Napagwile mumsinda wa Quebec, mu upande wakuŵecheta Chifalansa m’chilambo cha Canada. Achinangolo ŵangu (Louis soni Zélia) ŵasamalilaga soni kunonyela mnope. Baba ŵangu ŵaliji ŵasooni soni ŵanonyelaga kuŵalanga. Nanonyelaga kulemba soni nakulupililaga kuti lisiku line chinjiŵa jwakulokotela soni kulemba ngani.

Pinaliji ni yaka chiŵandika 12, mjawo baba juŵakamulaga najo masengo (Rodolphe Soucy) ni mjakwe, ŵayiche kukunguluka kunyumba. Jemanjaji ŵaliji Ŵamboni sya Yehofa. Namanyililaga yamnono pakwamba ya Mboni sya Yehofa soni nganindendaga chidwi ni dini jawoji. Nambo, nasangalalaga ni kajanje kawo ka yiwusyo pakamulichisya masengo Baibulo. Achinangolo ŵangu ŵalijisoni ŵakusangalala, myoyo twatandite kulijiganya Baibulo.

Pandaŵi jeleji, nalijiganyaga pa sukulu ja Chikatolika. Ndaŵi sine, nakambilanaga ni mjangu jwine jwamkalasi pakwamba yanalijiganyaga m’Baibulo pandili jika. Pali papitile ndaŵi, matichala gagaliji ga mbopesi, gamanyilile yatwakambilanagayo. Mmalo mwakamulichisya masengo Malemba pakusisya yatwakambilanagayo, jumo mwa jemanjaji, jwasasile pameso pa achimjangu wosope mkalasimo, kuti une naliji jwakwimuchila. Atamose kuti yaliji yakusawusya mnope, nambo yakwete yakuyichisya yambone ligongo yangamuchisye kumanyilila kuti yijiganyo ya dini nganiyikamulanaga ni yajasalaga Baibulo. Namanyilile kuti ngangusosekwa kulijiganya pa sukulujo. Achinangolo ŵangu paŵangundile, nasamile sukulu jine.

Napitilisye kulijiganya Baibulo, nambo nganinjawulaga pasogolo ligongo najogopaga kulalichila nyumba ni nyumba. Chalichi cha Katolika chasisyaga  mnope masengo getu gakulalichila. Mlongola jwa ndale jwine (Maurice Duplessis) ni juŵajikamuchisyaga dini ja Chikatolika. Jwalakweju jwatendekasisye kuti ŵandu ŵachiwawa atande kwajimuchila Ŵamboni. Pasosekwaga kulimba mtima kuti mundu alalichile pandaŵi jelejo.

M’bale John Rae, juŵalijiganyisye kalasi nambala 9 ja Sukulu ja Giliyadi ni juŵangamuchisye kumalana ni woga. Atamose kuti John jwamanyililaga yejinji, jwaliji jwakulinandiya soni jwakufasa, nambosoni jwaliji jwangasawusya kumyichila. Ngaŵa kuti jwalakwe jwatamilaga kungamuchisya, nambo nalijiganyisye yejinji kutyochela ku chisyasyo chakwe chambone. John jwalagaga kuŵecheta Chifalansa, myoyo nalonganaga najo kukulalichila nichakulinga chakuti ngamkamuchisyeje chiŵechetochi. Ligongo lyakuti namalilaga ndaŵi jejinji ndili ni John, yangamuchisye kuti mbe Jwamboni sya Yehofa. Nabatiswe pa 26 Meyi, 1951, pali papitile yaka 10 chiwoneganile ni Ŵamboni.

Mumpingo wetu wamwana wawaliji mumsinda wa Quebec mwaliji apainiya ŵajinji. Chisyasyo chawo chambone chalimbikasisye kuti ndande upainiya. Pandaŵi jelejo, twakamulichisyaga masengo Baibulope pakulalichila nyumba ni nyumba. Twasosekwaga kukamulichisya masengo Malemba ndaŵi syejinji mmalo mwa mabuku. Myoyo, nalinjilelinjile kuti nagamanyilile chenene Malemba pakusaka kuti lalichileje mwakulimba mtima. Nambope ŵandu ŵajinji ŵakanaga kuŵalanga Baibulo naga jili jakuti ŵa chalichi cha Chikatolika ngakusajijitichisya.

