1. Ana Yesu ali asigele panandi kuwa jwaŵechete maloŵe gamtuli kwa jwachiswamba juŵaŵandikene najo? (Luka 23:39-43)

 YESU yalumo ni ŵachiswamba ŵaŵili ŵaŵaliji chiŵandika ni jwalakwejo ŵapikanaga kupweteka mnope paŵasigele panandi kuwa. (Luk. 23:32, 33) Nambope ŵachiswambawo ŵamŵechetele Yesu maloŵe gachipongwe. Yeleyitu yikusalosya kuti jemanjaji nganaŵa ŵakulijiganya ŵakwe. (Mat. 27:44; Maliko 15:32) Nambo jumo mwa jemanjajo ŵachenjile mu mtima mwakwe. Jwalakwe jwatite, “Yesu, akangumbuchile pachakajinjile mu Uchimwene wawo.” Pelepo Yesu jwamjanjile kuti, “Nditu ngumsalichisya mmwejo lelojino kuti, chimchiŵa ni une mu Paladaiso.” (Aŵalanje Luka 23:39-43.) Pangali umboni uliwose wawukusalosya kuti jwachiswambaju jwakulupilile utenga wakwamba “Uchimwene wakwinani” waŵalalichilaga Yesu. Nambosoni Yesu nganasala kuti munduju chachijinjila mu Uchimwene wakwinani. (Mat. 4:17) Pelepa Yesu jwagambaga ya Paladaiso juchachiŵa pachilambopa kusogoloku. Ligongo chichi tukuŵecheta yeleyi?

2. Ana chichi chachikulosya kuti jwachiswamba juŵapitikwiche mtima jula jwaliji Myuda?

² Komboleka jwachiswamba juŵapitikwiche mtimaju jwaliji Myuda. Jwalakweju jwamsalile jwachiswamba mjakwe juŵaliji najo yalumo kuti, “Ana mmweji ngamkogopa Mlungu pakuyiwona kuti mpochele chilango chakulandana ni munduju?” (Luk. 23:40) Ayuda ŵamlambilaga Mlungu jumpepe, nambo ŵandu ŵamitundu jine ŵalambilaga milungu jejinji. (Eks. 20:2, 3; 1 Akoli. 8:5, 6) Yikaŵe kuti ŵachiswamba ŵala ŵaliji ŵamitundu jine, nikuti chiwusyo chila akawusisye kuti, “Ana mmweji ngamkogopa milungu?” Nambosonitu, paja Yesu nganatumidwa kwa ŵandu ŵamitundu jine, jwalakwe jwatumidwe kwa “ngondolo syesokonechele sya m’nyumba ja Yisalayeli.” (Mat. 15:24) Mlungu jwamanyisye Ayisalayeli kuti jwalakwejo chachajimusya ŵandu ŵaŵawile. Komboleka kuti jwachiswamba juŵapitikweche mtima jula jwamanyililaga yeleyi. Mwamti maloŵe gakwe gala gakusalosya kuti jwamanyililaga kuti Yehofa chachimjimusya Yesu kuti chalamulile mu Uchimwene wa Mlungu. Ngatukukayichila  kuti jwachiswambaju jwakulupililaga kuti Mlungu chachimjimusya.

3. Ana komboleka kuti jwachiswamba jula jwaganichisyaga ya chichi Yesu pajwakolasile ya Paladaiso? Alondesye. (Genesesi 2:15)

³ Mpela Myuda, komboleka kuti jwachiswamba juŵapitikwiche mtima jula jwamanyililaga yakwamba Adamu soni Hawa nambosoni Paladaiso juŵapele Yehofa jemanjaji. Myoyo, komboleka kuti jwachiswambaju jwakulupililaga kuti Paladaiso juŵagambaga Yesu chachiŵa mgunda wesalale mnope pachilambo chapasi pepa.—Aŵalanje Genesesi 2:15.

4. Ana yaŵamsalile Yesu jwachiswamba jula mpaka yitulimbikasye kuganichisya ya chichi?

⁴ Yaŵamsalile Yesu jwachiswamba jula, mpaka yitulimbikasye kuganichisya mwawuchiŵela umi mu Paladaiso. Mpaka tulijiganye kane kakwe pakwamba ya Paladaiso patukuganichisya muŵasangalalilaga ŵandu mu ulamusi wa Mwenye Solomoni. Ligongo lyakuti Yesu ali jwamkulungwa kupunda Solomoni, yili yakupikanika kwembecheya kuti jwalakwe ni ŵandu ŵachachilamulilaga nawo chachichitendekasya chilambochi kuŵa chakusalala mnope. (Mat. 12:42) Mwamti ŵa “ngondolo sine,” akusasosekwa kumanyilila chenene yindu yakusosekwa kutenda kuti chaŵajilwe kutama mpaka kalakala mu Paladaiso.—Yoh. 10:16.

