Yehofa paŵalamwile ŵandu kuti ‘agumbale chilambo chapasi soni kuchilamulila’ kapena kuti kuchisamalila, jwasakaga kuti pambesi pakwe chilambo chosope chiŵe paladaiso. (Gen. 1:28) Ŵandu ŵachachitamaga pachilambopa mpaka kalakala chachisosekwa kupikanila lilamusili. Nambo ligongo lyakuti mgunda wa Edeni apano kwangali, jemanjaji ngasachisimana chilambochi chili kala paladaiso. Pajichigamba kumala ngondo ja Alamagedo, pachiŵa masengo gejinji gakuswejesya soni kulinganya malo gosope gagajonasiche. Kusala yisyene gelega gachiŵa masengo gekulungwa mnope.

Yeleyi yikutukumbusya masengo gaŵasosekwaga kukamula Ayisalayeli pandaŵi jiŵawusile ku ukapolo ku Babulo. Kwa yaka 70 malo ga jemanjaji pangali mundu juŵatamaga. Nambo Yesaya jwasasile kuti Yehofa chachakamuchisya jemanjaji kuti akombole kugalinganyasoni malogo kuti gaŵe gakusalala mpela mugaŵelele pandanda. Yakulochesyayi yatite, “Atamose kuti chilambo chakwe chiŵele chipululu,  tinjichitendekasya kuŵa mpela mgunda wa Edeni. Atamose kuti chilambo chakwe chili litinji, tinjichitendekasya kuŵa mgunda wa AMBUJE.” (Yes. 51:3) Yehofa jwakamuchisye Ayisalayeli kuti akombole kukamula masengoga. Mwakulandana ni yeleyi, Yehofa chachakamuchisyasoni ŵandu ŵachachipochela chilambo chapasi kuti akombole kuchisamalila. Sonitu apano pana yindu yejinji yampaka tutende yakulosya kuti tuli ŵakusachilila kuti chitukamule nawo masengogo.

Litala limo lyakutendela yeleyi lili kusamalila pamlango pawo mwampaka akombolele kuti pawonecheje chenene. Mpaka atende yeleyi atamose yili mkuti ŵandu ŵaŵandikene nawo majumba ŵangatendaga yeleyo. Mpaka akamuchisyesoni pakuswejesya soni kulinganya yejonasiche pa Nyumba ja Uchimwene kapena pamalo ga msongano. Naga mpaka akombole mpaka aŵende kuti akamuchisyeje nawo kumalo kwakutendekwe ngosi syachilengedwe. Pakutenda yeleyi, chachilosya kuti ali ŵakoseka kwakamuchisya abale ni alongo ŵawo. Mpaka aliwusye kuti, ‘Ana mpaka nalijiganye maluso gane gampaka ngagakamulichisye masengo m’chilambo chasambano naga chinjikola upile wakusimanikwamo?’

Yesu ali agambile kumjimusya mwanache jwamkongwe jwa Yayilo, ndaŵi jijojo ŵasasile kuti ampe kanekakwe mwanachejo kuti alye. (Maliko 5:42, 43) Komboleka kuti nganigaŵa masengo gekulungwa kumsamalila msikana jwa yaka 12 juŵajimwiche kuŵawejo. Nambo aganichisye ya masengo gekulungwa gagachipagwa pagachikwanilichikwa maloŵe ga Yesu gakuti, “Ŵandu wosope ŵali m’malembe chachipikana maloŵe gakwe ni chachijimuka.” (Yoh. 5:28, 29) Atamose kuti Baibulo jangasala yejinji panganiji, nambo ngatukukayichila kuti ŵandu ŵachachijimukawo chachisosekwa kwakamuchisya kupata yakulya, malo gakutama soni yakuwala. Ana apano mpaka alosye chamtuli kuti ali ŵakoseka kwakamuchisya jemanjaji? Tukusosekwa kuganichisya yiwusyo yakuyichisyayi.

Naga apikene kuti jwakulolela dela akwika mumpingo mwawo, ana akusamŵilanga kuti akalye najo kumangwawo? Naga mundu jwakutumichila pa Beteli utumiki wakwe uchenjile kuti akatumichileje ku mpingo, kapena utumiki wa jwakulolela dela umasile, ana akusaŵa ŵakoseka kwakamuchisya kupata malo gakutama? Naga msongano wachigawo ukutendechela  mudela jawo, ana mpaka alipeleche kuja kukamula nawo masengo galigose pamalopo soni kwapochela achalendo ŵampaka ayiche?

Mwakamulana ni Masengo 24:15, tukwembecheya kuti ŵandu ŵajinji tachijimuka kuŵawe. Ŵajinji mwajemanjaji chachiŵa ŵakuti nganakola upile wakummanyilila Yehofa. Nambope pachachijimuka kuŵawe chachikola upile wakulijiganya. a Ŵakutumichila ŵa Mlungu ŵakulupichika ni ŵachachikamulaga masengo gakwiganyaga. (Yes. 11:9) Mlongo Charlotte, jwaŵele ali mkulalichila ku Europe, ku South America, soni ku Africa, akwembecheya mwachidwi kukamula masengoga. Mwakusangalala jwalakwe jwatite, “Ngwembecheya mwachidwi kwajiganya ŵandu ŵachachijimuka kuŵawe yakwamba Yehofa. Nambosoni kwasalila mwawuchiŵela umi wawo pachachimtumichilaga jwalakwe.”

Atamose ŵakutumichila ŵa Yehofa ŵakulupichika ŵaŵapali Yesu mkanayiche pachilambo chapasi chachisosekwa kulijiganya yindu yejinji. Agambe ganichisya mwatuchisangalalila kukola upile wakumlondechesya Daniyele ya kukwanilichikwa kwa yakulochesya yaŵalembile atamose kuti pandaŵijo jwalakwe nganayipikanichisyaga. (Dan. 12:8) Nambosoni mwayichiŵela yakusangalasya patuchimkamuchisyaga Lute ni Naomi kumanyilila kuti ŵakamuchisye nawo kuti Mesiya apagwe. Kusala yisyene tuchisangalala kwajiganya ŵandu pachilambo chosope, soni pachiŵa pangali chakusokonasya mpela mwayikuŵela masiku agano m’chilambo chakusakalachi.

Ana apano mpaka atende yamtuli pakulosya kuti ali ŵakoseka kuja kukamula nawo masengo gakwiganya? Litala lyangasawusya lili kukusya maluso gawo ga kajiganye soni kukamula nawo mwakutamilichika masengo gakulalichila gagakutendekwa pachilambo chosope masiku agano. (Mat. 24:14) Atamose kuti mwayiŵelele yindu paumi wawo nganaŵa akombwele kutenda yejinji pamasengo gakulalichila, kulingalinga kutenda yampaka akombole kuchilosya kuti ali ŵakoseka kuti chiŵajiganye ŵandu ŵachachijimuka kuŵawe.

Mpaka tutende chenene kuganichisyaga yiwusyo yakuyichisyayi. Ana ali ŵakusachilila yisyesyene kupochela chilambo chapasi? Ana akwembecheya mwachidwi kukamula nawo masengo gakusamalila chilambo chapasi, kwakamuchisya soni kwajiganya ŵandu ŵachachijimuka kuŵawe? Mpaka alosye kuti ali ŵakoseka kutama pachilambo chapasi mpaka kalakala mwakukamula nawo apano masengo gachachisosekwasoni kukamula m’chilambo chasambano.