LYATATU pa Januwale 18, 2023, papelechedwe chimanyisyo chapadela pa jw.org chakusala kuti M’bale Gage Fleegle soni Jeffrey Winder asagulidwe kuti atumichileje mu Likuga Lyakulongolela lya Mboni sya Yehofa. Abale wosopeŵa aŵele ali mkutumichila Yehofa mwakulupichika kwandaŵi jelewu.

M’bale Fleegle jwakulile kungapilolyuŵa ku dela ja Pennsylvania, m’chilambo cha U.S.A. Kudelaji jwalakwe jwatamaga ni achinangolo ŵakwe ŵaŵamtumichilaga Mlungu mwakulupichika. Pajwaliji jwachinyamata, achinangolo ŵakwe ŵasamile kwawula kukatawuni kakumusi kukwasosechelaga ŵakulalichila ŵajinji. Mkanipapite ndaŵi, jwalakwe ŵabatisidwe pa 20 Nofemba, 1988.

Achinangolo ŵa M’bale Fleegle ŵamlimbikasyaga jwalakwe kuti chatende utumiki wandaŵi syosope. Achinangoloŵa ŵanonyelagasoni kwaŵilanjila ŵakulolela madela soni abale ni alongo ŵaŵatumichilaga pa Beteli ku nyumba jawo. Yaŵatiga pakusangalala abale ni alongoŵa yamkamuchisye M’bale Fleegle. Mkanipapite ndaŵi jwalakwe ali abatisidwe jwatandite upayiniya wakutamilichika pa 1 Sepetemba, 1989. Kaneko pali pamasile yaka yiŵili ali mkutenda upayiniya, jwalakwe jwakwanilisye chakulinga chaŵakwete ali ni yaka 12 chakuti chatumichile pa Beteli. Mwamti jwatandite kutumichila pa Beteli ja ku Brooklyn mu Okotoba 1991.

Ali ayiche ku Beteli, M’bale Fleegle jwatumichilaga mu ofesi ja kupulinta mabuku, mwamti ŵakamwile masengo mu ofesiji kwa yaka 8. Panyuma pakwe ŵamchenjile ni kutumichilaga mu Dipatimenti ja Utumiki. Pandaŵiji, jwalakwe ŵasonganaga mu mpingo wa Chilasha. Kaneko mu 2006 ŵalombene ni Mlongo Nadia jwaŵatandite kutumichila najo yimpepe pa Beteli. Jemanjaji ŵatumichile yimpepe mu dela ja Chipwitikisi soni ŵatumichile yimpepe kwa yaka yakupunda 10 mu dela ja Chisipanishi. Panyuma pakutumichila yaka yejinji mu Dipatimenti ja Utumiki, M’bale Fleegle ŵatandite kutumichila mu Ofesi ja Komiti ja Kwiganya, kaneko mu ofesi ja Komiti ja Utumiki. Mu Malichi 2022,  jwalakwe ŵasagulidwe kuti aŵe jwakamuchisya mu Komiti ja Utumiki ja Likuga Lyakulongolela.

M’bale Winder jwakulile mu dela ja Murrieta, California, U.S.A. Achinangolo ŵakwe ni ŵaŵamjiganyisye Baibulo, mwamti jwabatisidwe pa 29 Malichi, 1986. M’mwesi wakuyichisya jwatandite kutenda upayiniya wakamuchisya. Jwalakwe ŵasangalalaga mnope ni upayiniyawu, mwamti jwaliji jwakusachilila kupitilisya upayiniyawu. Panyuma pakutenda upayiniya wakamuchisyawu kwa myesi jejinji, jwalakwe jwaganisisye yakuti atande upayiniya wakutamilichika pa 1 Okotoba, 1986.

Ali jwachinyamata, M’bale Winder ŵapite kuja kwalola achakulugwe ŵaŵili ŵaŵatumichilaga pa Beteli pandaŵijo. Ulendo welewu wamtendekasisye kola mtima wakusaka kutumichila pa Beteli pachachikulapo. Mwamti mu Meyi 1990, jwalakwe jwaŵilanjidwe kuti akatande kutumichila pa Beteli ku Wallkill.

Ali pa Beteli, M’bale Winder jwakamulaga masengo mu madipatimenti gakulekanganalekangana kupwatikapo mu Dipatimenti ja Kuswejesya, Dipatimenti ja Kulola Yaulimi nambosoni Ofesi ja Kulola ya pa Beteli. Mu 1997, jwalakwe jwalombele Mlongo Angela mwamti akutumichila najo yimpepe pa Beteli. Mu 2014, jwalakwe ŵamtumisye ku Warwick kuti akakamuchisyeje pa masengo ga kutaŵa ku Likulu lyetu. Mu 2016, jemanjaji ŵatumisye ku Likulu lya Majiganyo lya Watchtower ku Patterson. Mwamti M’bale Winder ŵatandite kutumichila mu Dipatimenti Jakulinganya Mafidiyo Soni Yakupikanila. Pali pamasile yaka mcheche ŵawujilesoni ku Warwick kwele M’bale Winder ŵatandite kutumichila mu Ofesi ja Komiti ja Kulola ya Ŵakutumichila pa Beteli. Mu Malichi 2022 jwalakwe ŵasagulidwe kuti aŵe jwakamuchisya mu Komiti ja Kulola ya Ŵakutumichila pa Beteli ja Likuga Lyakulongolela.

Tukumŵenda Yehofa kuti apitilisye kujipa upile “mituka ja achalume” jeleji pajikupitilisya kukamula masengo mwakulimbichila pakwawusya pasogolo masengo ga Uchimwene.—Aef. 4:8.