Mu 1952, namlombile mlongo jwine jwakulupichika lina lyakwe Simone Patry. Mkanichimale chaka chijawulile ku Montreal, twakwete mwanache jwamkongwe lina lyakwe Lise. Atamose kuti pandaŵi jine mkanitulombane najimichile kaje upayiniya, nambope Simone ni une twalinjilile kuti tukole umi wangasaka yejinji kuti tukombole kutenda yejinji mumpingo mpela liŵasa.

Pamasile yaka 10 mkanimbe kuganichisya mnope yakutanda upayiniya. Mu 1962, ndili simanikwe nawo pa Sukulu ja Undumetume wa Uchimwene ja achakulungwa ŵamumpingo jajatendekwaga kwa mwesi wamtundu ku Beteli ja ku Canada, ŵasalile kuti chindameje ni M’bale Camille. Nakolaga chidwi ni yaŵatiga m’baleju pakulimbichila utumiki ligongo lyakuti jwalakwe jwakwete udindo wakusamalila liŵasa. Kutandila kalakala, yaliji yakusoŵa mumsinda wa Quebec kumwona mundu ali mkutenda upayiniya kwineku ali mkulela ŵanache mpela muŵatendelaga  Camille. Pandaŵi josope jatwaliji yimpepe, ŵalimbikasyaga kuganichisya mwayaŵelele yindu paumi wangu. Pali pamasile miyesi jamnono, nayiweni kuti mpaka ndandilesoni kutenda upayiniya wakutamilichika. Ŵandu ŵane ŵakayichilaga yanasagwileyi, nambope nganimbujila munyuma soni nganingayichilaga kuti Yehofa changamuchisye kuti nalipelecheje mnope pakulalichila.

Mu 1964, une ni Simone ŵatuŵendile kuti tukatumichileje mumsinda wa Quebec wawaliji tawuni ja kumangwetu kwele twalalichile kwa yaka yine yejinji. Pandaŵiji masengo gakulalichila gajendaga chenene atamose kuti papali ŵandu ŵakusisya.

Lyakuŵeluka line musi, nataŵidwe m’tawuni jine (Sainte-Marie), jajaliji jakuŵandikana ni msinda wa Quebec. Jwapolisi jwine jwambisile mu ukayidi ligongo lyakuti nalalichilaga nyumba ni nyumba mwangakundidwa. Kaneko napite kukuwonechela pameso pa jwakulamula magambo, jwaŵaliji jwakutesya woga mnope. Jwalakwe jwasakaga kummanyilila mundu jutanjimilile pa magambogo. Panagambile kusala lina lya Glen How, jwaŵaliji loya jwa Mboni jwakumanyika mnope, jwasimonjile mwawoga ni jwatite, “Ooo iyayi! Jwelejo iyayi!” M’baleju aŵele mkwakamuchisya Ŵamboni kuwina magambo gakulekanganalekangana. Kaneko ŵaluŵala lwa magambo ŵasalile kuti nganingola magambo.

Ligongo lyakuti ku Quebec ŵagasisyaga masengo getu, yaŵaga yakusawusya kupata malo gambone gakutendela misongano. Kampingo ketu katendelaga misongano mu kagalaja kanekakwe kakalakala soni mwasisimaga mnope. Pakusisime mnope, abale ŵakamulichisyaga masengo kachipangiso kanekakwe kakwendela mauta pakusaka kuti apikaneje mtukuta. Misongano mkanijitande twajotaga moto pakamulichisya masengo kachipangisoko kwineku tuli mkulimbikasyana.