5. Ana wawojo akusajembecheya kuti umi uchiŵa wamtuli mu Paladaiso?

⁵ Ana munganisyo mwawo mukusayika ya chichi pakuganichisya mwawuchiŵela umi mu Paladaiso? Komboleka akusaganichisya ya malo gakusalala mnope mpela muwaŵelele mgunda wa Edeni. (Gen. 2:7-9) Komboleka akukumbuchila yakulochesya yaŵalembile Mika yakuti ŵandu ŵa Mlungu chachitama jwalijose “pasikati pa mgunda wakwe wa mipeleya ni nguju.” (Mik. 4:3, 4) Komboleka akukumbuchilasoni ya malemba gane m’Baibulo gagakusalosya kuti kuchiŵa yakulya yejinji. (Sal. 72:16; Yes. 65:21, 22) Pakuganichisya yeleyi, mpaka ayiwoneje ali atemi pa tebulo jegumbale ni yakulya yakunong’a. Mpaka ayiwonejesoni ali mkupumula kampweya kambone kakutyochela mu yakumela kwineku ali mkupikana kaliwungo kambone ka maluŵa. Kupwatika pelepa mpaka aganichisyejesoni ali mkusangalala soni kuseka ni achimjawo soni ŵachinasi ŵawo pampepe ni ŵandu ŵachachijimuka kuŵawe. Yindu yosopeyitu nganikuŵa kwamba kusagamila. Ngatukukayichila kuti yindu yambone yosopeyi yichitendekwa pachilambopa. Nambope, mu Paladaiso tuchikamulagasoni masengo gakusangalasya.

6. Ana mu Paladaiso tuchikamulaga masengo gamtuli? (Alole chiwulili.)

⁶ Yehofa jwatupanganyisye kuti tusangalaleje ni masengo getu. (Jwak. 2:24) Mu Ulamusi wa Yaka 1000 wa Klistu tuchikola masengo gejinji. Ŵandu ŵachachikulupuka pa yakusawusya yekulungwa, nambosoni ŵane ŵajinji ŵachachijimuka kuŵawe chachisosekwa yakuwala, yakulya, nambosoni malo gakutama. Kuti chitukombole kwapatila yindu yeleyi, tuchisosekwa kukamula masengo gejinji gakusangalasya. Mpela muyaŵelele ni Adamu ni Hawa ŵaŵasalilidwe kuti asamalileje mgunda wa Edeni, m’wejisoni  tuchikola upile wakuchisamalila chilambochi kuti chiŵe Paladaiso. Aganichisye mwayichiŵela yakusangalasya kwajiganya ŵandu ŵajinji ŵachachijimuka ku ŵawe. Ŵane mwajemanjaji chachiŵa ŵakuti akumanyilila yamnono pakwamba ya Yehofa soni chakulinga chakwe. Nambosoni aganichisye mwayichiŵela yakusangalasya kwajiganya yindu yejinji ŵandu ŵakulupichika ŵaŵawile Yesu mkanayiche pachilambopa.

7. Ana ngatukusosekwa kukayichila ya chichi? Ligongo chichi ngatukusosekwa kukayichila?

⁷ Ngatukukayichila kuti mu Paladaiso tuchitamaga mwamtendele, tuchikola chilichose chakusosekwa, nambosoni tuchiŵa ŵadongosolo. Tukuŵecheta yeleyi ligongo lyakuti Yehofa atupele kala chisyasyo cha mwawuchiŵelaga umi pasi pa ulamusi wa mwanache jwakwe. Ngani jakwamba Uchimwene wa Solomoni ni jajikusatukamuchisya kumanyilila yeleyi.

8. Ana maloŵe ga pa Salimo 37:10, 11, 29 gakwanilichikwe chamtuli panyuma pakuti Mwenye Daudi agalembile? (Alole ngani jakuti “Yiwusyo Yakutyochela kwa Ŵakuŵalanga” jajili mu magasiniji.)

