Ana aŵalasile mwakusamala magasini ga Sanja ja Mlonda ga chaka achino? Kwende alole, naga chakombole kwanga yiwusyo yakuyichisyayi:

Ana mpaka tupindule chamtuli patukupopela, kulijiganya nambosoni kuganichisya yakwamba Yehofa?

Tuchikombola kusagula yindu mwalunda, tuchiŵa ŵakwiganya ŵambone, tuchikola chikulupi chakulimba nambosoni tuchimnonyela mnope Yehofa.—w22.01, pp. 30-31.

Ana yichitukamuchisya chamtuli naga tukusamdalila Yehofa soni ŵandu ŵakusamjimila jwalakwe?

Ajino jili ndaŵi jambone jakulupilila mwakusatendela yindu Mlungu, mwamti tukusosekwa tukakayichilaga malangiso gatukusapochela kutyochela kwa achakulungwa ŵa mumpingo. Naga tukutenda yeleyi yichiŵa yangasawusyasoni kupikanila malangiso gatuchipochela mundaŵi ja yakusawusya yekulungwa atamose yili mkuti ngatukugapikanichisya chenene.—w22.02, pp. 4-6.

Ana lilayika lyagopolelaga chichi palyamsalilaga Sakaliya yakwamba “lukonji lwa jwakutaŵa nyumba mmyala mwa Selubabele”? (Sak. 4:8-10)

Mesomkulolaga gasimichisye ŵandu ŵa Mlungu kuti nyumbaji jichimala soni jichiŵa mpela muŵasachilaga Yehofa.—w22.03, pp. 16-17.

Ana mpaka tutende wuli kuti tuŵe “chisyasyo . . . mu yakuŵecheta” yetu? (1 Tim. 4:12)

Patuli mu utumiki tuŵecheteje mwakuwusimana mtima soni mwaulemu, tujimbeje ni mtima wosope soni tupelecheje ndemanga ndaŵi syosope patuli pamisongano, nambosoni tuŵecheteje yakuwona soni yampaka yalimbikasye ŵane soni tuŵambaleje maloŵe ga chipongwe.—w22.04, pp. 6-9.

Ligongo chichi kawoneche ka yilombo (maboma) mcheche yakuyisala pa Daniele chaputala 7 kakusasimanikwa mu chilombo chimpepe chakusachikolanga pa Chiwunukuko 13:1, 2?

Chilombo cha pa Chiwunukuko 13 changajimila uchimwene umpepe, mpela uchimwene wa Loma. Mmalo mwakwe chikusajimila maboma gosope gagaŵele mkwalamulila ŵandu mpaka mundaŵi jetu jino.—w22.05, p. 9.

Ana ni matala gapi gampaka tulosye kuti ngatukusakayichilaga chilungamo cha Mlungu?

Naga mundu jwine atuleŵele, kapena atukuŵesye, tukusalinga kuŵambala kutumbila soni kuwuchisya ni kujileka nganijo mmyala mwa Yehofa. Jwalakwe chachityosya yakusakala yosope yayikusayika ligongo lya ulemwa.—w22.06, pp. 10-11.

Ana m’bale jwakupeleka lipopelo pa misongano ja mpingo akusosekwa kumbuchila chichi?

Ngatukusosekwa kamulichisya masengo lipopelo pakuwujamuka mpingo kapena kupeleka yimanyisyo. Tuŵambalejesoni ‘kuchuluya maloŵe’ mnopemnope patukupeleka lipopelo lyandanda pamisongano. (Mat. 6:7)—w22.07, pp. 24-25.

Ana maloŵe gakuti ŵandu “ŵaŵatendaga yindu yakusakala” chachijimuka kuti ‘ŵawelusye’ gakugopolela chichi”? (Yoh. 5:29)

Ngaŵa kuti jemanjaji chachiwelusidwa pakujigalila yindu yaŵatendaga mkanawe, nambo chachawelusya pakujigalila yachachitendaga panyuma pakuti ajimwiche ku ŵawe.—w22.09, p. 18.

Ana ni chindu chakusangalasya chapi chaŵasasile J. F. Rutherford pa msongano wawatendekwe mu Sepetemba 1922?

Pa msongano wawatendechele ku Cedar Point, Ohio, ku U.S.A., m’baleju jwapeleche chimanyisyo chakuti, “Mwenye atandite kulamulila! Jemanja akwete masengo gakwasalila ŵane ya mwenyeju. Myoyo, alalichile, alalichile, alalichile ya Mwenye soni Uchimwene wakwe!”—w22.10, pp. 3-5.

Ana chaputala 30 cha buku ja Yesaya chikusasala kuti Mlungu akusatukamuchisya kuti tukombole kupilila mmatala gatatu gapi?

Chaputalachi chikusalosya kuti jwalakwe (1) akusatupikanila soni kwanga mapopelo getu, (2) akusatulongolelaga, soni (3) akusatupa yindu yambone apano soni chachitenda myoyo kusogoloku.—w22.11, p. 9.

Ligongo chichi mpaka tusale kuti maloŵe ga pa Salimo 37:10, 11, 29 gakwanilichikwe munyumamu soni kusogoloku gachikwanilichikwa?

Maloŵe ga Daudiga gagambaga ya yindu yambone yayaliji yakuti yichitendekwa mu Isalaeli, mpela mundaŵi ja ulamusi wa Solomoni. Yesu jwasalaga ya paladaiso jwa kusogoloku mwamti jwakamwile maloŵe ga mu ndime 11. (Mat. 5:5; Luk. 23:43)—w22.12, pp. 8-10, 14.