Yili yakusangalasya kulola yagatite pakwawula pasogolo masengo gakulalichila yaka yipiteyi. Cha mu 1960, kwapali mipingo jamnono mu Msinda wa Quebec, mu upande wa Côte-Nord, soni ku Chilumba cha Gaspé. Malo gelaga galiji mudela jimpepe. Nambo masiku agano, kwana mikuli jakupunda jiŵili, soni abale akusasongana m’Nyumba sya Uchimwene syakusalala mnope.

Une ni Simone ŵatuŵendile kuti tukatande masengo gakulolela mkuli mu 1970. Kaneko mu 1973, ŵatupele masengo gakulolela upande. M’yaka yeleyo, nalijiganyisye yejinji kutyochela kwa abale ŵane (Laurier Saumur) soni David Splane,  * wosopeŵa ŵatumichilepo mpela ŵakulolela mkuli. Panyuma pa msongano wuliwose une ni David twakamusyanaga nganisyo pa yampaka tutende kuti tuŵe ŵakwiganya ŵambone. Ngusakumbuchila lisiku line David ali mkusalila kuti, “Ngani jenu jila jaliji chenene kwabasi soni jisangalesye, nambo kwa une ngani jenu jila jikaŵele ma autilaini gatatu.” Chakusawusya chaliji chakuti natupiyaga mnope yakuŵecheta. Mwamti nasosekwaga kulijiganya kuti nandiyeje.

Jwakulolela upande jwakwete udindo wakumlimbikasya jwakulolela mkuli. Nambope, ŵakulalichila  ŵajinji ŵa ku Quebec ŵamanyililaga chenene unejo. Jemanjaji ndaŵi syejinji ŵasakaga kuti tulalichileje yimpepe pandili mudela jawo. Atamose kuti kulalichila yimpepe ni jemanjaji kwaŵaga kwakusangalasya mnope, nambope nganingolaga ndaŵi jakwanila jakukunguluka ni jwakulolela mkuli. Pandaŵi jine, jwakulolela mkuli jwine jwambone mtima jwasalile kuti, “Yili chenene kuti akulalichila yimpepe ni abaleŵa, nambo akaliŵalila kuti ayiche akuno kuti anjendele une wiki ajino. Akusosekwa kulimbikasya unesoni.” Maloŵega gangamuchisye kuti ndendeje yindu mwakuŵajilwa.

Mu 1976 chandendechele chindu chakutesya chanasa. Ŵamkwangu ŵalwasile mnope kaneko ŵajasiche. Simone jwaliji jwamkongwe jwambone ligongo jwaliji jwangalinonyela soni ŵamnonyelaga mnope Yehofa. Ligongo lyakuti namalilaga ndaŵi jejinji ndili mkulalichila, yangamuchisye kuti ngombole kupilila chiwachi. Namyamichile Yehofa ligongo lya kungamuchisya pandaŵi jakusawusyaji. Kaneko, nalombele Carolyn Elliott, jwaŵaliji mpayiniya jwakulimbichila jwakuŵecheta Chisungu. Jwalakweju jwayiche ku Quebec kukutumichila ligongo kwasosekwaga ŵakulalichila ŵajinji. Mlongo Carolyn ali jwangasawusya kumyichila soni akusatenda chidwi ni ŵane, mnopemnope ŵandu ŵakusatenda sooni. Jwalakwe ŵangamuchisye mnope patwatandite kamulila yimpepe masengo gakulolela mkuli.

Mu Januwale 1978, ŵasalile kuti ngajiganye Sukulu ja Apayiniya ku Quebec. Natesile woga, ligongo sukuluji jaliji jachilendo kwa une mpela muyaŵelele ni ŵakulijiganyawo. Chakusangalasya chaliji chakuti, kalasi jandanda janajiganyisyejo jakwete apayiniya ŵaŵatesile utumiki wawo kwa yaka yejinji. Atamose kuti naliji jwakwiganya, nalijiganyisye yejinji kutyochela kwa ŵakulijiganyawo.