⁸ Mwenye Daudi jwasalilidwe kulemba yakwamba mwawuchiŵela umi pandaŵi jele mwenye jwalunda chachilamulilaga kusogoloku. (Aŵalanje Salimo 37:10, 11, 29.) Ndaŵi syejinji tukusitwaŵalanjilaga ŵane lilemba lya Salimo 37:11 patukwasalila yakwamba Paladaiso juchachiyika kusogoloku. Yaŵatesile Yesu pakamula maloŵe ga palilembali pa kulalichila kwa petumbi, yikusalosya kuti maloŵega gachikwanilichikwasoni kusogoloku. (Mat. 5:5) Nambo maloŵe ga Daudiga gakusatukamuchisyasoni kumanyilila muwaŵelele umi pandaŵi ja ulamusi wa Mwenye Solomoni. Mwenyeju pajwalamulilaga ku Yisalayeli, ŵandu ŵa Mlungu ŵasangalalaga mnope ni mtendele soni ŵakolaga chilichose chaŵasosekwaga mchilambo “chakwenda mkaka ni uchi.” Mlungu jwasalile jemanjaji kuti, “Naga mkugakuyichisya malamusi gangu . . . , Tinjipeleka mtendele mchilambo mwenu, nipo timkagoneje mwa jii, pangali mundu jwine jwakumjogoya.” (Lef. 20:24, NWT; 26:3, 6) Maloŵega gakwanilichikwe mundaŵi ja ulamusi wa Solomoni. (1 Mbi. 22:9; 29:26-28) Yehofa jwasasilesoni kuti ŵandu ŵakusakala “ngasawoneka.” (Sal. 37:10) Myoyo, pakuŵa maloŵe ga pa Salimo 37:10, 11, 29 gakwanilichikwe munyumamu, nikuti gachikwanilichikwasoni kusogoloku.

9. Ana mwenye jwa ku Sheba jwasasile yamtuli pakwamba ya ulamusi wa Mwenye Solomoni?

⁹ Mwenye jwa ku Sheba jwapikene yakwamba bata ni mtendele wawapali mchilambo cha Yisalayeli  mundaŵi ja ulamusi wa Solomoni. Mwamti mwenyeju jwajesile ulendo wekulungwa kwawula ku Yelusalemu kuti akalole ni meso gakwe yakutendekwayi. (1 Ayi. 10:1) Panyuma pakulola yindu yayatendekwaga mu uchimwene wa Solomoni, jwalakwe jwatite, “Nganasalila atamose hafu ja yindu yosope. . . . Ŵana upile [ŵandu ŵenu]. Ŵana upile ŵakutumichila ŵenu, ŵakuŵa pameso penu ndaŵi syosope, ni kukola upile ŵakupikanila yakuŵecheta yenu ya lunda.” (1 Ayi. 10:6-8) Yayatendekwe mu ulamusi wa Solomoni chaliji chisyasyo chamnono chabe cha yindu yachachatendela Yehofa ŵandu wosope pasi pa ulamusi wa Mwanache jwakwe, Yesu.

10. Ana Yesu ali jwakulekangana chamtuli ni Solomoni?

¹⁰ Yesu ali jwakulekangana mnope ni Solomoni. Tukuŵecheta yeleyi ligongo lyakuti Solomoni jwaliji jwangali umlama soni jwalemwesyaga yindu yekulungwakulungwa yayatendekasisye kuti ŵandu ŵa Mlungu asimane ni yakusawusya. Nambo Yesu ali jwamlama, jwele chitandilile nganatendeje chakulemwa chilichose. (Luk. 1:32; Aheb. 4:14, 15) Yesu jwaŵele jwakulupichika kwa Mlungu pandaŵi jele Satana ŵamlingaga jwalakwe. Yesu jwalosisye kuti nganaŵa atesile chakulemwa kapena kutenda chilichose champaka chapweteche ŵandu ŵakwe ŵakulupichika. Kusala yisyene uli upile wekulungwa mnope kola Mwenye mpela jweleju.

11. Ana ŵani ŵachachilamulilaga yimpepe ni Yesu?

¹¹ Yesu chachilamulilaga yimpepe ni ŵa 144,000 pakwasamalila ŵandu wosope soni pakukwanilisya chakulinga cha Yehofa pachilambopa. (Chiw. 14:1-3) Jemanjaji ŵasimene ni yakusawusya yejinji paŵaliji ni umi pachilambopa, myoyo chachapikanichisyaga ŵandu. Ana ŵa 144,000 ŵeleŵa chachikamulaga masengo gamtuli?

