa mnope gakuŵela ‘ŵakusangalala mwa Mlungu jwacikulupusyo cetu.’—Hab. 3:18.

Tukusamtumicila Mlungu jwakusangalala soni jwaŵatupele umi. (Mase. 17:28; 1 Tim.1:11) Tukusamanyilila kuti twapali ligongo lya Mkupanganya jwetu. Ni ligongo lyakwe tukwendelecela kumtumicila jwalakwe mwangasamala kandu ya kutupa kwa yaka yayipitile kutyocela patwabatiswe.

Mwambone, kwende tulole cisyasyo ca Héctor juŵatumicilaga mpela jwakulolela mkuli kwa yaka 40. Yindu yikumjendelape cenene jwalakwe ‘atamose kuti akalambele.’ (Sal. 92:12-14) Apano Héctor ngakutenda yejinji mu undumetume ligongo lyakuti ŵamkwakwe akulwala. Nambope yeleyi nganiyimsumula cisangalalo cakwe. Jwalakwe ŵatite, “Atamose kuti ŵamkwangu akulwala soni kwasamalila kuli kwakusawusya, nambo ngangusakunda kuti yeleyi yisumule cisangalalo cangusapata pangumtumicila Mlungu jusyesyene. Kwamba kumanyilila kuti Yehofa ni juŵatupanganyisye soni ŵatupanganisye ni cakulinga, kuli ligongo lyakwanila lyakumnonyelela jwalakwe soni lyakumtumicila ni mtima wosope. Kuti njendelecele kuŵa jwakusangalala, ngusalingalinga kuŵa jwamtawu pamasengo gakulalicila, soni ngusaganicisya mnope ya cembeceyo cetu.”

Yehofa ŵatupele mbopesi jaciwombolo kuti tuŵe ŵakusangalala. “Mlungu ŵacinonyele mnope cilambo capasi mwati ŵapelece Mwanace jwakwe jwakupagwa jika, kuti jwalijose jwakumkulupilila jwalakwe akajonanjikwa, nambo akole umi wangamala.” (Yoh. 3:16) Mlungu mpaka atukululucile yakulemwa yetu soni mpaka tupate umi wangamala kupitila mumbopesi jaciwombolo jaŵapelece Yesu. Ana lyeleli ngaŵa ligongo lyakwanila lyakututendekasya kuŵa ŵakusangalala? Pakulosya kuti tukusayamicila mbopesiji tukusosekwa kumtumicila Yehofa mwakusangalala.

 M’bale jwine jwa ku Mexico lina lyakwe Jesús, ŵatite, “Nalipelekaga mnope pamasengo gangu. Mwati ndaŵi sine nakamulaga masengogo kwandaŵi jelewu atamose kuti nganiliŵa lilamusi kuti tukamuleje m’yoyo. Natendaga yeleyo kuti mbate mbiya syejinji. Kaneko nalijiganyisye yakwamba Yehofa soni mwaŵapelele ŵandu mbopesi ja Mwanagwe. Nasacililaga mnope kumtumicila jwalakwe. M’yoyo, nalipelece kwa Yehofa, soni ndili ngamwile masengo kwa yaka 28, naganisisye yakugaleka ni kutanda undumetume wandaŵi syosope.” Kutandila pandaŵiji jwalakwe aŵele ali mkumtumicila Yehofa mwakusangalala.

Yisogosi yatukusakoposya yikusatukamucisya kuŵa ŵakusangalala ngaŵaga ŵakudandawula. Ana akusakumbucila mwawaŵelele umi wawo mkanalijiganye yakwamba Yehofa? Ndumetume Paulo ŵakumbwisye Aklistu ŵa ku Loma kuti “pandanda ŵaliji acikapolo ŵa ulemwa” nambo ŵaŵele “acikapolo ŵa cilungamo.” Ŵakwete yisogosi “yeswela,” yayakamucisye kuti akapate umi wangamala. (Alo. 6:17-22) M’wejisoni tukusosekwa kuŵa ŵaswela, ngaŵaga ŵakudandawula ligongo lyakutenda yakusakala. Naga tukutenda yeleyi tucikola umi wakusangalala.

Kwendesoni tulole cisyasyo ca Jaime. Jwalakwe pandanda ŵakulupililaga kuti kwangali Mlungu soni kuti yaumi yatyocele ku yindu yine. Ŵanonyelagasoni ung’asi wa suŵa. Mkupita kwandaŵi jwalakwe ŵatandite kusimanikwa pamisongano ja Ciklistu soni ŵasimonjile ni cinonyelo ca abale. Kuti alece yitendo yakwe yakusakala, Jaime ŵam’ŵendile Yehofa kuti amkamucisye kuti amkulupilileje mnope jwalakwe. Jwalakwe ŵatite, “Mwapanandipanandi, natandite kumanyilila kuti pana Mlungu, jwali Mtati jwacinonyelo soni jwacanasa. Kuya malamusi gakulungama ga Yehofa kungamucisye mnope. Kutandila panatandite kumtumicila Yehofa mbele jwakusangalala mnope kulekangana ni kala kose.”

Ana tukusosekwa kupikana wuli mumtima patukwembeceya konasika kwacilambo cakusakalaci? Akaliŵalila kuti ‘ŵakukuya msimu wa Mlungu cacigowola umi wangamala.’ M’yoyo, “tukaleka kutenda yambone, pakuŵa pandaŵi jakwe tucigowola naga tukapela.” (Aga. 6:8, 9) Ni cikamucisyo ca Yehofa, tucipakombola kupilila, kola ndamo syambone syasicitukamucisya kulupuka pa “yisawusyo yakogoya,” soni kwendelecela kumtumicila Yehofa mwakusangalala atamose patusimene ni yakulingwa.—Ciu. 7:9, 13, 14; Yak. 1:2-4.

Tukakayicilaga kuti Mlungu cacitupa mbote ligongo lya kupilila kwetu, pakuŵa jwalakwe akusagawona masengo gatukusatenda soni cinonyelo catukusamlosya jwalakwe soni lina lyakwe. Naga tukwendelecela kumtumicila Yehofa mwakusangalala tuciŵeceta mpela jwamalumbo Daudi juŵatite, “Mbisile Yehofa paujo pangu ndaŵi syosope. Pakuŵa ali kumkono wangu wamlyo, ngasindenganyika. M’yoyo umi wangu ukusangalala, soni cinjiŵa jwakusangalala. Nambosoni cinjiŵa jwakuteteyeka.”—Sal. 16:8, 9.