Baibulo jikusasala mwakupikanika chenene kuti Yehofa mpaka asale yindu yayichitendekwa msogolo. (Yes. 45:21) Nambope Baibulo jangasala yosope yakwayana ni mwakusatendela Yehofa yeleyi soni winji wa yindu yakusasagula kuyimanyilila. Myoyo m’weji nganituŵa tumanyilile yosope pakwamba ya lunda lwakwete Yehofa lwakumanyilila yindu yamsogolo. Nambope pana yindu yine yamnono yatukusamanyililaga panganiji. Kwende tulole yine mwa yindu yeleyi.

Yehofa mpaka asagule kutenda chilichose chakusaka, nambope ndaŵi sine jwalakwe akusasagula ngatenda yineyakwe. Ligongo lyakuti jwalakwe ali jwalunda mnope mpaka asale chilichose chakusaka kutenda msogolo. (Alo. 11:33) Nambosoni ligongo lyakuti jwalakwe akusakombola kulilekasya mpaka asagule yindu yangakusaka kuyimanyilila yayichitendekwa msogolo.—Alole Yesaya 42:14.

Yehofa akusatendekasya kuti yakusasaka yitendekwe. Ana yeleyi yikukamulana chamtuli ni machili gakwete jwalakwe gakusala yayichitendekwa msogolo? Pa Yesaya 46:10 pakusati, “Naŵechete chile yakumbesi kutyochela pandanda pene. Kutandila pandanda nayilochesye chile, yele yitiyichitendekwa. Nasasile kuti nganisyo syangu ngasisilepela, tinjiyitenda yosope yinayisachile kutenda.”

Myoyo ligongo limo lyampaka limtendekasye Yehofa kusala yindu yayichitendekwa kusogolo lili lyakuti jwalakwejo akwete machili gakutendekasya yinduyo kuti yitendekwe. Kusala yisyene, jwalakwe jwangasosekwa kulingulila kapena kuwutuchila kulola yindu yayichitendekwa kusogolo. Yili myoyo ligongo lyakuti kwa jwalakwe yindu yayichitendekwa msogolo yikusaŵa mpela yitendekwe kala. Mwamti yikusaŵa mpela kuti ayiweni kala yili mkutendekwa. Mmalomwakwe Yehofa mpaka asagule ndaŵi jayichitendechela yineyakwe. Kaneko ndaŵijo pajiyiche ni kuyitendekasya yinduyo kuti yitendekwe.—Eks. 9:​5, 6; Mat. 24:36; Mase. 17:31.

Ligongo lya yeleyi, Baibulo jikusakamulichisya masengo maloŵe mpela gakuti “kuyikolosya,” soni “yinguyisosa kuyitenda” pakusala yakusatenda Yehofa pakwamba yindu yamsogolo. (2 Ayi. 19:25; Yes. 46:11) Maloŵe gelega ŵagagopolele kutyochela ku liloŵe lya m’chiŵecheto chandanda lyele ngopolelo jakwe jikusalandana ni maloŵe gakuti “jwagumba yiŵiga.” (Yel. 18:4) Mpela mwayikusaŵela ni jwagumba yiŵiga jwakusamanyilila chenene masengo gakwe jwampaka akamulichisye masengo lilongo pagumba chiŵiga chakusalala mnope, Yehofa mpaka ayitendekasye yindu kuti yikwanilisye chakulinga chakwe.—Aef. 1:11.

Yehofa akusachimbichisya ufulu wakusagula. Jwalakwe jwangalinganyila chile yindu yampaka yimtendechele mundu jwalijose. Nambosoni jwangatendekasya ŵandu ŵambone kutenda yindu yampaka yalongolele kukonasika. Mmalomwakwe jwalakwe akusamkunda mundu jwalijose kusagula yakusaka kutenda, soni akusiŵalimbikasya ŵandu kusagula yakutenda yampaka yakamuchisye.

Aganichisye yisyasyo yiŵili yakuyichisyayi. Chisyasyo chandanda chili chakwamba ŵandu ŵaŵatamaga ku Ninefe. Yehofa jwasasile kuti chawujonanje msinda wa Ninefe ligongo lyakuti ŵandu ŵakwe ŵatendaga yindu yakusakala. Nambo ŵandu ŵa ku Ninefe paŵagalawiche mtima, Yehofa “ŵachenjile nganisyo syakwe pa chilango chaŵasakaga kwapacho mwamti nganiŵapasoni.” (Yon. 3:​1-10) Yehofa ŵachenjile nganisyo syakwe pa yindu yaŵasakaga kutendayi ligongo lyakuti ŵandu ŵa ku Ninefe ŵakamulichisye masengo ufulu wakusagula mwakugalawuka mtima panyuma pa kupikana utenga wakukalamusya wakutyochela kwa Yehofa.

Chisyasyo chaŵili chili yakulochesya yakwamba Kolesi juŵaliji jwakuti chiŵagopole Ayuda ŵaŵaliji ku ukapolo soni kulamula yakutaŵasoni nyumba ja Mlungu. (Yes. 44:26–45:4) Mwenye Kolesi jwa ku Pelisiya jwakwanilisye chakulochesyachi. (Esa. 1:​1-4) Nambope Kolesi nganamtumichilaga Mlungu jwakuwona. Nambotu Yehofa ŵamkamulichisye masengo Kolesi pakukwanilisya chakulochesyachi. Atamose kuti yaliji myoyo, Yehofa nganamkanganichisya jwalakwe kuti amtumichileje.—Mis. 21:1.

Yindu yeleyi yigambile kuŵa yakuŵalanjikape pa yindu yakusaganichisya Yehofa pakusala yayichitendekwa msogolo. Kusala yisyene pangali mundu jwampaka apikanichisye yindu yosope yakusatenda Yehofa. (Yes. 55:​8, 9) Nambope yindu yatukumanyilila yakwamba Yehofa yikusalimbisya chikulupi chetu chakuti ndaŵi syosope jwalakwe akusatenda yindu yambone. Yeleyi yikupwatikapo yindu yakusasala pakwamba yamsogolo.