12. Ana Yehofa apeleche masengo gamtuli kwa ŵa 144,000?

¹² Masengo gachachikamulaga Yesu yimpepe ni ŵa 144,000 gachiŵa gekulungwa kupunda gaŵakamwile Solomoni. Mwenye Solomoni jwalolelaga ŵandu mamiliyoni ŵaŵatamaga m’chilambo chimpepe. Nambo ŵandu ŵachachilamulilaga mu Uchimwene wa Mlungu chachalolelaga ŵandu mabiliyoni gejinji ŵachachitamaga pachilambo chosope. Kusala yisyene, Yehofa ŵapele upile wekulungwa ŵa 144,000.

13. Ana ŵa 144,000 chachikolasoni udindo wapadela wapi?

¹³ Mwakulandana ni Yesu, nombe ŵa 144,000 chachitumichilaga mpela mamwenye soni ŵakutaga mbopesi. (Chiw. 5:10) Mu Chilamusi cha Mose, udindo wekulungwa wa ŵakutaga mbopesi waliji kwasamalila ŵandu mwakuchilu, kwineku ali mkulolechesya kuti ŵanduwo ali paunasi wambone ni Yehofa. Chilamusichi chagambile kuŵa “chiwulili basi cha yindu yambone yayikwika msogolo.” Myoyo yili yakupikanika kusala kuti ŵa 144,000 chachakamuchisya mwapadela mnope ŵandu ŵa Mlungu pakwasamalila mwakuchilu soni kwakamuchisya kuti aŵe paunasi wambone ni Yehofa. (Aheb. 10:1) Apano ngatukumanyilila mwachachitendelaga yindu mamwenyega soni ŵakutaga mbopesiŵa pakulumbikana ni ŵandu ŵachachiŵa pasi pa Uchimwene wa Mlungu pachilambopa. Chinga Yehofa chachilinganya yamtuli panganiji, nambo tukwete chikulupi chakuti mu Paladaiso jwakwikajo ŵandu ŵachachitamaga pachilambo chapasi chachipochelaga malangiso pandaŵi jakwe.—Chiw. 21:3, 4.

14. Ana pana kukamulana kwamtuli pasikati pa ŵa “ngondolo sine” ni “kagulu ka ngondolo”?

¹⁴ Pakusala ya ŵandu ŵachachilamulilaga najo, Yesu ŵakolasile kuti “kagulu ka ngondolo.” (Luk. 12:32) Jwalakwe jwasasilesoni ya gulu jine jiŵajikolasile kuti “ngondolo sine.” Magulu gaŵiliga gakusapanganya gulu jimpepe jajili jakamulana. (Yoh. 10:16) Maguluga gatandite kala kukamulila yimpepe masengo, mwamti yeleyi yichipitilila chilambochi pachichiŵa Paladaiso. Pandaŵi jelejo, ŵandu ŵali mu “kagulu ka ngondolo” chachiŵa ali  kwinani. Nambo ŵa “ngondolo sine” chachikola upile wakusangalala ni umi pachilambopa mpaka kalakala. Nambope pana yindu yine yakusosekwa kutenda apano ŵa “ngondolo sine” kuti chaŵajilwe kutama mu Paladaiso.

15. (a) Ana ŵa “ngondolo sine” akusiŵakamuchisya chamtuli Aklistu ŵasagulwe? (b) Ana mpaka amsyasye chamtuli m’bale jwali mu sitoloju? (Alole chiwulili.)

¹⁵ Mundu juŵaliji chigaŵenga juŵapitikwiche mtima jula jwawile mkanaŵe kulosya kuyamichila yindu yambone yaŵamtendele Yesu. Mwakulekangana ni yeleyi, m’weji ŵa “ngondolo sine” tukwete upile wejinji wakulosya kuyamichila yaŵatutendele Yesu. Mwachisyasyo, tukusalosya kuyamichila kweleku mwakwakamuchisya ŵasagulwe. Yesu jwasasile kuti tachisilamula ngondolo pakujigalila mwasyatendelaga yindu ni achalongo achimjakweŵa. (Mat. 25:31-40) Mpaka twakamuchisye achalongo achimjakweŵa mwakulipeleka mnope pamasengo gakulalichila soni gakwajiganya ŵandu. (Mat. 28:18-20) Kuti tukombole kutenda yeleyi, tukusosekwa kukamulichisya masengo yindu yakamuchisya pakwiganya yakusatupa kapolo jwakulupichika ni jwalunda, mpela buku jakuti Asangalaleje Mpaka Kalakala. Naga nganaŵepe kutanda kulijiganya Baibulo ni mundu jwine, mpaka atende yakomboleka kuti atande kulijiganya Baibulo ni ŵandu ŵajinji mwampaka akombolele.