Kaneko mu 1978, kwatendekwe msongano wa yilambo wawatendechele ku Sitediyamu ja Montreal. Msonganowo wakwete mtwe wakuti, “Chikulupi Chipundile.” Msonganowu, waliji msongano wandanda wekulungwa kutendechela ku Quebec, mwamti ŵandu ŵakupunda 80,000  ŵasimanikwepo. Ŵasalile kuti ngakamuchisye Dipatimenti Jagulusya Ngani. Naŵechetene ni ŵakulokotela ngani ŵajinji, soni nasangalele kumanyilila kuti ŵalembaga yindu yambone yakwamba m’weji. Kwa ma awala gakupunda 20, ŵagulusyaga ngani sya pamsonganowu pa wayilesi soni m’ma TV. Kusala yisyene jemanjaji ŵawandisye ngani syejinji.

Mu 1996 yindu yachenjile mnope kwa une. Panyuma pakutumichila mudela ja chiŵecheto cha Chifalansa ku Quebec kutandila panabatiswe, ŵandumisye kuti ngatumichileje mu upande wa Chisungu ku Toronto. Nalipikanaga kuti ndili jwangaŵilwa, ligongo lyakuti ngamkaningombola kuŵecheta chenene ngani m’Chisungu. Nasosekwaga kupopela soni kumdalila mnope Yehofa.

Natendaga woga mkanindande kutumichila mu upande welewu, nambo apano mpaka sale kuti nasangalele mnope kwa yaka yiŵili yanaŵele ndili mkutumichila ku Toronto. Ŵamkwangu Carolyn, aŵele ali mkungamuchisya mwakuwusimana mtima kuti mbecheteje chenene Chisungu. Nombe abale ŵangamuchisye mnope soni kulimbikasya. Mwachitema twapatile achimjetu ŵajinji ŵasambano.

Kupwatika pa masengo ganatendaga soni kukosechela msongano, Lyamsano lililyose ligulo, namalilaga awala jimo ndili mkulalichila ku nyumba ni nyumba. Ŵandu ŵane ŵasimongaga ni kuŵecheta kuti, ‘Ligongo chichi akulalichila mmalo mwakosechela msongano?’ Nambope, nayiweni kuti kuŵechetana ni ŵandu mu utumiki kwalimbikasyaga. Atamose apano ngusasangalala mnope pambite kukulalichila.

Mu 1998, une ni ŵamkwangu ŵatusalile kuti tukatumichile mpela apayiniya ŵapajika ku Montreal. Kwa yaka yejinji, utumiki wangu wapwatikaga kulondesya ya kulalichila mmalo gakusimanikwa ŵandu ŵajinji, soni kulondesya ya yindu yele ŵandu nganayipikanichisyaga yakwamba Ŵamboni sya Yehofa. Apano tukusasangalala kwalalichila ŵandu ŵakutyochela yilambo yine ŵayiche ku Canada ŵakusakola mtima wakusachilila kulijiganya Baibulo.

Panguganichisya yindu yambele ndili mkutenda kwa yaka 68 mpela jwakutumichila jwa Yehofa jwam’batiswe, ngusalipikana kuti ngwete upile. Upile wine wambatile uli kulijiganya kuti sangalaleje ni utumiki soni kwakamuchisya ŵandu ŵane kumanyilila yakwamba Mlungu. Mwanache jwangu jwamkongwe lina lyakwe Lise ni ŵamkwakwe paŵalelite ŵanache ŵawo mpaka kula ŵatandite upayiniya wakutamilichika. Ngusasangalala mnope kwawona jemanjaji ali mkulipeleka mnope mu utumiki. Ngwayamichila mnope Aklistu achimjangu ŵele chisyasyo chawo chambone, soni yaŵatendaga pakunjongolela ŵangamuchisye kuti ngombole kutenda yejinji pakumtumichila Yehofa. Apano nayiweni kuti mundu mpaka akombole kuŵa jwakulupichika pa utumiki wakwe naga akusadalila machili ga msimu weswela wa Yehofa. (Sal. 51:11) Ngupitilisya kumyamichila Yehofa ligongo lyakumba upile wakulilumba lina lyakwe.​—Sal. 54:6.