16. Ana apano tukusosekwa kutenda chichi kuti tukosechele kutama mu Paladaiso?

¹⁶ Ngatukusosekwa kwembecheya kuti mpaka tukajinjile mu Paladaiso mkanitukole ndamo syakusasaka Yehofa. Pandaŵi ajino, mpaka tulinjelinjeje kuŵa ŵakuwona mtima mu yakuŵecheta soni yitendo yetu, nambosoni mwakuŵa ŵandu ŵambone. Mpaka tulinjelinjejesoni kuŵa ŵakulupichika kwa Yehofa, kwa ŵamkwetu, nambosoni kwa Aklistu achimjetu. Patukulingalinga kumpikanila Yehofa m’chilambo chakusakalachi, yichiŵa yangasawusya kumpikanila jwalakwejo mu Paladaiso. Mpaka tulosyesoni kuti tukukosechela kutama mu Paladaiso mwakulijiganya maluso gane soni kola ndamo syambone. Alole ngani jajili m’magasiniji ja mtwe wakuti “Ana Ali Ŵakoseka ‘Kupochela Chilambo Chapasi’?”

17. Ana tutengucheje ligongo lya yakulemwa yatwatesile kala? Alondesye.

¹⁷ Tukusosekwasoni kuleka kulijimba magambo ligongo lya yakulemwa yatwatesile kalakala. Nambo yeleyi ngayikugopolela kuti tutendeje “yakulemwa mwamele” ligongo lya mbopesi jiŵapeleche  Yesu. (Aheb. 10:26-31) Nambo patutesile chakulemwa chekulungwa ni kupitikuka mtima yisyesyene soni kuchenga ndamo syetu, nambosoni kumŵenda Yehofa ni achakulungwa ŵa mumpingo kuti atukamuchisye, tukakayichilaga yakuti jwalakwe atukululuchile. (Yes. 55:7; Mase. 3:19) Akumbuchile maloŵe ga Yesu gaŵasalile Afalisi. Jwalakwe jwatite, “Nganimbika kukwaŵilanga ŵandu ŵakulungama, nambo ŵakulemwa.” (Mat. 9:13) Mbopesi jakutuwombola ja Yesu jili jamachili mnope mwamti mpaka jitukamuchisye kululuchidwa yakulemwa yetu yosope.

18. Ana mpaka asache kukambilana yindu yamtuli ni jwachiswamba juŵawile chiŵandika Yesu?

¹⁸ Aganichisye ali mu Paladaiso ni kuŵechetanaga ni jwachiswamba juŵaŵechetene ni Yesu jula. Yili yangakayikasya kuti mpaka akambilane najo yakulosya kuyamichila mbopesi ja Yesu Klistu. Kombolekasoni kuti mpaka amwusye yayatendekwe Yesu ali asigele panandi kuwa, nambosoni mwajwapikanile mumtima Yesu paŵamjanjile yindu yajwaŵendile. Kombolekasoni kuti jwalakwejo mpaka ŵawusye wawojo kuti amsalile mwayajendelaga yindu m’masiku gakumalisya ga chilambo cha Satanachi. Kusala yisyene, uchiŵa upile wekulungwa kulijiganya Maloŵe ga Mlungu ni ŵandu mpela jwalakweju.—Aef. 4:22-24.

19. Ligongo chichi umi mu Paladaiso uchiŵa wakusangalasya? (Alole chiwulili chapachikuto.)

¹⁹ Mu Paladaiso umi uchiŵa wakusangalasya. Tuchisimanaga ni ŵandu ŵambone soni tuchikamulaga masengo gakusangalasya. Soni chindu chakusangalasya mnope, chichiŵa chakuti lisiku lililyose tuchikolaga upile wakummanyilila chenene Yehofa nambosoni kusangalala ni yindu yachachitupaga. Ndaŵi syosope pachiŵaga yindu yejinji yakuti tulijiganye yakwamba jwalakwe, nambosoni pachiŵa yindu yejinji yakuti tulijiganye pakwamba yindu yachilengedwe. Yaka yejinji payichimalaga, ni patuchimnonyelagasoni mnope Mlungu. Kusala yisyene tukumyamichila mnope Yehofa soni Yesu ligongo lyakutusalila kuti yili yakomboleka kwa m’weji kutama ni umi mu Paladaiso mpaka kalakala.